Ol yang woman mo ol yang man long fored blong wan tempol

24 Jenuware

?Olsem Wanem Mi Save Mekem Mi Rere blong Tekpat long “Gudfala Wok” blong God?

Doktrin mo Ol Kavenan 3–5

kaonsel tugeta pikja bokis

Kaonsel Tugeta

Wan memba blong kworom o klas presidensi i lidim; kolosap 10–20 minit

Long stat blong miting, ripitim tugeta Stamba Toktok blong Ol Kworom blong Aronik Prishud o Stamba Toktok blong Ol Yang Woman. Afta, lidim wan toktok storian abaot ol samting we oli stap ia, mo mekem plan blong ol wei blong mekem wanem we yufala i stap toktok raon long hem (yufala i save disaed long wan presidensi miting wanem poen nao blong toktok raon long olgeta):

• Kworom o klas blong yumi. ?Wanem nao yumi save mekem blong bildimap yuniti bitwin ol memba blong kworom o ol memba blong klas? “?Wanem nao ol gol we yumi laekem blong wok tugeta long hem?

• Ol diuti mo responsabiliti blong yumi. ?Wanem nao yumi stap mekem blong serem gospel? Wanem nao ol eksperiens we yumi bin gat taem yumi mekem wok blong tempol mo famli histri?

• Laef blong yumi. ?Long wanem wei nao yumi bin luk han blong God insaed long laef blong yumi? ?Wanem nao i givim insperesen long yumi long skripja stadi blong yumi long wik ia?

Long en blong lesen, sapos i stret, mekem ol samting ia:

• Testifae abaot ol prinsipol we yu bin tijim.

• Rimaenem ol memba blong kworom o blong klas abaot ol plan mo invitesen we oli bin kasem long taem blong miting.

tijim doktrin pikja bokis

Tijim Doktrin

Wan adalt lida o yut i lidim; kolosap 25–35 minit

Rere long Yuwan long Saed blong Spirit

Taem we ol fas Sent oli stat blong harem mesej blong gospel we i kambak, plante oli bin wantem save wanem oli save mekem blong helpem wok ia. Papa blong Profet Josef Smit, Josef Smit Senia, i bin wan we i bin askem blong save tingting we Lod i gat long hem. Ansa blong Lod i stap long Doktrin mo Ol Kavenan 4; hem i givim insperesen long plante jeneresen blong ol pipol blong oli givim seves wetem evri “ful hat, ful paoa blong tingting, ful maen mo ful paoa blong bodi” (ves 2). I nomata se wan i wantem givim seves long wan misin, o long eni koling, o responsabiliti insaed long Jos, ol kwalifikesen blong givim seves oli semmak: Wan hat mo tingting blong wantem wok blong God, we i kam wetem fet, hop, jareti mo lav (luk long Doktrin mo Ol Kavenan 4:2–6). ?Olsem wanem yu save helpem ol memba blong kworom o klas blong oli gat strong tingting blong wantem wok blong Lod mo rere from ol fiuja janis we bae oli kam, blong givim seves?

Blong mekem yuwan i rere blong lidim ol memba blong kworom o klas long stadi ia, yu save ridim mo tingting hevi long wan o moa long wan mesej we yu save faenem insaed long “Ol Sapot Risos.”

ol yang man oli visitim wan olfala man

Blong stap kea long olgeta we oli stap long nid i pat blong wok ia blong fasin blong sevem man.

Stap Lan Tugeta.

Maet ol memba blong kworom o klas oli kasem insperesen blong givim seves long Lod wetem strong tingting taem oli ridim Doktrin mo Ol Kavenan 3–5 long wik ia. Blong leftemap tingting blong olgeta blong serem ol tingting blong olgeta, yu save invaetem olgeta blong traem tingting, insaed long maen blong olgeta, se oli stap aplae long wan wok. ?Wanem kwalifikesen bae oli raetem long resume blong olgeta, o wanem bae oli talem long wan intaviu blong wok? Oli save luklukbak long Doktrin mo Ol Kavenan 4 mo faenem ol kwalifikesen we Lod i askem blong olgeta we oli wantem tekpat long wok blong Hem. Jusum wan, o moa long wan long ol aktiviti andanit ia blong helpem olgeta we yu stap tijim blong tingting hevi long wanem oli save mekem blong tekpat moa fulwan long “gudfala wok” ia blong God (Doktrin mo Ol Kavenan 4:1).

• Blong helpem olgeta we yu stap tijim blong oli lanem olsem wanem oli save tekpat blong mekem wok ia blong fasin blong sevem man i go hariap, raetem olgeta mining blong wok blong fasin blong sevem man antap long bod: God i stap invaetem evriwan blong go long Kraes mo help long wok blong Hem taem oli stap laef folem gospel blong Jisas Kraes, stap kea long olgeta we oli stap long nid, stap invaetem evriwan blong kasem gospel, mo joenem ol famli blong taem we i no save finis. Invaetem ol memba blong kworom o klas blong toktok raon long wei we ol fasin we oli putum long lis long Doktrin mo Ol Kavenan 4 bae i helpem olgeta blong mekem wanwan pat ia blong wok blong fasin blong sevem man. Serem ol yut i go long ol grup; letem wanwan grup i toktok raon long ol wei we oli save developem ol fasin ia. ?Wanem nao yumi save mekem blong mekem wok blong fasin blong sevem man i wan moa impoten pat insaed long laef blong yumi?

• Invaetem ol memba blong kworom o klas blong luklukbak long wan long ol mesej we i stap long “Ol Sapot Risos,” mo lukaotem wan kwot we oli save serem abaot wei blong stap fetful blong givim seves long Lod insaed long ol koling, ol asaenmen, o ol nara responsabiliti insaed long Jos. Askem olgeta blong serem kwot we oli bin jusum, mo from wanem oli faenem se hemia i gat mining. ?Olsem wanem nao bae oli yusum o praktisim wanem we oli bin lanem, naoia mo long fiuja?

• Sam long ol memba blong kworom o klas, maet oli stap rere blong givim seves olsem ol misinari. Yu save askem olgeta blong serem olsem wanem oli stap mekem olgeta oli rere blong givim seves. Blong leftemap tingting blong olgeta long ol hadwok blong olgeta, yu save serem kwestin we Elda David A. Bednar i bin talem se hem i stap kasem oltaem: “?Wanem nao mi save mekem blong rere long wan wei we i wok gud blong givim seves olsem wan fultaem misinari?” (“Becoming a Missionary,” Liahona, Nov. 2005, 45). ?Olsem wanem ol memba blong kworom o klas oli save ansarem kwestin ia? ?Wanem niu tingting nao Elda Bednar i givim? Yu save invaetem wan o moa long wan riten misinari blong serem wanem we oli bin mekem blong rere from wan misin, mo wanem we oli bin ting afta, se oli sapos blong mekem.

Mekem Samting Wetem Fet

Leftemap tingting blong ol memba blong kworom o blong klas blong tingting hevi mo raetemdaon wanem bae oli mekem blong mekem folem ol strong tingting mo filing we oli kasem tedei. ?Olsem wanem lesen blong tedei i go wetem ol gol blong olgetawan, we oli bin mekem? Sapos oli wantem, ol memba blong kworom o blong klas oli save serem ol aedia blong olgeta.

Ol Sapot Risos

• Matiu 28:19–20; Doktrin mo Ol Kavenan 18:9–16; 50:13–14; 88:81 (Yumi gat wan diuti blong serem gospel)

• Dieter F. Uchtdorf, “Olgeta we Oli Moa Hae long Medel blong Yufala,” Liahona, Epril 2017, Churchofjesuschrist.org/general-conference/conferences?lang=bis

• Carl B. Cook, “Givim Seves,” https://www.churchofjesuschrist.org/general-conference/2016/10?lang=bis, Okt 2016

• “Preparing to Serve,” ChurchofJesusChrist.org/topics/missionary-preparation

Tij Folem Wei blong Sevya

Sevya i bin invaetem ol disaepol blong Hem blong oli testifae, mo taem oli bin mekem, Spirit i tajem hat blong olgeta. Taem yu stap tij abaot fasin blong stap obei, eksampol, invaetem ol memba blong kworom o klas blong oli serem ol testemoni blong olgeta abaot hamas nao i impoten blong stap obei long ol komanmen. (Luk long Teaching in the Savior’s Way [2016], 11, 32.)