Vakayagataki ni Lako Mai, Mo Muri Au—Me Baleta na Kuoramu ni Matabete i Eroni kei na Kalasi ni Goneyalewa

Na cava soti na inaki ni noda soqoni va kuoramu kei na kalasi?

Na Turaga e sa solia vei iko e dua na veivakabauti tabu: E sa kacivi iko mo veiqaravi ena dua na mataveiliutaki ena kuoramu ni Matabete i Eroni se na mataveiliutaki ena kalasi ni goneyalewa. E sa tiki ni nomu itavi mo liutaka ka qarava na nomu soqoni ni kuoramu se kalasi ena Sigatabu. Me caka oqo, e veivuke me kilaimatata na vuna eda sota kina ena veisoqoni oqo.

Na soqoni ni kuoramu ni Matabete i Eroni kei na soqoni ni kalasi ni Goneyalewa e duidui mai vei ira na kalasi ni Lotu me vaka na Matawilivola ni Sigatabu se semineri. Ena soqoni ni kuoramu se kalasi, eda cakava e levu cake na ka mai na vulici walega ni dua na ulutaga ni kosipeli. Eda sa vulica me baleta na cakacaka sa solia vei keda na Kalou, ka da cokonaki ira na lewe ni noda kuoramu se kalasi me ra na cakava na cakacaka vata o ya ena noda veivale, ena loma ni Lotu, ka vakakina ena noda itikotiko raraba. Eda tuvana, me kena ivakaraitaki, na sala eda na vakayacora rawa kina na noda itavi ni da tiki ni mataivalu itabagone ni Turaga me veivuke ena nodra vakasoqoni na Isireli. Ena vei soqoni oqo, eda sega walega ni vosa tiko me baleta na cakacaka—eda cakava na ituvatuva me na caka kina.

Ia na vakabibitaki oqo ni cakacaka e sega ni kena ibalebale ni sa biu tu na veivosaki vakaivunau me baleta ga na Matawilivola ni Sigatabu. E dina, na vulici ni ivunau ena kuoramu kei na soqoni ni Goneyalewa e ka bibi—e veivuke meda kila vakamatata na vuna eda cakava kina na cakacaka. Ni da vulica vata na kosipeli, na dina eda sa vulica e rawa ni veisautaka na lomada. Rawa ni da ciqoma na sala veivakauqeti eso ni kena vakalevutaki “na vuku kei na yago[da] talega, [ka] sa vinakati [keda] vakalevu cake tikoga na Kalou kei ira talega na tamata” (Luke 2:52). Ni sa yaco meda saumaki vakalevu cake tiko vei Jisu Karisito kei na Nona kosipeli, eda na vakila na gagadre me vukei ira na tani ena sala ni veiyalayalati, oka kina na noda matavuvale, noda itokani, kei ira na noda lewe ni kuoramu kei na kalasi.

O cei e liutaka na veisoqoni oqo?

Sa kacivi iko na Kalou ki na mataveiliutaki ni kuoramu kei na kalasi ka solia vei iko na dodonu ni lewa mo liutaka. Oqori na vuna ena vei soqoni yadua ni nomu kuoramu se kalasi e dodonu me liutaka e dua na lewe ni nomu mataveiliutaki ni kuoramu se kalasi. O ira na iliuliu matua e dodonu me ra solia na veituberi kei na veitokoni, ia me ra kakua ni taura vei iko. Raica na wase ka kena ulutaga na “Veivosaki Vata” ena itekivu ni ituvatuva yadua ena ivola oqo me baleta na vakasama eso ena vukei iko mo kila na sala me liutaka kina e dua na soqoni ka vakayacora rawa na kena inaki dina. Vakayagataka na bose ni mataveiliutaki mo tuvanaka kina na sala ko na veiliutaki kina ena veisoqoni ni Sigatabu vaka oqo.

O cei me vakavulica na lesoni?

iLiuliu matua, e dua na lewe ni kuoramu se mataveiliutaki ni kalasi, se dua tale na lewe ni kuoramu se kalasi e rawa ni vakavulica na lesoni. Ni ko mataveiliutaki ni kuoramu se kalasi, veitalanoa vata kei ira na nomu iliuliu matua se o cei e dodonu me lesi me vakatavulica na lesoni. Nanuma tiko ni levu na ka era rawa ni solia na nomu iliuliu matua. Saga mo vuli mai na nodra kilaka kei na ivakadinadina. Sa tiko talega na yaga eso ni nodra kerei na itabagone me ra veivakavulici—na veivakavulici e rawa ni vakatitobutaka na nodra saumaki ka tara cake na veimaliwai qaqaco sara kei ira na lewe tale eso ni kuoramu se kalasi. Io solia vei ira na madigi veiganiti me ra vakavulica taucoko se dua ga na tiki ni lesoni, ia mo nanuma tiko na gagadre kei na rawa-ka ni lewe ni nomu kuoramu se kalasi. Me kena ivakaraitaki, e rawa ni veivakavulici vakawasoma na iliuliu matua ena kuoramu se kalasi vata kei ira na itabagone gone sobu se o ira na itabagone ka lailai na nodra kila ni veivakavulici ena kosipeli. Ni sa sureti na itabagone me ra veivakavulici, e dua na itubutubu se dua na daunivakasala matua me na vukei ira mera vakavakarau me vaka e gadrevi.

O ira ka sa lesi me ra veivakavulici e rawa ni ra vakayagataka na wase ka kena ulutaga “Vakatavulica na iVunau” ena ituvatuva yadua ni vurevure oqo me vukei ira ena vakavakarau. Na wase oqo e umani tu kina na vakatutu eso ni veivakavulici ka veivosakitaki kina na ivunau ni macawa o ya, ia mera kakua ni yalani na qasenivuli ki na veivakatutu ga oqo. Ena veituberi ni Yalotabu, e rawa ni ra moica na qasenivuli na vakasama eso oqo se vakayagataka na nodra me ra veivakavulici kina ena sala ka veiganiti vakavinaka sara ki na nodra gagadre na lewe ni kuoramu se kalasi ka vukei ira me kiladeivaka na ivunau.

Na ulutaga vakaivunau cava beka eda na veivosakitaka ena noda soqoni?

Na ulutaga ni tuvatuva yadua vakamacawa e dua na ivakavuvuli vakaivunau e sa digitaki tu me salavata kei na wiliwili ni Vunau kei na Veiyalayalati ni macawa oya, kune ena Lako Mai, Mo Muri Au—Me Baleta na Tamata Yadua kei na Matavuvale. Ena sala oqo, na veivosaki vakaivunau ena kuoramu kei na kalasi ena tokona na ka era sa vulica tiko na itabagone mai vale.

Dina ga ni tiko na ituvatuva me na vakavulici ena vei-Sigatabu digitaki eso, sa na vakatau vei iko na veivosakitaki ni ulutaga vakaivunau tale eso e yavutaki ena nodra gagadre na nomu kuoramu se kalasi.

Na ivurevure ni vuli oqo e oka kina na ituvatuva ni soqoni ni kuoramu ni Matabete i Eroni kei na kalasi ni Goneyalewa ena veimacawa e vakayacori kina. Ena so na gauna, o na gadreva beka mo rikata e dua na lesoni me baleta na koniferedi ni iteki se dua tale na vuna.

Na cava na nodra itavi na noda iliuliu matua?

E bibi sara na nodra itavi na nomu iliuliu matua ena kuoramu ni Matabete i Eroni kei na kalasi ni Goneyalewa eso. Era na tuberi ka vakasalataki iko ena nomu veikacivi ni veiliutaki eso. Era na tokoni ka vakayaloqaqataki iko ni ko vakayacora tu na cakacaka ni nomu kuoramu se kalasi. Era na vakavulici iko ena ivunau, ka ra na vakalougatataki iko ena nodra ivakaraitaki, kilaka, kei na ivakadinadina.