kau finemui ʻoku nau hiva

25 Siulai

Ko e Hā ʻOku Totonu Ke u Talangofua ai ki he Ngaahi Fekau ʻa e ʻOtuá?

Tokāteline mo e Ngaahi Fuakava 81–83

fakaʻilonga fealeaʻaki fakatahá

Fealeaʻaki Fakataha

Tataki ʻe ha mēmipa ʻo e kau palesitenisī fakakōlomú pe fakakalasí; fakafuofua ki ha miniti ʻe 10–20

ʻI he kamataʻanga ʻo e fakatahá, lau fakataha ʻa e Kaveinga ʻo e Kōlomu ʻo e Lakanga Taulaʻeiki Faka-ʻĒloné pe ko e Kaveinga ʻo e Kau Finemuí. Tataki leva ha fealeaʻaki fekauʻaki mo ha ngaahi meʻa hangē ko ʻení, pea palani ha ngaahi founga ke ngāueʻi ai e ngaahi meʻa ne mou aleaʻí (te mou lava ʻo fili ʻi ha fakataha fakapalesitenisī pe ko e hā ʻe aleaʻí):

• Ko ʻetau kōlomú pe kalasí. Ko e hā te tau lava ʻo fai ke fakatupulaki ʻa e uouangatahá ʻi he kau mēmipa ʻo ʻetau kōlomú pe kalasí? Ko e hā ha ngaahi taumuʻa te tau fie ngāueʻi fakataha?

• Ko hotau ngaahi ngafá pe fatongiá. Ko e hā ha meʻa ʻoku tau fai ke vahevahe e ongoongoleleí? Ko e hā ha ngaahi meʻa kuo tau aʻusia ʻi hono fakahoko ʻo e ngāue fakatemipalé mo e hisitōlia fakafāmilí?

• Ko ʻetau moʻuí. Kuo tau mātā fēfē e toʻukupu ʻo e ʻEikí ʻi heʻetau moʻuí? Ko e hā ha meʻa kuó ne ueʻi fakalaumālie kitautolu ʻi heʻetau ako folofola he uike ní?

ʻI he fakaʻosinga ʻo e lēsoní, fakahoko e ngaahi meʻá ni, ʻo ka fie maʻu:

• Fakamoʻoni ki he ngaahi tefitoʻi moʻoni kuo akoʻí.

• Fakamanatu ki he kau mēmipa ʻo e kōlomú pe kalasí e ngaahi palani mo e fakaafe ne fai ʻi he lolotonga e fakatahá.

fakaʻilonga akoʻi e tokāteliné

Akoʻi e Tokāteliné

Tataki ʻe ha taki kakai lalahi pe toʻu tupu; fakafuofua ki ha miniti ʻe 25–35

Teuteuʻi Fakalaumālie Koe

Te tau ongoʻi ʻi ha ngaahi taimi ʻe niʻihi ʻoku fakataputapui ʻe he ngaahi fekau ʻa e ʻOtuá ʻetau tauʻatāiná mo fakangatangata ʻetau tauʻatāina ke filí. Ko hono moʻoní ʻoku fakalahi ʻe he ngaahi fekaú ʻetau tauʻatāiná. Te tau lava ʻo ako ʻi he Tokāteline mo e Ngaahi Fuakava 82:8–10 ʻe tokoniʻi kitautolu ʻe he ngaahi fekaú ke mahino e finangalo ʻo e ʻOtuá, pea ʻi heʻetau talangofuá, ʻe hoko ʻetau ngaahi ngāué “ko ha meʻa ke fakamoʻui ai ʻa [kitautolu].” Ko hono moʻoní, ʻi heʻetau talangofua ki he ʻOtuá, te Ne “haʻisia” ke foaki mai e kotoa ʻo e ngaahi tāpuaki kuó Ne talaʻofa maí (veesi 9–10). Kuo tāpuekina fēfē koe ʻe he Tamai Hēvaní ʻi haʻo talangofua ki Heʻene ngaahi fekaú? Ke ke teuteu ke faiakó, te ke lava ʻo lau e pōpoaki ʻa ʻEletā Teili G. Lenilani “Mohu Tāpuekina” (Liahona, Mē 2019, 70–73) pe fakalaulauloto ki ha niʻihi ʻo e ngaahi maʻuʻanga tokoni ʻi he fakamatala ʻi he Ngaahi Tefito ʻo e Ongoongoleleí “Talangofuá” (topics.ChurchofJesusChrist.org).

finemui ʻoku ako

ʻE lava ke ueʻi kitautolu ʻe he ngaahi sīpinga ʻo e kau tamaioʻeiki faivelenga ʻa e ʻOtuá ʻi he kuohilí, ke tau moʻui angatonu he ʻahó ni.

Ako Fakataha

Mahalo ʻoku fefaʻuhi ha kau mēmipa ʻo hoʻo kōlomú pe kalasí ke talangofua ki ha niʻihi ʻo e ngaahi fekaú. ʻI hoʻo tokoni ke mahino kiate kinautolu e ʻuhinga ʻoku mahuʻinga ai e talangofuá, ʻe lava ke ne ueʻi kinautolu. Hiki e taumuʻa ʻo e lēsoni ko ʻení ʻi he palakipoé pea fakaafeʻi e kau mēmipa ʻo e kōlomú pe kalasí ke nau fevahevaheʻaki e ngaahi talí. Te ke lava ʻo kole ange ke nau kumi ha ngaahi fakakaukau kehe ʻi he Tokāteline mo e Ngaahi Fuakava 82:8–10, ʻa ia mahalo kuo nau ako ʻi he uiké ni. Fili leva ha foʻi ʻekitivitī ʻe taha pe lahi ange mei lalo ke tokoni ke mahino lelei ange kiate kinautolu e ʻuhinga ʻoku mahuʻinga maʻu ai pē ke talangofua ki he ʻOtuá, naʻa mo e taimi ʻoku matuʻaki faingataʻa aí.

• ʻE faingofua ʻaupito ke talangofua ki he ngaahi fekaú ʻi he taimi ʻoku mahino ai kiate kitautolu e ngaahi ʻuhinga ki aí. Ke ako e ʻuhinga ʻoku ʻomi ai ʻe he ʻOtuá ha ngaahi fekaú, ʻe lava ke toe vakaiʻi ʻe he kau mēmipa ʻo e kōlomú pe kalasí e ngaahi fakamatala ʻi he “Maʻuʻanga Tokoni Poupoú” (pe niʻihi kehe ʻokú ke fakakaukau ki aí). ʻE tokoniʻi fēfē kitautolu ʻe he ngaahi potufolofolá ni ʻi he taimi ʻoku faingataʻa ai ke tau talangofua ki ha fekaú? ʻI he fealeaʻaki ko ʻení, te mou lava ʻo lau fakataha e konga “Faá, ʻoua naʻa ngalo e ʻʻuhinga’ ʻo e ongoongoleleí” ʻi he pōpoaki ʻa Palesiteni Tieta F. ʻUkitofa “ʻOua Naʻa Ngalo Au” (Liahona, Nōvema. 2011, 122).

• ʻI he mahino kiate kinautolu ʻokú ke akoʻí, e sīpinga haohaoa ʻa e Fakamoʻuí ʻo e talangofuá, ʻe malava ke ueʻi ai kinautolu ke nau talangofua kakato ange ki he ʻOtuá. Ko e fē ha taimi ne talangofua ai ʻa Sīsū Kalaisi ki he Tamaí, naʻa mo ha ngaahi tūkunga ne faingataʻa? (vakai, Mātiu 4:1–11; Luke 22:39–44). ʻE lava ke maʻu ʻi he Hepelū 11 ha sīpinga ʻo ha kau tangata mo ha kau fafine talangofua. ʻE lava ke fili ʻe hoʻo kōlomú pe kalasí ha taha ʻo e ngaahi sīpinga ko ʻení—pe ko ha ngaahi sīpinga kehe ʻoku nau ʻilo, kau ai ha ngaahi sīpinga mei honau fāmilí—pea vahevahe e meʻa ʻokú ne ueʻi kinautolu fekauʻaki mo e kakai ko ʻení. Ko e hā ne nau fili ai ke talangofua ki he ʻEikí? ʻOku tokoni fēfē mai nai e Fakamoʻuí kiate kitautolu ʻi he taimi ʻoku tau fili ai ke talangofuá?

• Ke tokoni ki he kau mēmipa ʻo e kōlomú pe kalasí ke vakai ki he ngaahi fekaú ko ha ngaahi tāpuaki kae ʻikai ko ha ngaahi kavengá, te ke lava ʻo vahevahe ange e ngaahi akonaki ʻa ʻEletā D. Toti Kulisitofasoni ʻi he “Ngaahi Maʻuʻanga Tokoni Poupoú.” Te ke lava ʻo fakaʻaliʻali pe tā ha fakatātā ʻo ha sitepu pea kole ange kiate kinautolu ʻokú ke akoʻí ke fakahingoa e foʻi sitepu kotoa pē ʻaki ha foʻi fekau ʻe ngali faingataʻa ke mahino ki ha tokotaha kei siʻi mo ne talangofua ki ai. ʻE tokoni fēfē nai e ngaahi lea ʻa ʻEletā Kulisitofasoní ki ha tokotaha ʻoku faingataʻa ke ne tauhi e ngaahi fekaú?

• ʻE lava ke maʻu mo ha ngaahi vitiō kehe fekauʻaki mo e talangofuá ʻi he ChurchofJesusChrist.org pea ʻi he polokalama Gospel Library (vakai, “Ngaahi Maʻuʻanga Tokoni Poupoú”). Te ke lava ʻo vahe ki he mēmipa takitaha ʻo e kalasí pe kōlomú ke nau sio ʻi ha taha ʻo e ngaahi foʻi vitiō ko ʻení kimuʻa he kalasí pea haʻu mateuteu ke vahevahe e meʻa ne nau ako fekauʻaki mo e talangofuá. ʻE lava ke palani ʻe he kōlomú pe kalasí ha foʻi vitiō pē ʻanautolu fekauʻaki mo e talangofua ki he ngaahi fekau ʻa e ʻOtuá. Te nau lava leva ʻo fokotuʻutuʻu ha foʻi ʻekitivitī ke faʻu ha foʻi vitiō pea vahevahe ia ʻi he mītia fakasōsialé.

Ngāue ʻi he Tui

Poupouʻi ʻa e kōlomú pe kau mēmipa ʻo e kalasí ke nau fakalaulauloto mo lekooti ʻa e meʻa te nau fai ke ngāueʻi ai e ngaahi ongo ne nau maʻu he ʻaho ní. ʻOku felāveʻi fēfē ʻa e lēsoni he ʻaho ní mo e ngaahi taumuʻa fakafoʻituitui kuo nau fokotuʻú? Kapau te nau fie maʻu, ʻe lava ke vahevahe ʻe he kau mēmipa ʻo e kōlomú pe kalasí ʻenau ngaahi fakakaukaú.

Ngaahi Maʻuʻanga Tokoni Poupoú

• 1 Nīfai 17:3; Mōsaia 2:41; Tokāteline mo e Ngaahi Fuakava 130:20–21 (ʻOku tāpuekina kitautolu ʻi heʻetau talangofua ki he ngaahi fekaú)

• Teutalōnome 10:12–13; Sione 14:15; 1 Sione 5:1–3 (ʻOku tau talangofua ki he ngaahi fekaú koeʻuhí ʻoku tau ʻofa ki he ʻOtuá)

• Tokāteline mo e Ngaahi Fuakava 93:20 (ʻOku fakaʻatā kitautolu ʻe he talangofuá ke tau maʻu e kānokato ʻo e ʻOtuá)

• “Talangofuá,” ʻi he vahe 3 ʻo e Malangaʻaki ʻEku Ongoongoleleí (2019), 83–84

• Naʻe akoʻi ʻe ʻEletā D. Toti Kulisitofasoni: “ʻOku vakai pē ha niʻihi ki he feilaulaú mo e ngaahi fakangatangata ʻi he talangofua ki he ngaahi fekau ʻo e fuakava foʻou mo taʻengatá, ka ko e niʻihi ko ia ʻoku moʻui ʻo aʻusia iá—ʻoku nau foaki tauʻatāina mo taʻemomou ai ʻenau moʻuí ki he fuakavá—ʻo nau maʻu ha tauʻatāina mo ha fiefia ʻoku lahi angé. ʻI he taimi ʻoku mahino moʻoni ai kiate kitautolú, ʻoku tau toe feinga leva ke fakalahi e ngaahi fekau ʻoku ʻomí kae ʻikai siʻi ange. Ko e fono pe fekau foʻou kotoa pē ʻoku tau ako mo moʻui ʻaki, ʻoku hangē ia ha foʻi kakaʻanga ʻe taha ʻi ha tuʻungá, ʻoku lava ke tau kaka ai ʻo toe māʻolunga ange. Ko hono moʻoní, ko ha moʻui ia ʻoku lelei ʻa e moʻui ʻi he ongoongoleleí” (“Ko e Mālohi ʻo e Ngaahi Fuakavá,” Liahona, Mē 2009, 23).

• “Ko ha Tuʻuʻanga Maʻu,” (vitiō) ChurchofJesusChrist.org

Ko e Faiako ‘i he Founga ‘a e Fakamoʻuí

Naʻe fakaafeʻi ʻe he Fakamoʻuí ʻEne kau ākongá ke nau fakamoʻoni, pea ʻi heʻenau fai iá, naʻe ueʻi honau lotó ʻe he Laumālié. ʻI hoʻo faiakó, fakaafeʻi e kau mēmipa ʻo e kōlomú pe kalasí ke nau vahevahe ʻenau fakamoʻoni ki he mahuʻinga hono tauhi ʻo e ngaahi fekaú.