Ol Sent we oli ronwe long ol rabis man

C. C. A. Christensen (1831–1912), Oli Ronemaot Ol Sent aot long Jakson Kaonti, Misuri, c. 1878, tempera long muslin, 77 ¼ × 113 inj. Brigham Yang Yunivesiti Miusiom blong Art, presen we i kam long ol apupikinini blong C. C. A. Christensen, 1970

12 Septemba

?Olsem Wanem Yumi Save Fesem Samting we I Kam Agens Wetem Fet?

Doktrin mo Ol Kavenan 98–101

kaonsel tugeta pikja bokis

Kaonsel Tugeta

Wan memba blong kworom o klas presidensi i lidim; kolosap 10–20 minit

Long stat blong miting, ripitim tugeta Stamba Toktok blong Ol Kworom blong Aronik Prishud o Stamba Toktok blong Ol Yang Woman. Afta, lidim wan toktok storian abaot ol samting we oli stap ia, mo mekem plan blong ol wei blong mekem wanem we yufala i stap toktok raon long hem (yufala i save disaed long wan presidensi miting wanem poen nao blong toktok raon long olgeta):

• Kworom o klas blong yumi. ?Huia i nidim help mo ol prea blong yumi? ?Wanem nao yumi save mekem blong helpem olgeta? ?Huia nao yumi sapos blong invaetem blong kam long wan aktiviti we i stap kam?

• Ol diuti mo responsabiliti blong yumi. ?Wanem ol asaenmen we yumi bin mekem finis? ?Wanem ol asaenmen we yumi nid blong mekem? ?Olsem wanem nao yumi bin invaetem ol narawan blong kam long Kraes, mo olsem wanem nao yumi save invaetem ol narawan naoia?

• Laef blong yumi. ?Wanem eksperiens we yumi bin gat i no longtaem i pas we i bin mekem ol testemoni blong yumi oli kam strong moa? ?Wanem i stap hapen insaed long laef blong yumi, mo olsem wanem nao yumi save sapotem wanwan long yumi?

Long en blong lesen, sapos i stret, mekem ol samting ia:

• Testifae abaot ol prinsipol we yu bin tijim.

• Rimaenem ol memba blong kworom o blong klas abaot ol plan mo invitesen we oli bin kasem long taem blong miting.

tijim doktrin pikja bokis

Tijim Doktrin

Wan adalt lida o yut i lidim; kolosap 25–35 minit

Rere long Yuwan long Saed blong Spirit

Ol toktok blong God we oli stap long Doktrin mo Ol Kavenan 98 mo101 oli givim kamfot long Ol Sent we oli bin stap fesem ol strong tes long Misuri long ol yia 1830. Maet ol tes blong yumi oli defren long olgeta fasfala memba blong Jos, be yumi evriwan i fesem samting we i kam agensem yumi long taem blong laef ia long wol, mo blong stap fesem wanem i kam agensem wetem fasin blong stap fetful, i save helpem yumi blong groap long saed blong spirit mo kam moa olsem Jisas Kraes.

?Olsem wanem nao we, taem yu bin tanem yu i go long Lod long ol taem blong agens i bin mekem yu yu kam strong moa mo i bin mekem rilesensip blong yu wetem Jisas Kraes i kam gud moa? ?Wanem jalenj mo tes ol memba blong kworom o blong klas blong yu oli stap gotru long hem, mo olsem wanem nao yu helpem olgeta blong faenem paoa long Sevya? Blong helpem yu blong rere blong tij abaot wanem i save kam agens, yu save luklukbak long mesej blong Elda Neil L. Andersen: “We I Karem Kil” (Liahona, Nov 2018, 83–86) mo “Wanem I Kam Agens” insaed long Stap Tru long Fet, ([2004], 208–212).

yang man i stap aotsaed

Yumi save faenem pis long ol taem blong agens taem yumi tanem yumi i go long Sevya.

Stap Lan Tugeta.

Wanwan long ol memba blong kworom o blong klas blong yu i stap gat hadtaem wetem ol jalenj blong hemwan. ?Wanem kamfot nao yu filim se bae oli save faenem insaed long Doktrin mo Ol Kavenan 98:1–3? Maet yu save yusum wan, o moa long wan long ol aktiviti andanit ia blong helpem olgeta blong andastanem olsem wanem blong gotru long fasin blong stap agens wetem fet long Lod.

• Ol skripja oli holem plante eksampol blong ol pipol we oli bin fetful blong stap strong tru long ol tes. Ol memba blong kworom o blong klas oli save lanem olsem wanem blong stap fetful blong stap strong agensem wanem i kam agens taem oli stadi long sam long ol eksampol (luk long sam long olgeta insaed long “Ol Sapot Risos”). Oli save jusum wan long ol skripja ia mo talem sot eksperiens blong man o woman ia long kworom o long klas. ?Wanem niu tingting yumi kasem abaot from wanem nao yumi gat samting we i kam agensem yumi? ?Wanem nao yumi lanem abaot wei blong stap fetful blong stap strong agensem samting we i agensem yumi? Invaetem ol memba blong kworom o blong klas blong wanwan i raetemdaon wan tes we olgeta, o wan famli blong olgeta i stap fesem, mo tingting hevi long wei we oli save yusum paoa blong Sevya blong helpem olgeta long taem blong ol tes ia.

• Blong lanem abaot sam long ol risen blong ol samting ia we oli kam agensem yumi, mo wanem nao yumi save lanem aot long ol tes blong yumi, tugeta yufala i save ridim ol fas tu paragraf anda long “Wanem I Kam Agens” insaed long Stap Tru long Fet (pej 208). Askem ol memba blong kworom o blong klas blong serem wanem we oli bin lanem. Afta, wanwan i save luklukbak long wan long ol trifala seksen we i stap anda long “Wanem I Kam Agens” mo i rere blong tijim nara haf blong klas long wanem we oli bin lanem, mo tu, olsem wanem Sevya i save helpem yumi long taem blong ol tes ia. Leftemap tingting blong olgeta blong serem wan eksperiens blong olgeta we i go wetem wanem we oli ridim sapos oli filim se i stret blong mekem.

• Wan wei blong statem wan toktok storian abaot wanem i kam agens i blong raetem wan laen long medel blong bod mo raetem ?From wanem yumi gat samting we i kam agens? ong wan saed, mo ?Olsem wanem yumi save stap fetful mo fesem samting we i kam agens? long nara saed blong bod Wanwan memba blong kworom o blong klas i save ridim wan long ol seksen blong mesej blong Elda Neil L. Andersen, we taetol i “We I Karem Kil,” mo lukaotem ol ansa long ol kwestin long bod. ?Wanem nao yumi lanem abaot mesej blong Elda Andersen?

• Elda Stanley G. Ellis i yusum ol eksampol blong ol bebi faol mo ol bataflae blong tij abaot wanem we i save kam agens, insaed long mesej blong hem “Do We Trust Him? Hard Is Good” (Liahona, Nov. 2017, 112–14). Yu save soem wan pikja blong wan bebi faol we i jes bon, o blong wan bataflae we i jes kamaot long koten eg blong hem mo toktok raon long wanem Elda Ellis i bin tijim. Afta, olgeta we yu stap tijim olgeta oli save wok tugeta tutu mo luklukbak long toktok blong Elda Ellis. Wanwan smol grup ia i save raetem lis blong evri samting we oli save faenem we Elda Ellis i bin tijim abaot risen from wanem yumi gat samting we i kam agensem yumi, mo olsem wanem yumi sapos blong fesem hemia. ?Long wanem wei nao we taem yumi bin stap fetful long ol taem blong agens i bin helpem yumi blong kam kolosap moa long Sevya?

Mekem Samting Wetem Fet

Leftemap tingting blong ol memba blong kworom o blong klas blong tingting hevi mo raetemdaon wanem bae oli mekem blong mekem folem ol strong tingting mo filing we oli kasem tedei. ?Olsem wanem lesen blong tedei i go wetem ol gol blong olgetawan, we oli bin mekem? Sapos oli wantem, ol memba blong kworom o blong klas oli save serem ol aedia blong olgeta.

Ol Sapot Risos

• 1 Samuel 1; 1 King 17; Luk 23:33–34; 1 Nifae 5:1–9; Mosaea 24:8–17; 3 Nifae 1:4–21; Moronae 1; Gaed long Ol Skripja, “Rut” mo “Esta,” olskripja.ChurchofJesusChrist.org (Ol Eksampol blong ol pipol we oli bin fesem samting we i kam agensem olgeta)

• Jon 14:18; Rom 8:28, 35–39; Alma 36:3 (Sevya i save helpem yumi long taem we i gat samting we i kam agensem yumi)

• “God Will Lift Us Up,” “The Will of God,” vidio, ChurchofJesusChrist.org

Tij Folem Wei blong Sevya

Sevya Hem i save olgeta we Hem i bin tijim— mo Hem i save se wanem kaen man bae oli save kam. Taem oli stap traehad blong kamaot long hadtaem, Hem i no bin givap long olgeta, be Hem i bin gohed blong lavem mo givhan long olgeta. ?Wanem sam had samting we ol yut oli stap gat? ?Olsem wanem yumi save soem lav mo sapot?