Josef Smit i stap prea

Mi Bin Luk Wan Laet, i kam long Jon McNaughton

10 Jenuware

?From Wanem Fas Visen I Impoten?

Fas Toktok long Doktrin mo Ol Kavenan; Josef Smit—Histri 1:1–26

kaonsel tugeta pikja bokis

Kaonsel Tugeta

Wan memba blong kworom o klas presidensi i lidim; kolosap 10–20 minit

Long stat blong miting, ripitim tugeta Stamba Toktok blong Ol Kworom blong Aronik Prishud o Stamba Toktok blong Ol Yang Woman. Afta, lidim wan toktok storian abaot ol samting we oli stap ia, mo mekem plan blong ol wei blong mekem wanem we yufala i stap toktok raon long hem (yufala i save disaed long wan presidensi miting wanem poen nao blong toktok raon long olgeta):

• Kworom o klas blong yumi. ?Huia i nidim help mo ol prea blong yumi? ?Wanem nao yumi save mekem blong helpem olgeta? ?Huia nao yumi sapos blong invaetem blong kam long wan aktiviti we i stap kam?

• Ol diuti mo responsabiliti blong yumi. ?Wanem ol asaenmen we yumi bin mekem finis? ?Wanem ol asaenmen we yumi nid blong mekem? ?Olsem wanem nao yumi bin invaetem ol narawan blong kam long Kraes, mo olsem wanem nao yumi save invaetem ol narawan naoia?

• Laef blong yumi. ?Wanem eksperiens we yumi bin gat i no longtaem i pas we i bin mekem ol testemoni blong yumi oli kam strong moa? ?Wanem i stap hapen insaed long laef blong yumi, mo olsem wanem nao yumi save sapotem wanwan long yumi?

Long en blong lesen, sapos i stret, mekem ol samting ia:

• Testifae abaot ol prinsipol we yu bin tijim.

• Rimaenem ol memba blong kworom o blong klas abaot ol plan mo invitesen we oli bin kasem long taem blong miting.

tijim doktrin pikja bokis

Tijim Doktrin

Wan adalt lida o yut i lidim; kolosap 25–35 minit

Rere long Yuwan long Saed blong Spirit

Nomata we i ova long 200 yia stat long fas taem we Josef Smit i bin nildaon blong prea long Tabu Bus, ansa we hem i bin kasem i stap tajem bigwan laef blong yumi tedei. Tingting hevi long ol blesing we oli kam insaed long laef blong yu from se Papa mo Pikinini, Tufala i bin kamaot long Josef. ?From wanem hem i impoten blong wanwan long olgeta we yu stap tijim blong oli mas kasem witnes blong olgetawan we i kam tru long Tabu Spirit, long saed blong Fas Visen? ?Olsem wanem bae yu helpem olgeta blong kasem hemia? Maet bae i help blong yu luklukbak long ol mesej blong Epril 2020 jeneral konfrens, we i makem 200 yia aniveseri blong visen blong glori ia.

ol yang woman oli stap long klas

Wanwan yangfala i save kasem wan testemoni blong hemwan abaot Fas Visen.

Stap Lan Tugeta.

From se Josef Smit i bin wan yangfala long taem ia we Fas Visen i bin hapen, olgeta we yu stap tij, maet bae oli save tekem hemia i kambak long olgetawan, long saed blong fasin blong lukaotem trutok. Givim sam taem long ol memba blong kworom o klas blong oli serem tingting mo ol filing blong olgeta abaot Josef Smit—Histri 1:1–26. Ol aktiviti andanit ia, oli save helpem olgeta blong mekem testemoni blong olgeta i kam strong moa se God Papa mo Jisas Kraes, Tufala i bin kamkamaot long Josef Smit.

• ?Wanem trutok blong gospel nao yumi stap lan aot long eksperiens blong Josef Smit long Tabu Bus? Ol memba blong kworom o klas oli save ridim stori blong Josef insaed long Josef Smit—Histri 1: 7–20 mo serem ol trutok we oli faenem. (Eksampol, God i stap harem mo ansarem ol prea; Setan mo paoa blong hem oli ril, be paoa blong God i moa bigwan; revelesen i no stop.) ?Olsem wanem ol trutok ia oli blesem laef blong yumi?

• Yu save askem ol memba blong kworom o blong klas blong luklukbak long ol mesej abaot Fas Visen we oli stap long Epril 2020 jeneral konfrens (luk long Liahona, Mei 2020). Eksampol: oli save luklukbak long mesej blong Presiden Russel M. Nelson, “Lisin Gud long Hem” (Liahona, Mei 2020, 88–92). Invaetem olgeta blong oli serem wanem we oli faenem, mo oli serem ol filing blong olgeta abaot Fas Visen.

• Wanwan long ol Presiden blong Jos oli bin testifae abaot tabu misin blong Profet Josef Smit. Ol memba blong kworom o klas bae oli lanem samting sapos oli ridim ol testemoni blong ol presiden ia insaed long ol lesenbuk ia: Teachings of Presidents of the Church. (Plante long ol lesenbuk ia oli gat wan japta abaot Profet Josef Smit. Blong kasem wan lis blong ol japta ia, luk long Gospel Topics, “First Vision,” topics.ChurchofJesusChrist.org.) Sam dei bifo klas, yu save invaetem ol memba blong kworom o klas blong oli jusum wan long ol Presiden ia mo serem wan toktok we hem i bin talem, we oli save yusum blong tijim wan narawan abaot Fas Visen.

• Tingting blong invaetem ol memba blong kworom mo klas blong stadi long “Restoresen blong Gospel blong Jisas Kraes tru long Josef Smit” long japta 3 blong Preach My Gospel ([2019], 36–38) mo blong praktis blong tijim wanwan long olgeta abaot Fas Visen. Yu save givim jalenj long olgeta blong oli serem eksperiens blong Josef Smit mo yusum sam long ol stret toktok blong hem, we oli save faenem long Josef Smit—Histri 1:16–17.

• Olgeta ia we yu stap tijim olgeta, ?oli save se i gat ol defren stori abaot Fas Visen? Wanwan long ol stori ia i givim ol spesel ditel we i givim wan moa ful save abaot wanem i bin hapen long Tabu Bus. Yu save talemsot seksen ia: “Overview” we i stap long wan raeting insaed long Gospel Topics, “First Vision Accounts” (topics.ChurchofJesusChrist.org). Afta, yu save askem olgeta we yu stap tijim blong luklukbak long ol sot stori blong ol fofala histri we oli faenem anda long “Accounts of the First Vision.” Oli save ridim tu sam long ol stret histri we oli stap insaed long ol link ia. ?Wanem nao oli faenem we i mekem testemoni blong olgeta abaot Fas Visen i kam strong moa? Yu save wajem vidio ia: “Ask of God: Joseph Smith’s First Vision” (ChurchofJesusChrist.org), we i stap soem Fas Visen wetem ol ditel we oli stap long ol histri ia. ?From wanem hem i gud blong gat plante defren stori abaot Fas Visen? ?Olsem wanem ol stori o histri ia oli helpem yumi blong andastanem gud moa Papa long Heven mo Jisas Kraes?

Mekem Samting Wetem Fet

Leftemap tingting blong ol memba blong kworom o blong klas blong tingting hevi mo raetemdaon wanem bae oli mekem blong mekem folem ol strong tingting mo filing we oli kasem tedei. ?Olsem wanem lesen blong tedei i go wetem ol gol blong olgetawan, we oli bin mekem? Sapos oli wantem, ol memba blong kworom o blong klas oli save serem ol aedia blong olgeta.

Ol Sapot Risos

• Matiu 3:13–17; Ol Wok 7:54–60; 3 Nifae 11:3–10 (God Papa mo Jisas Kraes, Tufala i soemaot Tufala long ol pipol long wol)

• “?Wanem nao yumi lanem abaot huia God, aot long Fas Visen?” Vidio we i kamaot long “Fes tu Fes wetem Presiden Eyring mo Elda Holland” (worldwide youth broadcast, Mar. 4, 2017), FacetoFace.ChurchofJesusChrist.org

Tij Folem Wei blong Sevya

Sevya i bin invaetem olgeta we oli bin stap folem Hem blong oli testifae se ol tijing blong Hem oli tru. Taem oli bin stap mekem hemia, Spirit i tajem hat blong olgeta. ?Olsem wanem yu save leftemap tingting blong olgeta we yu stap tijim blong oli talem testemoni blong olgeta? (Luk long Teaching in the Savior’s Way [2016], 11.)

Luk tu long “Prepare to Teach” (video, ChurchofJesusChrist.org).