11 Epril

?Olsem Wanem Mi Save Invaetem Evriwan blong Kam long Kraes?

Doktrin mo Ol Kavenan 30–36

Kaonsel Tugeta

Wan memba blong kworom o klas presidensi i lidim; kolosap 10–20 minit

Long stat blong miting, ripitim tugeta Stamba Toktok blong Ol Kworom blong Aronik Prishud o Stamba Toktok blong Ol Yang Woman. Afta, antap long kaonsel tugeta abaot ol stret bisnis blong kworom o klas, ating yu wantem blong toktok raon long ol filing mo ol stamba toktok we oli kamaot long jeneral konfrens. Ol kwestin ia bae i save help:

• ?Wanem stamba tingting o mesej we i kamaot klia long yumi?

• ?Wanem nao yu filim se Spirit i talem long yu blong go mekem from olgeta samting ia we yu bin lanem, o bin filim?

• ?Wanem yumi nidim blong mekem olsem wan kworom o klas blong tekem aksen folem kaonsel we yumi bin harem long jeneral konfrens?

Long en blong lesen, sapos i stret, mekem ol samting ia:

• Testifae abaot ol prinsipol we yu bin tijim.

• Rimaenem ol memba blong kworom o blong klas abaot ol plan mo invitesen we oli bin kasem long taem blong miting.

Tijim Doktrin

Wan adalt lida o yut i lidim; kolosap 25–35 minit

Rere long Yuwan long Saed blong Spirit

Sam manis nomo afta we Jos ia we i kambak i bin oganaes long 6 Epril 1830, long Feyet, Niu Yok, Lod i bin stat blong singaotem ol misinari blong oli pulum tugeta “olgeta we [hem i] jusumaot long ol fo pat blong wol ia” (Doktrin mo Ol Kavenan 33:6). Wanem i bin stat olsem ol hadwok blong wan smol namba blong ol niu konvet long wan smol ples nomo, i gro i kam wan ami blong ol misinari we oli stap talemaot gospel raon long wol. Be misinari wok i no stop wetem olgeta we oli stap mekem ol fultaem misin nomo. Lod i bin wantem wanwan long yumi blong invaetem olgeta raon long yumi blong go long Hem.

?Wanem eksperiens nao yu yu bin gat wetem fasin blong invaetem ol narawan blong lanem abaot gospel blong Sevya? ?Hem i minim wanem long ol memba blong kworom o blong klas blong gat Jos Ia blong Jisas Kraes insaed long laef blong olgeta? Taem yu stap rere blong tij, tingting blong luklukbak long “What Is My Purpose as a Missionary?” insaed long Preach My Gospel ([2019] 1–16) mo mesej blong Elda Dieter F. Uchtdorf “Misinari Wok: Stap Serem Wanem I Stap long Hat blong Yu,” Liahona, Mei 2019, 15–18).

Taem yumi stap invaetem ol fren blong go long ol miting o aktiviti blong Jos, yumi stap helpem olgeta blong lan abaot Kraes.

Stap Lan Tugeta.

Doktrin mo Ol Kavenan 30–36 i talem nem blong samfala pipol we oli bin singaotem olgeta blong go long ol misin long ol eli taem blong Jos. Sam dei bifo long miting blong yu, yu save givim long wanwan memba blong kworom o blong klas blong yu, wan long ol nem ia (luk long ol heding blong ol seksen 30 kasem 36) mo invaetem memba blong klas ia blong lanem wanem kaonsel Lod i bin givim blong helpem hem blong serem gospel. ?Olsem wanem nao yumi save putum kaonsel o advaes ia i kambak long yumiwan? Ol aedia andanit ia oli save givim moa insperesen long olgeta we yu stap tijim, blong oli invaetem olgeta raonabaot long olgeta blong go long Kraes.

• Olsem wanem long olgeta we yu stap tijim, ?oli andastanem wanem nao i minim blong go long Kraes? Yu save askem olgeta blong oli serem ol tingting blong olgeta. Sapos hemia i save help, yu save serem eksplenesen ia: “Blong go long Sevya, ol pipol oli mas gat fet long Hem blong oli sakem sin—blong mekem ol jenis we i nid blong mekem blong mekem se laef blong olgeta i go stret wetem ol tijing blong Hem” (Preach My Gospel, 2). Ol memba blong kworom o blong klas oli save ridim tu ol skripja we oli gat insaed ol sentens olsem, “kam long mi” o “kam long Kraes” blong help blong ansarem kwestin ia—eksampol: Matiu 11:28–30; Omnae 1:26; Moronae 10:32; Doktrin mo Ol Kavenan 20:59. ?From wanem yumi wantem ol pipol blong oli go long Kraes? ?Wanem nao sam long ol simpol samting we yumi save mekem blong helpem olgeta? Ol memba blong kworom o blong klas oli save mekem ol plan blong invaetem wan we oli save hem blong hem i go kolosap moa long Kraes.

• Blong stap lanem abaot wei we ol narawan oli bin serem gospel, i wan gudfala wei blong givim insperesen long olgeta ia we yu stap tijim. Yu save soem wan, o moa long wan vidio we i stap long “Ol Sapot Risos”, o yu save invaetem ol memba blong kworom o blong klas blong ridim kaonsel mo eksampol we oli stap insaed long mesej blong Sista Cristina B. Franco “Stap Faenem Glad Taem Yumi Stap Serem Gospel” (Liahona, Nov 2019, 83–85). ?Wanem nao yumi lanem aot long ol eksampol ia? Tugeta, toktok raon long wanem we kworom o klas blong yu i save mekem blong invaetem ol narawan blong kam long Kraes.

• Taem i kam blong stap serem gospel, Elda Dieter F. Uchtdorf i bin talem se, sam long yumi, bae i “gat ol tu tingting abaot hemia. O, bae yumi filim fraet blong mekem ol samting we yumi no yus long hem.” (“Misinari Wok: Stap Serem Wanem I Stap long Hat blong Yu,” Liahona, Mei 2019, 15). Sapos ol memba blong kworom o blong klas oli filim olsem, ol faef simpol tingting we Elda Uchtdorf i bin givim long mesej blong hem i save helpem olgeta. Yu save invaetem wanwan memba blong klas blong oli rid abaot wan long ol tingting blong hem, mo serem wanem we oli bin lanem.

Mekem Samting Wetem Fet

Leftemap tingting blong ol memba blong kworom o blong klas blong tingting hevi mo raetemdaon wanem bae oli mekem blong mekem folem ol strong tingting mo filing we oli kasem tedei. ?Olsem wanem lesen blong tedei i go wetem ol gol blong olgetawan, we oli bin mekem? Sapos oli wantem, ol memba blong kworom o blong klas oli save serem ol aedia blong olgeta.

Ol Sapot Risos

• 1 Timoti 4:12 (Stap wan eksampol long olgeta we oli bilif)

• Alma 17:2–4 (Ol boe blong Mosaea oli mekem olgetawan oli rere blong serem gospel)

• Doktrin mo Ol Kavenan 42:6–7 (Prijim gospel tru long paoa blong Spirit)

• Russell M. Nelson mo Wendy Nelson, “Hope of Israel” (wol yut divosen, 3 Jun 2018), i kam seperet insaed long New Era and Ensign, HopeofIsrael.ChurchofJesusChrist.org

• “Inviting All to Come unto Christ: Sharing the Gospel,” “Inviting Others to ‘Come and See,’” “Inviting Others to ‘Come and Help,’” “Inviting Others to ‘Come and Stay’” (vidio), ChurchofJesusChrist.org

Tij Folem Wei blong Sevya

Sevya i invaetem ol narawan blong testifae abaot ol trutok we oli lanem blong Spirit i save tajem hat blong olgeta. “Be yufala. ?Yufala i stap tokbaot se mi hu?” Hem i askem. Taem Pita i ansa, testemoni blong hem i bin kam strong moa:g “Yu yu Mesaea ia. Yu yu Pikinini blong God ia we i laef, i stap we i stap.” (Matiu 16:15–16). ?Olsem wanem blong serem gospel i save mekem testemoni blong ol memba blong kworom o blong klas i kam strong moa?