25 Julae

?From Wanem Nao Mi Mas Obei long Ol Komanmen blong God?

Doktrin mo Ol Kavenan 81–83

Kaonsel Tugeta

Wan memba blong kworom o klas presidensi i lidim; kolosap 10–20 minit

Long stat blong miting, ripitim tugeta Stamba Toktok blong Ol Kworom blong Aronik Prishud o Stamba Toktok blong Ol Yang Woman. Afta, lidim wan toktok storian abaot ol samting we oli stap ia, mo mekem plan blong ol wei blong mekem wanem we yufala i stap toktok raon long hem (yufala i save disaed long wan presidensi miting wanem poen nao blong toktok raon long olgeta):

• Kworom o klas blong yumi. ?Wanem nao yumi save mekem blong bildimap yuniti bitwin ol memba blong kworom o ol memba blong klas? “?Wanem nao ol gol we yumi laekem blong wok tugeta long hem?

• Ol diuti mo responsabiliti blong yumi. ?Wanem nao yumi stap mekem blong serem gospel? Wanem nao ol eksperiens we yumi bin gat taem yumi mekem wok blong tempol mo famli histri?

• Laef blong yumi. ?Long wanem wei nao yumi bin luk han blong God insaed long laef blong yumi? ?Wanem nao i givim insperesen long yumi long skripja stadi blong yumi long wik ia?

Long en blong lesen, sapos i stret, mekem ol samting ia:

• Testifae abaot ol prinsipol we yu bin tijim.

• Rimaenem ol memba blong kworom o blong klas abaot ol plan mo invitesen we oli bin kasem long taem blong miting.

Tijim Doktrin

Wan adalt lida o yut i lidim; kolosap 25–35 minit

Rere long Yuwan long Saed blong Spirit

Bambae i gat sam taem we bae yumi filim se ol komanmen blong God oli blokem yumi blong no gat fridom mo i putum fanis long fridom blong yumi blong mekem joes. Trutok i we, ol komanmen oli mekem se yumi gat moa fridom. Insaed long Doktrin mo Ol Kavenan 82:8–10 yumi lanem se ol komanmen oli stap helpem yumi andastanem wanem we God i wantem, mo taem yumi obei long wanem Hem i wantem, ol aksen blong yumi bae “i tanem i kambak long [yumi] blong [hem i] sevem [yumi].” Wanem we i tru, i we, taem yumi obei long God, Hem i “mas” givim yumi evriwan long ol blesing ia we Hem i bin promesem (ves 9–10). ?Olsem wanem nao Papa long Heven i blesem yu taem yu bin stap obei long ol komanmen blong Hem? Blong rere blong tij, yu save ridim mesej blong Elda Dale G. Renlund “Glad long Fulap Blesing Tumas” (Liahona, Mei 2019, 70–73) o tingting hevi long samfala long ol risos insaed long atikol blong Ol Gospel Topik “Obedience” (topics.ChurchofJesusChrist.org).

Ol eksampol blong ol fetful wokman blong God, we oli pas finis, oli save givim insperesen long yumi blong stap fetful long laef tedei.

Stap Lan Tugeta.

Ol memba blong kworom o klas blong yu, maet oli gat hadtaem blong stap obei long sam long ol komanmen. Blong stap helpem olgeta blong andastanem from wanem fasin blong stap obei i impoten, mo i save givim insperesen long tufala. Raetem taetol blong aotlaen ia long bod, mo invaetem ol memba blong kworom o blong klas blong oli serem ol ansa. Yu save askem tu long olgeta blong sam moa niu tingting we i stap long Doktrin mo Ol Kavenan 82:8–10, we maet oli bin stadi long hem long wik ia. Afta, jusum wan o moa long wan long ol aktiviti andanit ia blong helpem olgeta blong oli andastanem from wanem i impoten oltaem blong stap obei long God, iven we, taem blong mekem, i had tumas.

• I moa isi blong obei long ol komanmen taem yumi andastanem ol risen biaen long ol komanmen ia. Blong lanem from wanem God i givim ol komanmen long yumi, ol memba blong kworom o blong klas oli save luklukbak long ol skripja refrens insaed long “Ol Sapot Risos” (o sam narawan moa we yu tingting long hem). ?Olsem wanem ol skripja ia oli helpem yumi taem yumi faenem i had blong stap obei long wan komanmen? Olsem pat blong toktok storian, tugeta, yufala i save ridim seksen ia we taetol blong hem i: “Fourth, forget not the ‘why’ of the gospel” insaed long mesej blong Presiden Dieter F. Uchtdorf’, “Forget Me Not” (Liahona, Nov. 2011, 122).

• Taem bae olgeta we yu stap tijim oli andastanem eksampol ia we i stret evriwan blong Sevya abaot fasin blong stap obei, bae oli save kasem insperesen blong obei God moa fulwan. ?Wetaem nao Jisas Kraes i bin obei long Papa blong Hem, iven long ol situesen we oli had tumas (luk long Matiu 4:1–11; Luk 22:39–44). Bae oli save faenem ol eksampol blong ol man mo ol woman we oli bin stap obei long Hibrus 11. Mebi ol memba blong kworom o blong klas oli save jusum wan long ol eksampol ia—o sam narawan we oli save long ol, wetem sam blong famli blong olgeta—mo serem wanem i stap givim insperesen long olgeta abaot ol pipol ia. ?From wanem nao oli jusum blong obei long Lod? ?Olsem wanem nao Sevya i stap helpem yumi blong stap obei?

• Blong helpem ol memba blong kworom o blong klas blong oli luk ol komanmen olsem ol blesing be i no olsem ol hevi samting, yu save serem ol tijing blong Elda D. Todd Christofferson we yu save faenem insaed long “Sam Sapotem Risos.” Yu save soem o droem wan pikja blong wan lada mo askem olgeta we yu stap tijim blong raetem nem blong wanwan step ia wetem wan komanmen we maet i had blong wan yangfala blong andastanem o stap obei. ?Olsem wanem ol toktok blong Elda Christofferson i save helpem wan we i gat hadtaem blong stap obei long ol komanmen?

• Samfala vidio we oli stap tij abaot fasin blong obei, oli stap long ChurchofJesusChrist.org mo insaed long Gospel Laebri ap (luk long “Ol Sapot Risos”). Yu save givim wok long wanwan memba blong kworom o blong klas blong wajem wan long ol vidio ia bifo miting, mo blong kam we hem i rere blong serem wanem hem i bin lanem abaot fasin blong stap obei. Mebi kworom o klas i save mekem plan blong vidio blong olgetawan abaot fasin blong stap obei long ol komanmen blong God. Afta long hemia, oli save oganaesem wan aktiviti blong krietem vidio mo serem i go long sosol media.

Mekem Samting Wetem Fet

Leftemap tingting blong ol memba blong kworom o blong klas blong tingting hevi mo raetemdaon wanem bae oli mekem blong mekem folem ol strong tingting mo filing we oli kasem tedei. ?Olsem wanem lesen blong tedei i go wetem ol gol blong olgetawan, we oli bin mekem? Sapos oli wantem, ol memba blong kworom o blong klas oli save serem ol aedia blong olgeta.

Ol Sapot Risos

• 1 Nifae 17:3; Mosaea 2:41; Doktrin mo Ol Kavenan 130:20–21 (Yumi gat blesing tru long fasin blong stap obei long ol komanmen)

• Dutronome 10:12–13; Jon 14:15; 1 Jon 5:1–3 (Yumi obei long ol komanmen from se yumi lavem God)

• Doktrin mo Ol Kavenan 93:20 (Fasin blong stap obei i letem yumi blong kasem evri samting we God i gat)

• “Obedience,” insaed long japta 3 blong Preach My Gospel (2019), 75

• Elda D. Todd Christofferson i bin tijim: “Sam oli luk nomo ol sakrifaes mo ol samting we i stopem man blong stap obei long ol komanmen blong kavenan ia we i niu mo i no gat en, be olgeta we oli gotru long eksperiens ia—we oli givim olgetawan long ful tingting blong olgeta long kavenan laef ia, we i no gat samting i holemtaet olgeta—bae oli faenem moa bigfala fridom mo glad long wanem oli mekem. Taem yumi rili andastanem samting, yumi lukaotem blong folem moa komanmen, i no blong no folem olgeta. Wanwan niu loa o komanmen we yumi lanem mo laef folem, i olsem wan moa step long wan lada, we i mekem se yumi save klaem i go hae moa mo hae moa. I tru. Gospel laef i gudfala laef” (“Paoa blong ol Kavenan,” Liahona, Mei 2009, 23).

• Ol vidio ia: “The Sting of the Scorpion,” “Stay within the Lines,” “A Secure Anchor,” “Shower of Heavenly Blessings,” “Blessed and Happy Are Those Who Keep the Commandments of God,” ChurchofJesusChrist.org

Tij Folem Wei blong Sevya

Sevya i bin invaetem ol disaepol blong Hem blong oli testifae, mo taem oli bin mekem, Spirit i tajem hat blong olgeta. Taem yu stap tij, invaetem ol memba blong kworom o blong klas blong oli serem ol testemoni blong olgeta abaot hamas nao i impoten blong stap obei long ol komanmen.