Siosefa Sāmita ʻoku lotu

Ne u Mamata ki ha Maama, tā fakatātaaʻi ʻe Jon McNaughton

10 Sanuali

Ko e Hā ‘Oku Mahuʻinga ai ‘a e ‘Uluaki Mata Meʻa-Hā-Maí?

Talateu ki he Tokāteline mo e Ngaahi Fuakavá; Siosefa Sāmita—Hisitōlia 1:1–26

fakaʻilonga fealeaʻaki fakataha

Fealeaʻaki Fakataha

Tataki ʻe ha mēmipa ʻo e kau palesitenisī fakakōlomú pe fakakalasí; fakafuofua ki ha miniti ʻe 10–20

ʻI he kamataʻanga ʻo e fakatahá, lau fakataha ʻa e Kaveinga ʻa e Kōlomu ʻo e Lakanga Taulaʻeiki Faka-ʻĒloné pe ko e Kaveinga ʻa e Kau Finemuí. Tataki leva ha fealeaʻaki fekauʻaki mo ha ngaahi meʻa hangē ko ʻení, pea palani ha ngaahi founga ke ngāueʻi ai e ngaahi meʻa ne mou aleaʻí (te mou lava ʻo fili ʻi ha fakataha fakapalesitenisī pe ko e hā ʻe aleaʻí):

• Ko ʻetau kōlomú pe kalasí. Ko hai ʻokú ne fie maʻu ʻetau tokoní mo e ngaahi lotú? Ko e hā te tau lava ʻo fai ke tokoniʻi ai kinautolú? Ko hai ʻoku totonu ke tau fakaafeʻi ki ha ʻekitivitī ʻoku ʻamanaki ke fai?

• Ko hotau ngaahi ngafá pe fatongiá. Ko e hā ha ngaahi ngāue kuo tau fakahoko? Ko e hā ha ngaahi ngāue ʻoku fie maʻu ke tau fai? Ko e hā ha founga kuo tau fakaafeʻi mai ai e niʻihi kehé ke nau haʻu kia Kalaisi, pea ʻe founga fēfē haʻatau fakaafeʻi mai e niʻihi kehé he taimí ni?

• Ko ʻetau moʻuí. Ko e hā ha ngaahi aʻusia kimuí ni kuó ne fakamālohia ʻetau fakamoʻoní? Ko e hā e meʻa ʻoku hoko ʻi heʻetau moʻuí, pea ʻe founga fēfē haʻatau fepoupouaki?

ʻI he fakaʻosinga ʻo e lēsoní, fakahoko e ngaahi meʻá ni, ʻo ka fie maʻu:

• Fakamoʻoni ki he ngaahi tefitoʻi moʻoni kuo akoʻí.

• Fakamanatu ki he kau mēmipa ʻo e kōlomú pe kalasí e ngaahi palani mo e fakaafe ne fai ʻi he lolotonga e fakatahá.

fakaʻilonga akoʻi e tokāteliné

Akoʻi e Tokāteliné

Tataki ʻe ha taki kakai lalahi pe toʻu tupu; fakafuofua ki ha miniti ʻe 25–35

Teuteuʻi Fakalaumālie Koe

Neongo kuo laka hake he taʻu ʻe 200 talu mei he fuofua tūʻulutui ʻa Siosefa Sāmita ke lotu ʻi he Vaoʻakau Tapú, ka kuo liliu lahi ʻe he tali naʻá ne maʻú ʻetau moʻuí he ʻahó ni. Fakalaulauloto ki he ngaahi tāpuaki kuó ke maʻu ʻi hoʻo moʻuí koeʻuhí naʻe hā ʻa e Tamaí mo e ʻAló kia Siosefa. Ko e hā ʻoku mahuʻinga ai kiate kinautolu ʻokú ke akoʻí ke nau maʻu ha fakamoʻoni ʻo e ʻUluaki Mata Meʻa-Hā-Maí mei he Laumālie Māʻoniʻoní? Te ke tokoni fēfē nai kiate kinautolu ke fakahoko ʻení? ʻE ala tokoni ke ke toe vakaiʻi e ngaahi pōpoaki mei he konifelenisi lahi ʻi ʻEpeleli 2020, ʻa ia ne fakamanatu ai e taʻu 200 ʻo e mata meʻa-hā-mai nāunauʻia ko ʻení.

kau finemui ʻi he kalasí

ʻE lava ke maʻu ʻe he tokotaha kei talavou kotoa pē ha fakamoʻoni fakataautaha ʻo e ʻUluaki Mata Meʻa-Hā-Maí.

Ako Fakataha

Koeʻuhí ne kei talavou ʻa Siosefa Sāmita ʻi he taimi ʻo e ʻUluaki Mata Meʻa-Hā-Maí, ʻe lava ke fakafehokotaki e niʻihi ʻokú ke akoʻí ki heʻene fekumi ki he moʻoní. ʻOange ki he kau mēmipa ʻo e kōlomú pe kalasí ha ngaahi miniti siʻi ke vahevahe ai ʻenau ngaahi fakakaukau mo e ongo fekauʻaki mo e Siosefa Sāmita—Hisitōlia 1:1–26. ʻE lava ke tokoni e ngaahi ʻekitivitī ko ʻeni ʻi laló ke fakamālohia ʻenau ngaahi fakamoʻoni naʻe hā ʻa e ʻOtua ko e Tamaí mo Sīsū Kalaisi kia Siosefa Sāmita.

• Ko e hā ha ngaahi moʻoni ʻo e ongoongoleleí ʻoku tau ako mei he aʻusia ʻa Siosefa Sāmita ʻi he Vaoʻakau Tapú? ʻE lava ke lau ʻe he kau mēmipa ʻo e kōlomú pe kalasí ʻa e talanoa ʻi he Siosefa Sāmita—Hisitōlia 1:7–20 pea vahevahe e ngaahi moʻoni ʻoku nau maʻú. (Hangē ko ʻení, ʻoku fanongo mo tali ʻe he ʻOtuá e ngaahi lotú; ʻoku ʻi ai moʻoni ha Sētane mo hono mālohi, ka ʻoku mahulu ange e mālohi ʻo e ʻOtuá; kuo teʻeki ngata ʻa e maʻu fakahaá.) Kuo tāpuekina fēfē ʻe he ngaahi moʻoni ko ʻení ʻetau moʻuí?

• Te ke lava foki ʻo kole ki he kau mēmipa ʻo e kōlomú pe kalasí ke nau toe vakaiʻi e ngaahi pōpoaki fekauʻaki mo e ʻUluaki Mata Meʻa-Hā-Maí mei he konifelenisi lahi ʻo ʻEpeleli 2020 (vakai, Liahona, Mē 2020). Hangē ko ʻení, te nau lava ʻo vakaiʻi ʻa e pōpoaki ʻa Palesiteni Lāsolo M. Nalesoni “Fanongo kiate Ia” (Liahona, Mē 2020, 88–92). Fakaafeʻi kinautolu ke vahevahe e meʻa ʻoku nau maʻú mo ʻenau ngaahi ongo fekauʻaki mo e ʻUluaki Mata Meʻa-Hā-Maí.

• Naʻe fakamoʻoni ʻa e Kau Palesiteni takitaha ʻo e Siasí ki he misiona fakalangi ʻo e Palōfita ko Siosefa Sāmitá. Mahalo ʻe lelei ki he kau mēmipa ʻo e kōlomú pe kalasí hano lau ʻo ʻenau ngaahi fakamoʻoní mei ha taha ʻo e ngaahi tohi lēsoni Ngaahi Akonaki ʻa e Kau Palesiteni ʻo e Siasí. (ʻOku ʻi he lahi taha ʻo e ngaahi tohi lēsoni ko ʻení ha vahe fekauʻaki mo e Palōfita ko Siosefa Sāmitá. Ki ha lisi ʻo e ngaahi vahe ko ʻení, vakai ki he Ngaahi Tefito ʻo e Ongoongoleleí, “ ʻUluaki Mata Meʻa-Hā-Maí,” topics.ChurchofJesusChrist.org.) Te ke lava ʻo fakaafeʻi e kau mēmipa hoʻo kōlomú pe kalasí ʻi ha ngaahi ʻaho siʻi kimuʻa he kalasí, ke nau fili ha taha ʻi he kau Palesiteni ko ʻení, pea vahevahe haʻane fakamatala te nau ala fakaʻaongaʻi ke akoʻi ha taha fekauʻaki mo e ʻUluaki Mata Meʻa-Hā-Maí.

• ʻE lava ke ke fakaafeʻi ha kau mēmipa ʻo e kōlomú pe kalasí ke nau ako e feakoʻiʻaki ʻiate kinautolu ʻa e ʻUluaki Mata Meʻa-Hā-Maí. ʻE lava ke ke fakaafeʻi kinautolu ke vahevahe e aʻusia ʻa Siosefa Sāmitá ʻo fakaʻaongaʻi ha niʻihi ʻo ʻene ngaahi lea ʻoku maʻu ʻi he Siosefa Sāmita—Hisitōlia 1:16–17.

• ʻOku ʻiloʻi koā ʻe he niʻihi ʻokú ke akoʻí ʻoku lahi ha ngaahi fakamatala ʻo e ʻUluaki Mata Meʻa-Hā-Maí? ʻOku ʻomi ʻe he ngaahi fakamatala takitaha ko ʻení ha fakaikiiki makehe ʻa ia ʻokú ne ʻomi ha mahino kakato ange ʻo e meʻa ne hoko ʻi he Vaoʻakau Tapú.         ʻE lava ke ke huluʻi ʻa e foʻi vitiō “Ask of God: Joseph Smith’s First Vision” (ChurchofJesusChrist.org), ʻa ia ʻokú ne fakatātaaʻi mai ʻa e ʻUluaki Mata Meʻa-hā-maí ʻaki hono ngāue ʻaki ha ngaahi fakaikiiki mei he ngaahi talanoa ko ʻení. Ko e hā ʻoku lelei ai ke lahi ha ngaahi fakamatala ʻo e ʻUluaki Mata Meʻa-Hā-Maí? ʻOku tokoni fēfē e ngaahi fakamatala ko ʻení ke mahino ange kiate kitautolu e Tamai Hēvaní mo Sīsū Kalaisí?

Ngāue ʻi he Tui

Poupouʻi ʻa e kōlomú pe kau mēmipa ʻo e kalasí ke nau fakalaulauloto mo lekooti ʻa e meʻa te nau fai ke ngāueʻi ai e ngaahi ongo ne nau maʻu he ʻaho ní. ʻOku felāveʻi fēfē ʻa e lēsoni he ʻaho ní mo e ngaahi taumuʻa fakafoʻituitui kuo nau fokotuʻú? Kapau te nau fie maʻu, ʻe lava ke vahevahe ʻe he kau mēmipa ʻo e kōlomú pe kalasí ʻenau ngaahi fakakaukaú.

Ngaahi Maʻuʻanga Tokoni Poupoú

• Mātiu 3:13–17; Ngāue 7:54–60; 3 Nīfai 11:3–10 (ʻOku fakahaaʻi ʻe he ʻOtua ko e Tamaí mo Sīsū Kalaisi, ʻa Kinaua, ki he kakai ʻi he māmaní)

• “Ko e Hā ʻOku Tau Ako Fekauʻaki mo e Natula ʻo e ʻOtuá mei he ʻUluaki Mata Meʻa-hā-maí?” mei he “Face to Face with President Eyring and Elder Holland” (fakamafola fakamāmanilahi maʻá e toʻu tupú, 4 ʻo Māʻasi 2017), FacetoFace.ChurchofJesusChrist.org

Ko e Faiako ‘i he Founga ‘a e Fakamoʻuí

Naʻe fakaafeʻi ‘e he Fakamoʻuí Hono kau muimuí ke nau fakamoʻoniʻi e moʻoni ‘o ‘Ene ngaahi akonakí. ‘I heʻenau fai iá, naʻe ueʻi hake honau lotó ‘e he Laumālié. Te ke poupouʻi fēfē ʻa kinautolu ʻokú ke akoʻí ke fakahoko ʻenau fakamoʻoní? (Vakai, Ko e Faiako ʻi he Founga ʻa e Fakamoʻuí [2016], 11.)

Vakai foki ki he foʻi vitiō “Teuteu ke Akoʻí” (ʻi he ChurchofJesusChrist.org).