ol yang woman oli stap long klas

Stap Yusum Kam , Folem Mi—Blong Ol Kworom blong Aronik Prishud mo Ol Yang Woman Klas

?Wanem ol stamba tingting blong kworom mo ol klas miting blong yumi?

Lod i bin givim yu wan tabu tras: Hem i bin singaotem yu blong wok long wan kworom blong Aronik Prishud presidensi o Ol Yang Woman klas presidensi. Pat blong responsabiliti blong yu i blong lid mo kondaktem kworom o ol klas miting long Sandei. Blong mekem hemia, bae i helpem yu blong andastanem from wanem yumi gat ol miting ia.

Kworom blong Aronik Prishud mo Ol Yang Woman klas miting i defren long ol klas blong Jos olsem Sandei Skul o seminari. Long kworom o ol klas miting, yumi mekem moa bitim blong stadi long wan gospel topik. Yumi lan abaot wok we God i bin givim long yumi, mo yumi oganaesem ol memba blong kworom blong yumi o klas blong mekem wok ia long ol hom blong yumi, insaed long Jos, mo long ol komuniti blong yumi. Eksampol, yumi mekem plan blong olsem wanem yumi stap mekem ol rol blong yumi olsem pat blong yut ami blong Lod blong help blong karem Isrel i kam tugeta. Long ol miting ia, yumi no jes tokbaot wok nomo—yumi mekem ol plan blong mekem ol wok ia.

ol yang man long wan klas

Be blong tokbaot plante wok ia, i no minim se yumi lego ol storian long saed blong doktrin i stap blong Sandei Skul nomo. Wanem we i stap, i we, blong stap lanem doktrin long kworom mo Ol Yang Woman miting i impoten—i helpem yumi blong andastanem ol risen from wanem yumi mekem wok. Taem yumi stadi gospel tugeta, ol trutok we yumi stap lanem oli save jenisim hat blong yumi. Yumi save kasem ol kwaet toktok blong Spirit abaot ol wei blong kam antap moa “long bodi blong mo long waes. Mo oltaem God i glad tumas mo ol man tu oli glad tumas” (Luk 2:52). Taem yumi kam blong jenisim moa laef blong yumi long Jisas Kraes mo gospel blong Hem, bae yumi filim blong wantem blong helpem ol narawan long kavenan rod ia, mo tu, helpem ol famli blong yumi, ol fren blong yumi, mo ol memba blong kworom mo blong klas blong yumi.

?Huia i stap lidim ol miting ia?

God i bin singaotem yufala olsem ol kworom mo klas presidensi mo i bin givim atoriti long yufala blong lid. Hemia i from wanem wan memba blong kworom o blong klas presidensi blong yu i mas lidim wanwan miting blong kworom o blong klas. Ol adalt lida oli mas soem rod mo givim sapot, be oli no mas tekova long yufala. Luk long seksen we taetol blong hem “Kaonsel Tugeta” long stat blong wanwan aotlaen long risos ia blong luk ol aedia blong helpem yufala blong save olsem wanem blong lidim wan miting mo winim ol stret stamba tingting blong hem. Yusum ol presidensi miting blong mekem plan blong wei blong lidim ol Sandei miting ia.

?Huia i mas tijim lesen ia?

Ol adalt lida, wan memba blong kworom o klas presidensi, o eni nara memba blong kworom o klas i save tijim ol lesen ia. Olsem kworom o klas presidensi, kaonsel wetem ol adalt lida blong yu abaot huia bae oli asaenem blong tijim ol lesen ia. Tingbaot se ol adalt lida blong yu oli gat fulap blong givim. Lukaotem blong lan aot long ol eksperiens mo testemoni blong olgeta. I gat ol gudfala saed blong stap askem ol yut blong tij—blong stap tij, i save help blong mekem jenis long hat blong olgeta i kam moa dip mo i save bildim wan rilesensip we i moa strong wetem ol nara memba blong kworom o klas. Givim olgeta ol stret janis blong tijim evri pat o pat blong wan lesen, be tingbaot ol nid mo blong ol pipol long kworom o klas blong yu, mo hamas oli save mekem. Eksampol, ol adalt lida oli save tij fulap moa insaed long ol kworom o klas wetem ol yangfala yut o wetem ol yut we oli nogat tumas eksperiens blong stap tijim gospel. Taem oli invaetem ol yut blong tij, wan mama o papa o wan adalt advaesa i mas helpem olgeta blong rere olsem we i nid.

Olgeta we oli givim wok long olgeta blong tij oli save yusum seksen we taetol blong hem “Stap Tijim Doktrin” long wanwan aotlaen long risos ia blong help olgeta blong rere. Insaed long seksen ia i gat ol tingting blong stap tij folem, mo blong stap storian raon long doktrin blong wik ia, be ol tija oli no mas filim se oli mas yusum ol tingting ia nomo. Olsem we Spirit i stap talem, ol tija oli save stretem ol aedia o yusum ol aedia blong olgetawan blong tij long wan wei we bae i mitim ol nid blong ol memba blong kworom o blong klas mo helpem olgeta blong andastanem doktrin.

?Wanem ol topik doktrin we bae yumi storian raon long ol miting blong yumi?

Topik blong wanwan aotlaen blong wik i wan doktrin prinsipol we oli bin jusum blong go wetem riding long Buk blong Momon blong wik ia, we yu save faenem long Kam Folem Mi—Blong Wanwan Man, Woman mo Famli. Long wei ia, ol storian blong doktrin long kworom o ol klas miting bae i sapotem wanem ol yut oli stap lanem long hom.

Nomata oli sapos blong tijim ol aotlaen ia long ol spesifik Sandei, yufala i save storian raon long ol nara doktrin topik folem ol nid blong kworom o klas blong yu.

Risos ia, insaed long hem i gat ol aotlaen blong evri wik taem i gat miting blong Kworom blong Aronik Prishud miting mo ol klas blong Ol Yang Woman. Wanwan taem, maet bae yu nidim blong skipim wan lesen from ol stek konfrens o ol narafala risen.

?Wanem nao i rol blong ol adalt lida blong yumi?

Ol adalt lida blong yufala i gat wan impoten rol insaed long ol klas blong Ol Kworom blong Aronik Prishud mo Ol Yang Woman. Bae hem i gaedem mo advaesem yu long ol lidasip koling blong yu. Bae hem i sapotem mo leftemap tingting blong yu taem yu stap mekem wok blong kworom o blong klas blong yu. Bae hem i tijim yu doktrin, mo bae hem i blesem yu tru long eksampol, eksperiens mo testemoni blong olgeta.