8 Ogis

?Olsem Wanem Mi Save Tekpat long Kam Tugeta blong Isrel?

Doktrin mo Ol Kavenan 85–87

Kaonsel Tugeta

Wan memba blong kworom o klas presidensi i lidim; kolosap 10–20 minit

Long stat blong miting, ripitim tugeta Stamba Toktok blong Ol Kworom blong Aronik Prishud o Stamba Toktok blong Ol Yang Woman. Afta, lidim wan toktok storian abaot ol samting we oli stap ia, mo mekem plan blong ol wei blong mekem wanem we yufala i stap toktok raon long hem (yufala i save disaed long wan presidensi miting wanem poen nao blong toktok raon long olgeta):

• Kworom o klas blong yumi. ?Wanem nao ol aktiviti we yumi jes gat i no longtaem? ?Oli bin sakses? ?Wanem i bin go gud, mo olsem wanem yumi save mekem gud moa?

• Ol diuti mo responsabiliti blong yumi. ?Huia i nidim seves blong yumi? ?Olsem wanem nao yumi save helpem olgeta?

• Laef blong yumi. ?Wanem nao ol gol we yumiwan i stap wok long olgeta? ?Wanem eksperiens nao yumi save serem? ?Wanem blesing nao yumi bin kasem?

Long en blong lesen, olsem we i stret, mekem olgeta samting ia:

• Testifae abaot ol prinsipol we yu bin tijim.

• Rimaenem ol memba blong kworom o blong klas abaot ol plan mo invitesen we oli bin kasem long taem blong miting.

Tijim Doktrin

Wan adalt lida o yut i lidim; kolosap 25–35 minit

Rere long Yuwan long Saed blong Spirit

Maet olgeta we oli stap long kworom o long klas blong yu oli save wan samting abaot responsabiliti blong olgeta blong oli mekem misinari wok mo tempol mo famli histri wok. Be sapos yu toktok long olgeta abaot kam tugeta blong Isrel, maet bae oli no save wanem ia yu stap tokbaot. ?Olsem wanem we, taem yu helpem olgeta blong andastanem se blong stap serem gospel, blong stap lukaotem famli histri, mo mekem ol odinens insaed long tempol oli pat blong wan moa bigfala wok blong pulum Isrel i kam tugeta blong stap rere from Seken Kaming blong Sevya?

Olgeta ia we yu stap tijim, oli bin stadi long parabol blong gudfala mo rabis gras we i stap long Doktrin mo Ol Kavenan 86, we i stap tijim abaot kam tugeta blong Isrel long ol las dei. Taem yu stap ridim seksen ia, traem blong gat wan visen long maen blong ol pipol insaed long kworom o klas blong yu olsem ol wokman long ol plantesen blong Lod. ?Olsem wanem nao yu save helpem olgeta blong eksperiensem glad ia we i kam taem oli tekpat long bigfala wok ia? Blong lan moa abaot topik ia, stadi long mesej blong Presiden Russel M. Nelson mo Sista Wendy W. Nelson “Hope of Israel” ([worldwide youth devotional, June 3, 2018], we i kam tu insaed long New Era mo Ensign, ChurchofJesusChrist.org).

Ol yang man mo ol yang woman oli save help blong karem Isrel i kam tugeta taem oli mekem tempol mo famli histri wok.

Stap Lan Tugeta.

Yu save stat wetem sam kwestin i go long ol memba blong klas olsem: ?Wanem i kamaot klia long yu taem yu bin ridim Doktrin mo Ol Kavenan 86 long hom? ?Wanem nao yu bin lanem abaot wok blong karem ol pikinini blong God oli kam wanples long ol las dei ia? ?Wanem nao yumi stap mekem blong tekpat long wok ia? Andanit ia i gat sam aedia we oli ademap blong givim insperesen long kworom o klas blong tekpat long kam tugeta blong Isrel.

• Askem ol memba blong kworom o blong klas blong yu se oli tingting wanem taem oli harem toktok ia “kam tugeta blong Isrel.” Sapos oli nidim help, givim tingting blong oli ridim mining we i kam long Presiden Russell M. Nelson: “Kam tugeta blong Isrel, long en, i minim blong stap presentem gospel blong Jisas Kraes long ol pikinini blong God long tugeta saed blong vel, we oli no mekem eni impoten kavenan we i nid wetem God, mo oli no bin kasem ol stamba odinens. Evri pikinini blong Papa blong yumi long Heven, i inaf blong gat wan janis blong jusum blong folem Jisas Kraes, mo blong akseptem mo kasem gospel blong Hem wetem evri blesing blong gospel ia” (“Hope of Israel,” 11–12). ?Olsem wanem mining ia i jenisim wei we yumi stap tingting abaot impoten diuti ia?

• Blong helpem ol memba blong kworom o blong klas blong luk olsem wanem parabol blong gudfala mo rabis gras i blong olgeta tu, yu save raetem ol sentens ia we oli stap long Doktrin mo Ol Kavenan 86 long bod. Ol sentens ia oli save tokbaot ol simbol insaed long parabol ia—olsem “ol man blong planem sid,” “ol rabis gras oli jokem gudfala sid,” “sid i stap gro yet,” “putum tugeta ol gudfala sid” (ol ves 2–4, 7). Ol sentens ia oli save tokbaot tu fasin blong talem mining blong ol simbol ia—olsem “Ol Aposol,” “Apostasi,” “Kambak blong Gospel,” mo “misinari wok.” Afta, ol memba blong kworom o blong klas oli save wok tugeta blong luklukbak long seksen 86 mo joenem ol simbol i go wetem mining blong olgeta. (Mo tu, oli save ridim Matiu 13:36–43.) ?Wanem nao yumi lanem aot long parabol ia abaot wok ia blong mekem Isrel i kam tugeta? ?Wanem nao yumi save mekem blong stap “wan laet” mo “wan sevya” long ol pikinini blong God?(Doktrin mo Ol Kavenan 86:11).

• Ol memba blong kworom o blong klas oli save tingbaot se long mesej blong “Hop blong Isrel,” Presiden Russel M. Nelson i bin invaetem olgeta blong mekem ol spesifik samting blong rere blong help blong tekem Isrel i kam tugeta (luk long ol pej 14–17). Askem olgeta wanem invitesen oli tingbaot, mo luklukbak long ol invitesen tugeta olsem we i nid. ?Olsem wanem nao we taem yu mekem olgeta samting ia i mekem se yumi wok gud moa long wok blong pulum Isrel i kam tugeta? ?Wanem nao yumi save mekem blong rimaenem yumi abaot ol invitesen ia mo helpem wanwan long yumi blong mekem oli kamtru? Leftemap tingting blong ol memba blong kworom o blong klas blong oli tingting long wan wei blong krietem samting mo serem ol aedia blong olgeta.

• Ol memba blong kworom o blong klas oli save ridim fas toktok mo ol fas tufala seksen blong mesej blong Elda Quentin L. Cook: “Bigfala Lav long Ol Pikinini blong Papa blong Yumi” (Liahona, Mei 2019, 76–79), mo lukaotem from wanem lav i impoten tumas long misinari mo tempol mo famli histri hadwok blong yumi. Askem olgeta blong serem wanem we oli lanem abaot wei we lav i save mekem samting i defren taem yumi stap traehad blong serem gospel wetem olgeta we oli stap long tugeta saed blong vel. Givim long ol memba blong kworom o blong klas taem blong oli raetemdaon wan samting we oli wantem mekem from storian blong yufala tedei. Blong helpem olgeta blong tingting long sam aedia, yu save traem talem se oli tingting long ol pipol we oli save olgeta. ?Olsem wanem nao bae God i stap go toktok long ol pipol ia? ?Olsem wanem nao yumi save helpem olgeta?

Ol Sapot Risos

• Russell M. Nelson, “The Gathering of Scattered Israel,” Liahona, Nov. 2006, 79–82

• Church History Topics, “The Gathering of Israel,” ChurchofJesusChrist.org/study/history/topics

Tij Folem Wei blong Sevya

Sevya i bin trastem olgeta we oli bin folem Hem. Hem i bin mekem olgeta oli rere mo Hem i bin givim ol impoten responsabiliti long olgeta blong oli tijim, blesem, mo givim seves long ol narawan (luk long Teaching in the Savior’s Way [2016], 28). ?Wanem nao ol janis we yu save givim long ol yut blong oli tijim wanwan long olgeta?