Kraes long Getsemane, i kam long Heinrich Hofmann

28 Maj

?From Wanem Mi Nidim Atonmen blong Jisas Kraes?

Doktrin mo Ol Kavenan 29

Kaonsel Tugeta

Wan memba blong kworom o klas presidensi i lidim; kolosap 10–20 minit

Long stat blong miting, ripitim tugeta Stamba Toktok blong Ol Kworom blong Aronik Prishud o Stamba Toktok blong Ol Yang Woman. Afta, lidim wan toktok storian abaot ol samting we oli stap ia, mo mekem plan blong ol wei blong mekem wanem we yufala i stap toktok raon long hem (yufala i save disaed long wan presidensi miting wanem poen nao blong toktok raon long olgeta):

• Kworom o klas blong yumi. ?Wanem nao yumi save mekem blong bildimap yuniti bitwin ol memba blong kworom o ol memba blong klas? “?Wanem nao ol gol we yumi laekem blong wok tugeta long hem?

• Ol diuti mo responsabiliti blong yumi. ?Wanem nao yumi stap mekem blong serem gospel? Wanem nao ol eksperiens we yumi bin gat taem yumi mekem wok blong tempol mo famli histri?

• Laef blong yumi. ?Long wanem wei nao yumi bin luk han blong God insaed long laef blong yumi? ?Wanem nao i givim insperesen long yumi long skripja stadi blong yumi long wik ia?

Long en blong lesen, sapos i stret, mekem ol samting ia:

• Testifae abaot ol prinsipol we yu bin tijim.

• Rimaenem ol memba blong kworom o blong klas abaot ol plan mo invitesen we oli bin kasem long taem blong miting.

Tijim Doktrin

Wan adalt lida o yut i lidim; kolosap 25–35 minit

Rere long Yuwan long Saed blong Spirit

Presiden Esra Taf Benson i bin tijim: “Semmak olsem wan man i no rili wantem kaekae kasem taem hem i hanggri, semmak, bae hem i no wantem blong Kraes i sevem hem kasem taem hem i save from wanem hem i nidim Kraes. I no gat wan bae i save stret, o bae i inaf blong save from wanem hem i nidim Kraes kasem taem hem i andastanem mo akseptem doktrin blong Foldaon mo wanem hemia i mekem long evri man” (“The Book of Mormon and the Doctrine and Covenants,” Ensign, May 1987, 85). Taem yu bin stap stadi long Doktrin mo Ol Kavenan 29 long wik ia, yu bin luk hao Sevya i tokbaot Foldaon, mo olsem wanem Hem i pemaot yumi long Foldaon ia. ?Olsem wanem nao yu kasem wan testemoni abaot Atonmen blong Jisas Kraes mo wok blong Hem olsem Sevya mo Ridima blong yu? Tingting long olsem wanem nao, blong mekem i kam strong moa testemoni blong ol memba blong kworom o klas abaot Kraes, bae i jenisim olgeta. Taem yu stap rere, tingting blong stadi tu long “Agency and the Fall of Adam and Eve,” “The Atonement of Jesus Christ,” mo “The Divine Mission of Jesus Christ” insaed long japta 3 blong Preach My Gospel ([2019], 49–52, 60–61).

From se Sevya i pemaot yumi long Foldaon, yumi save faenem glad.

Stap Lan Tugeta.

Blong statem klas storian blong tedei, yu save invaetem olgeta we yu tijim blong lukaot blong raetem long bod lis blong eni samting we oli save abaot Foldaon blong Adam mo Iv. Eksampol: ?Wanem nao oli lanem abaot Foldaon aot long Doktrin mo Ol Kavenan 29:36–50? ?Wanem pruf blong Foldaon nao yumi stap luk raon long yumi? Ol aktiviti andanit ia bae oli helpem kworom o klas blong yu blong faenem olsem wanem Atonmen blong Jisas Kraes i stap helpem yumi blong winim ol risal we oli kamaot long Foldaon ia.

• Blong andastanem gud moa Foldaon blong Adam mo Iv, ol memba blong kworom o klas oli save ridim “Foldaon” insaed long Stap Tru long Fet (64–68) o “Agency and the Fall of Adam and Eve” insaed long japta 3 blong Preach My Gospel (49–50). Invaetem olgeta blong traem tingting insaed long maen blong olgeta se wan fren i stap askem olgeta: “?From wanem mi nidim Jisas Kraes?” Invaetem olgeta blong oli sidaon tutu, mo tijim wanwan long olgeta long wei we bae oli ansarem kwestin ia folem wanem we oli bin lanem long riding ia.

• ?Olsem wanem yu save helpem ol memba blong kworom o klas blong lan aot long ol skripja, long saed blong from wanem nao oli nidim Atonmen blong Jisas Kraes? Wan wei i blong raetem sam long ol skripja refrens ia we oli stap long “Ol Sapot Risos” long bod, mo afta, raetem ol sot toktok blong ol refrens ia long ol pis pepa. Givim, long wanwan memba blong kworom o klas, wan long ol pis pepa ia. Invaetem olgeta blong oli ridim ol skripja refrens we oli raetem long bod mo faenem wan we i go stret wetem sot toktok blong olgeta. (Sam long ol sot toktok ia i go wetem moa long wan skripja.) Invaetem wanwan memba blong kworom o klas blong ridim laod skripja we i go wetem sot toktok blong olgeta, mo serem wanem oli bin lanem abaot risen from wanem yumi nidim Atonmen blong Sevya.

• Invaetem ol memba blong kworom o klas blong ansarem ol kwestin ia long praevet: ?Olsem wanem mi gat blesing tru long Atonmen blong Jisas Kraes? ?Bae Sevya i wantem mi jenis long wanem wei nao blong mi save eksperiensem moa fulwan ol blesing blong Atonmen blong Hem? Afta, askem olgeta blong toktok raon long fas kwestin tugeta. Oli save luklukbak long “The Atonement of Jesus Christ” mo “The Divine Mission of Jesus Christ” insaed long japta 3 blong Preach My Gospel (51–52, 60–61) mo wan, o moa long wan vidio insaed long “Ol Sapot Risos.” Invaetem olgeta blong serem wanem we oli lanem.

Mekem Samting Wetem Fet

Leftemap tingting blong ol memba blong kworom o blong klas blong tingting hevi mo raetemdaon wanem bae oli mekem blong mekem folem ol strong tingting mo filing we oli kasem tedei. ?Olsem wanem lesen blong tedei i go wetem ol gol blong olgetawan, we oli bin mekem? Sapos oli wantem, ol memba blong kworom o blong klas oli save serem ol aedia blong olgeta.

Ol Sapot Risos

• Doktrin mo Ol Kavenan 19:16–19 (Jisas Kraes i bin pem praes from ol sin blong yumi blong mekem se bae yumi no safa, sapos yumi sakem sin)

• 2 Nifae 9:6–16; Alma 42:6–9 (Jisas Kraes i sevem yumi long ded mo hel)

• 2 Nifae 2:5–10; Hileman 14:15–17 (Tru long Jisas Kraes nomo bae yumi save gobak long God)

• Mosaea 3:7; Alma 7:11–13 (From se Kraes i bin tekem long Hemwan ol hadtaem mo ol sin blong yumi, Hem i save olsem wanem blong helpem yumi)

• Moses 5:10–12 (From se Sevya i bin pemaot yumi long Foldaon, yumi save faenem glad)

• Walter F. González, “Hiling Han blong Sevya,” Liahona, Nov 2019, 90–92

• “Where Justice, Love, and Mercy Meet,” “Why We Need a Savior,” “The Atonement Enables Us” (vidio), ChurchofJesusChrist.org

Tij Folem Wei blong Sevya

Sevya i bin prea from ol disaepol blong Hem mo i bin gohed blong givim seves long olgeta. Hem i bin faenem ol janis blong stap wetem olgeta mo talemaot lav blong Hem. ?Wanem janis nao yu yu gat blong mekem semmak wetem olgeta we yu stap tijim? (Luk long Teaching in the Savior’s Way [2016], 6.)