Au a Raica e dua na Rarama, mai vei Jon McNaughton

10 ni Janueri

Cava na Vuna e Bibi kina na Matai ni Raivotu?

iVakamacala taumada ki na Vunau kei na Veiyalayalati; Josefa Simici—Ai Tukutuku 1:1–26

Veivakasalataki Vata

Liutaki mai na dua na lewe ni mataveiliutaki ni kuoramu se kalasi; rauta ni 10–20 na miniti

Ena itekivu ni soqoni, cavuta vata na iToko ni Kuoramu ni Matabete i Eroni se na iToko ni Goneyalewa. Qai liutaka e dua na veivosaki ena veika vakaoqo, ka tuvanaka na sala eso me vakayacori kina na veika sa veivosakitaki (rawa ni o digitaka ena dua na soqoni ni mataveiliutaki na veika me veivosakitaki):

• Noda kuoramu se kalasi. O cei e gadreva na noda veivuke kei na masu? Na cava rawa ni cakava meda vukei ira kina? O cei me da sureta ki na itaviqaravi mai oqo?

• Noda itavi se icolacola. Na ilesilesi cava soti eda sa vakayacora rawa? Na ilesilesi cava so e gadrevi meda vakayacora? Eda a sureti ira vakacava na tani mera lako mai vei Karisito, ka da na sureti ira vakacava eso tale ena gauna oqo?

• Noda bula. Na cava so e sotavi wale tikoga oqo e sa vakaqaqacotaka na noda ivakadinadina? Na cava e sa yaco tiko ki na noda bula, ka rawa vakacava ni da veitokoni vakai keda?

Ena itini ni lesoni, ke veiganiti, cakava na ka oqo:

• Vakadinadinataka na ivakavuvuli eso sa vakatavulici.

• Vakananuma vei ira na lewe ni kuoramu se kalasi na ituvatuva kei na veisureti a caka ena gauna ni bose.

Vakavulica na iVunau

Liutaki mai vua e dua na iliuliu itabaqase se itabagone; rauta ni 25-35 na miniti

Vakarautaki Iko Vakayalo

Dina ga ni sa sivia tu e 200 na yabaki mai na gauna a tekiduru taumada kina o Josefa Simici ena Veikau Tabu, na isaunitaro a ciqoma esa ra-wa vakalevu sara na noda bula nikua. Vakasamataka vagumatua na veivakalougatataki sa basika mai ki na nomu bula baleta ni a rairai na Tamada kei na Luvena vei Josefa. Cava na vuna e bibi kina vei ira o vakavulica me ra rawata na nodra vakadinadina vakataki ira me baleta na Matai ni Raivotu mai na Yalo Tabu? O na vukei ira vakacava ni kitaka oqo? Ena rairai veivuke mo railesuva na itukutuku mai na koniferedi raraba ni Epereli 2020, ka vakananuma nai ka 200 ni yabaki ni raivotu lagilagi oqo.

Sa rawa me ciqoma na tamata gone yadua na nona ivakadinadina ni Matai ni Raivotu.

Vulica Vata

Baleta ni a cauravou tu o Josefa Simici ena gauna ni Matai ni Raivotu, sa rawa ni ra na vakatauvatani o ira o vakavulica ki na nona vakasaqara na dina. Solia vei ira na lewe ni kuoramu kei na kalasi e vica na gauna mera wasea na nodra nanuma kei na vakasama me baleta na Josefa Simici—Ai Tukutuku 1:1–26. Na veitaviqaravi e ra ena rawa ni vukei ira sa vaqaqacotaka na nodra ivakadinadina ni a rairai na Kalou na Tamada kei Jisu Karisito vei Josefa Simici.

• Na dina cava so ni kosipeli eda sa vulica mai na ka a sotava o Josefa Simici ena Veikau Tabu? Rawa ni ra wilika na lewe ni kuoramu se kalasi na itukutuku i Josefa Simici ena Josefa Simici—Ai Tukutuku 1:7–20 ka wasea na dina eso era raica. (Me ivakaraitaki, sa rogoca ka sauma noda masu na Kalou, sa ka dina o Setani kei na nona kaukauwa, ia sa levu cake sara na kaukauwa ni Kalou; e sega ni se mudu na ivakatakila.) E sa vakalougatataka vakacava na noda bula na veidina oqo?

• Rawa talega ni o kerei ira na lewe ni kuoramu se kalasi mera railesuva na itukutuku eso ni Matai ni Raivotu mai na Koniferedi raraba ni Epereli 2020 (raica na Liaona, Me 2020). Me kena ivakaraitaki, e rawa ni ra railesuva na itukutuku nei Peresitedi Russell M. Nelson “Rogoci Koya” (liaona, me 2020, 88 – 92). Sureta mera wasea na ka era raica kei na nodra nanuma me baleta na Matai ni Raivotu.

• Era vakadinadinataka na Peresitedi ni Lotu yadua na ilesilesi vakalou ni Parofita o Josefa Simici. Ena rairai yaga vei ira na lewe ni kuoramu se kalasi na wiliki ni nodra ivakadinadina ena dua na ivolavakarau ni Nodra iVakavuvuli na Peresitedi ni Lotu . (E tiko ena vuqa na ivolavakarau oqo e dua na wase me baleta na Parofita o Josefa Simici. Me baleta na ituva ni veiwase oqo, raica na Gospel Topics, “First Vision,” topics.ChurchofJesusChrist.org.) Ena vica na siga ni bera na kalasi, rawa ni o sureta na lewe ni nomu kuoramu se kalasi mera digitaka e dua vei ira na Peresitedi oqo ka wasea e dua na itukutuku e a cakava era rawa ni vakayagataka me vakavulici kina e dua me baleta na Matai ni Raivotu.

• Navuca mo sureta na lewe ni kuoramu se kalasi mera vulica “Na Vakalesui Mai ni Kosipeli i Jisu Karisito mai vei Josefa Simici” ena wase 3 ni Vunautaka na Noqu Kosipeli ([2019], 36–38) ka vakatovotovotaka na veivakavulici vakai ira me baleta na Matai ni Raivotu. O na via bolei ira mera wasea na ka a sotava o Josefa Simici ena vakayagataki ni so na nona vosa, e kune ena Josefa Simici—Ai Tukutuku 1:16–17.

• Era sa kila tu li o ira o vakavulica ni vica vata tiko na itukutuku ni Matai ni Raivotu? Na itukutuku vakayadua oqo sa vakarautaka na ivakamacala vakasakiti eso e vakataucokotaka cake na kilai deivaki ni ka a yaco ena Veikau Tabu. O na via vakalekalekataka na wase ni “Overview” ena italanoa ni Gospel Topics “First Vision Accounts” (topics.ChurchofJesusChrist.org). O na qai via kerei ira o vakavulica mera railesuva na ivakaleleka ni va na itukutuku e kune ena ruku ni “iTukutuku Eso ni Matai ni Raivotu.” Sa rawa talega mera wilika eso na itukutuku dina ena vakayagataki ni sema vakarautaki eso. Na cava era raica esa vaqaqacotaka na nodra ivakadinadina ni Matai ni Raivotu? Sa rawa ni o sarava na vidio “Ask of God: Joseph Smith’s First Vision” (ChurchofJesusChrist.org), e vakaraitaka na Matai ni Raivotu ena vakayagataki ni vakamacala mai na veitukutuku oqo. Cava na vuna e vinaka kina me vica tu na itukutuku ni Matai ni Raivotu? E vukei keda vakacava na veitukutuku oqo me kilai vinaka na Tamada Vakalomalagi kei Jisu Karisito?

Cakacaka ena Vakabauta

Vakauqeta na lewe ni kuoramu se kalasi mera vakasamataka vagumatua ka vola na ka era na cakava me vakayacori kina na veivakauqeti eso era ciqoma nikua. E semati vakacava na lesoni nikua ki na nodra dui veilalawa era sa cakava? Kevaka era vinakata, sa rawa ni wasea na lewe ni kuoramu se kalasi na nodra vakasama.

iVurevure Veitokoni

• Maciu 3:13–17; Cakacaka 7:54–60; 3 Nifai 11:3–10 (Erau sa vakatakilai rau na Kalou na Tamada kei Jisu Karisito kivei ira na tamata e vuravura)

• Na vidio “What do we learn about the nature of God from the First Vision?” mai na Face to Face with President Eyring and Elder Holland (lotu kaburaki e vuravura raraba ni itabagone, 4 ni Maji, 2017), FacetoFace.ChurchofJesusChrist.org

Veivakavulici ena iVakarau ni iVakabula

A sureti ira na Nona imuri na iVakabula mera vakadinadinataka na dina ni Nona ivakavuvuli. Ni ra cakava vakakina, e tara na yalodra na Yalotabu. E rawa vakacava mo vakayaloqaqataki ira o vakavulica me ra wasea na nodra ivakadinadina? (Raica na Veivakavulici ena iVakarau ni iVakabula [2016], 11.)

Raica talega na “Prepare to Teach” (vidio, ChurchofJesusChrist.org).