!Had mo Longfala Wokbaot Ia I Gohed!
Wan had mo longfala wokbaot i gobak long Papa long Heven i wokbaot we i moa impoten long laef blong yumi.
Wan handred mo seventi yia i pas, Brigham Yang i lukluk krosem Sol Lek Vale blong fas taem mo i talem: “!Hemia nao stret ples!” Hem i bin save ples ia from se Lod i bin soemaot long hem.
Taem oli kasem yia 1869, i gat ova long 70,000 Sent we oli mekem semfala had longfala wokbaot ia. Nomata oli toktok defren lanwis, gat defren kalja mo sitisensip, oli bin serem wan testemoni abaot Papa, Pikinini, mo Tabu Spirit, Restoresen blong gospel blong Jisas Kraes, mo wan strong tingting blong wantem bildimap Saeon—wan ples blong pis, hapines, mo ples we i naes blong rere long Seken Kaming blong Saeon.
Long medel blong olgeta fasfala Sent we oli kasem Yuta, i gat Jane Manning James—gel blong wan fri slef, we i joenem Jos we i kambak, mo hem i wan gudfala disaepol we i bin fesem ol had jalenj. Sista Jemes i gohed blong stap wan fetful Lata-dei Sent kasem taem hem i ded long 1908.
Jane i raetem: “Mi wantem talem stret long ples ia, se fet blong mi long gospel blong Jisas Kraes olsem we Jos blong Jisas Kraes blong Ol Lata-dei Sent i tijim, i strong nomo tedei, no, i strong moa bitim dei ia we mi bin baptaes. Mi stap pem taeting mo ofring blong mi, holem tok blong waes, mo mi go long bed eli mo girap eli, mo mi traem evri wei blong stap wan gud eksampol long evriwan.”
Sista Jemes, olsem plante nara Lata-dei Sent, i no bildim Saeon wetem blad, swet, mo wota blong ae nomo, be tu, i lukaotem ol blesing blong Lod tru long fasin blong laef folem ol gospel prinsipol long bes wei we hem i save mekem, mo holemtaet fet blong hem long Jisas Kraes—we i Bigfala Man blong Hilim Man long evriwan we i askem Hem.
Ol fasfala Sent oli no bin stret evriwan, be oli stanemap wan fandesen we yumi bildimap ol famli mo wan sosaeti we i lavem mo kipim ol kavenan, we oli stap haelaetem long ol defren nius stori raon long wol from komitmen blong yumi long Jisas Kraes, mo from ol volontia wok blong yumi blong helpem olgeta we oli stap kolosap mo longwe.
Presiden Eyring, mi wantem ademap tangkyu blong mi long ol plante ten blong ol taosen blong ol yelo sot we oli givim seves long Teksas, Meksiko, mo ol nara ples.
Mi gat wan dip bilif se sapos yumi lusum rilesensip wetem olgeta we oli ded fastaem long yumi, hemia wetem ol paeonia papa mo mama blong yumi, bambae yumi lusum wan rij samting. Mi bin tokbaot “Fet long Evri Step” bifo, mo bambae mi gohed long fiuja from se mi save se ol jeneresen we oli stap kam antap, oli mas gat semfala kaen bilif ia we ol fas Sent oli bin gat long Lod Jisas Kraes mo gospel blong Hem we i kambak.
Ol paeonia papa mo mama blong mi oli bin stap wetem ol fetful paeonia ia we oli bin pulum ol hankat, oli ron long wagun, mo wokbaot i go long Yuta. Olgeta, olsem Sista Jane Manning James, i gat bigfala fet long evri step blong olgeta taem oli wokbaot long had mo longfala wokbaot blong olgeta.
Jenol blong olgeta i fulap wetem ol toktok we oli tokbaot strong hadtaem, hanggri, mo sik, mo tu, ol testemoni blong bilif blong olgeta long God mo gospel we i kambak blong Jisas Kraes.
Oli gat smol samting nomo, be oli bin glad long fulap fulap blesing we i kam long ol brata mo sista we oli faenem long Jos blong Jisas Kraes. Taem oli bin save mekem, oli leftemap olgeta we oli slak, mo oli blesem olgeta we oli sik tru long seves we oli givim long wanwan mo tru long prishud blong God.
Ol sista, insaed long Kas Vale, Yuta, oli givhan long Ol Sent wetem spirit ia blong Rilif Sosaeti blong oli “wok wan blong helpem olgeta long nid.” Bigfala bubuwoman blong mi, Magaret MakNil Balad i wok long saed blong hasban blong Hem, Henri, taem hem i stap prisaed olsem bisop blong Logan Seken Wod blong 40 yia. Magaret i bin wod Rilif Sosaeti presiden blong 30 yia. Long haos blong olgeta, hem i tekem olgeta we oli pua, oli sik, oli wido, o nogat papa o mama, mo tu, hem i mekem ol dedman oli gat klin tempol klos.
Although it is appropriate and important to remember the historic 19th-century Mormon pioneer trek, we need to remember that “the trek through life continues!” for each of us as we prove our own “faith in every footstep.” Nomata i stret mo i impoten blong tingbaot histri blong ol Momon Paeonia wokbaot blong 19 senturi, yumi nidim tu blong tingbaot se “!had mo longfala wokbaot tru long laef i stap gohed!” hemia, long wanwan long yumi taem yumi stap pruvum “fet blong yumi long evri step yumi tekem.”
Ol niu konvet oli nomo nidim blong kam tugeta long ol paeonia senta long Wes Yunaeted Stet. Be, ol konvet oli kam tugeta long ol lokol kongregesen blong olgeta, ples we ol Sent oli wosipim Papa long Heven long nem blong Jisas Kraes. Wetem moa long 30, 000 kongregesen we oli stanap raon long wol, yumi evriwan i kam tugeta long Saeon blong yumi. Olsem Skripja i talem: “Hemia nao Saeon—olgeta we hat blong olgeta i klin.”
Taem yumi stap wokbaot long rod blong laef, oli testem yumi blong luk se “bambae yumi mekem evri kaen samting we Lod i talem long yumi.”
Plante long yumi i stap long ol gudfala wokbaot blong faenem samting—we i lidim olgeta blong kasem wanem oli wantem, mo kasem moa laet long spirit. Sam long yumi, oli stap long wan had longfala wokbaot we i lidim olgeta long harem nogud, sin, wari, mo lusum hop.
Long kaen olsem, plis askem yuwan: ?Weaples nao las ples blong yu kasem? ?Ol wokbaot blong yu oli tekem yu i go wea? ?Mo rod ia yu stap folem i lidim yu long ol fulap blesing ia we Sevya i promesem?
Wan had longfala wokbaot i gobak long Papa long Heven i had longfala wokbaot ia we i moa impoten long laef blong yumi, mo i gohed evri dei, evri wik, evri manis, mo evri yia taem yumi stap kam antap long bilif blong yumi long Hem mo long Pikinini blong Hem we Hem i Lavem, Jisas Kraes.
Yumi mas lukaotgud se ol wokbaot blong yumi long laef oli tekem yumi i go wea. Yumi mas lukaotgud mo mekem folem kaonsel blong Jisas long ol disaepol blong Hem taem Hem i ansarem ol kwestin ia: “Plis, yu talemaot long mifala, ?Bambae ol samting ia oli kamtru wetaem? ?Mo wanem saen we bambae i soemaot we yu bambae yu kambak bakegen, mo wol ia i finis?
“Mo Jisas i ansa i talem olgeta: “Yufala i mas lukaot gud blong bae i no gat man [mo mi ademap woman] i giaman long yufala.”
Tedei, mi ripitim fas kaonsel we i kam long ol lida blong Jos.
-
Ol brata mo sista. Kipim doktrin blong Kraes i klin gud mo lukaot blong neva foldaon long trik blong olgeta we oli jenisim doktrin. Gospel blong Papa mo Pikinini i kambak tru long Josef Smit, profet blong las dispensesen ia.
-
Yufala i no lisin long olgeta we oli no odenem olgeta mo no setem olgeta apat long Jos koling blong olgeta, mo ol memba blong Jos oli luksave olgeta.
-
Lukaot gud long ol oganaesesen, ol grup, o ol man mo woman we oli klemem se oli gat ol sikret ansa long ol doktrin kwestin, mo oli talem se ol aposol mo ol profet blong tedei oli no gat o oli no andastanem.
-
No lisin long olgeta we oli switim yu blong kam rij kwiktaem long mane. Ol memba blong yumi oli lusum bigfala mane tumas, so lukaotgud.
Long sam ples, tumas pipol blong yumi oli lukluk i go bitim saen mo oli stap lukaotem ol sikret save, mo spendem fulap mane long sam praktis we i gat kwestin long hem blong save kasem hiling mo sapot.
Wan ofisol Jos toktok, we oli putumaot wan yia i pas i talem: “Mifala i askem strong long ol memba blong Jos blong oli mas lukaotgud blong no tekempat long eni grup we i askem mane mo oli promes ol merikel hiling, o oli klemem se oli gat spesel wei blong kasem hiling paoa aotsaed long hemia we ol prishud man we oli odenem olgeta long stret fasin oli gat.”
Jos Hanbuk i talem: “Ol memba oli no sapos blong yusum ol medikol o helt praktis we oli no stret o i save gat kwestin long hem. Ol lokol lida oli sapos blong givim advaes long ol memba we oli gat helt problem blong go luk ol dokta we oli gat raet blong praktis long ol kantri we oli stap long hem.”
Ol brata mo sista. Yufala i mas waes mo mas save se ol kaen praktis ia, oli save pulum filing blong yu, be long en, oli save spolem yu long saed blong spirit mo bodi.
Long ol paeonia bubu blong yumi, indipendens mo fasin blong dipen long yumiwan i bin wan mas; be komuniti filing ia i bin impoten tu. Oli bin wok tugeta, mo oli bin helhelpem wanwan long olgeta blong winim ol jalenj blong bodi mo filing long taem blong olgeta. Long ol man, i bin gat prishud kworom, mo ol woman, seves i kam long Rilif Sosaeti. Ol risal ia, oli no jenis long taem blong yumi.
Rilif Sosaeti mo prishud kworom oli givim gudlaef long saed blong spirit mo long wol long ol memba blong yumi.
Stap long gospel rod taem yu gat “fet long evri step,” blong mekem se yu save kambak sef long ples we Papa long Heven mo Lod Jisas Kraes, Tufala i stap long hem. Lod i bigfala Sevya blong yumi. Hem i Ridima blong wol. Yumi mas ona long tabu nem blong Hem, mo yumi no mas yusum nogud long eni wei, mo mas traehad blong obei ol komanmen blong Hem. Sapos yumi mekem olsem, bambae Hem i blesem yumi mo i lidim yumi i gobak sef.
Mi invaetem evriwan we i harem saon blong voes blong mi blong welkamem mo akseptem eniwan we i stap mekem had longfala wokbaot blong hem, nomata weaples oli stap long hem long wokbaot blong olgeta.
Plis tingbaot se i no gat blesing we eniwan i save serem we i bigwan moa bitim mesej blong Restoresen, we, taem oli kasem mo laef folem, i promesem glad mo pis we i no gat en—iven laef we i no save finis. Bae yumi yusum paoa long bodi, long tingting mo ol testemoni blong helpem ol misinari blong yumi blong oli faenem, tijim, mo baptaesem ol pikinini blong God, blong mekem se oli gat paoa blong doktrin blong gospel we i stap lidim evri dei laef blong olgeta.
Yumi nidim blong akseptem ol pikinini blong God wetem lav mo sore, mo sakemaot eni jajmen, olsem kala blong skin, seks, o sitisensip. Letem man i talem se yumi stap biliv tru se ol blesing blong gospel we i kambak blong Jisas Kraes oli blong evri pikinini blong God.
Mi testifae se “had mo longfala wokbaot i stap gohed,” mo mi invaetem yufala blong stap long rod blong gospel taem yufala i stap gohed blong wok i go taem yufala i go kasem evri pikinini blong God wetem lav mo sore, blong yumi kam wan blong mekem hat mo han blong yumi i klin gud blong kasem ol fulap blesing we oli stap blong olgeta we oli rili lavem Papa blong yumi long Heven mo Pikinini blong Hem we Hem i lavem, mo from hemia, mi prea wetem hat we i stap daon, long tabu nem blong Jisas Kraes, amen.