oli setem apat wan yang woman

23 Mei

?Olsem Wanem Nao Mi Kasem Presen Ia we I Tabu Spirit?

Doktrin mo Ol Kavenan 51–57

kaonsel tugeta pikja bokis

Kaonsel Tugeta

Wan memba blong kworom o klas presidensi i lidim; kolosap 10–20 minit

Long stat blong miting, ripitim tugeta Stamba Toktok blong Ol Kworom blong Aronik Prishud o Stamba Toktok blong Ol Yang Woman. Afta, lidim wan toktok storian abaot ol samting we oli stap ia, mo mekem plan blong ol wei blong mekem wanem we yufala i stap toktok raon long hem (yufala i save disaed long wan presidensi miting wanem poen nao blong toktok raon long olgeta):

• Kworom o klas blong yumi. ?Wanem nao yumi save mekem blong bildimap yuniti bitwin ol memba blong kworom o ol memba blong klas? “?Wanem nao ol gol we yumi laekem blong wok tugeta long hem?

• Ol diuti mo responsabiliti blong yumi. ?Wanem nao yumi stap mekem blong serem gospel? Wanem nao ol eksperiens we yumi bin gat taem yumi mekem wok blong tempol mo famli histri?

• Laef blong yumi. ?Long wanem wei nao yumi bin luk han blong God insaed long laef blong yumi? ?Wanem nao i givim insperesen long yumi long skripja stadi blong yumi long wik ia?

Long en blong lesen, sapos i stret, mekem ol samting ia:

• Testifae abaot ol prinsipol we yu bin tijim.

• Rimaenem ol memba blong kworom o blong klas abaot ol plan mo invitesen we oli bin kasem long taem blong miting.

tijim doktrin pikja bokis

Tijim Doktrin

Wan adalt lida o yut i lidim; kolosap 25–35 minit

Rere long Yuwan long Saed blong Spirit

Afta we yumi baptaes, olgeta we oli kasem prishud oli putum han blong olgeta antap long hed blong yumi blong givim presen we i Tabu Spirit. Maet ol memba blong kworom o klas oli tingbaot hemia taem oli bin stadi long Doktrin mo Ol Kavenan 51–57 long wik ia. Be, blong kasem Tabu Spirit i nidim moa bitim hemia. Blong kasem Tabu Spirit olsem wan kampani blong yumi oltaem, yumi mas wantem blong Hem i stap wetem yumi, yumi mas invaetem Hem insaed long laef blong yumi, mo yumi mas fetful blong stap obei long ol komanmen. ?Wanem blesing nao bae i kam insaed long laef blong olgeta we yu stap tijim taem oli stap lukaotem paoa blong Hem blong lidim tingting blong olgeta?

Blong helpem yu rere blong tij, yu save luklukbak long “Presen we i Tabu Spirit” insaed long Stap Tru long Fet, ([2004], 189–191) o mesej blong Presiden Henry B. Eyring “Blong Spirit blong Hem I Stap Wetem Yu” (Liahona, Mei 2018, 86–89).

ol yang woman mo ol yang man insaed long wan klas

Blong mekem se Tabu Spirit i save soem rod, yumi mas lukaotem blong Hem i gat paoa long laef blong yumi, evri dei.

Stap Lan Tugeta.

Blong helpem ol memba blong kworom o klas blong oli andastanem presen ia we i Tabu Spirit, yu save stat blong tokbaot olsem wanem oli stap givim presen we i Tabu Spirit ia. Oli save ridim Doktrin mo Ol Kavenan 52:10; 53:3; 55:1–3 mo toktok raon long wanem oli bin lanem. Talem gud se man we i kasem prishud i no givim Tabu Spirit, be hem i stap invaetem memba ia blong kasem Tabu Spirit. ?Wanem nao i defren? Ol aktiviti andanit ia oli save helpem olgeta we yu stap tijim blong oli andastanem gud moa wei blong kasem presen ia we i nambawan.

• Wanem we Lihae mo famli blong hem i bin mekem blong Liahona i soem rod long olgeta, i semmak long wanem yumi mas mekem blong kasem paoa blong Tabu Spirit blong soem rod long yumi. Yu save soem wan pikja blong Lihae mo Liahona (luk long Gospel Art Buk [2009], namba 68) mo askem ol memba blong kworom o blong klas blong oli serem wanem we oli save abaot Liahona. Afta long hemia, yu save invaetem haf blong olgeta blong ridim 1 Nifae 16:14–29 mo nara haf blong ridim 1 Nifae 18:8–22, mo lukaotem ol wei we i soem se Liahona i olsem Tabu Spirit. ?Wanem nao yumi save lanem aot long eksampol blong famli blong Lihae we i save helpem yumi blong kasem Tabu Spirit moa fulwan?

• Wanwan seksen insaed long Blong Ol Yut Oli Kam Strong i gat insaed advaes blong stap laef folem ol standet mo ol komanmen. Blong stap laef folem ol komanmen ia i stap invaetem paoa blong Tabu Spirit insaed long laef blong yumi. Tingting blong stap invaetem ol memba blong kworom o blong klas blong wanwan long olgeta i jusum wan long ol seksen insaed long Blong Ol Yut Oli Kam Strong, blong oli ridim, mo oli makem ol samting we oli sapos blong mekem o no mekem blong helpem olgeta blong kasem Tabu Spirit. Afta long hemia, oli save serem wanem we oli lanem wetem haf blong kworom o klas. Invaetem olgeta blong putum wan gol we bae i helpem olgeta blong kasem Tabu Spirit moa fulwan. ?From wanem yumi wantem blong gat Tabu Spirit i stap wetem yumi? (luk long Jon 14:26–27; 15:26; 16:13; 2 Nifae 32:3).

• Insaed long mesej blong hem, “Blong Spirit blong Hem I Stap Wetem Yu” (Liahona, Mei 2018, 86–89), Presiden Henry B. Eyring i bin talem, “Hop blong mi tedei, i blong mekem yufala i wantem mo gat strong tingting moa blong kasem presen we i Tabu Spirit.” (pej 86). Askem ol memba blong kworom o blong klas blong oli ridim ol naen paragraf long mesej blong hem, stat long “Ol eksperiens blong Profet Josef Smit” (pej 88). Invaetem olgeta blong lukaotem wanem we Josef Smit i bin mekem blong kasem paoa blong Tabu Spirit. Oli save listimdaon long bod wanem we oli faenem. Sapos we i stret, yu save invaetem olgeta blong oli serem ol eksperiens blong olgeta, abaot wan taem we oli bin kasem givhan we i kam long Tabu Spirit. ?Wanem nao oli bin stap mekem long taem blong ol eksperiens ia we i bin lidim olgeta blong Tabu Spirit i soem rod long olgeta? Yu tu yu save serem wan eksperiens.

Mekem Samting Wetem Fet

Leftemap tingting blong ol memba blong kworom o blong klas blong tingting hevi mo raetemdaon wanem bae oli mekem blong mekem folem ol strong tingting mo filing we oli kasem tedei. ?Olsem wanem lesen blong tedei i go wetem ol gol blong olgetawan, we oli bin mekem? Sapos oli wantem, ol memba blong kworom o blong klas oli save serem ol aedia blong olgeta.

Ol Sapot Risos

• Moronae 8:25–26; Doktrin mo Ol Kavenan 20:77, 79; 121:45–46 (Olsem wanem blong kasem presen we i Tabu Spirit)

• David A. Bednar, “Receive the Holy Ghost,” Liahona, Nov. 2010, 94–97

• Douglas D. Holmes, “The Gift of the Holy Ghost” (First Presidency Christmas Devotional, Dec. 4, 2016), broadcasts.ChurchofJesusChrist.org

Tij Folem Wei blong Sevya

Blong stap rere from seves blong Hem long wol ia, “Spirit i bin lidim Jisas i go long waelples,” blong Hem i livim kakae, blong prea, mo “blong hem i stap wetem God” (Josef Smit Translesen, Matiu 4:1.    . Gospel tijing we i gat paoa i no minim blong jes rere long wan lesen nomo, be i minim blong mekem yumiwan i rere. (Luk long Teaching in the Savior’s Way [2016], 12.)