“Doktrinal nga Kahanas: Ether 12:27—Pagbuntog sa Atong mga Kahuyang,” Manwal sa Magtutudlo sa Basahon ni Mormon (2024)

“Doktrinal nga Kahanas: Ether 12:27,” Manwal sa Magtutudlo sa Basahon ni Mormon

Doktrinal nga Kahanas: Ether 12:27

Pagbuntog sa Atong mga Kahuyang

batan-ong babaye nga gipakita ang iyang mga muscle

Sa imong pagtuon sa Ether 12:23–27, imong nakat-onan nga kon kita magpaubos ug magpakita og hugot nga pagtuo sa Ginoo, Iyang mahimo ang atong mga kahuyang ngadto sa mga kalig-on. Kini nga leksiyon makatabang nimo sa pagsag-ulo sa pakisayran sa doktrinal nga kahanas ug sa mahinungdanon nga hugpong sa pulong sa kasulatan alang sa Ether 12:27, mapasabot ang doktrina, ug magamit ang mga baroganan sa pag-angkon og espirituhanong kahibalo sa tinud-anay nga mga sitwasyon sa kinabuhi.

Hatagi ang mga estudyante og panahon sa paggamit sa mga baroganan sa pag-angkon og espirituhanong kahibalo.Hatagi ang mga estudyante og klaro nga mga instruksiyon, ug dayon hatagi sila og panahon sa paggamit sa mga baroganan sa pag-angkon og espirituhanong kahibalo. Tugoti sila sa pagdiskobre sa mga tubag alang sa ilang mga kaugalingon. Dasiga ang mga estudyante nga magmatinud-anong modangop ug mosalig sa Ginoo.

Pagpangandam sa estudyante: Dapita ang mga estudyante sa pagsulay sa pagsag-ulo sa Ether 12:27.

Mga Posibleng Kalihokan sa Pagkat-on

Kini nga leksiyon sa tudling sa doktrinal nga kahanas gidesinyo nga itudlo human sa leksiyon sa “Ether 12:23–27,” nga mao ang pangkonteksto nga leksiyon alang sa tudling sa doktrinal nga kahanas sa Ether 12:27. Kon kini nga leksiyon sa tudling sa doktrinal nga kahanas kinahanglang ibalhin ngadto sa laing semana, seguroha usab nga itudlo ang katugbang nga pangkonteksto nga leksiyon nianang semanaha.

Ipasabot ug isag-ulo

Hatagi ang mga estudyante og yano nga kalihokan aron matabangan sila sa pagpasabot sa doktrina nga gitudlo sa Ether 12:27. Ang mosunod mao ang usa ka posibleng kalihokan.

Kon dili motan-aw sa Ether 12:27, tan-awa kon imong mapuno ang kulang nga mga blangko niini nga kapahayag base sa mga pagtulun-an sa Ginoo ngadto ni Moroni:

Kon ako , , ug , nan si Jesukristo mohimo sa mahuyang nga mga butang nga mahimong malig-on ngari kanako.

Unsa sa imong hunahuna ang importante nga hinumdoman sa usa ka tawo mahitungod niini nga kapahayag?

Tabangi ang mga estudyante nga magpraktis sa pagsag-ulo sa pakisayran ug mahinungdanon nga hugpong sa mga pulong sa kasulatan. Mahimong buhaton sa mga estudyante ang mosunod nga magpares o sa gagmay nga mga grupo. Ikonsiderar ang pagtakda og limitasyon sa oras aron masiguro nga ang mga estudyante adunay igong oras sa pagpraktis sa paggamit sa mga baroganan sa pag-angkon og espirituhanong kahibalo diha sa seksiyon sa “Pagpraktis sa paggamit” sa leksiyon.

Aron matabangan ka nga masag-ulo ang parehong pakisayran ug sa mahinungdanon nga hugpong sa mga pulong sa kasulatan, irebyo kining duha sa pipila ka mga higayon ug dayon sulayi kini pagsulat gikan sa memorya diha sa imong journal sa pagtuon.

Ether 12:27: “Kon ang mga tawo moduol ngari kanako … niana Ako mohimo sa mahuyang nga mga butang nga mahimo nga malig-on ngadto kanila.”

Itandi ang imong gisulat gikan sa memorya uban sa pakisayran ug mahinungdanon nga hugpong sa mga kasulatan sa ibabaw, ug paghimo og bisan unsa nga gikinahanglan nga mga koreksiyon. Sulayi pagsulat ang pakisayran ug ang mahinungdanon nga hugpong sa mga pulong sa kasulatan katulo o upat pa ka higayon o hangtod nga masulat nimo kini gikan sa memorya.

Pagpraktis sa paggamit

Hatagi ang mga estudyante og kahigayonan sa pagrebyo sa mga baroganan sa pag-angkon og espirituhanong kahibalo. Ikonsiderar ang pagdapit og tulo ka mga estudyante sa pagsulat sa matag usa sa mga baroganan sa pag-angkon og espirituhanong kahibalo diha sa pisara. Dapita ang dugang nga mga estudyante sa pagsulat og mga pagpasabot sunod sa matag baroganan gikan sa memorya. Hatagi ang mga estudyante og pipila ka minuto sa pagrebyo niini nga mga baroganan sa mga parapo 5–12 sa Mahinungdanon nga Dokumento sa Doktrinal nga Kahanas (2023) ug sa pagdugang sa bisan unsang mga detalye nga ilang nataligam-an.

Ang mosunod nga kalihokan gituyo aron sa pagtabang sa mga estudyante nga makapraktis sa paggamit sa mga baroganan sa pag-angkon og espirituhanong kahibalo ngadto sa may kalabotan nga kahuyang. Mahimong kompletohon sa mga estudyante ang kalihokan sa unang higayon diha sa gagmay nga mga grupo, nga magpares, o isip usa ka klase. Mahimo dayon nga balikon sa mga estudyante ang kalihokan sa tinagsa alang sa lahi o mas personal nga kahuyang.

Kon gusto nimo nga mogamit og senaryo, tan-awa ang mga sugyot sa “Dugang nga Kalihokan sa Pagkat-on” nga seksiyon sa leksiyon.

Diha sa imong journal sa pagtuon, ilista ang pipila ka mga kahuyang nga mahimong hinungdan sa usa ka batan-on nga mobati nga walay katakos o kakulang.
Pagpili og usa niini nga mga kahuyang nga imong gibati nga angay alang sa daghang kabatan-onan, ug irekord kon sa unsang paagi ang usa ka batan-on makagamit sa mga baroganan sa pag-angkon og espirituhanong kahibalo sa pagbuntog niini nga kahuyang.
Usa ka paagi sa pagbuhat niini mahimong ang paglista sa matag usa sa mga baroganan sa pag-angkon og espirituhanong kahibalo diha sa imong journal sa pagtuon ubos sa kahuyang nga imong gipili nga tutokan. Dayon mahimo nimong ilista sa ubos ang matag baroganan kon unsaon kini paggamit sa kahuyang, o mahimo nimong irekord ang mga pangutana nga mahimong ipangutana sa usa ka tawo mahitungod sa baroganan.

Mahimo nimong ipakita ang mosunod nga ehemplo alang sa mga estudyante. Makatabang kini kanila samtang nagbuhat sila sa ilang kaugalingong praktis.

Sama pananglit, kon mopili ka og kahuyang o kabalaka sama sa “Ang kabatan-onan mogahin og daghang oras sa ilang mga telepono,” ang imong isulat sa journal mahimong sama sa mosunod:

Ang kabatan-onan naggahin og daghang oras sa ilang mga telepono

Lihokon inubanan sa Hugot nga Pagtuo

Tingali kadtong nakigbisog niini mahimong mag-ampo nga mas piho alang sa tabang niini nga problema. Sa dili pa mag-ampo, makapamalandong sila kon unsa nga tabang ang ilang gikinahanglan alang nianang adlawa. Mahimo pa gani silang mag-ampo sa dili pa nila gamiton ang ilang telepono.
Ang Dios mihatag kanato og teknolohiya aron sa pagpanalangin sa atong mga kinabuhi ug sa pagtabang kanato ug sa uban nga mas maduol ngadto Kaniya; unsaon nato kini paggamit niining paagiha?
Ether 12:27: Unsaon nato pagpakita sa Ginoo nga kita mapainubsanon, misalig Kaniya, ug nagkinahanglan sa Iyang tabang sa pagpalambo niini?

Mahangtorong Panglantaw

Kon ang usa ka tawo dili makabuntog niini, sa unsang paagi kini makaapekto sa ilang umaabot nga mga relasyon, trabaho, kahangtoran, ug uban pa?
Unsay akong nahibaloan bahin sa Dios ug sa Iyang mga sukdanan? Nganong mahinungdanon man Kaniya ang atong paggamit sa teknolohiya?

Balaanong Gipili nga mga Tinubdan

Nasayod ko nga ang akong bishop namulong mahitungod niini, ug nakahinumdom ko nga naghisgot siya mahitungod sa mga butang nga iyang nabuhat. Ako siyang pangutan-on kon unsa nga mga kapanguhaan ang iyang gigamit ug kon unsa ang nakatabang kaniya.

Kon mahuman na ka, kompletoha pag-usab ang miaging kalihokan. Niining higayona ipunting ang usa ka piho nga kahuyang nga gusto nimo nga tabangan. Dili ka hangyoon nga ipakigbahin kini sa uban.

Ikonsiderar ang paghatag og panahon sa mga estudyante sa pagpamalandong sa ilang mga kasinatian ug sa pagpakigbahin unsay ilang nakat-onan gikan sa kalihokan karon. Pagpamatuod sa gahom ug tinguha sa Manluluwas sa pagtabang kanato nga molambo ug mahimong mas mahisama Kaniya.

Rebyo sa doktrinal nga kahanas

Gamita ang mosunod nga kalihokan sa pagrebyo sa usa ka leksiyon nga imong itudlo sa dili madugay human niini.

Pangutan-a ang mga estudyante kon makahinumdom ba sila sa mahinungdanon nga hugpong sa mga pulong sa kasulatan alang sa Ether 12:27. Isip usa ka klase, sublia ang pakisayran sa kasulatan ug mahinungdanon nga hugpong sa mga pulong sa kasulatan, “Ether 12:27: Kon ang mga tawo moduol ngari kanako … niana Ako mohimo sa mahuyang nga mga butang nga mahimo nga malig-on ngadto kanila,” sa pipila ka mga higayon.