yangfala gel i stap prea

9 Mei

?Olsem Wanem Nao Tabu Spirit I Stap Blesem Mi Evri Dei?

Doktrin mo Ol Kavenan 46–48

kaonsel tugeta pikja bokis

Kaonsel Tugeta

Wan memba blong kworom o klas presidensi i lidim; kolosap 10–20 minit

Long stat blong miting, ripitim tugeta Stamba Toktok blong Ol Kworom blong Aronik Prishud o Stamba Toktok blong Ol Yang Woman. Afta, lidim wan toktok storian abaot ol samting we oli stap ia, mo mekem plan blong ol wei blong mekem wanem we yufala i stap toktok raon long hem (yufala i save disaed long wan presidensi miting wanem poen nao blong toktok raon long olgeta):

• Kworom o klas blong yumi. ?Huia i nidim help mo ol prea blong yumi? ?Wanem nao yumi save mekem blong helpem olgeta? ?Huia nao yumi sapos blong invaetem blong kam long wan aktiviti we i stap kam?

• Ol diuti mo responsabiliti blong yumi. ?Wanem ol asaenmen we yumi bin mekem finis? ?Wanem ol asaenmen we yumi nid blong mekem? ?Olsem wanem nao yumi bin invaetem ol narawan blong kam long Kraes, mo olsem wanem nao yumi save invaetem ol narawan naoia?

• Laef blong yumi. ?Wanem eksperiens we yumi bin gat i no longtaem i pas we i bin mekem ol testemoni blong yumi oli kam strong moa? ?Wanem i stap hapen insaed long laef blong yumi, mo olsem wanem nao yumi save sapotem wanwan long yumi?

Long en blong lesen, sapos i stret, mekem ol samting ia:

• Testifae abaot ol prinsipol we yu bin tijim.

• Rimaenem ol memba blong kworom o blong klas abaot ol plan mo invitesen we oli bin kasem long taem blong miting.

tijim doktrin pikja bokis

Tijim Doktrin

Wan adalt lida o yut i lidim; kolosap 25–35 minit

Rere long Yuwan long Saed blong Spirit

Plante long ol fasfala memba blong Jos ia we i bin kambak oli bin ridim abaot ol wei we Tabu Spirit i bin soem samting long saed blong spirit, hemia insaed long ol skripja (luk long Ol Wok 2:1–4; 13:52; 1 Korin 12:4–11; 3 Nifae 19). Maet ol memba blong kworom o blong klas oli stadi long Doktrin mo Ol Kavenan 46–48 long wik ia mo oli bin lanem we Lod i wantem tumas blong tijim olgeta Sent ia abaot ol blesing we Tabu Spirit i save tekem i kam insaed long laef blong olgeta. ?Wanem eksperiens nao i bin tijim yu olsem wanem Tabu Spirit i blesem yu? ?Olsem wanem Tabu Spirit i helpem olgeta we yu stap tijim long evri saed blong laef blong olgeta?

Blong helpem yu blong rere blong givim insperesen long kworom mo klas blong yu blong lukaotem paoa blong Tabu Spirit, yu save luklukbak long “Ol Wok blong Tabu Spirit” insaed long Stap Tru long Fet, ([2004], 188-189) mo mesej blong Elda Gary E. Stevenson “Olsem Wanem Tabu Spirit I Stap Helpem Yu?” (Jeneral Konfrens, Epril 2017, churchofjesuschrist.org/general-conference/2017/04?lang=bis).

Wan yang woman we i stap ridim ol skripja insaed long klas

Tabu Spirit i save help blong andastanem mo tijim ol trutok blong gospel.

Stap Lan Tugeta.

Ol skripja oli save givim plante eksampol abaot ol presen long saed blong spirit. ?Olsem wanem nao yu save helpem ol memba blong kworom o blong klas blong oli bildimap fet blong olgeta se ol presen ia oli save kamkamaot long laef blong yumi tedei? Yu save stat taem yu invaetem olgeta blong raetem antap long bod wan presen long saed blong spirit we oli tokbaot insaed long Doktrin mo Ol Kavenan 46:7–33 mo blong oli toktok raon long hao nao oli bin luk hemia i bin kamaot insaed long laef blong olgeta, o insaed long laef blong wan we oli save.

Antap long ol presen we oli kam long Spirit, Tabu Spirit i stap blesem yumi long plante nara wei. Yu save yusum wan o moa long wan long ol aktiviti andanit ia blong helpem ol memba blong kworom o blong klas blong oli andastanem hemia.

• Samtaem, yumi ting se yumi nidim Tabu Spirit nomo blong mekem ol impoten desisen, o long ol impoten taem blong laef blong yumi. ?Olsem wanem nao yu save helpem olgeta we yu stap tijim blong luksave hamas moa Tabu Spirit i save mekem blong olgeta? Yu save serem kworom o klas long ol smol grup, mo askem wanwan grup blong ridim wan o moa long wan long ol skripja we i stap insaed long “Ol Sapot Risos.” Wan long wanwan grup bae i serem wanem oli lanem. Afta, invaetem wanwan memba blong kworom o blong klas blong mekem wan lis blong ol wei we Tabu Spirit i save blesem evri dei laef blong olgeta. Taem oli serem lis blong olgeta ia, oli save tokbaot wanem oli save mekem blong gat Tabu Spirit i stap wetem olgeta truaot long wanwan dei.

• Wan nara wei blong helpem olgeta we yu stap tijim blong oli andastanem wei we Tabu Spirit i save helpem olgeta, hem i blong raetem olgeta kwestin ia long bod: ?Wanem nao yumi save abaot Tabu Spirit? ?Olsem wanem Tabu Spirit i save helpem yumi? Afta, ol memba blong kworom o blong klas oli save luklukgud blong faenem ol ansa insaed long mesej blong Elda Gary E. Stevenson “?Olsem Wanem Tabu Spirit I Stap Helpem Yu?” (Jeneral Konfrens, Okt 2017, churchofjesuschrist.org/general-conference/2017/04?lang=bis). Oli save faenem ol ansa tu taem oli luklukbak long “Ol Wok blong Tabu Spirit” insaed long Stap Tru long Fet (pej 188). Olsem we i stret, serem ol eksperiens we yu bin gat wetem Tabu Spirit, mo invaetem ol yut blong oli serem ol eksperiens we oli bin gat.

• Ol memba blong kworom o blong klas oli save ridim “Personal Revelation” o “Learn to Recognize the Promptings of the Spirit” insaed long japta 4 blong Preach My Gospel ([2019], 95–96, 102–3). Afta, oli save priten blong oli ol misinari we oli stap tijim wan we i neva harem olsem wanem Tabu Spirit i save blesem laef blong yumi. ?Wanem nao bae oli talem long olgeta?

Mekem Samting Wetem Fet

Leftemap tingting blong ol memba blong kworom o blong klas blong tingting hevi mo raetemdaon wanem bae oli mekem blong mekem folem ol strong tingting mo filing we oli kasem tedei. ?Olsem wanem lesen blong tedei i go wetem ol gol blong olgetawan, we oli bin mekem? Sapos oli wantem, ol memba blong kworom o blong klas oli save serem ol aedia blong olgeta.

Ol Sapot Risos

• Jon 14:16–27 (Spirit blong Givhan i save tijim yumi mo mekem yumi save tingbaot evri samting)

• Jon 15:26; Doktrin mo Ol Kavenan 42:17; Moses 1:24 (Tabu Spirit i talemaot se Papa mo Pikinini, Tufala i stap.)

• Rom 8:16 (Spirit i witnes se yumi ol pikinini blong God)

• 2 Nifae 32:5; Doktrin mo Ol Kavenan 18:18 (Tabu Spirit bae i soem long yumi ol samting we yumi mas mekem)

• 3 Nifae 27:20 (Tabu Spirit i mekem yumi kam tabu)

• Moronae 8:26 (Tabu Spirit bae i mekem yumi fulap long hop mo lav)

• Moronae 10:5 (Tabu Spirit i stap tijim trutok long yumi)

Tij Folem Wei blong Sevya

Sevya i bin serem ol simpol stori, parabol, mo eksampol blong ril laef blong tijim ol disaepol blong Hem long wan wei we bae oli save haremsave samting. ?Wanem nao ol eksperiens blong yuwan yu save serem wetem ol yut blong helpem olgeta blong andastanem ol rol blong Tabu Spirit mo filim wan strong filing blong lukaotem blong kasem ol kaen eksperiens ia? (Luk long Teaching in the Savior’s Way [2016], 22.)