Stap Wetem God mo Riperem Wanem we I Brok
Kraes i gat paoa blong tekem yumi kam felosip wetem lav wetem Papa mo wetem wanwan long yumi.
Yumi nidim blong gogohed blong gat moa dip save mo fasin blong obei long Papa long Heven. Rilesensip blong yumi wetem Hem, i no save finis. Yumi, ol pikinini blong Hem, mo hemia bae i no jenis. ?Olsem wanem nao bae yumi akseptem, wetem hat blong yumi, invitesen blong Hem blong kam kolosap long Hem blong yumi save glad long ol blesing we Hem i wantem tumas blong givim long yumi long laef ia mo long nekis wol?
Lod i talem long Isrel blong bifo, mo Hem i bin talem long yumi: “Mi mi lavem yufala tumas, mo oltaem, mi stap soemaot fasin ia long yufala.” Papa i talem long yumi: “Mo bae yu stap wetem mi, mo bae mi stap wetem yu; from hemia, yu wokbaot wetem mi” ?Yumi trastem Hem inaf blong stap wetem Hem mo wokbaot wetem Hem?
Yumi stap ia long wol ia blong lanem samting mo gro, mo moa impoten taem blong stap lanem samting mo gro, i kamaot long kavenan rilesensip blong yumi wetem Papa long Heven mo Jisas Kraes. Aot long fetful rilesensip blong yumi wetem Tufala, bae save olsem hemia blong God, lav, paoa mo wan moa bigfala paoa blong givim seves, bae i kam.
“Yumi fas long diuti ia blong lanem evri samting we God i talemaot long yumi abaot Hemwan.” Yumi mas andastanem se God Papa i soem rod long Pikinini blong Hem, Jisas Kraes, blong i krietem wol ia blong yumi save gro long hem; Papa long Heven i givim Pikinini blong Hem blong pem wanem we jastis i askem blong sevem yumi, mo prishud paoa blong Papa mo tru Jos blong Pikinini wetem ol odinens we yumi nidim, Tufala i putumbak blong yumi gat blesing. ?Yu yu save filim dip lav ia tru long ol taem ia we Tufala i rere blong mekem se yumi stap glad mo stap gro? Yumi nidim blong save se plan blong fasin blong sevem man we i kam long Papa long Heven, i blong yumi obei ol loa mo ol odinens blong gospel mo kasem laef we i no save finis, mo long wei ia, kam olsem we God i stap. Hemia nao tru hapines we i stap oltaem we Papa long Heven i givim long yumi. I no gat wan narafala hapines we i tru mo i stap oltaem.
Ol jalenj blong yumi oli save pulumaot yumi long rod ia blong stap hapi. Yumi save lusum rilesensip ia wetem God sapos ol tes ia oli stap pusum yumi long nara samting, be i no daon long ni blong yumi.
Simpol singsing ia i askem yumi blong katkatemaot sam samting:
Ol sista. ?Wanem nao i moa impoten long yufala? ?Wanem nao i save stap oltaem long yufala? Samting we i stap impoten oltaem long ae blong Papa, i blong yumi lanem abaot Hem, yumi putum tingting i stap daon, mo yumi gro long fasin blong stap obei long Hem tru long ol eksperiens we yumi gat long wol. Hem i wantem yumi jenisim selfis fasin blong yumi i kam seves, mo jenisim ol fraet oli kam fet. Ol samting ia we oli impoten oltaem oli save testem yumi kasem bun blong yumi.
Taem i naoia, wetem ol samting we yumi save mekem long wol ia nomo, we Papa i stap askem yumi blong lavem man taem we i moa had blong lavem man, blong givim seves taem we i no stret taem blong givim seves, blong fogiv taem we i mekem sol blong yu i soa tumas blong fogiv. ?Be olsem wanem? ?Bae yumi mekem olsem wanem? Yumi askem, oltaem mo wetem strong tingting, blong kasem help blong Papa, long nem blong Pikinini, mo mekem ol samting long wei blong Hem, be i no blong yumi mekem folem tingting blong yumi wetem hae tingting.
Mi bin luksave hae tingting blong mi taem we Presiden Esra Taf Benson i toktok long saed blong klinim insaed long yumi. Mi tekem se mi mi wan jag blong wota. ?Olsem wanem nao bae mi mekem doti we i hae tingting i kamaot long jag wota ia? Blong fosem yumiwan blong putum tingting i stap daon, blong traem mekem yumi lavem ol nara man i no wan tru fasin, i no gat respek, mo i no wok. Ol sin mo hae tingting blong yumi oli mekem wan hol—o wan spes— i stap bitwin yumi mo springwota blong evri lav, Papa blong yumi long Heven.
Atonmen blong Sevya nomo i save klinim yumi long ol sin blong yumi, mo i sarem hol ia.
Yumi wantem se ol han blong lav blong Papa long Heven oli raonem yumi blong lidim yumi, mekem se yumi putum tingting blong Hem i kam faswan wetem wan hat we i sore we i askem se Kraes bae i kapsaetem ol smol reva blong wota we i klinim man i kam insaed long jag wota blong yumi. Fastaem, maet wota ia i dropdrop, be taem yumi stap lukaotem, askem mo stap obei, bae i ron bigwan. Wota ia we i stap laef bae i stat blong fulumap yumi, mo i kapkapsaed wetem lav blong Hem; nao yumi save leftemap jag blong sol blong yumi, mo serem wanem i stap insaed wetem ol narawan we oli tosta blong kasem hiling, hop, mo pat blong famli. Taem insaed long jag blong yumi i stap kam klin, ol rilesensip blong yumi long wol oli stat blong kam oraet bakegen.
Yumi nid blong sakrifaesem ol plan blong yumi blong i gat rum blong ol plan we oli no save finis blong God. Sevya, we i toktok long bihaf blong Papa, i plis long yumi: “Kam kolosap long mi blong Hem i kam kolosap long yu.” Blong go kolosap long Papa i save minim blong lanem abaot trutok blong Hem tru long ol skripja, folem kaonsel blong profet, mo traehad blong mekem tingting blong Hem moa fulwan.
?Yumi, yumi andastanem se Kraes i gat paoa blong tekem yumi blong felosip wetem lav wetem Papa mo wetem ol narawan? Hem, tru long paoa blong Tabu Spirit, i save givim niu lukluk long ol rilesensip.
Wan Praemeri tija i storian long wan gudfala eksperiens wetem ol 11 yia boe long klas blong hem. Wan long olgeta we bae mi singaotem Jimi, i wan we i stap hemwan long klas. Wan Sandei, tija i kasem insperesen blong lego lesen blong hem, mo i talem from wanem hem i lavem Jimi. Hem i tokbaot se hem i gat hat mo i biliv long yang man ia. Afta tija i askem ol memba blong klas blong talem long Jimi wan samting we oli laekem abaot Jimi. Nao ol memba blong klas, wan afta wan, oli talem long Jimi from wanem hem i spesel long olgeta; boe ia i benem hed mo wota blong ae i ron long fes blong hem. Tija ia mo klas, oli bildim wan brij i go long hat blong Jimi. Simpol lav ia, we oli talem wetem tru hat, i bin givim hop mo valiu long ol narawan. Mi singaotem hemia blong “riperem wanem we i bin brok, o fulumap spes we i stap.”
Maet se laef blong yumi long laef bifo wol ia we i gat lav, i mekem se yumi wantem tumas blong gat wan lav we i tru, i stap oltaem long wol ia. Oli krietem yumi blong yumi givim lav mo blong oli lavem yumi, mo lav we i moa dip i kam taem yumi stap wan wetem God. Buk blong Momon i invaetem yumi blong “stretem yumi wetem [Hem] tru long atonmen blong Kraes.”
Aesea i tokbaot olgeta we oli fetful blong laef folem loa blong livim kaekae, mo long wei ia, insaed long famli blong olgeta oli kam “ol man we oli riperem wanem we i bin brok.” Olgeta nao we Aesea i promesem se, bae oli “stanemap bakegen ol haos we oli brokbrok longtaem finis.” Long sem wei, Sevya i bin wokem gud bakegen wanem i bin brokbrok —o hol we i stap—bitwin yumi mo Papa long Heven. Hem, tru long bigfala sakrifaes we i bin pem praes, i openem rod blong yumi save kasem paoa blong lav blong God, mo afta, yumi gat paoa blong riperem ol samting we “oli brokbrok longtaem finis” long wanwan laef blong yumi. Blong hilim filing blong stap longlongwe long yumi, i nidim yumi blong akseptem lav blong God wetem fasin blong sakrifaesem fasin blong yumi blong stap selfis mo stap fraet.
Wan naet we mi tingbaot, wan famli mo mi i no agri long wan poen blong politik. Sista ia i toktok strong mo pispisim toktok blong mi, mo i pruvum se mi rong, mo evri memba blong famli oli harem. Mi filim sem mo mi no oraet—maet i tru. Long naet ia, taem mi bin nildaon blong prea, mi hariap blong eksplenem long Papa long Heven se sista ia i gat strong fasin. Mi gohed mo no stop blong toktok. Ating mi stop smol blong komplen, mo Tabu Spirit i gat wan janis blong pulum tingting blong mi—from se, mi sapraes we mi harem miwan mi talem afta: “Ating yu wantem mi blong mi lavem hem.” ?Lavem hem? Mi gohed blong prea, mi talem: “?Bae mi lavem hem olsem wanem? Mi no laekem hem nomo. Hat blong mi i strong tumas mo mi harem nogud. Mi no save mekem.”
Afta, i tru, wetem help blong Spirit, mi gat wan niu tingting mo mi talem: “Be Papa, yu yu lavem hem. ?Bae Yu save givim smol lav ia blong Yu—blong mi save lavem hem tu?” Ol had filing blong mi oli kam sopsop, hat blong mi i stat blong jenis, mo mi stat blong luk sista ia long wan defren wei. Mi stat blong filim tru valiu we Papa long Heven i bin luk. Aesea i raetem: “Hae God bambae i fasem ol sobodi ia we hem i givim finis long ol man blong hem, nao i mekem olgeta oli kam gud bakegen.”
Wetem taem, spes ia bitwin mitufala i lus. Be iven sapos hem i no akseptem hat blong mi we i bin jenis, mi bin lanem se Papa long Heven bae i save mekem se yumi lavem man, iven blong lavem ol man ia we yumi ting se man i no save lavem olgeta, sapos nomo yumi askem help blong hem. Atonmen blong Sevya i wan paep blong mekem se jareti i aot long Papa blong yumi we i stap long Heven i kam kasem yumi oltaem. Yumi mas jusum blong akseptem mo stap wetem lav ia blong save gat jareti long evriwan.
Taem yumi givim hat blong yumi long Papa mo Pikinini, yumi jenisim wol—nomata ol situesen raon long yumi oli no jenis. Yumi go kolosap long Papa long Heven mo yumi filim fasin blong Hem we i kaen, we i stap akseptem ol hadwok blong yumi blong stap olsem tru disaepol blong Kraes. Fasin blong yumi luksave samting, gat tras long yumiwan, mo gat fet, i kam antap bigwan.
Momon i stap talem long yumi blong prea wetem ful paoa blong hat blong gat lav ia, mo lav ia i aot long stamba blong hem, i kavremap yumi—stamba i Papa long Heven. Long tetaem ia nomo bae yumi save kam man blong riperem wanem i brokbrok long ol rilesensip blong yumi long wol.
Lav we i no gat en, blong Papa blong yumi, i kam kasem yumi, i tekem yumi gobak long glori mo glad blong Hem. Hem i givim Wan Stret Pikinini ia Nomo blong Hem, Jisas Kraes, blong Hem i riperem ol samting we oli brokbrok we i putum bigfala spes bitwin yumi mo Hem. Blong kam joen bakegen wetem Papa we i stap long Heven i stamba blong lav we i no gat en mo stamba tingting we i no save finis. Yumi mas joen wetem Hem naoia blong lanem wanem nao i impoten moa, blong lavem man olsem we Hem i lavem man, mo blong gro blong kam olsem Hem. Mi testifae se fetful rilesensip blong yumi wetem Papa long Heven mo Sevya i impoten, we i no save finis, long Tufala mo long yumi. Long nem blong Jisas Kraes, amen.