yang woman we i stap holem fon

13 Jun

?Olsem Wanem blong Mi No Foldaon long Ponografi?

Doktrin mo Ol Kavenan 63

kaonsel tugeta pikja bokis

Kaonsel Tugeta

Wan memba blong kworom o klas presidensi i lidim; kolosap 10–20 minit

Long stat blong miting, ripitim tugeta Stamba Toktok blong Ol Kworom blong Aronik Prishud o Stamba Toktok blong Ol Yang Woman. Afta, lidim wan toktok storian abaot ol samting we oli stap ia, mo mekem plan blong ol wei blong mekem wanem we yufala i stap toktok raon long hem (yufala i save disaed long wan presidensi miting wanem poen nao blong toktok raon long olgeta):

• Kworom o klas blong yumi. ?Wanem nao ol aktiviti we yumi jes gat i no longtaem? ?Oli bin sakses? ?Wanem i bin go gud, mo olsem wanem yumi save mekem gud moa?

• Ol diuti mo responsabiliti blong yumi. ?Huia i nidim seves blong yumi? ?Olsem wanem nao yumi save helpem olgeta?

• Laef blong yumi. ?Wanem nao ol gol we yumiwan i stap wok long olgeta? ?Wanem eksperiens nao yumi save serem? ?Wanem blesing nao yumi bin kasem?

Long en blong lesen, olsem we i stret, mekem olgeta samting ia:

• Testifae abaot ol prinsipol we yu bin tijim.

• Rimaenem ol memba blong kworom o blong klas abaot ol plan mo invitesen we oli bin kasem long taem blong miting.

tijim doktrin pikja bokis

Tijim Doktrin

Wan adalt lida o yut i lidim; kolosap 25–35 minit

Rere long Yuwan long Saed blong Spirit

Maet ol memba blong kworom o blong klas oli bin stadi long Doktrin mo Ol Kavenan 63 long wik ia mo oli bin ridim abaot woning blong Lod i go long ol fasfala Sent abaot ol denja blong gat rabis tingting long saed blong seks—wan woning ia we Hem i bin stap ripitim plante taem (luk long Doktrin mo Ol Kavenan 63:13–16; Matiu 5:27–28; 3 Nifae 12:27–30). Ol woning ia oli blong ol pipol we i nomata yia blong olgeta mo wanem taem oli stap laef long hem; be hem i moa blong yumi, long taem blong yumi tedei, from se ponografi i wan rabis sik we i kasem evri ples. ?Wanem denja o fos we i joen wetem ponografi we maet ol memba blong kworom o klas oli stap fesem? ?Wanem gospel prinsipol mo wanem rul blong kontrolem hemia bae i save helpem olgeta blong kipim ol tingting mo ol aksen blong olgeta i klin evriwan?

Taem yu stap rere blong tij, tingting blong luklukbak long “Entetenmen mo Media” mo “Stap Klin long Saed blong Seks” insaed long Blong Ol Yut Oli Kam Strong ([2011], 11–13, 34–37) mo Let Virtue Garnish Thy Thoughts (buklet, 2006).

ol yang man long wan klas

Ol memba blong kworom mo blong klas oli save mekem wanwan long olgeta i kam strong moa blong no stap foldaon long ponografi.

Stap Lan Tugeta.

Blong statem wan toktok storian abaot ponografi, yu save invaetem ol memba blong kworom o klas blong ridim Doktrin mo Ol Kavenan 63:13–16 mo toktok raon long ol niu tingting we oli kamaot long ol ves ia we i helpem olgeta blong andastanem from wanem ponografi i save spolem man. Blong helpem ol memba blong kworom o blong klas oli andastanem olsem wanem blong no foldaon long ponografi, yusum wan, o moa long wan long olgeta aktiviti ia. Long en blong toktok storian blong yufala, maet bae yu filim blong toktok raon long wei we bisop i save helpem olgeta we oli stap insaed long ponografi (luk long Blong Ol Yut Oli Kam Strong Moa, 12, 37).

• Ol memba blong kworom o blong klas oli save gat ol kwestin abaot fasin blong no stap foldaon long ponografi. Blong helpem olgeta blong faenem ol ansa, yu save raetem olgeta kwestin ia antap long bod: ?Wanem i ponografi? ?From wanem i save spolem man? ?Olsem wanem mi save tanem baksaed blong mi long temtesen ia blong ponografi? Blong helpem ol memba blong kworom o blong klas blong oli faenem ol ansa long ol fas tu kwestin, askem olgeta blong luklukbak long “Ponografi” insaed long Stap Tru long Fet (ol pej 141–142) mo “Entetenmen mo Media” mo “Stap Klin long Saed blong Seks” insaed long Blong Ol Yut Oli Kam Strong (ol pej 11–13, 35–37). Blong helpem olgeta blong faenem ol ansa long nambatri kwestin ia, askem olgeta blong luklukbak long Jenesis 39:1–12; Rom 12:21; 2 Timoti 2:22; Alma 39:3–9; Moronae 10:30; Doktrin mo Ol Kavenan 27:15–18; 121:45–46. Invaetem olgeta blong serem ol ansa we oli faenem.

• Blong helpem kworom o klas blong yu blong faenem ol wei blong no stap foldaon long ponografi, yu save mekem olgeta oli luklukbak long mesej blong Elda Jeffrey R. Holland “Place No More for the Enemy of My Soul” (Liahona, May 2010, 44–46) mo mesej blong Sista Linda S. Reeves “Protection from Pornography—a Christ-Focused Home” (Liahona, May 2014, 15–17). Oli save tingting se oli stap gat wan toktok wetem fiuja boe o gel blong olgeta abaot from wanem ponografi i save prapa spolem man, mo olsem wanem blong stap longwe long hemia. ?Wanem infomesen nao bae oli save serem aot long mesej blong konfrens we oli bin luklukbak long hem? Invaetem olgeta blong oli sidaon tutu, mo oli serem ol ansa we oli faenem. Mo tu, askem olgeta blong raetemdaon wanem bae oli mekem blong stap longwe long ponografi.

• Invaetem olgeta we yu stap tijim blong ridim 1 Korin 10:13 mo Alma 13:28. Askem olgeta olsem wanem oli ting se ol skripja ia i go wetem ol jalenj blong yumi tedei blong no stap foldaon long ponografi. Yu save askem olgeta tu blong traem tingting se oli gat wan fren we i gat hadtaem blong faet agensem ponografi mo i wantem sakem sin. ?Wanem nao oli faenem insaed long ol skripja we bae i helpem fren blong olgeta? ?Wanem oli faenem anda long “Ol Sapot Risos” mo long ol pej 1–4 blong buklet ia: Let Virtue Garnish Thy Thoughts? ?Wanem nao bae i save helpem fren blong olgeta blong andastanem se bisop i save helpem hem (luk long Blong Ol Yut Oli Kam Strong Moa, 12, 37).

Mekem Samting Wetem Fet

Leftemap tingting blong ol memba blong kworom o blong klas blong tingting hevi mo raetemdaon wanem bae oli mekem blong mekem folem ol strong tingting mo filing we oli kasem tedei. ?Olsem wanem lesen blong tedei i go wetem ol gol blong olgetawan, we oli bin mekem? Sapos oli wantem, ol memba blong kworom o blong klas oli save serem ol aedia blong olgeta.

Ol Sapot Risos

• Aesea 1:18; Mosaea 4:2; Doktrin mo Ol Kavenan 58:42–43 (Yumi save kasem fogivnes sapos yumi sakem sin)

• 1 Nifae 17:3; Mosaea 24:14–15; Alma 26:12 (God bambae i mekem yumi kam strong moa long ol hadwok blong yumi blong stap obei long olgeta komanmen)

• Seksen ia: “Individuals” insaed long AddressingPornography.ChurchofJesusChrist.org

• “Watch Your Step,” “To Look Upon,” “Chastity: What Are the Limits?” “Pornography Addiction: Is There Hope?” “Redeeming the Dead Redeemed Me” (vidio), ChurchofJesusChrist.org

Tij Folem Wei blong Sevya

Taem yu stap tij olsem we Sevya i bin tij, ol memba blong kworom o blong klas bae oli putum spes i stap, insaed long hat blong olgeta, blong oli planem sid blong gospel, blong i solap mo i gro. ?Wanem nao yu save mekem blong helpem olgeta blong yusum ol skripja blong olgeta blong oli andastanem paoa mo wanem i naes blong stap laef long wan laef i we i gat klin fasin?