?Yumi Trastem Hem? Had I Gud
Nomata long situesen, had i save kam gud blong olgeta we bae oli muv fored wetem fet mo oli trastem Lod mo plan blong Hem.
Bifo mi stat, olsem wan we i ripresentem evriwan long mifala we hariken mo etkwek we i jes pas i no longtaem i spolem gud mifala, mi talem tangkyu long evri Han blong Help mo ol olgeta we oli bin lidim ol wok ia, we oli givim help mo hop long mifala.
Long Oktoba 2006, mi bin givim fas jeneral konfrens toktok blong mi. Mi bin filim wan impoten mesej blong Jos raon long Wol we i talem ol toktok ia: “!Lod i trastem yumi!”
Hem i rili trastem yumi long plante defren wei. Hem i givim long yumi gospel blong Jisas Kraes, mo long dispensesen ia, ful gospel. Hem i trastem yumi wetem ful prishud atoriti blong Hem wetem ol ki blong yusum gud. Wetem paoa ia, yumi save blesem, wok, kasem odinens, mo mekem ol kavenan. Hem i trastem yumi wetem Jos blong Hem we i kambak, mo tabu tempol tu. Hem i trastem ol wokman blong Hem wetem ol paoa blong sil—!blong joenem long wol mo mekem God i joenem long heven! Hem i trastem yumi blong stap olsem ol papa mo mama, ol tija, mo ol man blong kea long ol pikinini blong Hem long wol ia.
Afta ol yia blong seves olsem Jeneral Atoriti long plante pat blong wol, mi talemaot wetem moa sua tingting—Hem i trastem yumi.
Naoia kwestin blong konfrens ia i: “?Yumi trastem Hem?”
?Yumi trastem Hem?
Presiden Thomas S. Monson i rimaenem yumi oltaem blong “yumi mas trastem Hae God long olgeta tingting blong yumi.
“Long olgeta samting we yumi stap mekem, yumi mas tingbaot hem oltaem, mo sapos yumi stap mekem olsem, hem bambae i soemaot stret rod long yumi, blong yumi folem.
“I nogud yumi ting se yumi waes man.” (Ol Proveb 3:5–7).
?Yumi trastem se ol komanmen blong Hem oli blong gud blong yumi? ?Ol Lida blong Hem, nomata se oli no stret gud evriwan, yumi trastem se bae oli lidim yumi i gud? ?Ol promes blong Hem, oli tru? ?Yumi trastem se Papa long Heven mo Jisas Kraes tufala i save yumi mo wantem blong helpem mo blesem yumi? ?Iven long medel blong ol tes, jalenj, had situesen mo hadtaem, yumi stil trastem Hem?
Taem mi luklukbak, mi bin lanem sam top lesen long ol hadtaem—hemia olsem wan yut, long wan misin, taem mi statem wan niu wok, taem mi traehad blong mekem gud ol koling blong mi, taem mi lukaotem wan bigfala famli, o taem mi bin traem bes blong stap dipen long miwan. Hem i klia se !had i gud!
Had i Gud
Had i mekem yumi kam strong moa, tingting blong yumi i stap daon, mo i givim yumi janis blong pruvum yumiwan. Ol hankat paeonia blong yumi we yumi lavem, oli kam blong save God long strong hadtaem blong olgeta. ?From wanem i tekem tu japta blong Nifae mo ol brata blong hem blong kasem ol buk blong bras mo tri ves nomo blong winim famli blong Ismael blong joenem olgeta long waelples? (Luk long 1 Nifae 3–4; 7:3–5) I luk olsem se Lod i wantem blong mekem Nifae i kam strong moa tru long fasin blong traehad blong kasem ol buk.
Ol had samting long laef blong yumi oli no sapos blong kam olsem sapraes. Wan long ol eli kavenan we yumi mekem wetem Lod i blong laef folem loa blong sakrifaes. Sakrifaes i minim blong lego ol samting we yumi laekem. Wetem eksperiens yumi luksave se hem i wan smol praes nomo blong pem komperem long ol blesing we bae i folem. Josef Smit i talem, “Wan relijin we i no nidim sakrifaes blong evri samting bae i neva gat paoa we i inaf blong givim fet we i nid blong laef mo blong sevem man.”
Ol memba blong Godhed oli no niu long ol had samting. God, Papa i sakrifaes long Wan Stret Pikinini ia nomo blong Hem blong safaring ia blong Atonmen, we i tekem ded tru long kros. Ol skripja oli talem se; Jisas Kraes i lanem fasin blong obei tru long ol samting we Hem i safa from” (Hibrus 5:8). Hem i wantem blong safa long harem nogud blong Atonmen. Tabu Spirit i mas gat longfala tingting blong wekemap, wonem mo gaedem yumi, be samtaem, yumi tanem baksaed, no andastanem gud, mo fogetem Hem.
Pat long Plan ia
Had i pat long plan blong gospel. Wan long ol stamba tingting blong laef ia i blong yumi pruvum yumi (Luk long Ebraham 3:25). Sam oli bin safa moa nogud bitim ol pipol blong Alma. !Oli bin ronwe long nogud King Noa be oli kam slef long Ol Man blong Leman! Tru long ol tes ia, Lod tijim olgeta mekem se Hem i stretem olgeta mo i testem fasin blong save wet long taem blong olgeta mo fet blong olgeta (Mosaea 23:21).
Long ol nogud dei insaed long Libeti kalabus, Lod i tijim Josef Smit blong “mekem gud blong stap strong” (D&C 121:8) mo promes se sapos hem i mekem, “evri samting ia bae i givim hem eksperiens mo bae i blong gud blong hem” (D&C 122:7).
Presiden Thomas S. Monson i askem strong: “Bae oltaem yumi jusum raet we i had be i no rong we i isi.” Long saed blong ol tempol blong yumi, hem i talem se “i no gat wan sakrifaes we i moa bigwan, i no gat praes we i moa hevi, i no gat hadtaem we i moa had blong save kasem ol blesing blong [tempol]”
Long wol blong neja, had i pat blong sekol blong laef. Hem i had blong wan bebi faol blong i brekem strong sel blong eg blong hem. Be taem wan man i traem blong mekem i kam moa isi, bebi faol ia i no developem paoa we hem i nidim blong laef. Long wan semmak wei, ol traehad blong bataflae blong kamaot long strong sel we i holemtaet hem, i mekem se hem i kam strong long laef we bae hem i laef folem.
!Tru long ol eksampol ia, yumi luk se had i wan samting we evriwan i mas gotru long hem! Yumi evriwan i gat ol jalenj. Wanem i jenis i hao yumi gotru wetem ol had samting.
Long wan taem, sam pipol blong Buk blong Momon oli bin safa “ol bigfala agens” mo “plante hadtaem” (Helaman 3:34). ?Olsem wanem nao oli fesem? “Oli bin livim kakae mo oli bin prea, mo oli bin wok strong mo moa strong blong putum tingting blong olgeta i stap daon, mo oli bin kam strong mo moa strong long fet long Kraes, mekem se oli bin fulumap sol blong olgeta wetem glad mo fasin blong leftemap tingting blong harem gud bakegen” (Helaman 3:35). Wan nara eksampol i hapen afta ol yia blong wo. “Be luk, from faet we i longfala mo i tumas bitwin ol man blong Nifae mo ol man blong leman plante i bin kam stronghed…mo plante we hat blong olgeta i kam sofsof from ol hadtaem blong olgeta, inaf blong mekem se oli putum tingting blong olgeta i stap daon long fored blong God” (Alma 62:41).
Yumi wanwan i jusum ol aksen blong yumi blong fesem ol had samting.
Stap lukaot long Ol Isi samting
Bifo long koling ia, mi bin wan faenens konsalten long Yuston, Teksas. Plante long ol wok blong mi i bin wetem ol rij rijman we oli lukaotem bisnis blong olgetawan. Kolosap evriwan long olgeta oli krietem bisnis blong olgetawan stat long siro i go long plante hadwok. Wanem we mi harem nogud long hem, i we, sam long olgeta oli talem se oli wantem blong mekem i kam moa isi blong ol pikinini blong olgeta. Oli no wantem ol pikinini blong olgeta blong safa olsem we olgeta i bin safa. Long nara toktok, bae oli no letem ol pikinini blong olgeta blong gat wanem we i mekem se oli gat sakses.
Long narasaed, mifala i save wan famli we oli tekem wan defren rod. Ol papa mo mama oli kasem wan tingting tru long eksperiens blong J. C. Penney we papa blong hem i talem long hem se taem hem i groap kasem eit yia blong hem se bae hem i lukaotem hemwan long saed blong mane. Oli mekem wan wei blong olgeta: taem wanwan pikinini i graduet long hae skul, oli lukaotem olgetawan long saed blong mane—blong skul moa (kolej, graduet skul.) mo blong oli lukaotem gud mane blong olgetawan (dipen long olgetawan tru) (luk long D&C 83:4). Yumi hapi, ol pikinini oli fesem wetem waes. Olgeta evriwan oli graduet long yunivesiti, mo sam oli finisim graduet skul—evri samting ia olgetawan. I no bin isi, be oli mekem. Oli mekem mo muv i go fored wetem fet.
Fet blong Trastem Hem
Kwestin ia “Yumi trastem Hem?” bae oli save talem gud moa, “Yumi gat fet ia blong trastem Hem?”
Yumi gat fet ia blong trastem ol promes blong Hem we i abaot taeting mo se wetem 90 pesen blong ol salari blong yumi plas help blong Lod, yumi oraet wetem bitim ol 100 pesen blong wetem yumiwan?
?Yumi gat inaf fet blong trastem se bae Hem i visitim yumi long ol hadtaem blong yumi (luk long Mosaea 24:14), se bae Hem i faet agensem olgeta we oli faet wetem yumi (luk longAesea 49:25; 2 Nifae 6:17), mo se bae Hem konsekretem ol hadtaem blong yumi blong oli kam wan blesing? (luk long 2 Nifae 2:2).
?Bae yumi praktisim fet we i nid blong obei ol komanmen blong Hem blong mekem se Hem i save blesem yumi long saed blong bodi tugeta wetem spirit? ?Mo bae yumi gohed blong stap fetful kasem en blong mekem se bae Hem i letem stap wetem Hem? (luk long Mosaea 2:41).
Ol brata mo sista. !Yumi save gat fet blong trastem Hem! Hem i wantem wanem we i bes blong yumi (luk longMoses 1:39). Bae Hem i ansarem ol prea blong yumi (luk long D&C 112:10). Bae Hem i kipim ol promes blong Hem (luk long D&C 1:38). Hem i gat paoa ia blong kipim ol promes ia (luk long Alma 37:16). !Hem i save evri samting! Mo moa impoten, Hem i save wanem i moa gud (luk long Aesea 55:8–9).
Wan Wol we I Gat Denja
Wol blong yumi tedei i had tumas—Yumi gat plante ivel mo korapsen long evri nesen, teroris i kasem tu ol ples we i sef, ekonomi i foldaon, nogat wok, ded, ol disasta, ol sivil wo, ol rabis lida, plante moa. ?Bae yumi mekem wanem? ?Bae yumi ron o yumi faet? ?Wijwan nao i raet? Tufala ia i denja? I bin denja blong Joj Wasington mo ol ami blong hem blong faet, be tu, i semmak tu long ol bubu paeonia blong oli ronwe. I bin denja blong Nelson Mandela blong traehad from fridom. Oli bin talem finis se blong devel i win, i gud nomo blong ol gudfala pipol blong no mekem wan samting.
!No Fraet!
Long eni samting we yumi mekem, yumi no sapos blong disaed o tekem aksen, wetem spirit blong fraet. I tru, “God i no givim long yumi spirit blong fraet” (2 Timoti 1:7) (?Yu luk save se toktok ia, yu no fraet, oli poenemaot gud long olgeta skripja?) Lod i bin tijim mi se tingting we i foldaon mo fraet oli ol tul blong enemi. Ansa blong Lod long hadtaem i blong go fored wetem fet.
?Wanem I Had?
Wanwan long yumi i gat defren tingting long saed blong wanem i had. Sam oli ting se i had blong pem taeting taem mane i no inaf. Ol lida oli samtaem faenem i had blong tingting se olgeta we oli pua bae oli pem taeting. Ating i had blong sam long yumi blong go fored wetem fet mo mared o blong gat wan famli. I gat olgeta we oli faenem i had blong laef wetem wanem we Lod i givim long [olgeta]” (Alma 29:3) Ating i had blong stap wetem ol koling blong yumi blong naoia (luk long Alma 29:6). Jos disiplin i kam had tumas, be blong sam, i makem wan stat blong rod blong sakem sin wetem tru tingting.
Nomata long situesen, had i save kam gud blong olgeta we bae oli muv fored wetem fet mo oli trastem Lod mo plan blong Hem.
Wines blong Mi
Ol brata mo sista blong mi. Mi witnes se ol lida ia biaen long mi, God i singaotem olgeta. Tingting blong hat blong olgeta i blong givim gud seves long Lod mo helpem yumi putum gospel long hat blong yumi. Mi lavem mo sastenem olgeta.
Mi lavem Sevya blong yumi, Jisas Kraes. Mi sapraes se Hem i lavem Papa mo yumi inaf blong kam olsem Sevya mo Ridima blong yumi, mo from Hem i mekem olsem, Hem i mas safa long wan kaen safaring we i mekem se “ Hem i seksek from ol soa blong bodi mo blong blad i ron long evri hol blong bodi blong hem mo blong harem nogud long bodi mo spirit” (D&C 19:18) Yet wetem kaen safaring ia mo evri samting we i go wetem, Hem i talem long Papa, “I no olsem we mi mi wantem be olsem we yu nomo yu wantem” (Luk 22:42) Mi givim glori long ol toktok blong enjel we i se: “Hem i no stap long ples ia, hem i laef bakegen finis” (Matiu 28:6).
Eksampol blong hem i tru “rod ya, stamba blong trutok mo stamba blong laef” (Jon 14:6) Taem yumi folem nomo eksampol ia, bae yumi faenem “pis long wol ia, mo laef we i no save finis long wol we i stap kam” (D&C 59:23). Taem mi bin stap folem eksampol blong Hem mo yusum ol tijing blong Hem, mi bin kam blong lanem wanwan long ol bigbigfala mo ol gudfala promes blong Hem” (2 Pita 1:4) we oli tru.
Bigfala tingting blong hat blong mi i blong stanap wetem Momon olsem wan tru disaepol blong Jisas Kraes (luk long 3 Nifae 5:13) mo blong wan dei, harem long maot blong hem, “!Ei! Yu yu mekem wan gudfala wok” (Matthew 25:21). Long nem blong Jisas Kraes, amen.