11 Julae

?Olsem Wanem Nao we Taem Mi Save Plan blong Fasin blong Sevem Man, I Jenisim Laef blong Mi?

Doktrin mo Ol Kavenan 76

Kaonsel Tugeta

Wan memba blong kworom o klas presidensi i lidim; kolosap 10–20 minit

Long stat blong miting, ripitim tugeta Stamba Toktok blong Ol Kworom blong Aronik Prishud o Stamba Toktok blong Ol Yang Woman. Afta, lidim wan toktok storian abaot ol samting we oli stap ia, mo mekem plan blong ol wei blong mekem wanem we yufala i stap toktok raon long hem (yufala i save disaed long wan presidensi miting wanem poen nao blong toktok raon long olgeta):

• Kworom o klas blong yumi. ?Huia i nidim help mo ol prea blong yumi? ?Wanem nao yumi save mekem blong helpem olgeta? ?Huia nao yumi sapos blong invaetem blong kam long wan aktiviti we i stap kam?

• Ol diuti mo responsabiliti blong yumi. ?Wanem ol asaenmen we yumi bin mekem finis? ?Wanem ol asaenmen we yumi nid blong mekem? ?Olsem wanem nao yumi bin invaetem ol narawan blong kam long Kraes, mo olsem wanem nao yumi save invaetem ol narawan naoia?

• Laef blong yumi. ?Wanem eksperiens we yumi bin gat i no longtaem i pas we i bin mekem ol testemoni blong yumi oli kam strong moa? ?Wanem i stap hapen insaed long laef blong yumi, mo olsem wanem nao yumi save sapotem wanwan long yumi?

Long en blong lesen, sapos i stret, mekem ol samting ia:

• Testifae abaot ol prinsipol we yu bin tijim.

• Rimaenem ol memba blong kworom o blong klas abaot ol plan mo invitesen we oli bin kasem long taem blong miting.

Tijim Doktrin

Wan adalt lida o yut i lidim; kolosap 25–35 minit

Rere long Yuwan long Saed blong Spirit

Papa blong yumi long Heven i givim wan plan we i letem yumi kasem ol blesing we i no save finis, mo blong yumi kam olsem Hem. Hem i wantem evriwan long ol pikinini blong Hem blong oli save abaot plan ia, mekem se Hem i talemaot plan ia tru long ol profet truaot long ol plante yia. Taem we ol ol memba blong kworom o blong klas oli bin stadi long Doktrin mo Ol Kavenan 76 long wik ia, oli bin lanem wanem we God i bin talemaot long Josef Smit m Sidni Rigdon abaot plan blong Hem, mo tu, abaot stamba rol blong Sevya insaed long plan ia, mo glori we bae yumi save kasem long laef we i stap kam. Sapos yumi fetful, yumi save kam stret evriwan tru long Atonmen blong Jisas Kraes, kasem wan glad we i fulwan, mo laef wetem God blong oltaem.

?Olsem wanem we, taem yumi save abaot plan blong Papa long Heven i bin lidim wei we yumi lukluk laef? ?Olsem wanem nao yu save helpem ol memba blong kworom o blong klas blong andastanem se hem i wan blesing blong save abaot plan ia blong fasin blong sevem man? Blong yu rere blong tij, yu save ridim “Plan blong Fasin blong Sevem Man” insaed long Stap Tru long Fet ([2004], 137–140) o mesej blong Elda Dieter F. Uchtdorf “Bigfala Wokbaot blong Yu” (Liahona, Nov 2019, 86–90).

Blong stap lan abaot plan blong fasin blong sevem man, bae i soem rod long yumi mo i givim wan stamba tingting long laef blong yumi.

Stap Lan Tugeta.

Wan wei blong statem toktok storian insaed long kworom o klas blong yu abaot plan blong fasin blong sevem man, hem i blong invaetem wan blong raetem olgeta heding ia antap long bod, wetem ol ves we oli kamaot long Doktrin mo Ol Kavenan 76: Laef bifo Laef long Wol Ia (ol ves 22–27), Laef long Wol Ia (ol ves 40–43), mo Laef Afta long Ded(ol ves 50–53, 59–62). Givim sam minit long ol memba blong klas blong oli luklukbak long ol ves ia blong oli faenem rol blong Sevya blong mekem plan blong Papa long Heven i kamtru. Askem olgeta blong raet, andanit long wanwan heding, wanem we oli faenem. Ol aktiviti andanit ia i save helpem olgeta blong andastanem moa olsem wanem plan blong Papa long Heven i save blesem laef blong olgeta.

• Blong luklukbak long nem blong plan ia blong Papa long Heven i save helpem ol memba blong kworom o blong klas blong oli andastanem gud moa plan ia. Oli save luklukbak long ol skripja we oli stap long fas dak poen anda long “Ol Sapot Risos,” mo mekem wan lis blong sam long ol nem ia blong plan blong God. ?Wanem nao wanwan long ol nem ia i stap tijim abaot plan? Eksampol: ?Olsem wanem plan ia i tekem glad i kam long yumi, naoia mo blong taem we i no save finis? ?Wanem nao ol skripja ia oli stap tijim yumi abaot rol blong Sevya insaed long plan ia? Yu save soem vidio ia “Our Eternal Life” o “Men’s Hearts Shall Fail Them” (ChurchofJesusChrist.org) mo invaetem olgeta we yu stap tijim blong oli tokbaot ol taem we oli bin filim blong talem tangkyu from plan ia blong Papa long Heven.

• Tingting blong stap invaetem olgeta we yu stap tijim blong oli toktok raon long wei we bae oli save givim wan ansa long wan fren we i stap askem olgeta kwestin ia abaot plan blong fasin blong sevem man: ?Yumi kam wea? ?From wanem yumi stap long ples ia? ?Afta we yumi ded, bae yumi go wea? Invaetem olgeta blong yusum infomesen we i stap anda long “Plan blong Fasin blong Sevem Man” insaed long Stap Tru long Fet (ol pej 137–140) wetem olgeta risos we oli stap anda long “Ol Sapot Risos” blong save rere long wan ansa long wan long ol kwestin ia: ?Olsem wanem nao tingting blong mi i strong moa naoia we mi save ol ansa long olgeta kwestin ia?

• Ol memba blong kworom o blong klas oli lanem gud mo dip moa ol trutok blong gospel taem oli kasem ol janis blong save tij. Bifo taem, askem samfala ol memba blong kworom o blong klas blong kam we oli rere finis blong serem wan sot samting abaot wanem oli save abaot wan pat blong plan blong fasin blong sevem man. Oli save yusum ol sot toktok we oli save faenem anda long “The Plan of Salvation” insaed long japta 3 blong Preach My Gospel ([2019], 48–53). ?Wanem i defren bitwin fasin blong save abaot plan blong fasin blong sevem man?

Mekem Samting Wetem Fet

Leftemap tingting blong ol memba blong kworom o blong klas blong tingting hevi mo raetemdaon wanem bae oli mekem blong mekem folem ol strong tingting mo filing we oli kasem tedei. ?Olsem wanem lesen blong tedei i go wetem ol gol blong olgetawan, we oli bin mekem? Sapos oli wantem, ol memba blong kworom o blong klas oli save serem ol aedia blong olgeta.

Ol Sapot Risos

• 2 Nifae 11:5; Alma 12:30; 34:9; 41:2; 42:8, 13–15; Moses 6:59–62 (Ol nem blong plan blong Papa long Heven)

• Doktrin mo Ol Kavenan 38:1–3; 138:53–56; Moses 4:1–4; Ebraham 3:21–24 (Laef Bifo Laef long Wol Ia)

• 2 Nifae 2:19–21, 25; Alma 5:15–16; 34:32; Ebraham 3:25–26 (Laef long wol ia)

• Jon 14:1–2; Alma 11:42–45; Doktrin mo Ol Kavenan 76:39–43, 89–93 (Laef afta long ded)

Stap Tij Folem Wei blong Sevya

Sevya hem i askem ol kwestin we i mekem olgeta we hem i tijim blong tingting plante. Hem i intres plante long ol ansa blong olgeta. ?Olsem wanem yu save yusum ol kwestin ia blong helpem ol yut blong tingting moa dip abaot plan ia blong God? (Luk long Teaching in the Savior’s Way [2016], 33–34.)