22 Ogis

?From Wanem Lod I Wantem blong Mi Stap Helti?

Doktrin mo Ol Kavenan 89–92

Kaonsel Tugeta

Wan memba blong kworom o klas presidensi i lidim; kolosap 10–20 minit

Long stat blong miting, ripitim tugeta Stamba Toktok blong Ol Kworom blong Aronik Prishud o Stamba Toktok blong Ol Yang Woman. Afta, lidim wan toktok storian abaot ol samting we oli stap ia, mo mekem plan blong ol wei blong mekem wanem we yufala i stap toktok raon long hem (yufala i save disaed long wan presidensi miting wanem poen nao blong toktok raon long olgeta):

• Kworom o klas blong yumi. ?Huia i niu long wod blong yumi, mo olsem wanem nao yumi save helpem olgeta blong filim welkam? ?Wanem nao yumi stap mekem blong mekem se taem blong yumi long kworom o miting long klas i gat mining?

• Ol diuti o responsabiliti blong yumi. ?Wanem nao sam diuti mo responsabiliti we yumi gat olsem ol yang man mo ol yang woman? ?Olsem wanem nao yumi save mekem i kam moa gud?

• Laef blong yumi. Wanem nao yumi stap mekem blong kam moa olsem Jisas Kraes mo kasem paoa blong Hem long laef blong yumi? ?Wanem nao yumi stap mekem blong helpem ol famli blong yumi blong kam long Hem?

Long en blong lesen, sapos i stret, mekem olgeta samting ia:

• Testifae abaot ol prinsipol we yu bin tijim.

• Rimaenem ol memba blong kworom o blong klas abaot ol plan mo invitesen we oli bin kasem long taem blong miting.

Tijim Doktrin

Wan adalt lida o yut i lidim; kolosap 25–35 minit

Rere long Yuwan long Saed blong Spirit

Hem i isi blong sam pipol blong tingting long Tok blong Waes we i stap long Doktrin mo Ol Kavenan 89, olsem wan lis blong ol samting blong mekem mo blong no mekem. Insaed long Tok blong Waes i gat sam samting olsem, be tu, i tekem olgeta prinsipol blong kipim bodi blong yumi i stap helti. Hem i stap tijim se wei we yumi tritim bodi blong yumi i lidim helt blong yumi long saed blong tingting, filing mo spirit. ?Wanem blesing nao yu bin kasem taem yu bin stap traehad blong laef folem wan helti laef?

Maet ol memba blong kworom o blong klas oli bin stadi long Tok blong Waes taem oli bin stap ridim Doktrin mo Ol Kavenan 89–92 long wik ia. ?Olsem wanem yu save helpem olgeta blong andastanem blesing long saed blong bodi mo long saed blong spirit we i kam taem wan i stap obei long revelesen ia? Yu save faenem ol niu tingting taem yu luklukbak long atikol ia insaed long Ol Gospel Topik we oli singaotem: “Word of Wisdom” (topics.ChurchofJesusChrist.org) o “Helt blong Bodi mo blong Filing” insaed long Blong Ol Yut Oli Kam Strong ([2011], 24–27).

Blong stap kea long bodi blong yumi bae i tajem helt blong yumi long saed blong tingting, filing, mo long saed blong spirit.

Stap Lan Tugeta.

Blong stat blong toktok raon long Tok blong Waes,, raetem ol toktok ia long bod: Bodi, Tingting, Spirit, mo Sosol. Invaetem ol memba blong kworom o blong klas blong ridim Doktrin mo Ol Kavenan 89:18–21 mo toktok raon long wei we ol promes insaed long ol ves ia oli blong yusum long ol eria ia. ?Wanem blesing i save kam taem oli stap obei long Tok blong Waes? ?Olsem wanem nao yumi bin gat eksperiens long ol blesing ia insaed long laef blong yumi?

• Ol memba blong kworom o blong klas oli save lanem plante aot long wanwan long olgeta taem oli mekem wan joen lis blong ol samting we oli stap mekem blong stap helti. Sekem ol memba blong kworom o blong klas long ol grup, mo givim wok long wanwan grup blong luklukgud insaed long wan, o moa long wan long ol skripja long fas poen anda long “Ol Sapot Risos,” mo lukaotem ol trutok abaot helt long saed blong bodi. Mekem wanwan grup i serem wanem we oli bin lanem mo raetemdaon lis blong ol aedia blong olgeta long bod. ?Olsem wanem nao bae yumi ansa ol kwestin olsem olgeta ia: “?From wanem God i givim yumi ol loa long saed blong helt long saed blong bodi? ?From wanem yumi stap obei long olgeta?

• Bae oli save askem long ol memba blong kworom o blong klas from wanem oli no dring alkol, oli no smol, o tekem drag. ?Olsem wanem nao bae oli ansa long ol kwestin ia? Oli save luklukgud insaed long “Helt long Bodi mo blong Filing” insaed long Blong Ol Yut Oli Kam Strong (ol pej 24–27) mo faenem ol blesing we Lod i promesem blong oli save serem wetem ol narawan. ?Olsem wanem nao, wei we yumi tritim bodi blong yumi i tajem rilesensip blong yumi wetem God? ?Long wanem wei nao ol memba blong kworom o blong klas oli bin kasem wan testemoni se, fasin blong stap obei long Tok blong Waes, i blesem laef blong olgeta/

• Ol eksperiens we oli soem se ol blesing blong stap obei long Tok blong Waes i save givim insperesen long ol memba blong kworom o blong klas blong oli komitim olgeta moa blong stap laef folem loa ia. Yu save serem wan eksperiens blong laef blong yu, o eksperiens blong Presiden Thomas S. Monson, we hem i bin serem long mesej blong hem: “Ol Prinsipol mo Ol Promes” (Jeneral Konfrens, Okt 2016, Churchofjesuschrist.org/general-conference/conferences?lang=bis). Vidio ia long Inglis: “Leave the Party” (ChurchofJesusChrist.org) i tekem insaed wan nara eksampol. Yu save leftemap tingting blong ol memba blong kworom o blong klas blong oli serem ol eksperiens blong olgeta.

• Blong stat blong toktok raon long wei blong stanap agensem ol temtesen blong brekem Tok blong Waes, yu save soem wan giaman fis blong huk long ol memba blong kworom o blong klas (o yu save soem pikja blong wan). ?Long wanem wei nao ol giaman fis blong huk ia oli giaman long ol fis? Ol ansa long kwestin ia, bae yu save faenem insaed long vidio ia we i stap long Inglis: “You Will Be Freed” (ChurchofJesusChrist.org; luk tu long M. Russell Ballard, “O That Cunning Plan of the Evil One,” Liahona, Nov. 2010, 108–10). ?Olsem wanem nao oli giaman fis blong huk oli olsem wanem we Setan i stap mekem blong giaman o trikim yumi? ?Wanem mesej nao Presiden Ballard i gat blong olgeta we oli fas long adiksen? ?Olsem wanem yumi save helpem wan we i gat hadtaem wetem temtesen blong hem i tanem hem i go long Sevya? (luk long ol skripja insaed long seken poen anda long “Ol Sapot Risos”).

Mekem Samting Wetem Fet

Leftemap tingting blong ol memba blong kworom o blong klas blong tingting hevi mo raetemdaon wanem bae oli mekem blong mekem folem ol strong tingting mo filing we oli kasem tedei. ?Olsem wanem lesen blong tedei i go wetem ol gol blong olgetawan, we oli bin mekem? Sapos oli wantem, ol memba blong kworom o blong klas oli save serem ol aedia blong olgeta.

Ol Sapot Risos

• Daniel 1:3–20; 1 Korin 6:19–20; Doktrin mo Ol Kavenan 88:124; 89:5–21 (Olsem wanem yumi mas lukaot gud long bodi blong yumi; hemia i impoten long Lod)

• Mosaea 7:33; Alma 13:27–29; Ita 12:27 (Hop blong olgeta we oli gat hadtaem wetem ol adiksen)

• Ogis 2019 namba blong New Era mo Ensign (spesel namba abaot bodi)

Tij Folem Wei blong Sevya

Long evri ples, Sevya Hem i eksampol mo tija blong tingting blong yumi. Taem yu stap rere blong tij, tingting long wei we Lod i bin stap toktok wetem ol narawan, mo olsem wanem yu save toktok long wan wei we i leftemap olgeta we yu stap tijim.