Jisas Kraes

Lod Jisas Kraes, i kam long Del Parson

27 Jun

?Olsem Wanem Mi Save Rere Naoia blong Stanemap Wan Hom we Kraes I Stap long Senta blong Hem?

Doktrin mo Ol Kavenan 67–70

kaonsel tugeta pikja bokis

Kaonsel Tugeta

Wan memba blong kworom o klas presidensi i lidim; kolosap 10–20 minit

Long stat blong miting, ripitim tugeta Stamba Toktok blong Ol Kworom blong Aronik Prishud o Stamba Toktok blong Ol Yang Woman. Afta, lidim wan toktok storian abaot ol samting we oli stap ia, mo mekem plan blong ol wei blong mekem wanem we yufala i stap toktok raon long hem (yufala i save disaed long wan presidensi miting wanem poen nao blong toktok raon long olgeta):

• Kworom o klas blong yumi. ?Huia i niu long wod blong yumi, mo olsem wanem nao yumi save helpem olgeta blong filim welkam? ?Wanem nao yumi stap mekem blong mekem se taem blong yumi long kworom o miting long klas i gat mining?

• Ol diuti o responsabiliti blong yumi. ?Wanem nao sam diuti mo responsabiliti we yumi gat olsem ol yang man mo ol yang woman? ?Olsem wanem nao yumi save mekem i kam moa gud?

• Laef blong yumi. Wanem nao yumi stap mekem blong kam moa olsem Jisas Kraes mo kasem paoa blong Hem long laef blong yumi? ?Wanem nao yumi stap mekem blong helpem ol famli blong yumi blong kam long Hem?

Long en blong lesen, sapos i stret, mekem olgeta samting ia:

• Testifae abaot ol prinsipol we yu bin tijim.

• Rimaenem ol memba blong kworom o blong klas abaot ol plan mo invitesen we oli bin kasem long taem blong miting.

tijim doktrin pikja bokis

Tijim Doktrin

Wan adalt lida o yut i lidim; kolosap 25–35 minit

Rere long Yuwan long Saed blong Spirit

Doktrin mo Ol Kavenan 68 i holem sam kaonsel we i go long ol papa mo mama, we maet ol memba blong kworom o blong klas oli no luk se i blong olgeta (luk long ol ves 25–28). Be, from se oli save gat wan strong paoa long famli blong olgeta naoia o long fiuja, kaonsel ia i save helpem olgeta naoia. Bes wei blong olgeta blong rere blong wan wan hom we Kraes i stap long senta blong hem long fiuja, hem i “blong wokbaot long stret laef long fored blong Lod” tedei (ves 28).

?Wanem blesing nao i bin kam long famli blong yu from se yu bin folem ol tijing blong Sevya? ?Olsem wanem ol memba blong kworom o blong klas oli helpem ol famli blong olgeta blong stanemap wan hom we Kraes i stap long senta blong hem? Blong rere blong tij, yu save luklukbak long mesej blong Presiden Henri B. Eyring “Wan Hom we Spirit I Stastap long Hem” (Liahona, Mei 2019, 22–25) mo “Famli: Wan Ofisol Toktok I Go long Wol” (Churchofjesuschrist.org/study?lang=bis).

Wan yang woman we i stap plei long piano

Yumi save filim moa bigfala lav insaed long ol famli blong yumi taem yumi mekem hom blong yumi i lukluk nomo long Kraes.

Stap Lan Tugeta.

Blong helpem ol memba blong kworom o blong klas oli luk hao Doktrin mo Ol Kavenan 68:25–28 i blong olgeta oli yusum tu, yu save askem olgeta blong raetem sot wanem oli wantem insaed long fiuja famli laef blong olgeta. Yu save askem olgeta blong serem wanem we oli bin raetem, sapos oli wantem. Afta, oli save ridim Doktrin mo Ol Kavenan 68:25–28 mo lukaotem ol tijing mo prinsipol blong gospel we i save helpem olgeta blong oli bildimap ol stret mo gud famli naoia mo long fiuja. Ol aktiviti andanit ia oli save helpem olgeta blong oli andastanem olsem wanem blong mekem Kraes i stap long senta blong famli blong olgeta.

• Nambaseven paragraf blong “Famli: Wan Ofisol Toktok I Go long Wol” i tekem ol trutok se oli save helpem ol memba blong kworom o blong klas blong oli mekem hom blong olgeta i lukluk nomo long Sevya. Invaetem olgeta blong ridim paragraf ia mo faenemaot ol tijing mo prinsipol we bae i helpem wan famli blong i stap hapi. Maet bae yu wantem raetem olgeta samting ia antap long bod mo askem olgeta we yu stap tijim blong toktok raon long from wanem wanwan bae i helpem wan famli blong i stap hapi. Maet ol memba blong kworom o blong klas oli wantem serem olsem wanem ol stret famli o ol nara famli oli bin yusum o praktisim ol tijing mo ol prinsipol ia. Leftemap tingting blong olgeta blong oli tingting hevi long wei we oli save praktisim wan long ol prinsipol ia insaed long laef blong olgeta naoia. Talem gud long olgeta se oli save mekem Jisas Kraes i senta blong laef blong olgeta, i no mata wanem famli situesen oli kamaot long hem.

• Ol memba blong kworom o blong klas oli save toktok raon long ol samting we oli kipim Sevya i stap long senta blong ol hom blong yumi, mo ol samting we oli stopem Hem blong i stap long medel o long senta blong hom blong yumi. Maet yu save askem samfala o sam smol grup blong oli luklukbak long wan long ol seksen blong mesej blong Presiden Henri B. Eyring: “Wan Hom we Spirit I Stastap long Hem” (Liahona, Mei 2019, 22–25) blong faenem ol prinsipol we oli save help blong mekem hom blong yumi i lukluk moa long Kraes. Invaetem ol memba blong kworom o blong klas blong oli serem wanem we oli bin lanem mo blong oli jusum wan samting we bae oli mekem long wik we i stap kam, blong mekem hom blong olgeta oli lukluk moa long Jisas Kraes mo ol tijing blong Hem.

• Maet yu save askem wan o moa long wan memba blong kworom o blong klas blong i singsing o ridim wan singsing abaot hom mo famli, olsem “Home Can Be a Heaven on Earth” (Hymns, no. 298) o “Love Is Spoken Here” (Children’s Songbook, 190). Ol narawan oli save lisin long wanem singsing ia i stap tijim abaot wei blong mekem wan hom i kam wan hapi ples. Invaetem olgeta blong serem wan eksperiens taem we oli bin filim hapi from se wan i bin soem lav long hem, o taem we oli bin helpem wan blong gat moa lav insaed long hom blong olgeta.

Mekem Samting Wetem Fet

Leftemap tingting blong ol memba blong kworom o blong klas blong tingting hevi mo raetemdaon wanem bae oli mekem blong mekem folem ol strong tingting mo filing we oli kasem tedei. ?Olsem wanem lesen blong tedei i go wetem ol gol blong olgetawan, we oli bin mekem? Sapos oli wantem, ol memba blong kworom o blong klas oli save serem ol aedia blong olgeta.

Ol Sapot Risos

• Mosaea 4:14–16; Doktrin mo Ol Kavenan 88:119; 121:41–46 (Olsem wanem blong stanemap wan hom we i stret mo gud)

• “What Can I Do to Help Ease Family Tension?” i kamaot log Fes tu Fes wetem Elda Rasband, Sista Oscarson, mo Brata Owen (wol yut brodkas, 20 Jen 2016), ol vidio ia: “Two Brothers Apart,” “Through Small Things,” “More Diligent and Concerned at Home”, ChurchofJesusChrist.org

Tij Folem Wei blong Sevya

Sevya i bin soem lav blong Hem long ol narawan tru long fasin blong givim seves. Wanwan man o woman i bin jenisim laef mo laef blong olgeta i bin jenis tru long ol gudfala wok blong Hem. ?Olsem wanem nao yu save kopi long kwaliti ia, olsem wan lida? ?Olsem wanem nao yu save helpem ol yut blong wantem folem eksampol blong Sevya long saed blong seves, insaed long stret famli blong olgeta bakegen?