yangfala gel i stap stadi

28 Febwari

?Hem I Minim Wanem blong Sakem Sin?

Doktrin mo Ol Kavenan 18–19

kaonsel tugeta pikja bokis

Kaonsel Tugeta

Wan memba blong kworom o klas presidensi i lidim; kolosap 10–20 minit

Long stat blong miting, ripitim tugeta Stamba Toktok blong Ol Kworom blong Aronik Prishud o Stamba Toktok blong Ol Yang Woman. Afta, lidim wan toktok storian abaot ol samting we oli stap ia, mo mekem plan blong ol wei blong mekem wanem we yufala i stap toktok raon long hem (yufala i save disaed long wan presidensi miting wanem poen nao blong toktok raon long olgeta):

• Kworom o klas blong yumi. ?Huia i niu long wod blong yumi, mo olsem wanem nao yumi save helpem olgeta blong filim welkam? ?Wanem nao yumi stap mekem blong mekem se taem blong yumi long kworom o miting long klas i gat mining?

• Ol diuti o responsabiliti blong yumi. ?Wanem nao sam diuti mo responsabiliti we yumi gat olsem ol yang man mo ol yang woman? ?Olsem wanem nao yumi save mekem i kam moa gud?

• Laef blong yumi. ?Wanem nao yumi stap mekem blong kam moa olsem Jisas Kraes mo kasem paoa blong Hem long laef blong yumi? ?Wanem nao yumi stap mekem blong helpem ol famli blong yumi blong kam long Hem?

Long en blong lesen, sapos i stret, mekem olgeta samting ia:

• Testifae abaot ol prinsipol we yu bin tijim.

• Rimaenem ol memba blong kworom o blong klas abaot ol plan mo invitesen we oli bin kasem long taem blong miting.

tijim doktrin pikja bokis

Tijim Doktrin

Wan adalt lida o yut i lidim; kolosap 25–35 minit

Rere long Yuwan long Saed blong Spirit

Hem i had blong ridim Doktrin mo Ol Kavenan 19:16–19 mo no filim lav we Sevya i gat long yumi. Long ol ves ia, Hem i tokbaot gud safaring we Hem i bin gotru long Hem taem Hem i bin pem praes from ol sin blong yumi, mo talemaot from wanem Hem i glad blong safa i bigwan olsem—“blong [yumi] no save safa sapos [yumi] sakem sin.” Fasin blong sakem sin i wan blesing we Sevya i bin mekem i posibol. Hem i wan hadwok we i hapen oltaem, i hapen evri dei blong tanem baksaed long sin mo tanem yumi i fesem God. Hem i pat blong plan blong Papa long Heven blong helpem yumi gobak long Hem. Taem yumi andastanem olsem wanem blong sakem sin, i save helpem yumi blong kam klin long ol sin blong yumi, jenisim hat mo maen blong yumi, mo kam kolosap moa long God.

?Olsem wanem nao fasin blong sakem sin i bin helpem yu blong kam kolosap moa long Papa long Heven? ?Olsem wanem yu save helpem olgeta we yu stap tijim olgeta blong oli wantem sakem sin? ?Olsem wanem nao yu save helpem olgeta blong luk se fasin blong sakem sin i wan evri dei hadwok mo i no jes blong taem yumi mekem ol bigfala sin? Taem yu stap rere blong tij, tingting blong stap stadi long mesej blong Presiden Russel M. Nelson: “Yumi Save Mekem Gud Moa mo Stap Gud Moa” (Liahona, Mei 2019, 67–69).

Jisas Kraes i stap prea

Kraes long Getsemane, i kam long Harry Anderson

Stap Lan Tugeta.

Evri profet, stat long stat, oli bin askem long ol pipol blong oli sakem sin. Be, maet i no gat wan invitesen we i tajem hat moa bitim invitesen blong Sevya we i stap long Doktrin mo Ol Kavenan 19:15–19, we maet ol yut oli bin ridim long wik ia. Mebi yu save askem olgeta wanem oli lanem abaot Sevya aot long ol ves ia. ?Wanem nao ol ves ia oli talem abaot hamas i impoten, long ae blong Lod, blong yumi sakem sin? Olgeta aedia ia, oli save helpem olgeta we yu stap tijim blong luk fasin blong sakem sin olsem wan evri dei blesing insaed long laef blong olgeta.

• Blong helpem ol memba blong kworom o klas blong oli andastanem olsem wanem fasin blong sakem sin i blesem laef blong olgeta, yu save stat taem yu askem olgeta kwestin i: ?Olsem wanem ol hadwok blong mi blong sakem sin oli wok, o karem frut? ?Olsem wanem nao Sevya i stap helpem mi blong jenis? Antap long hemia blong kasem fogivnes from ol sin blong yumi, ?wanem nara blesing nao i kam from yumi sakem sin? Invaetem ol memba blong klas blong ridim wan, o moa long wan long ol skripja insaed long “Ol Sapot Risos,” mo lukaotem ol ansa long ol kwestin ia. ?Wanem nao oli bin faenem? Olsem pat blong toktok storian insaed long klas, yu save serem vidio ia, “Repentance: A Joyful Choice” (ChurchofJesusChrist.org).

• Plante long ol yang pipol oli no andastanem gud se i minim wanem blong sakem sin. Maet oli no wantem save long fasin blong sakem sin, o oli ting se hem i blong ol bigfala sin nomo. Blong help blong stretem rong andastaning ia, yu save invaetem ol memba blong kworom o klas blong oli stadi sam pat blong mesej blong Presiden Russel M. Nelson: “Yumi Save Mekem Gud Moa mo Stap Gud Moa” (Liahona, Mei2019, 67–69), mo lukaotem ol sentens we bae i helpem olgeta blong andastanem mining blong sakem sin. ?Wanem nao oli faenem we i helpem olgeta blong tingting abaot fasin blong sakem sin long wan niu wei? ?Wanem blesing nao Presiden Nelson i promesem long olgeta we oli sakem sin?

• ?Olsem wanem yu save helpem olgeta we yu stap tijim blong oli andastanem from wanem mo olsem wanem yumi mas sakem sin? Mesej blong Presiden Dallin H. Oaks: “Fasin blong Sakem Sin I Klinim Mi” (Liahona Mei 2019, 91–94) i save help. Yu save serem kworom o klas long ol fofala grup mo givim wok long wanwan grup blong ridim wan long ol fofala seksen blong toktok blong Presiden Oaks. Afta, wanwan grup i save presentem long sot toktok wanem we oli bin ridim, i go long ol nara grup, mo ridim tu eni skripja we i kamaot long mesej ia we i sapotem wanem we oli bin lanem. Yu save endem taem yu askem ol memba blong kworom o klas blong oli serem testemoni blong olgeta abaot hamas, insaed long plan blong God, i impoten blong sakem sin.

Mekem Samting Wetem Fet

Leftemap tingting blong ol memba blong kworom o blong klas blong tingting hevi mo raetemdaon wanem bae oli mekem blong mekem folem ol strong tingting mo filing we oli kasem tedei. ?Olsem wanem lesen blong tedei i go wetem ol gol blong olgetawan, we oli bin mekem? Sapos oli wantem, ol memba blong kworom o blong klas oli save serem ol aedia blong olgeta.

Ol Sapot Risos

• 2 Nifae 31:13; Inos 1:5–9; Mosaea 4:9–12; 27:23–26, 35; Alma 19:33; 36:18–21, 24; 37:9; Hileman 15:7–8; Moronae 6:8; Doktrin mo Ol Kavenan 58:42–43; 64:9–10 (Ol skripja abaot fasin blong sakem sin)

• Doktrin mo Ol Kavenan 18:10–16 (Fasin blong sakem sin i tekem glad i kam)

• “Fasin blong Sakem Sin,” insaed long Blong Ol Yut Oli Kam Strong (2011), 28–29

• “Repentance through the Atonement of Jesus Christ,” insaed long japta 3 blong Preach My Gospel (2019), 62–63

• “Repentance Is a Blessing to All of Us,” “Atonement—Not a One-Time Thing” (vidio), ChurchofJesusChrist.org

Tij Folem Wei blong Sevya

Sevya i bin invaetem ol narafala man blong tekem aksen wetem fet mo blong laef folem ol trutok we Hem i bin tijim. ?Wanem nao yu save mekem blong helpem olgeta we yu stap tijim blong luk paoa blong sakem sin evri dei? (Luk long Teaching in the Savior’s Way [2016], 31, 35.)