Sīsū Kalaisi

Ko e ʻEiki ko Sīsū Kalaisí, tā fakatātaaʻi ʻe Del Parson

27 Sune

Te u Lava Fēfē ʻo Teuteu he Taimí Ni ke Fokotuʻu ha ʻApi ʻOku Fakatefito ʻia Kalaisi?

Tokāteline mo e Ngaahi Fuakava 67–70

fakaʻilonga fealeaʻaki fakatahá

Fealeaʻaki Fakataha

Tataki ʻe ha mēmipa ʻo e kau palesitenisī fakakōlomú pe fakakalasí; fakafuofua ki ha miniti ʻe 10–20

ʻI he kamataʻanga ʻo e fakatahá, lau fakataha ʻa e Kaveinga ʻo e Kōlomu ʻo e Lakanga Taulaʻeiki Faka-ʻĒloné pe ko e Kaveinga ʻo e Kau Finemuí. Tataki leva ha fealeaʻaki fekauʻaki mo ha ngaahi meʻa hangē ko ʻení, pea palani ha ngaahi founga ke ngāueʻi ai e ngaahi meʻa ne mou aleaʻí (te mou lava ʻo fili ʻi ha fakataha fakapalesitenisī pe ko e hā ʻe aleaʻí):

• Ko ʻetau kōlomú pe kalasí. Ko hai ʻoku foʻou ki hotau uōtí, pea ko e hā ha founga te tau lava ai ʻo tokoniʻi kinautolu ke nau ongoʻi ʻoku talitali lelei kinautolú? Ko e hā ʻoku tau fai ke ʻuhingamālie ai hotau taimi ʻi he ngaahi fakataha fakakōlomú pe fakakalasí?

• Ko hotau ngaahi ngafá pe fatongiá. Ko e hā ha ngaahi ngafa mo ha ngaahi fatongia ʻe niʻihi ʻoku tau maʻu ko ha kau talavou mo ha kau finemui? ʻE founga fēfē haʻatau fakahoko lelei ange kinautolu?

• Ko ʻetau moʻuí. Ko e hā ʻoku tau fai ke tau hoko ʻo hangē ange ko Sīsū Kalaisí mo maʻu Hono mālohí ʻi heʻetau moʻuí? Ko e hā ʻoku tau fai ke tokoni ki hotau ngaahi fāmilí ke nau haʻu kiate Iá?

ʻI he fakaʻosinga ʻo e lēsoní, fakahoko e ngaahi meʻá ni, ʻo ka fie maʻu:

• Fakamoʻoni ki he ngaahi tefitoʻi moʻoni kuo akoʻí.

• Fakamanatu ki he kau mēmipa ʻo e kōlomú pe kalasí e ngaahi palani mo e fakaafe ne fai ʻi he lolotonga e fakatahá.

fakaʻilonga akoʻi e tokāteliné

Akoʻi e Tokāteliné

Tataki ʻe ha taki kakai lalahi pe toʻu tupu; fakafuofua ki ha miniti ʻe 25–35

Teuteuʻi Fakalaumālie Koe

ʻOku kau ʻi he Tokāteline mo e Ngaahi Fuakava 68 ha faleʻi ki he mātuʻá mahalo he ʻikai ngali felāveʻi tonu mo e kau mēmipa ʻo e kōlomú pe kalasí veesi 25–28). Ka neongo ia, koeʻuhí te nau lava ʻo maʻu ha takiekina mālohi ʻi honau ngaahi fāmili lolotongá mo e kahaʻú, ʻe lava ke tokoni e faleʻi ko ʻení kiate kinautolu he taimí ni. Ko e founga lelei taha kiate kinautolu ke teuteu ke maʻu ha ʻapi ʻoku fakatefito ʻia Kalaisi ʻi he kahaʻú ko e “ʻaʻeva ʻi he angatonu ʻi he ʻao ʻo e ʻEikí” he ʻahó ni (veesi 28).

Ko e hā ha ngaahi tāpuaki kuo maʻu ʻe hoʻo fāmilí koeʻuhí naʻá ke muimui he ngaahi akonaki ʻa e Fakamoʻuí? ʻE tokoni fēfē e kau mēmipa ʻo e kōlomú pe kalasí ki honau ngaahi fāmilí ke nau fokotuʻu ha ʻapi ʻoku fakatefito ʻia Kalaisi? Ke teuteu ke faiakó, te ke lava ʻo toe vakaiʻi e pōpoaki ʻa Palesiteni Henelī B. ʻAealingi “Ko ha ʻApi ʻOku ʻAfio ai e Laumālie ʻo e ʻEikí” (Liahona, Mē 2019, 22–25) mo e “Ko e Fāmilí: Ko ha Fanongonongo ki Māmani” (ChurchofJesusChrist.org).

finemui ʻoku tā piano

Te tau lava ʻo ongoʻi ha ʻofa lahi ange ʻi hotau ngaahi fāmilí ʻi heʻetau fakatefito hotau ngaahi ʻapí ʻia Kalaisí.

Ako Fakataha

Ke tokoni ki he kau mēmipa hoʻo kōlomú pe kalasí ke nau vakai ki he founga ʻoku fakaʻaongaʻi ai kinautolu ʻi he Tokāteline mo e Ngaahi Fuakava 68:25–28, te ke lava ʻo kole ange ke nau hiki ha fakamatala nounou ʻo e meʻa ʻoku nau fie maʻu ke aʻusia ʻe honau fāmili ʻi he kahaʻú. Te ke lava ʻo kole ange ke nau vahevahe e meʻa ne nau hikí kapau ʻoku nau loto ki ai. Hili iá, ʻe lava ke nau lau e Tokāteline mo e Ngaahi Fuakava 68:25–28 pea fekumi ki ha ngaahi akonaki mo ha ngaahi tefitoʻi moʻoni ʻi he ongoongoleleí ʻe lava ke tokoni ke nau langa ai ha ngaahi fāmili angatonu ʻi he taimí ni pea ʻi he kahaʻú. ʻE lava ke tokoni e ngaahi ʻekitivitī ʻi laló ke mahino kiate kinautolu e founga ke ngaohi ai ʻa Kalaisi ko e uho ʻo honau ngaahi fāmilí.

• ʻOku ʻi he palakalafi fitu ʻo e “Ko e Fāmilí: Ko ha Fanongonongo ki Māmani” ha ngaahi moʻoni ʻe lava ke tokoni ki he kau mēmipa ʻo e kōlomú pe kalasí ke fakatefito honau ngaahi ʻapí ʻi he Fakamoʻuí. Fakaafeʻi kinautolu ke nau lau e palakalafi ko ʻení mo kumi e ngaahi akonaki mo e ngaahi tefitoʻi moʻoni ʻe tokoni ki ha fāmili ke nau fiefiá. ʻE lava ke ke hiki e ngaahi meʻá ni ʻi he palakipoé pea kole kiate kinautolu ʻokú ke akoʻí, ke nau aleaʻi e ʻuhinga ʻe tokoni ai e meʻa takitaha ke fiefia ha fāmili. Mahalo ʻe fie maʻu ʻe he kau mēmipa ʻo e kōlomú pe kalasí ke vahevahe e founga kuo nau mātā ai hano fakaʻaongaʻi ʻo e ngaahi akonaki mo e ngaahi tefitoʻi moʻoni ko ʻení ʻi honau ngaahi fāmilí pe fāmili ʻo e niʻihi kehé. Poupouʻi kinautolu ke nau fakalaulauloto ki he founga ʻe lava ke nau fakaʻaongaʻi ai ha tefitoʻi moʻoni pē ʻe taha ʻi heʻenau moʻuí he taimí ni. Toe fakapapauʻi ange te nau lava ʻo fokotuʻu ʻa Sīsū Kalaisi ko e uho ʻo ʻenau moʻuí, neongo pe ko e hā e tuʻunga ʻo e fāmili ʻoku nau omi mei aí.

• ʻE lava ke aleaʻi ʻe he kau mēmipa ʻo e kōlomú pe kalasí ha ngaahi meʻa ʻokú ne tauhi maʻu e Fakamoʻuí ʻi he uho ʻo hotau ngaahi ʻapí pea mo e ngaahi meʻa ʻokú ne taʻofi Ia mei Heʻene hoko ko e uho ʻo hotau ngaahi ʻapí. Te ke lava ʻo kole ki ha niʻihi fakafoʻituitui pe ngaahi kulupu iiki ke toe vakaiʻi ha taha ʻo e ngaahi konga ʻo e pōpoaki ʻa ʻEletā B. ʻAealingi “Ko ha ʻApi ʻOku ʻAfio ai e Laumālie ʻo e ʻEikí” (Liahona, Mē 2019, 22–25) ke kumi ha ngaahi tefitoʻi moʻoni ʻe lava ke tokoni ke ngaohi hotau ngaahi ʻapí ke toe fakatefito ange ʻia Kalaisi. Fakaafeʻi e kau mēmipa ʻo e kōlomú pe kalasí ke vahevahe e meʻa ʻoku nau akó pea fili ha meʻa ʻe taha te nau fai lolotonga e uike ka hokó ke fakatefito ange ai honau ngaahi ʻapí ʻia Sīsū Kalaisi mo ʻEne ngaahi akonakí.

• Te ke lava ʻo kole ange ki ha mēmipa ʻe taha pe lahi ange ʻo e kōlomú pe kalasí ke hivaʻi pe lau ha foʻi hiva fekauʻaki mo e ʻapí mo e fāmilí, hangē ko e “Hoko ʻa ʻApi ko e Hēvani” (Ngaahi Himí, fika 188) pe “Lea ʻAki Heni e ʻOfá” (Tohi Hiva ʻa e Fānaú, 102). ʻE lava ke fanongo e niʻihi kehé ki he meʻa ʻoku akoʻi mai ʻe he foʻi hivá fekauʻaki mo hono ngaohi ʻo ʻapi ko ha feituʻu fiefiá. Fakaafeʻi kinautolu ke vahevahe ha aʻusia ne nau ongoʻi fiefia ai koeʻuhí ne fakahaaʻi ange ha ʻofa kiate kinautolu pe koeʻuhí naʻa nau tokoni ke fakatupulaki e ʻofá ʻi honau ʻapí.

Ngāue ʻi he Tui

Poupouʻi ʻa e kōlomú pe kau mēmipa ʻo e kalasí ke nau fakalaulauloto mo lekooti ʻa e meʻa te nau fai ke ngāueʻi ai e ngaahi ongo ne nau maʻu he ʻaho ní. ʻOku felāveʻi fēfē ʻa e lēsoni he ʻaho ní mo e ngaahi taumuʻa fakafoʻituitui kuo nau fokotuʻú? Kapau te nau fie maʻu, ʻe lava ke vahevahe ʻe he kau mēmipa ʻo e kōlomú pe kalasí ʻenau ngaahi fakakaukaú.

Ngaahi Maʻuʻanga Tokoni Poupoú

• Mōsaia 4:14–16; Tokāteline mo e Ngaahi Fuakava 88:119; 121:41–46 (Founga ke fokotuʻu ai ha ʻapi anga māʻoniʻoní)

• “ʻI he Fanga Kiʻi Meʻa Īkí,” (vitiō) ChurchofJesusChrist.org

Ko e Faiako ‘i he Founga ‘a e Fakamoʻuí

Naʻe fakahaaʻi ʻe he Fakamoʻuí ʻEne ʻofa ki he niʻihi kehé ʻi he ngāue tokoní. Naʻe ului ha kakai fakafoʻituitui pea naʻe liliu ʻa e moʻuí ʻi Heʻene ngaahi ngāue leleí. ʻI hoʻo hoko ko e takí, te ke muimui fēfē ki he ʻulungaanga leleí ni? Te ke lava fēfē ʻo tokoni ki he toʻu tupú ke nau fie muimui he sīpinga ngāue tokoni ʻa e Fakamoʻuí ʻi honau ngaahi fāmilí?