“Fakataukei Fakatokāteliné: ʻEta 12:27—Ko Hono Ikunaʻi Hotau Ngaahi Vaivaí,” Tohi ʻa Molomoná – Tohi Lēsoni ʻa e Faiakó (2024)

“Fakataukei Fakatokāteliné: ʻEta 12:27,” Tohi ʻa Molomoná – Tohi Lēsoni ʻa e Faiakó

Fakataukei Fakatokāteliné: ʻEta 12:27

Ko Hono Ikunaʻi Hotau Ngaahi Vaivaí

ʻI hoʻo ako ʻa e ʻEta 12:23–27, naʻá ke ako ai kapau ʻoku tau loto-fakatōkilalo mo tui ki he ʻEikí, te Ne lava ʻo liliu hotau ngaahi vaivaí ko ha ngaahi mālohinga. ʻE lava ke tokoni ʻa e lēsoni ko ʻení ke ke ako maʻuloto ʻa e fakamoʻoni fakafolofola fakataukei fakatokāteliné mo e kupuʻi lea folofola mahuʻinga ki he ʻEta 12:27, fakamatalaʻi ʻa e tokāteliné, pea fakaʻaongaʻi ʻa e ngaahi tefitoʻi moʻoni ki hono maʻu ʻo e ʻilo fakalaumālié ʻi ha tūkunga moʻoni ʻo e moʻuí.

ʻOange ha taimi ki he kau akó ke fakaʻaongaʻi ʻa e ngaahi tefitoʻi moʻoni ki hono maʻu ʻo e ʻilo fakalaumālié. ʻOange ki he kau akó ha fakahinohino mahino, pea ʻoange ha taimi ke nau fakaʻaongaʻi ai ʻa e ngaahi tefitoʻi moʻoni ki hono maʻu ʻo e ʻilo fakalaumālié. Tuku ange ke nau fekumi ki ha ngaahi tali ʻiate kinautolu pē. Poupouʻi ʻa e kau akó ke nau tafoki mo falala ʻi he faivelenga ki he ʻEikí.

Teuteu ʻa e tokotaha akó: Fakaafeʻi ʻa e kau akó ke nau feinga ke ako maʻuloto ʻa e ʻEta 12:27.

Ngaahi ʻEkitivitī Ako ʻOku Ala Fakahokó

ʻOku fokotuʻutuʻu ʻa e lēsoni fakataukei fakatokāteline ko ʻení ke akoʻi ʻi he hili ʻa e lēsoni “ʻEta 12:23–27,” ʻa ia ko e lēsoni puipuituʻa ki he potufolofola fakataukei fakatokāteline ʻEta 12:27. Kapau ʻoku fiemaʻu ke ʻunuakiʻi e lēsoni ʻo e potufolofola fakataukei fakatokāteline ko ʻení ki ha uike kehe, fakapapauʻi ke akoʻi foki mo e lēsoni puipuituʻa fekauʻaki mo iá ʻi he lolotonga e uike ko iá.

Fakamatalaʻi mo e ako maʻuloto

ʻOange ki he kau akó ha ʻekitivitī faingofua ke tokoniʻi kinautolu ke nau fakamatalaʻi ʻa e tokāteline naʻe akoʻi ʻi he ʻEta 12:27. Ko ha ʻekitivitī ʻeni ʻe taha ʻe lava ke fakaʻaongaʻi.

ʻOua ʻe toe sio ki he ʻEta 12:27, kae vakai pe te ke lava ʻo fakafonu ʻa e ngaahi konga ʻoku pulia ʻi he sētesi ko ʻení ʻo fakatefito ʻi he ngaahi akonaki ʻa e ʻEikí kia Molonaí:

Kapau te u , , mo , ʻe liliu ʻe Sīsū Kalaisi ʻa e ngaahi meʻa vaivaí ko ha mālohinga kiate au.

ʻOkú ke pehē ko e hā ʻa e meʻa ʻe mahuʻinga ke manatuʻi ʻe ha taha fekauʻaki mo e sētesi ko ʻení?

Tokoni ke ako maʻuloto ʻe he kau akó ʻa e fakamoʻoni fakafolofolá mo e kupuʻi lea mahuʻinga ʻi he folofolá. ʻE lava ke fakahoko ʻeni ʻe he kau akó mo haʻanau hoa pe fakakulupu iiki. Fakakaukau ke fokotuʻu ha taimi fakangatangata ke fakapapauʻi ʻoku maʻu ʻe he kau akó ha taimi feʻunga ke fakaangaanga hono fakaʻaongaʻi ʻa e ngaahi tefitoʻi moʻoni ki hono maʻu ʻo e ʻilo fakalaumālié ʻi he konga “Akoako hono fakaʻaongaʻi” ʻo e lēsoní.

Ke tokoni ke ke ako maʻuloto fakatouʻosi ʻa e fakamoʻoni fakafolofolá mo e kupuʻi lea mahuʻinga ʻi he folofolá, toe vakaiʻi tuʻo lahi kinaua pea feinga ke hiki maʻuloto kinaua ʻi hoʻo tohinoa akó.

ʻEta 12:27: “Kapau ʻe haʻu kiate au ʻa e tangatá … te u liliu ʻa e ngaahi meʻa vaivaí ko e mālohi kiate kinautolu.”

Fakafehoanaki ʻa e meʻa naʻá ke hiki mei hoʻo manatú mo e fakamoʻoni fakafolofola mo e kupuʻi lea mahuʻinga ʻi ʻolungá, pea fai ha ngaahi fakatonutonu ʻoku fiemaʻu. ʻAhiʻahi hiki tuʻo tolu pe fā ʻa e fakamoʻoni fakafolofolá mo e kupuʻi lea mahuʻinga ʻi he folofolá pe toutou fakahoko ia kae ʻoua kuó ke lava ʻo tohi maʻuloto kinaua.

Akoako hono fakaʻaongaʻí

ʻOange ha faingamālie ki he kau akó ke toe vakaiʻi ʻa e ngaahi tefitoʻi moʻoni ki hono maʻu ʻo e ʻilo fakalaumālié. Fakakaukau ke fakaafeʻi ha kau ako ʻe toko tolu ke nau takitaha hiki ha taha ʻo e ngaahi tefitoʻi moʻoni ki hono maʻu ʻo e ʻilo fakalaumālié ʻi he palakipoé. Fakaafeʻi ha kau ako kehe ke nau hiki ha ngaahi fakamatala ʻi he tafaʻaki ʻo e tefitoʻi moʻoni takitaha mei heʻenau manatú. Tuku ange ha ngaahi miniti siʻi ki he kau akó ke toe vakaiʻi ʻa e ngaahi tefitoʻi moʻoni ko ʻení ʻi he palakalafi 5–12 ʻo e Fakamatala ki he ʻElito ʻo e Fakataukei Fakatokāteliné (2023) pea ke tānaki atu ha ngaahi fakaikiiki naʻe ʻikai ke nau maʻu.

ʻOku fakataumuʻa ʻa e ʻekitivitī ko ʻení ke tokoni ki he kau akó ke fakaangaanga hono fakaʻaongaʻi ʻo e ngaahi tefitoʻi moʻoni ʻo hono maʻu ʻo e ʻilo fakalaumālié ki ha vaivaiʻanga ʻoku felāveʻi mo ia. ʻE lava ke ʻuluaki fakakakato ʻe he kau akó ʻa e ʻekitivitií ʻi ha ngaahi kulupu iiki, tauhoa, pe fakakalasi. ʻE lava leva ke toe fakahoko fakafoʻituitui ʻe he kau akó ʻa e ʻekitivitií ki ha vaivaiʻanga fakafoʻituitui kehe pe lahi ange.

Kapau ʻokú ke fie fakaʻaongaʻi ha tūkunga, vakai ki he ngaahi fokotuʻu ʻi he konga ʻo e lēsoní ki he “ʻEkitivitī Fakalahi ki he Akó.”

Lisi ʻi hoʻo tohinoa akó ha ngaahi vaivai te ne ala fakatupu ha ongoʻi taʻemalava pe taʻefeʻunga ʻa ha toʻu tupu.
Fili ha taha ʻo e ngaahi vaivaiʻanga ko ʻeni ʻokú ke ongoʻi ʻoku angamaheni ki ha toʻu tupu tokolahi, pea lekooti ʻa e founga ʻe lava ke fakaʻaongaʻi ai ʻe ha toʻu tupu ʻa e ngaahi tefitoʻi moʻoni ʻo hono maʻu ʻo e ʻilo fakalaumālié ke ikunaʻi ʻaki ʻa e vaivai ko ʻení.
Ko e founga ʻe taha ke fai ai ʻení ko hano lisi ʻa e ngaahi tefitoʻi moʻoni takitaha ʻo hono maʻu ʻo e ʻilo fakalaumālié ʻi hoʻo tohinoa akó ʻi lalo ʻi he vaivaiʻanga naʻá ke fili ke ke fakatefito aí. Te ke lava leva ʻo lisi ʻi lalo ʻi he tefitoʻi moʻoni takitaha ʻa e founga ʻe lava ke fakaʻaongaʻi ai ia ki he vaivaiʻangá, pe ko hoʻo lekooti ha ngaahi fehuʻi ʻe ala fai ʻe ha taha fekauʻaki mo e tefitoʻi moʻoní.

Te ke lava ʻo fakaʻaliʻali ʻa e sīpinga ko ʻení ki he kau akó. ʻE lava ke tokoni ʻeni kiate kinautolu ʻi heʻenau akoakó.

Hangē ko ʻení, kapau te ke fili ha vaivaiʻanga pe hohaʻa hangē ko e “ʻOku fakamoleki ʻe he toʻu tupú ha taimi lahi fau ʻi heʻenau telefoní,” ʻe lava ke hā peheni ʻa e meʻa te ke tohi ʻi hoʻo tohinoá:

ʻOku fakamoleki ʻe he toʻu tupú ha taimi lahi fau ʻi heʻenau telefoní

Ngāue ʻi he Tuí

Mahalo ʻe lava ʻa kinautolu ʻoku fefaʻuhi mo e meʻa ko ʻení ʻo lotua ha tokoni kae tautautefito ki he palopalemá ni. Kimuʻa pea nau lotú, te nau lava ʻo fakalaulauloto ki he tokoni te nau ala fiemaʻu ki he ʻaho ko iá. Mahalo te nau lava ʻo lotu kimuʻa pea nau toki fakaʻaongaʻi ʻenau telefoní.
Kuo foaki mai ʻe he ʻOtuá ʻa e tekinolosiá ke tāpuekina ʻetau moʻuí mo tokoniʻi kitautolu mo e niʻihi kehé ke tau ofi ange kiate Ia; te tau lava fēfē ke fakaʻaongaʻi ia ʻi he founga ko ʻeni?
ʻEta 12:27: Te tau lava fēfē ʻo fakahaaʻi ki he ʻEikí ʻoku tau loto-fakatōkilalo, falala kiate Ia, pea mo fiemaʻu ʻEne tokoní ke fakalakalaka ʻi he meʻá ni?

Fakakaukau ʻoku Taʻengatá

Kapau he ʻikai ikunaʻi ʻeni ʻe ha taha, te ne uesia fēfē honau ngaahi vā fetuʻutaki ʻi he kahaʻú, ngāué, ʻitānití, mo e alā meʻa peheé?
Ko e hā ha meʻa ʻoku ou ʻilo fekauʻaki mo e ʻOtuá mo ʻEne ngaahi tuʻunga moʻuí? Ko e hā ʻoku mahuʻinga ai kiate Ia ʻetau fakaʻaongaʻi ʻa e tekinolosiá?

Ngaahi Maʻuʻanga Tokoni kuo Fokotuʻu Fakalangí

ʻOku ou ʻilo kuo lea ʻaki ʻeni ʻe heʻeku pīsopé, pea ʻoku ou manatu ki heʻene talanoa kau ki ha ngaahi meʻa kuó ne fai. Te u ʻeke ange pe ko e hā ʻa e ngaahi maʻuʻanga tokoni kuó ne fakaʻaongaʻí pea mo e meʻa kuó ne tokoniʻi iá.

Ko ʻene ʻosí pē pea toe fakakakato ʻa e ʻekitivitī kimuʻá. ʻI hoʻo toe fakahoko iá, nofotaha ʻi he vaivai ʻokú ke fiemaʻu tokoni aí. He ʻikai kole atu ke ke vahevahe ʻeni mo e niʻihi kehé.

Fakakaukau ke tuku ha taimi maʻá e kau akó ke nau fakakaukauloto ai ki heʻenau ngaahi aʻusiá pea vahevahe ʻa e meʻa ne nau ako mei he ʻekitivitī ʻo e ʻaho ní. Fakamoʻoni ki he mālohi mo e finangalo ʻo e Fakamoʻuí ke tokoniʻi kitautolu ke tau fakalakalaka pea hoko ʻo hangē ko Iá.

Toe vakaiʻi ʻo e fakataukei fakatokāteliné

Ngāue ʻaki ʻa e ʻekitivitī toe vakaiʻi ko ʻení ʻi ha lēsoni ʻe vave hano akoʻi hili ʻa e lēsoni ko ʻení.

ʻEke ki he kau akó pe te nau lava ʻo manatuʻi ʻa e kupuʻi lea folofola mahuʻinga ki he ʻEta 12:27. Toutou lau fakakalasi ʻa e fakamoʻoni fakafolofolá mo e kupuʻi lea mahuʻinga ʻi he folofolá, “ʻEta 12:27: Kapau ʻe haʻu kiate au ʻa e tangatá … te u liliu ʻa e ngaahi meʻa vaivaí ko e mālohi kiate kinautolu.”