kau finemui mo ha kau talavou ʻi muʻa ʻi he temipalé

24 Sanuali

Te u Lava Fēfē ʻo Teuteu ke Kau ʻi he “Ngāue Fakaofo” ʻa e ʻOtuá?

Tokāteline mo e Ngaahi Fuakava 3–5

fakaʻilonga fealeaʻaki fakataha

Fealeaʻaki Fakataha

Tataki ʻe ha mēmipa ʻo e kau palesitenisī fakakōlomú pe fakakalasí; fakafuofua ki ha miniti ʻe 10–20

ʻI he kamataʻanga ʻo e fakatahá, lau fakataha ʻa e Kaveinga ʻo e Kōlomu ʻo e Lakanga Taulaʻeiki Faka-ʻĒloné pe ko e Kaveinga ʻo e Kau Finemuí. Tataki leva ha fealeaʻaki fekauʻaki mo ha ngaahi meʻa hangē ko ʻení, pea palani ha ngaahi founga ke ngāueʻi ai e ngaahi meʻa ne mou aleaʻí (te mou lava ʻo fili ʻi ha fakataha fakapalesitenisī pe ko e hā ʻe aleaʻí):

• Ko ʻetau kōlomú pe kalasí. Ko e hā te tau lava ʻo fai ke fakatupulaki ʻa e uouongatahá ʻi he kau mēmipa ʻo ʻetau kōlomú pe kalasí? Ko e hā ha ngaahi taumuʻa te tau fie ngāueʻi fakataha?

• Ko hotau ngaahi ngafá pe fatongiá. Ko e hā ha meʻa ʻoku tau fai ke vahevahe e ongoongoleleí? Ko e hā ha ngaahi meʻa kuo tau aʻusia ʻi hono fakahoko ʻo e ngāue fakatemipalé mo e hisitōlia fakafāmilí?

• Ko ʻetau moʻuí. Kuo tau mātā fēfē e takiekina ʻa e ʻEikí ʻi heʻetau moʻuí? Ko e hā kuó ne ueʻi fakalaumālie kitautolu ʻi heʻetau ako folofola he uike ní?

ʻI he fakaʻosinga ʻo e lēsoní, fakahoko e ngaahi meʻá ni, ʻo ka fie maʻu:

• Fakamoʻoni ki he ngaahi tefitoʻi moʻoni kuo akoʻí.

• Fakamanatu ki he kau mēmipa ʻo e kōlomú pe kalasí e ngaahi palani mo e fakaafe ne fai ʻi he lolotonga e fakatahá.

fakaʻilonga akoʻi e tokāteliné

Akoʻi e Tokāteliné

Tataki ʻe ha taki kakai lalahi pe toʻu tupu; fakafuofua ki ha miniti ʻe 25–35

Teuteuʻi Fakalaumālie Koe

ʻI he fuofua kamata ke fanongo e Kāingalotu ʻi he kuonga muʻá ki he pōpoaki ʻo e ongoongolelei kuo fakafoki maí, ne tokolahi ha kau fie ʻilo pe ko e hā te nau lava ʻo fai ke tokoni ʻi he ngāué. Naʻe kau e tamai ʻa e Palōfita ko Siosefa Sāmitá, Siosefa Sāmita ko e Lahi, ʻiate kinautolu ne kole ke ʻilo e finangalo ʻo e ʻEikí maʻaná. Talu mei ai mo hono ueʻi ʻe he tali ʻa e ʻEikí, ʻa ia ʻoku ʻi he Tokāteline mo e Ngaahi Fuakava 4, ha kakai tokolahi ke nau ngāue ʻaki honau “lotó, iví, ʻatamaí mo e mālohí kotoa” (veesi 2). Neongo pe ko e ngāue fakafaifekau pe ngāue ʻi ha faʻahinga uiuiʻi pe fatongia ʻi he Siasí, ʻoku tatau pē e ngaahi fiemaʻu ki aí: ko ha loto-holi ke ngāue maʻá e ʻOtuá fakataha mo e tui, ʻamanaki lelei, manavaʻofa, mo e ʻofa (vakai, Tokāteline mo e Ngaahi Fuakava 4:2–6). Te ke tokoni fēfē ki he kau mēmipa ʻo e kōlomú pe kalasí ke fakamālohia ʻenau loto-holi ke ngāue maʻá e ʻEikí mo teuteu ki ha ngaahi faingamālie ngāue tokoni he kahaʻú?

Ke teuteuʻi koe ke tataki e kau mēmipa hoʻo kōlomú pe kalasí ʻi he ako ko ʻení, ʻe lava ke ke lau mo fakalaulauloto ki ha pōpoaki ʻe taha pe lahi ange ʻi he “Ngaahi Maʻuʻanga Tokoni Poupoú.”

kau talavou ʻoku nau ʻaʻahi ki ha tangata matuʻotuʻa ange

ʻOku kau e tokanga kiate kinautolu ʻoku faingataʻaʻiá ʻi he ngāue ʻo e fakamoʻuí.

Ako Fakataha

Mahalo kuo ueʻi fakalaumālie e kau mēmipa ʻo e kalasí pe kōlomú ke nau ngāue fakamaatoato ange maʻá e ʻEikí ʻi heʻenau lau e Tokāteline mo e Ngaahi Fuakava 3–5 he uike ní. Ke poupouʻi kinautolu ke vahevahe ʻenau ngaahi fakakaukaú, te ke lava ʻo fakaafeʻi kinautolu ke nau fakakaukauloto ʻoku nau tohi kole ki ha ngāue. Ko e hā ha ngaahi tuʻunga fakaako te nau tohi ʻi ha tohi tala ngāue pe talanoa ai ʻi ha ʻinitaviu ngāue? ʻE lava ke nau toe vakaiʻi e Tokāteline mo e Ngaahi Fuakava 4 ʻo kumi e ngaahi fiemaʻu ʻa e ʻEikí kiate kinautolu ʻoku fie kau ʻi Heʻene ngāué. Fili ha ʻekitivitī ʻe taha pe lahi ange mei lalo ke tokoni kiate kinautolu ʻokú ke akoʻí ke nau fakakaukau ki he meʻa te nau lava ʻo fai ke nau kau kakato ange ai ki he “ngāue fakaofo” ʻa e ʻOtuá (Tokāteline mo e Ngaahi Fuakava 4:1).

• Ke tokoni kiate kinautolu ʻokú ke akoʻí ke nau ako e founga ʻe lava ke nau kau ai ʻi hono fakavaveʻi e ngāue ʻo e fakamoʻuí, hiki ʻi he palakipoé e ʻuhinga ko ʻeni ʻo e ngāue ʻo e fakamoʻuí: ʻOku fakaafeʻi ʻe he ʻOtuá e taha kotoa ke haʻu kia Kalaisi pea tokoni ʻi Heʻene ngāué, ʻaki hono moʻui ʻaki e ongoongolelei ʻa Sīsū Kalaisí, tokoni kiate kinautolu ʻoku faingataʻaʻiá, fakaafeʻi e tokotaha kotoa ke fanongo ki he ongoongoleleí, mo fakatahaʻi e ngaahi fāmilí ki he taʻengatá. Fakaafeʻi e kau mēmipa ʻo e kōlomú pe kalasí ke nau aleaʻi e founga ʻe tokoni ai kiate kinautolu e ngaahi ʻulungaanga ʻoku lisi ʻi he Tokāteline mo e Ngaahi Fuakava 4 ke nau fai e konga takitaha ʻo e ngāue ʻo e fakamoʻuí. Vahevahe e toʻu tupú ki ha ngaahi kulupu, pea tuku ke aleaʻi ʻe he kulupu takitaha ha ngaahi founga ʻe lava ke nau fakatupulaki ai e ngaahi ʻulungaanga ko ʻení. Ko e hā te tau lava ʻo fai ke fokotuʻu e ngāue ʻo e fakamoʻuí ko ha konga mahuʻinga ange ʻo ʻetau moʻuí?

• Fakaafeʻi e kau mēmipa ʻo e kōlomú pe kalasí ke nau toe vakaiʻi ha taha ʻo e ngaahi pōpoaki ʻoku maʻu ʻi he “Ngaahi Maʻuʻanga Tokoni Poupoú,” ʻo kumi ha lea ʻe lava ke nau vahevahe fekauʻaki mo e founga ke ngāue faivelenga ai maʻá e ʻEikí ʻi he ngaahi uiuiʻi, ngāue, pe ngaahi fatongia kehe ʻi he Siasí. Kole ange ke nau vahevahe e lea ne nau filí mo e ʻuhinga ne nau pehē ai ʻoku ʻuhingamālié. Te nau fakaʻaongaʻi fēfē ʻa e meʻa ne nau akó he taimí ni pea ʻi he kahaʻú?

• Mahalo ʻoku teuteu ha kau mēmipa ʻe niʻihi ʻo e kōlomú pe kalasí ke ngāue fakafaifekau. ʻE lava ke ke kole ange ke nau vahevahe e founga ʻoku nau teuteu ai ke ngāue fakafaifekaú. Ke poupouʻi kinautolu ʻi heʻenau ngaahi ngāué, ʻe lava ke ke vahevahe e fehuʻi naʻe pehē ʻe ʻEletā Tēvita A. Petinā ʻokú ne faʻa maʻú: “Ko e hā te u lava ʻo fai ke u maʻu e teuteu lelei taha ke hoko ko ha faifekau taimi kakató?” (“Becoming a Missionary,” Liahona, Nōvema. 2005, 45). ʻE tali fēfē ʻe he kau mēmipa ʻo e kōlomú pe kalasí e fehuʻi ko ʻení? Ko e hā e ngaahi fakakaukau ne ʻomi ʻe ʻEletā Petinaá? ʻE lava ke ke fakaafeʻi ha tokotaha toki ʻosi ngāue fakafaifekau ʻe taha pe lahi ange ke vahevahe e meʻa ne nau fai ke teuteu ai ki he ngāue fakafaifekaú mo e meʻa ʻoku nau fakaʻamu ne nau fakahokó.

Ngāue ʻi he Tui

Poupouʻi ʻa e kōlomú pe kau mēmipa ʻo e kalasí ke nau fakalaulauloto mo lekooti ʻa e meʻa te nau fai ke ngāueʻi ai e ngaahi ongo ne nau maʻu he ʻaho ní. ʻOku felāveʻi fēfē ʻa e lēsoni he ʻaho ní mo e ngaahi taumuʻa fakafoʻituitui kuo nau fokotuʻú? Kapau te nau fie maʻu, ʻe lava ke vahevahe ʻe he kau mēmipa ʻo e kōlomú pe kalasí ʻenau ngaahi fakakaukaú.

Ngaahi Maʻuʻanga Tokoni Poupoú

• Mātiu 28:19–20; Tokāteline mo e Ngaahi Fuakava 18:9–16; 50:13–14; 88:81 (ʻOku tau maʻu ha fatongia ke vahevahe e ongoongoleleí)

• Dieter F. Uchtdorf, “Ko e Lahi Taha ʻIate Kimoutolú,” Liahona, Mē 2017, 78–81

• Carl B. Cook, “Ngāue,” Liahona, Nōvema 2016, 110–12

•   

Ko e Faiako ‘i he Founga ‘a e Fakamoʻuí

Naʻe fakaafeʻi ʻe he Fakamoʻuí ʻEne kau ākongá ke nau fakamoʻoni, ʻi heʻenau fai iá, naʻe ueʻi honau lotó ʻe he Laumālié. ʻI hoʻo faiako fekauʻaki mo e talangofuá, hangē ko ʻení, fakaafeʻi e kau mēmipa ʻo e kōlomú pe kalasí ke vahevahe ʻenau fakamoʻoni ki he mahuʻinga hono tauhi ʻo e ngaahi fekaú. (Vakai, Ko e Faiako ʻi he Founga ʻa e Fakamoʻuí [2016], 11, 32.)