famli we i stap stadi long skripja

14 Maj

?Olsem Wanem Ol Tabu Rol blong Ol Man mo Rol blong Ol Woman Oli Joen mo Kam Komplitim Wanwan long Olgeta?

Doktrin mo Ol Kavenan 23–26

kaonsel tugeta pikja bokis

Kaonsel Tugeta

Wan memba blong kworom o klas presidensi i lidim; kolosap 10–20 minit

Long stat blong miting, ripitim tugeta Stamba Toktok blong Ol Kworom blong Aronik Prishud o Stamba Toktok blong Ol Yang Woman. Afta, lidim wan toktok storian abaot ol samting we oli stap ia, mo mekem plan blong ol wei blong mekem wanem we yufala i stap toktok raon long hem (yufala i save disaed long wan presidensi miting wanem poen nao blong toktok raon long olgeta):

• Kworom o klas blong yumi. ?Huia i nidim help mo ol prea blong yumi? ?Wanem nao yumi save mekem blong helpem olgeta? ?Huia nao yumi sapos blong invaetem blong kam long wan aktiviti we i stap kam?

• Ol diuti mo responsabiliti blong yumi. ?Wanem ol asaenmen we yumi bin mekem finis? ?Wanem ol asaenmen we yumi nid blong mekem? ?Olsem wanem nao yumi bin invaetem ol narawan blong kam long Kraes, mo olsem wanem nao yumi save invaetem ol narawan naoia?

• Laef blong yumi. ?Wanem eksperiens we yumi bin gat i no longtaem i pas we i bin mekem ol testemoni blong yumi oli kam strong moa? ?Wanem i stap hapen insaed long laef blong yumi, mo olsem wanem nao yumi save sapotem wanwan long yumi?

Long en blong lesen, sapos i stret, mekem ol samting ia:

• Testifae abaot ol prinsipol we yu bin tijim.

• Rimaenem ol memba blong kworom o blong klas abaot ol plan mo invitesen we oli bin kasem long taem blong miting.

tijim doktrin pikja bokis

Tijim Doktrin

Wan adalt lida o yut i lidim; kolosap 25–35 minit

Rere long Yuwan long Saed blong Spirit

Papa long Heven i givim long ol man mo ol woman ol ikwol impoten rol blong mekem plan blong Hem i kamtru. Olgeta rol ia, oli komplitim wanwan long olgeta. Blong helpem ol man mo ol woman blong mekem ol rol ia, Hem i givim olgeta ol presen mo ol paoa blong mekem samting we i blong olgeta wanwan nomo. Maet ol memba blong kworom o klas oli bin stadi long Doktrin mo Ol Kavenan 25 long wik ia. Long revelesen ia, Lod i givim kaonsel long Ema Smit abaot impoten wok blong hem insaed long Restoresen blong gospel, mo i eksplenem olsem wanem Josef mo Ema oli save sapsapotem tufala bakegen. ?Wanem eksampol nao yu bin luk long ol man mo ol woman we oli stap wok tugeta long ol wei we oli komplitim olgeta blong mekem wok blong Lod? ?Olsem wanem yu givim insperesen long ol yang man o ol yang woman we yu stap tijim blong andastanem ol tabu rol blong olgeta, mo wok tugeta blong bildimap kingdom blong God?

Taem yu stap rere blong tij, tingting blong luklukbak long “Famli: Wan Ofisol Toktok I Go long Wol” (ChurchofJesusChrist.org/study?lang=bis) mo mesej blong Presiden Linda K. Burton “We’ll Ascend Together” (Liahona, May 2015, 29–32).

Ol yang woman mo ol yang man oli dekoretem wan kek

Ol yang man mo ol yang woman oli save lan blong wok tugeta blong bildim kingdom blong God.

Stap Lan Tugeta.

Blong statem wan toktok storian abaot wei we ol man mo ol woman oli wok tugeta insaed long kingdom blong God, tingting blong invaetem ol memba blong kworom o blong klas blong luklukbak long Doktrin mo Ol Kavenan 25. ?Wanem nao Lod i talem abaot ol responsabiliti we Ema mo Josef i gat long wanwan long tufala? ?Wanem nao yumi save lanem aot long seksen 25 abaot wei we ol hasban mo ol waef oli mas wok tugeta? Yu save givim olgeta we yu stap tijim sam pepa blong oli raetem wanem we oli faenem, mo mekem olgeta oli serem ol tingting blong olgeta. Afta, jusum aot long olgeta aktiviti ia blong helpem olgeta blong andastanem gud moa olsem wanem God i wantem luk se ol boe mo ol gel blong Hem oli wok tugeta.

• ?Yu yu save tingting abaot wan eksampol blong helpem ol memba blong kworom o klas blong oli andastanem wanem nao “komplitim” i minim? Eksampol: oli save tokbaot ol kala we oli komplitim olgeta, o toktok raon long hao nao ol defren voes long wan kwaea i mekem miusik i moa naes. ?Olsem wanem ol tabu rol blong ol man mo tabu rol blong ol woman oli joen mo kam komplitim wanwan long olgeta? Olsem wan kworom o klas, tugeta, ridim tufala fas paragraf blong seksen ia we oli singaotem “Lifting and Helping in Our Complementary Roles” we i kam long mesej blong Presiden Linda K. Burton “We’ll Ascend Together” (Liahona, May 2015, 30). O yu save invaetem wan mared kapol blong kam visitim kworom o klas blong yu blong tokbaot olsem wanem tufala i bin helhelpem tufala blong mekem rol blong tufala, mo olsem wanem Lod i bin helpem tufala. ?Wanem nao yumi lanem, aot long mesej blong Presiden Burton, o kapol ia, abaot wei we ol man mo ol woman oli sapsapotem wanwan long olgeta insaed long ol famli?

• Ol skripja we oli stap long lis insaed long “Ol Sapot Risos” oli save helpem ol memba blong kworom o klas blong lanem moa abaot ol responsabiliti blong ol man mo ol woman insaed long ol famli. Yu save givim wok long wanwan memba blong kworom o klas blong oli ridim wan long ol skripja ia. Invaetem olgeta blong oli serem ol ves ia mo blong oli tokbaot ol responsabiliti we oli tokbaot long ol skripja ia. ?Wanem nao ol skripja ia oli stap tij abaot ol responsabiliti blong ol papa mo mama? ?Olsem wanem ol hasban mo ol waef oli helpem wanwan long olgeta blong mekem olgeta tabu responsabiliti ia? ?Olsem wanem Sevya i helpem olgeta blong oli gat sakses? ?Olsem wanem nao ol pikinini oli save helpem olgeta?

• Blong helpem kworom o klas blong yu blong andastanem olsem wanem ol man mo ol woman oli save komplitim olgeta olsem ol ikwol patna, raetem ol heding ia long bod: responsabiliti blong Papa mo responsabiliti blong Mama. Askem ol memba blong kworom o klas blong oli luklukgud insaed long nambaseven paragraf blong “Famli: Wan Ofisol Toktok I Go long Wol” mo raetem wanem we oli faenem anda long stret heding. ?Wanem nao yumi lanem abaot ol tabu rol blong ol papa mo mama? ?Hem i minim wanem se ol papa mo ol mama oli mas helhelpem wanwan long olgeta “olsem ol ikwol patna” blong mekem ol responsabiliti ia oli kamtru? ?Wanem eksampol nao yumi save serem aot long laef blong yumi we i soem se ol papa mo ol mama oli stap mekem rol blong olgeta mo stap helhelpem wanwan long olgeta olsem ol ikwol patna? Yu save toktok raon tu long ol wei we ol yang pipol oli save rere naoia blong mekem ol fiuja rol ia.

Mekem Samting Wetem Fet

Leftemap tingting blong ol memba blong kworom o blong klas blong tingting hevi mo raetemdaon wanem bae oli mekem blong mekem folem ol strong tingting mo filing we oli kasem tedei. ?Olsem wanem lesen blong tedei i go wetem ol gol blong olgetawan, we oli bin mekem? Sapos oli wantem, ol memba blong kworom o blong klas oli save serem ol aedia blong olgeta.

Ol Sapot Risos

• Ol Proveb 22:6; Doktrin mo Ol Kavenan 68:25–28; 121:41–43 (Ol responsabiliti blong ol papa mo mama)

• Efesas 5:25; Moses 3:21–24; 5:1–12 (Ol hasban mo ol waef oli wok tugeta olsem ol ikwol patna)

• Jean B. Bingham, “Yumi Wan blong Mekem Wok blong God I Kamtru,” Liahona, Mei 2020, 60–63

• “The Women in Our Lives,” “Let Us Be Men” (vidio), ChurchofJesusChrist.org

Tij Folem Wei blong Sevya

Sevya i bin mekem rere olgeta we Hem i bin tijim mo i bin givim olgeta ol impoten responsabiliti. ?Olsem wanem nao yu yu save rere olgeta ia we yu stap tijim blong oli wok tugeta olsem ol boe mo ol gel blong God? (Luk long Teaching in the Savior’s Way [2016], 27–28.)