Jon Baptaes i givim Aronik Prishud

“Antap long Hed blong Yufala, Ol Wokman we Yumi Wok Tugeta” i kam long Linda Curley Christensen mo Michael T. Malm

14 Febwari

?Wanem Hem I Prishud?

Doktrin mo Ol Kavenan 12–13; Josef Smit—Histri 1:66–75

kaonsel tugeta pikja bokis

Kaonsel Tugeta

Wan memba blong kworom o klas presidensi i lidim; kolosap 10–20 minit

Long stat blong miting, ripitim tugeta Stamba Toktok blong Ol Kworom blong Aronik Prishud o Stamba Toktok blong Ol Yang Woman. Afta, lidim wan toktok storian abaot ol samting we oli stap ia, mo mekem plan blong ol wei blong mekem wanem we yufala i stap toktok raon long hem (yufala i save disaed long wan presidensi miting wanem poen nao blong toktok raon long olgeta):

• Kworom o klas blong yumi. ?Wanem nao ol aktiviti we yumi jes gat i no longtaem? ?Oli bin sakses? ?Wanem i bin go gud, mo olsem wanem yumi save mekem gud moa?

• Ol diuti mo responsabiliti blong yumi. ?Huia i nidim seves blong yumi? ?Olsem wanem nao yumi save helpem olgeta?

• Laef blong yumi. ?Wanem nao ol gol we yumiwan i stap wok long olgeta? ?Wanem eksperiens nao yumi save serem? ?Wanem blesing nao yumi bin kasem?

Long en blong lesen, olsem we i stret, mekem olgeta samting ia:

• Testifae abaot ol prinsipol we yu bin tijim.

• Rimaenem ol memba blong kworom o blong klas abaot ol plan mo invitesen we oli bin kasem long taem blong miting.

tijim doktrin pikja bokis

Tijim Doktrin

Wan adalt lida o yut i lidim; kolosap 25–35 minit

Rere long Yuwan long Saed blong Spirit

Taem yu stap rid abaot Aronik Prishud we i kambak long Doktrin mo Ol Kavenan 13, traem ridim tru long ae blong olgeta ia we yu stap tijim olgeta. ?Olgeta ia oli andastanem paoa blong prishud insaed long laef blong olgeta? ?Long wanem wei nao ol prishud odinens, olsem baptaes mo sakramen, oli bin helpem yu blong kasem paoa blong Sevya. Tingabaot ol eksperiens we yu save serem. Bong mekem yuwan i rere blong tij abaot prishud, tingting blong stadi long ol skripja we oli putum i stap long aotlaen blong wik ia insaed long Kam Folem Mi—Blong Wanwan Man, Woman mo Famli, mo long “Prishud” insaed long Gaed long Ol Skripja (olskripja.ChurchofJesusChrist.org).

yang man i stap ridim ol skripja long klas

Ol skripja oli helpem yumi blong andastanem olsem wanem prishud i blesem laef blong yumi.

Stap Lan Tugeta.

Blong statem wan toktok storian abaot prishud, yu save invaetem ol memba blong kworom o klas blong serem wanem oli save abaot restoresen blong Aronik Prishud, wetem wanem oli bin ridim long wik ia insaed long Doktrin mo Ol Kavenan 13 mo Josef Smit—Histri 1:66–75. Soem wan pikja we i soem restoresen blong Aronik Prishud (luk long Gospel Art Buk, [2009] namba 93], mo invaetem ol memba blong kworom o klas blong serem wanem we oli save abaot taem ia. ?From wanem yumi talem tangkyu se oli putumbak prishud? Olgeta aktiviti ia oli save helpem olgeta we yu stap tijim blong oli andastanem gud moa wanem hem i prishud, mo blong oli save olsem wanem yumi kasem blesing tru long prishud ia.

• ?Olsem wanem ol memba blong kworom o klas bae oli eksplenem wanem hem i prishud long wan we i neva harem abaot hemia bifo? Blong helpem olgeta, yu save raetem sam kwestin long bod we ol pipol oli save gat abaot prishud, olsem ?Wanem hem i prishud? ?Olsem wanem nao wan i kasem prishud? ?Olsem wanem nao prishud lida i sapos blong mekem samting? ?Olgeta we oli holem prishud, oli mekem wanem? Invaetem olgeta we yu stap tijim blong lukaotem ol ansa blong olgeta insaed long ol skripja mo ol nara risos we oli save faenem insaed long “Ol Sapot Risos,” mo blong oli raetem ansa blong olgeta long bod. Yu save askem olgeta blong serem ol blesing we oli bin kam insaed long laef blong olgeta from prishud ia. Mo tu, yu save soem mo toktok raon long vidio ia: “How the Priesthood Works” (ChurchofJesusChrist.org; luk tu long Dale G. Renlund, “Prishud mo Paoa blong Atonmen blong Sevya,” https://www.churchofjesuschrist.org/general-conference/2017/10?lang=bis, Okt 2017).

• Sapos yu stap tijim olgeta we oli holem Aronik Prishud, bae i gud blong oli luklukbak long mesej blong Brata Douglas D. Holmes, “Wanem we Evriwan we Oli Kasem Aronik Prishud Oli Nidim blong Andastanem:,” (Liahona Mei 2018, 50–53). Yu save givim wok long wanwan memba blong kworom blong luklukbak long ol fas seven paragraf blong mesej, o wan long ol nara fo seksen. Invaetem wanwan long olgeta blong lukaotem wan samting we hem i filim se evriwan we oli holem Aronik Prishud oli nidim blong andastanem. Givim hem wan janis blong serem wanem hem i bin lanem, mo blong hem i eksplenem from wanem hem i jusum tijing ia.

• Sapos yu stap tijim ol yang woman, yu save serem mesej blong Presiden Russel M. Nelson: “Ol Rij Samting long Saed blong Spirit,” we hem i givim long olgeta (Liahona, Nov 2019, 76–79). Yu save askem ol memba blong klas blong luklukgud insaed long mesej blong hem mo faenem wan samting we oli save mekem i moa gud moa blong “yusum fulwan ol paoa blong Sevya” insaed long laef blong olgeta (pej 77). ?Wanem nao Presiden Nelson i stap tijim abaot hao yumi save yusum paoa blong prishud? ?Olsem wanem prishud paoa ia i stap blesem yumi? Leftemap tingting blong ol yang woman blong tingting long wei we bae oli tekem aksen folem invitesen blong Presiden Nelson: “Mi talem strong long yufala blong stadi wetem prea long evri trutok we yu save faenem abaot prishud paoa” (pej 79).

Mekem Samting Wetem Fet

Leftemap tingting blong ol memba blong kworom o blong klas blong tingting hevi mo raetemdaon wanem bae oli mekem blong mekem folem ol strong tingting mo filing we oli kasem tedei. ?Olsem wanem lesen blong tedei i go wetem ol gol blong olgetawan, we oli bin mekem? Sapos oli wantem, ol memba blong kworom o blong klas oli save serem ol aedia blong olgeta.

Ol Sapot Risos

• Doktrin mo Ol Kavenan 84:17–22; 107:1–5 (Prishud, hem i paoa mo atoriti blong God)

• Hibrus 5:4; Ol Toktok blong Bilif 1:5 (Olgeta we oli holem prishud, God i singaotem olgeta mo wan we i gat atoriti nao i odenem olgeta)

• Doktrin mo Ol Kavenan 121:34–46 (Paoa mo atoriti blong prishud i save wok nomo folem ol prinsipol blong stret mo gud fasin)

• Matiu 3:1–6; 28:16–19; Jon 15:16; Doktrin mo Ol Kavenan 12:3–4 (Ol man mo ol woman we oli klin inaf oli prijim gospel)

• Ol Wok 3:1–8; Jemes 5:14–15 (Olgeta we oli holem prishud oli givim ol blesing blong hilim olgeta we oli sik mo gat hadtaem)

• 3 Nifae 11:21–22; 18:1–5; Doktrin mo Ol Kavenan 107:20 (Olgeta we oli holem prishud oli mekem ol odinens)

• Doktrin mo Ol Kavenan 65:2; 107:18–21 (Olgeta we oli holem prishud nao oli help blong lidim Jos)

• “Aronik Prishud,” “Melkesedek Prishud,” “Prishud,” insaed long Stap Tru long Fet (2004), 8–9, 118–119, 148–153

Tij Folem Wei blong Sevya

Sevya i tijim ol disaepol blong Hem blong oli tanem olgeta long skripja blong kasem ansa long ol kwestin, mo blong kasem paoa long saed blong spirit. ?Olsem wanem nao yu save leftemap tingting blong olgeta we yu stap tijim blong oli tanem olgeta long ol skripja blong oli faenem ol ansa long ol kwestin mo jalenj blong olgeta? (Luk long Teaching in the Savior’s Way [2016], 30.)