Jisas I Stap Wasem Leg blong Ol Aposol, i kam long Del Parson

25 Epril

?Olsem Wanem Mi Save Stap Moa Olsem Kraes long Seves blong Mi long Ol Narawan?

Doktrin mo Ol Kavenan 41–44

Kaonsel Tugeta

Wan memba blong kworom o klas presidensi i lidim; kolosap 10–20 minit

Long stat blong miting, ripitim tugeta Stamba Toktok blong Ol Kworom blong Aronik Prishud o Stamba Toktok blong Ol Yang Woman. Afta, lidim wan toktok storian abaot ol samting we oli stap ia, mo mekem plan blong ol wei blong mekem wanem we yufala i stap toktok raon long hem (yufala i save disaed long wan presidensi miting wanem poen nao blong toktok raon long olgeta):

• Kworom o klas blong yumi. ?Huia i niu long wod blong yumi, mo olsem wanem nao yumi save helpem olgeta blong filim welkam? ?Wanem nao yumi stap mekem blong mekem se taem blong yumi long kworom o miting long klas i gat mining?

• Ol diuti o responsabiliti blong yumi. ?Wanem nao sam diuti mo responsabiliti we yumi gat olsem ol yang man mo ol yang woman? ?Olsem wanem nao yumi save mekem i kam moa gud?

• Laef blong yumi. ?Wanem nao yumi stap mekem blong kam moa olsem Jisas Kraes mo kasem paoa blong Hem long laef blong yumi? ?Wanem nao yumi stap mekem blong helpem ol famli blong yumi blong kam long Hem?

Long en blong lesen, sapos i stret, mekem olgeta samting ia:

• Testifae abaot ol prinsipol we yu bin tijim.

• Rimaenem ol memba blong kworom o blong klas abaot ol plan mo invitesen we oli bin kasem long taem blong miting.

Tijim Doktrin

Wan adalt lida o yut i lidim; kolosap 25–35 minit

Rere long Yuwan long Saed blong Spirit

Taem we Lod i bin givim oda long Ol Sent blong oli kam tugeta long wan ples long Ketlan, Ohaeo, plante pipol oli bin fetful mo oli lego ol hom blong olgeta, mo oli travel i go long ples ia. Be muv ia, i no jes blong stap muv i go laef long wan niu ples—hem i blong stap laef folem wan niu wei. Maet ol memba blong kworom o blong klas oli bin stadi long Doktrin mo Ol Kavenan 41–44 long wik ia mo oli bin lanem we Ol Sent oli bin muv i go long Ketlan, mo loa ia we Lod i bin talemaot long olgeta longwe, tru long revelesen. Wetem sam samting moa, Lod i bin wantem luk Ol Sent oli kam wan taem oli stap lavlavem mo givim seves long wanwan long olgeta (luk long Doktrin mo Ol Kavenan 42:30–31, 38–39, 45; 44:6). ?Wanem eksperiens nao yu save serem we bae i save helpem kworom o klas blong yu blong filim olsem wanem i impoten blong givim seves olsem Kraes i bin mekem?

Blong helpem yu blong rere blong tij abaot seves we i olsem hemia blong Kraes, yu save luklukbak long “Seves” insaed long Blong Ol Yut Oli Kam Strong ([2011], 32–33) mo mesej blong Presiden Russel M. Nelson: “Seken Hae Komanmen Ia” (Liahona, Nov 2019, 96–99).

Yumi save givim seves olsem we Sevya i bin mekem.

Stap Lan Tugeta.

Blong statem wan toktok storian abaot seves we i olsem hemia blong Kraes, maet bae yu save raetem long bod “Laef tugeta wetem lav” (Doktrin mo Ol Kavenan 42:45). Invaetem kworom o klas blong yu blong ridim Doktrin mo Ol Kavenan 42:30–31, 38–39, 45; 44:6 mo mekem wan lis blong ol wei we Lod i wantem Ol Sent blong oli givim seves long wanwan long olgeta bakegen. ?Wanem janis nao yumi gat, tugeta insaed long ol hom mo aotsaed long hom blong yumi, blong givim seves we oli gat nid, long saed blong bodi, filing, o long saed blong spirit? Aot long ol aedia we oli stap daon ia, givim insperesen long kworom o klas blong yu blong givim seves long ol narawan, we i olsem seves we Kraes i bin givim.

• Blong helpem ol memba blong kworom o blong klas oli lan aot long eksampol blong Sevya blong givim seves, yu save givim, long wanwan, wan skripja blong hem i ridim abaot Sevya we i stap givim seves long wan (luk long “Ol Sapot Risos”). Wanwan i save talem sot wanem i stap long skripja ia, mo i eksplenem wanem we Sevya i bin mekem blong givim seves long ol narawan. ?Wanem nao ol eksampol ia oli stap tijim yumi abaot mining blong givim seves olsem we Sevya i bin givim seves? ?Wanem i defren blong givim seves long wei blong Sevya, mo givim seves long sam nara wei? Ol memba blong kworom o blong klas oli save serem ol eksperiens blong olgeta abaot sam taem we oli bin traem blong givim seves olsem we Sevya i bin mekem, o taem we ol narawan oli bin givim seves long olgeta long wei ia.

• Maet bae i save help blong kworom o klas blong yu i luklukbak long wanem we Sevya mo ol profet blong Hem oli bin tijim abaot seves. Hemia samfala skripja we oli save ridim tugeta: Matiu 25:31–46; Luk 10:25–37; Jon 13:34–35; Jemes 1:27; Mosaea 2:17; 18:8–10. Leftemap tingting blong olgeta blong oli raetemdaon wanem we oli bin lanem abaot fasin blong givim seves long ol narawan, mo serem ol tingting mo ol eksperiens we oli go wetem wanem we oli bin lanem. Afta, oli save mekem plan blong sam wei blong givim seves olsem hemia blong Kraes. (Oli save karem ol aedia blong olgeta taem oli stap wajem wan o moa long wan long ol vidio we oli stap insaed long “Ol Sapot Risos” o stap visitim JustServe.org.)

• Blong helpem ol memba blong kworom o blong klas long ol hadwok blong olgeta blong givhan long ol narawan, tingting blong luklukbak long mesej blong Presiden Bonnie H. Cordon “Kam Wan Man blong Lukaot long Sipsip” (Liahona, Nov 2018, 74–76). Blong stat, yu save soem sam pikja blong Sevya we i stap givim seves (Presiden Cordon i bin soem sam long taem we hem i bin stap givim mesej blong hem). ?Wanem nao ol pikja ia oli stap tij abaot wei we yumi save givhan long ol wei we i olsem olgeta blong Kraes? Afta long hemia, tingting blong invaetem ol memba blong kworom o blong klas blong oli sidaon tutu, mo oli ridim wan long ol seksen blong mesej, mo oli serem wanem we oli bin lanem abaot wei blong givim seves olsem we Sevya i bin mekem. Mo tu, oli save serem wanem we oli stap lanem abaot seves we i olsem hemia blong Kraes, taem we oli stap givhan long ol narawan.

Mekem Samting Wetem Fet

Leftemap tingting blong ol memba blong kworom o blong klas blong tingting hevi mo raetemdaon wanem bae oli mekem blong mekem folem ol strong tingting mo filing we oli kasem tedei. ?Olsem wanem lesen blong tedei i go wetem ol gol blong olgetawan, we oli bin mekem? Sapos oli wantem, ol memba blong kworom o blong klas oli save serem ol aedia blong olgeta.

Ol Sapot Risos

• Matiu 14:13–21; Jon 9:1–11; 13:4–5, 12–17; 1 Nifae 11:31; 3 Nifae 17:5–10 (Ol eksampol blong Jisas we i stap givim seves long ol narawan)

• Joy D. Jones, “Blong Hem,” Liahona, Nov 2018, 50–52

• “If We Forget Ourselves,” “Teachings of Thomas S. Monson: Rescuing Those in Need,” “Youth in Action,” “Opportunities to Do Good” (ol vidio), ChurchofJesusChrist.org

Tij Folem Wei blong Sevya

Long taem blong seves blong Hem long wol ia, Jisas Kraes i bin spendem taem blong Hem blong givim seves mo helpem olgeta we oli bin stap raonabaot long Hem. Ol tru disaepol blong Kraes, oli mekem semmak samting (luk long Jon 13:35). Lukaotem samfala wei blong invaetem ol memba blong kworom o blong klas blong oli serem olsem wanem oli bin givim seves long ol narawan, mo wanem nao i bin givim insperesen long olgeta blong givim seves. (Luk long Teaching in the Savior’s Way [2016], 4–5.)