kau finemui ʻi ha kalasi

Ko Hono Fakaʻaongaʻi ʻo e Haʻu, ʻo Muimui ʻIate Au—Maʻá e Ngaahi Kōlomu ʻo e Lakanga Taulaʻeiki Faka-ʻĒloné mo e Ngaahi Kalasi ʻa e Kau Finemuí

Ko e hā e ngaahi taumuʻa ʻo ʻetau ngaahi fakataha fakakōlomú mo fakakalasí?

Kuo tuku atu ʻe he ʻEikí ha falala toputapu kiate koe: kuó Ne ui koe ke ke ngāue ʻi he kau palesitenisī fakakōlomu ʻo e Lakanga Taulaʻeiki Faka-ʻĒloné pe kau palesitenisī fakakalasi ʻo e Kau Finemuí. ʻOku kau ʻi ho ngaahi fatongiá hono taki mo tataki hoʻomou ngaahi fakataha fakakōlomu pe fakakalasi he Sāpaté. Ke fai ʻení, ʻe tokoni ke maʻu ha mahino ki he ʻuhinga ʻoku tau fai ai e ngaahi fakataha ko ʻení.

ʻOku kehe ʻa e ngaahi fakataha ʻa e kōlomu ʻo e Lakanga Taulaʻeiki Faka-ʻĒloné mo e kalasi ʻa e Kau Finemuí mei he ngaahi kalasi ʻa e Siasí hangē ko e Lautohi Faka-Sāpaté pe seminelí. ʻI he ngaahi fakataha fakakōlomú pe fakakalasí, ʻoku tau ako ai ki ha ngaahi meʻa lahi ange ʻi ha tefito pē ʻo e ongoongoleleí. ʻOku tau ako ki he ngāue kuo ʻomi ʻe he ʻOtuá kiate kitautolú, pea ʻoku tau fokotuʻutuʻu ʻa e kau mēmipa ʻo ʻetau kōlomú pe kalasí ke nau fai ʻa e ngāue ko iá ʻi hotau ngaahi ʻapí, ʻi he Siasí, pea ʻi hotau tukui koló. Hangē ko ʻení, ʻoku tau palani ʻa e founga te tau fakahoko ai hotau fatongia ko e konga ʻo e kongakau toʻu tupu ʻa e ʻEikí ke tokoni ki hono tānaki ʻo ʻIsilelí. ʻI he ngaahi fakataha ko ʻení, ʻoku ʻikai ke tau talanoa ʻataʻatā pē ki he ngāué—ka ʻoku tau faʻu ha ngaahi palani ke fakahoko ia.

kau talavou ʻi he kalasí

Ka ʻoku ʻikai ʻuhinga hono fakamamafaʻi ko ʻeni ʻo e ngāué ke tau tuku ai ʻa e ngaahi fealeaʻaki fakatokāteliné ki he Lautohi Faka-Sāpaté pē. Ko hono moʻoní, ʻoku mahuʻinga ʻa hono ako ʻo e tokāteliné ʻi he ngaahi fakataha ʻa e kōlomú mo e Kau Finemuí—ʻoku tokoni ia ke mahino kiate kitautolu ʻa e ʻuhinga ʻoku tau fai ai ʻa e ngāué. ʻI heʻetau ako fakataha ʻa e ongoongoleleí, ʻe lava ke liliu ʻe he ngaahi moʻoni ʻoku tau akó hotau lotó. ʻE lava ke tau maʻu ha ngaahi ueʻi fakalaumālie ki he ngaahi founga ke tau tupulaki ai “ʻi he potó … mo e lahí, pea ʻofeina [ʻe he] ʻOtuá mo e tangatá” (Luke 2:52). ʻI heʻetau ului ange kia Sīsū Kalaisi mo ʻEne ongoongoleleí, ʻoku tau ongoʻi ai ha holi ke tokoni ki he niʻihi kehé ʻi he hala ʻo e fuakavá, ʻo kau ai hotau ngaahi fāmilí, kaungāmeʻá, mo e kōlomú mo e kau mēmipa ʻo e kalasí.

Ko hai ʻokú ne tataki e ngaahi fakataha ko ʻení?

Kuo ui kimoutolu ʻe he ʻOtuá ke mou hoko ko e kau palesitenisī fakakōlomu mo fakakalasi pea kuó Ne foaki atu ʻa e mafai ke mou taki. Ko e ʻuhinga ia ʻoku totonu ke tataki ai ʻe ha mēmipa ʻo hoʻomou kau palesitenisī fakakōlomú pe fakakalasí ʻa e fakataha kotoa pē ʻo hoʻomou kōlomú pe kalasí. Ko e kau taki kakai lalahí ʻoku totonu ke nau fakahinohino pē mo poupou, ka ʻoku ʻikai totonu ke nau tataki e fakatahá maʻamoutolu. Vakai ki he konga “Fealeaʻaki Fakataha” ʻi he kamataʻanga ʻo e lēsoni kotoa ʻi he maʻuʻanga tokoni ko ʻení ki ha ngaahi fakakaukau ke tokoniʻi koe ke ke ʻiloʻi ʻa e founga ke tataki ai ha fakataha mo aʻusia hono ngaahi taumuʻa totonú. Fakaʻaongaʻi ʻa e ngaahi fakataha fakapalesitenisií ke mou palani ai ʻa e founga ke tataki ʻaki ʻa e ngaahi fakataha he Sāpaté.

Ko hai ʻoku totonu ke ne akoʻi ʻa e lēsoní?

ʻE lava ʻe he kau taki kakai lalahí, ko ha mēmipa ʻo e kau palesitenisī fakakōlomú pe fakakalasí, pe ko ha mēmipa pē ʻo e kōlomú pe kalasí ʻo akoʻi ʻa e lēsoní. ʻI hoʻo hoko ko e kau palesitenisī ʻo e kōlomú pe kalasí, talanoa mo hoʻo kau taki kakai lalahí fekauʻaki mo e tokotaha ʻoku totonu ke vahe ki ai ke ne akoʻi ʻa e ngaahi lēsoní. Manatuʻi ʻoku lahi e ngaahi meʻa ʻe ala tokoni ai hoʻo kau taki kakai lalahí. Fekumi ke ke ako mei heʻenau taukeí mo e ngaahi fakamoʻoní. ʻOku toe ʻi ai foki ha lelei ʻi hono kole ki he toʻu tupú ke nau faiakó—ʻe lava ke tokoni e faiakó ke fakaloloto ʻenau uluí mo fakatupulaki ha ngaahi vā fetuʻutaki mālohi ange mo e kau mēmipa kehe ʻo e kōlomú pe kalasí. Ko ia tuku ange ha ngaahi faingamālie feʻunga ke nau akoʻi kakato pe ko ha konga ʻo e lēsoní, ka ke faʻa fakakaukau ki he ngaahi fiemaʻu mo e meʻa ʻe malava ʻe kinautolu ʻi hoʻo kōlomú pe kalasí. Hangē ko ʻení, ʻe lava ke faʻa faiako fakataha ʻa e kau taki kakai lalahí mo e toʻu tupu iiki angé pe toʻu tupu ʻoku siʻi ʻenau taukei ʻi hono akoʻi ʻo e ongoongoleleí ʻi he ngaahi kōlomú pe kalasí. ʻI hono fakaafeʻi ʻo e toʻu tupú ke nau faiakó, ʻoku totonu ke tokoni ʻa e mātuʻá pe ʻetivaisá ki heʻenau teuteú ʻo ka fie maʻu.

ʻE lava ʻe kinautolu ne vahe ke faiakó ʻo fakaʻaongaʻi ʻa e konga ko e “Akoʻi e Tokāteliné” ʻi he lēsoni takitaha ʻi he maʻuʻanga tokoni ko ʻení ke tokoni ki heʻenau teuteú. ʻOku kau ʻi he konga ko ʻení ha ngaahi fokotuʻu ki hono akoʻí pea ʻoku aleaʻi ai ʻa e tokāteline ki he uike ko iá, ka ʻoku ʻikai totonu ke ongoʻi ʻe he kau faiakó ʻoku fakangatangata pē ki he ngaahi fokotuʻu ko ʻení. ʻE lava ke liliu ʻe he kau faiakó e ngaahi fakakaukau ko ʻení ke feʻunga pe fakaʻaongaʻi ʻenau fakakaukau pē ʻanautolú ʻo fakatatau mo e fakahinohino ʻa e Laumālié, ke akoʻi ʻi ha founga te ne feau lelei taha ai e ngaahi fiemaʻu ʻa e kōlomú pe kau mēmipa ʻo e kalasí pea tokoni ke mahino kiate kinautolu ʻa e tokāteliné.

Ko e hā ʻa e ngaahi tefito fakatokāteline te tau aleaʻi ʻi heʻetau ngaahi fakatahá?

Ko e tefito ʻi he lēsoni ʻo e uike takitaha ko ha tefitoʻi moʻoni fakatokāteline ia kuo fili ke fenāpasi mo e laukonga ʻi he Tokāteline mo e Ngaahi Fuakavá kuo fokotuʻu ki he uike ko iá, ʻa ia ʻoku hā ʻi he Haʻu, ʻo Muimui ʻIate Au—Maʻá e Fakafoʻituituí mo e Ngaahi Fāmilí. ʻI he founga ko ʻení, ʻe tokoni ʻa e ngaahi fealeaʻaki fakatokāteline ʻi he ngaahi fakataha fakakōlomú mo fakakalasí ki he meʻa ʻoku ako ʻe he toʻu tupú ʻi ʻapí.

Neongo ʻoku totonu ke akoʻi ʻa e ngaahi lēsoní ʻi ha ngaahi ʻaho Sāpate pau, ka ʻe kei ʻatā pē ke ke fili ke aleaʻi ʻa e ngaahi tefito fakatokāteline kehé ʻo fakatefito ʻi he ngaahi fiemaʻu ʻa hoʻo kōlomú pe kalasí.

ʻOku fakakau ʻi he maʻuʻanga tokoni ko ʻení ʻa e fokotuʻutuʻu ki he uike takitaha ki he taimi ʻoku fai ai e ngaahi fakataha ʻa e kōlomu Lakanga Taulaʻeiki Faka-ʻĒloné mo e ngaahi kalasi ʻa e Kau Finemuí. ʻE ʻi ai ha ngaahi taimi ʻe niʻihi ʻe fie maʻu ai ke ke hiki fakalaka mei ha lēsoni koeʻuhí ko e ngaahi konifelenisi fakasiteikí pe ngaahi ʻuhinga kehe.

Ko e hā e fatongia ʻo ʻemau kau taki kakai lalahí?

ʻOku ʻi ai ha fatongia mahuʻinga ʻa hoʻomou kau taki kakai lalahí ʻi he ngaahi kōlomu ʻo e Lakanga Taulaʻeiki Faka-ʻĒloné mo e ngaahi kalasi ʻa e Kau Finemuí Te nau fakahinohino mo faleʻi koe ʻi ho ngaahi fatongia fakatakimuʻá. Te nau tokoni mo poupouʻi koe ʻi hoʻo fai e ngāue ʻa hoʻo kōlomú pe kalasí. Te nau akoʻi atu kiate koe ʻa e tokāteliné, pea te nau tāpuekina koe ʻo fakafou ʻi heʻenau tā sīpingá, taukeí, mo e fakamoʻoní.