Wantem Tumas blong Gobak Hom
Tanem sol blong yu i go long laet. Stat blong wokbaot long rod blong yu i gobak hom. Taem yu mekem olsem, laef blong yu bae i gud moa, i hapi moa, mo i gat moa mining.
I no longtaem i pas, taem mifala i stap mit wetem Presiden Thomas S. Monson, hem i talem, wetem bigfala respek mo wan glad fes, hamas hem i lavem Lod mo we hem i save se Lod i lavem hem. Ol dia brata mo sista blong mi. Mi save se Presiden Monson i glad tumas from lav blong yufala, ol prea blong yufala, mo strong tingting blong yufala long Lod mo bigfala gospel blong Hem.
Bobi Paoa Dog
Kolosap wan handred yia i pas, wan famli blong Oregon i stap holidei long Indiana—ova 3,000 kilometa longwe—taem oli lusum dog we oli laekem tumas, Bobi. Famli i lukaotem dog ia evri ples be oli no faenem hem. Bobi i lus.
Hat i brok, nao oli gobak hom, mo evri kilometa i mekem se oli go longwe moa long dog we oli laekem tumas.
Sikis manis afta, famli i sapraes blong faenem Bobi long fored blong doa blong haos long Oregon. “Hem i doti, i bunbun, oli luk bun nomo—i luk olsem hem i wokbaot nomo i kambak hom hemwan.” Stori blong Bobi i mekem tingting blong ol pipol i wok raon long Yunaeted Stet, mo oli save hem olsem: Bobi Paoa Dog.
Bobi i no wan animol ia nomo we i trikim ol man blong saens wetem gudfala save se bae i go wea, mo weaples nao hom i stap long hem. Sam grup blong ol monak bataflae oli stap muv 4,800 kilometa evri yia i go long ol ples we weta i moa stret blong oli stap laef. Ol letabak totel oli travel krosem Bigfala Solwota blong Pasifik, oli aot long Indonesia i go long ol kos blong Kalifonia. Ol Hampbak welfis oli swim tru long ol kolkol wota long Not mo Saot Pol i go long Ekwato mo oli gobak. Maet wan we i sapraes moa hem i pijin blong atik we i flae long Atik Sekol i go long Antatika mo i gobak evri yia, hemia samples long 97,000 kilometa.
Taem ol man blong saens oli stap long wei blong olgeta, oli askem ol kwestin olsem “?Olsem wanem nao oli save weaples blong go? Mo ?olsem wanem evri jeneresen afta i lanem kaen fasin ia?”
Taem mi stap rid abaot bigfala paoa long ol animol, mi stap askem miwan nomo: “?Hem i posibol blong ol man tu oli gat semfala paoa ia—wan kaen sistem insaed—we i pulum olgeta i gobak long hom blong olgeta long heven?”.
Mi biliv se evri man, woman, mo pikinini i filim singaot ia blong heven long wan taem long laef blong hem. Dip insaed long yumi, i gat wan filing i stap, blong yumi go bitim vel ia, mo haggem Papa mo Mama long heven we yumi bin save mo lavem Tufala long wan taem.
Sam oli katemaot filing ia, mo oli mekem sol blong olgeta i ded, oli no harem singaot ia. Be olgeta we oli no daonem laet ia insaed long olgeta, oli save folem wan gudfala wokbaot—blong aot i go long ol gudfala ples long heven.
God I Stap Singaot I Kam long Yu
Bigfala mesej blong Jos blong Jisas Kraes blong Ol Lata-dei Sent i we God i Papa blong yumi, se Hem i kea long yumi, mo i gat wan wei blong gobak long Hem.
God i stap singaot i kam long yu.
God i save evri tingting blong yu, harem nogud blong yu, mo bigfala hop blong yu. God i save ol fulap taem ia we yu bin lukaotem Hem. Ol fulap taem ia we yu bin filim wan glad we i bigwan, we i bigwan. Ol fulap taem we yu bin krae yuwan. Ol fulap taem we yu filim se yu no save mekem moa, yu konfius o yu kros.
Yet, nomata long histri blong yu—sapos yu bin foldaon, mestem blong mekem samting, filim se hat i brok, yu konkon, o oli kilimdaon yu—yu mas save se yu no stap yuwan. God i stap singaot i kam long yu.
Sevya i stap stretem han blong Hem i kam long yu. Mo, olsem we Hem i bin mekem long ol man blong pulum fis we oli bin stanap longtaem i pas long ol so blong Solwota blong Galili, wetem lav we i no gat en, Hem i stap toktok i kam long yu: “Yu kam, yu folem mi.”
Sapos bae yu harem Hem, bambae Hem i toktok long yu long naoia nomo.
Taem yu stat blong wokbaot long rod blong stap disaepol—taem yu stat blong muv i go from Papa long Heven—i gat wan samting insaed long yu we bae i konfemem se yu bin harem singaot blong Sevya mo yu putum hat blong yu i lukluk i go long laet. Bae i talem yu se yu stap long stret rod, mo yu stap gobak hom.
Stat long stat blong taem, ol profet blong God oli bin askem strong long ol pipol blong taem blong olgeta blong “mekem folem voes blong Lod blong [olgeta] … blong oli obei long ol komanmen mo rul blong Hem … , [mo] blong oli tanem olgeta [i go long Hem] wetem evri hat blong olgeta mo evri sol blong olgeta.”
Ol skripja oli tijim yumi wan taosen risen from wanem yumi sapos blong mekem hemia.
Tedei bae mi tokbaot tufala risen from wanem yumi mas tanem yumi i go long Lod.
Faswan: Laef blong yu bae i gud moa.
Seken: God bae i yusum yu blong mekem laef blong ol narawan oli kam gud moa.
Laef blong Yu Bae I Gud Moa
Mi testifae se, taem bae yumi stat, o gohed long gudfala wokbaot ia we i lidim yumi i go long God, laef blong yumi bae i kam gud moa.
Hemia i no minim se laef blong yumi bae i fri long harem nogud. Yumi evriwan i save samfala fetful pipol we oli folem Kraes we oli gotru long bigfala trabol mo nogud taem—Jisas Kraes Hemwan i safa i bitim eniwan. Semmak olsem we God i mekem se “san blong hem i girap antap long ol nogud mo ol gud man,” Hem i stap letem tu, wanem we i kam agens, i kam testem olgeta man we oli stret, mo olgeta we oli no stret. Yes, samtaem i luk olsem se laef blong yumi i moa had from se yumi stap traem blong laef folem bilif blong yumi.
No. Sapos yu folem Sevya, hemia bae i no karemaot evri tes blong yu. Be, bae i karemaot ol fanis bitwin yu mo help we Papa long Heven i wantem blong givim long yu. Bambae Hem i stap wetem yu. Bambae Hem i lidim wokbaot blong yu. Bambae Hem i wokbaot long saed blong yu, mo bambae i karem yu tu taem yu gat bigfala nid.
Bambae yu gat eksperiens long ol tabu frut blong Spirit: “lav, glad, pis, wet longtaem long hadtaem, kaen fasin, gud fasin [mo] fet.”
Ol frut ia blong Spirit oli no risal blong sakses long wol, o from yu gat mane. Oli kam from yu stap folem Sevya, mo oli save stap wetem yu oltaem, iven long medel blong ol hariken we oli tudak.
Ol faea mo noes blong laef long wol oli save sakem nogud tok long yu mo mekem yu fraet, be olgeta we oli tanem hat blong olgeta i go long God, bae pis blong Hem bae i raonem olgeta. Glad blong olgeta i no go daon. Bambae oli no stap olgetawan o oli no fogetem olgeta.
“[Trastem Lod wetem ful hat blong yu;]” ol skripja oli tijim, “[mo no dipen long save blong yu. Long evri samting, luksave hem, mo bambae hem i lidim wokbaot blong yu.]”
Olgeta we oli mekem folem singaot insaed long olgeta mo oli lukaotem God, olgeta we oli stap prea, biliv, mo wokbaot long rod we Sevya i rere long hem—nomata bae oli kikim ston long rod samtaem—oli kasem tru pis ia se “evri samting bae i wok tugeta blong gud blong olgeta.”
From se God “i givim paoa long bodi blong olgeta we oli taet mo i givim paoa long olgeta we oli no strong.”
“[From se nomata olgeta we oli stret mo gud oli foldaon seven taem, bambae oli girap bakegen.]”
Mo Lod long gud fasin blong hem i askem:
?Yu yu wantem blong harem glad ia we i stap oltaem?
?Yu yu wantem tumas blong filim, insaed long hat blong yu, pis ia we i bitim wanem man i save andastanem?
Nao, tanem sol blong yu i go fesem laet.
Stat wokbaot long gudfala rod blong yuwan i gobak hom.
Taem yu mekem olsem, laef blong yu bae i gud moa, i hapi moa, mo i gat moa stamba tingting long hem.
God Bambae I Yusum Yu
Long rod blong yu i gobak long Papa long Heven, bae yu luksave kwiktaem se wokbaot ia i no blong lukluk long laef blong yuwan nomo. No. Rod ia i stap lidim yu blong yu kam wan blesing long laef blong ol nara pikinini blong God—ol brata mo sista blong yu. Mo samting we i intresting abaot wokbaot ia, i we, taem yu stap givim seves long God, mo taem yu stap kea mo help blong blesem laef blong ol narafala man, bambae yu luk bigfala progres long laef blong yuwan long ol wei we yu no tingting nating long hem.
Maet yu luk se yu yu no help long wan wei; maet yu no ting se yu wan blesing long laef blong wan. Plante taem, taem yumi lukluk long yumiwan, yumi luk nomo ol samting we yumi no save mekem, mo ol rong samting long yumi. Maet yumi ting se yumi mas mekem moa long wan samting blong God i stap yusum yumi—kam moa waes, moa helti, toktok moa gud, gat moa talen, moa spirit. Ol blesing bambae oli kam i no tumas from ol samting we yu save wokem, be from ol joes blong yu. Mo God blong yunives bambae i wok insaed mo tru long yu, mo bae i dabolem ol wok we yu stap mekem from ol stamba tingting blong Hem.
Wok blong Hem i stap gogohed folem impoten prinsipol ia: “Mo aot long ol smol samting, ol samting we oli bigwan oli kamkamaot.”
Taem hem i stap raet i go long olgeta Sent long Korin, Pol i luk se i no gat plante long olgeta we bae oli tekem se oli waes folem ol standet blong wol. Be hemia i no bin impoten from se “[God i bin jusum olgeta we oli no strong long wol ia blong oli mekem olgeta we oli strong, oli sem].”
Histri blong wok blong God i fulap wetem ol pipol we oli stap tekem se oli no naf. Be oli putum tingting i stap daon mo givim seves, oli dipen long gladhat blong God, mo oli kasem promes blong Hem: “Mo han blong olgeta bae i han blong mi, mo bae mi mi stap olsem sil blong olgeta … , mo bae oli faet blong mi wetem ful tingting mo paoa; … bae mi mekem olgeta ia oli laef.”
Long las sama, famli blong mifala i bin gat gudfala janis blong visitim sam ples blong Jos histri bifo long Is blong Yunaeted Stet. Long wan spesel wei, mifala i gotru bakegen histri blong taem ia. Ol pipol we mi bin rid plante abaot olgeta—ol pipol olsem Martin Haris, Oliva Kaodri, mo Tomas B. Mars,—oli kam moa ril long mi taem mifala i wokbaot long ples we oli wokbaot mo tingting hevi long ol sakrifaes we oli bin mekem blong bildimap kingdom blong God.
Oli gat fulap samting we i letem olgeta blong mekem ol bigfala kontribusen ia blong Jos blong Jisas Kraes i Kambak. Be oli bin ol man, oli no strong, mo oli save foldaon—semmak olsem yu mo mi. Sam oli faenem se oli no agri wetem Profet Josef Smit mo oli aot long Jos. Afta, plante long ol semfala pipol ia oli gat wan jenis long hat, oli putum tingting blong olgeta i stap daon, mo wan moa taem, oli go mo kam fren wetem olgeta Sent.
Maet yumi gat fasin ia blong jajem ol lida ia mo ol nara memba olsem olgeta. Maet yumi stap talem: “Mi, bae mi neva lego Profet Josef.”
Mebi hemia i tru, yumi no save se i olsem wanem long taem bifo, long situesen ia. No. Oli no stret evriwan, be i leftemap tingting blong save se God i bin save yusum olgeta. Hem i bin save wanem oli strong mo no strong long hem. Hem i givim olgeta bigfala janis ia blong save raetem wan ves o wan miusik blong bigfala singsing blong Restoresen.
Hem i leftemap tingting blong save, se nomata yumi no stret evriwan, sapos hat blong yumi i tanem i go long God, bambae Hem mi gat open hat, mo i kaen mo i yusum yumi from stamba tingting blong Hem.
Olgeta we oli lavem mo givim seves long God mo ol nara man, mo wetem tingting i stap daon oli tekpat long wok blong Hem, bambae oli luk ol sapraes samting oli hapen long laef blong olgeta mo long laef blong olgeta we oli lavem.
Ol doa we yu luk se oli sat bae oli open.
Ol enjel oli go fastaem long olgeta mo rere long rod i stap.
Nomata wanem posisen blong yu insaed long komuniti o insaed long Jos, God bae i yusum yu sapos yu wantem. Bae hem i blesem yu wetem ol stret mo gud samting we yu wantem mo i tanem ol aksen we yu planem oli kam ol gudfala kaekae blong pikimap.
Yumi No Save Putum Samting long Otomatik
Yumi, wanwan long yumi, i “ol strenja o [ol man blong wokbaot i go long tabu ples]” long wol ia. Long plante wei, yumi stap longwe long hom. Be hemia i no minim se yumi nidim blong harem se yumi lus o stap yumiwan.
Papa we i stap long Heven i givim yumi Laet blong Kraes. Mo dip insaed long yumi wanwan, i gat wan filing blong heven we i pusum yumi blong tanem ae mo hat long Lod taem yumi wokbaot i gobak long selestial hom.
Hemia i nidim wok. Yu no save kasem ples ia we yu traehad blong lanem abaot Hem, blong andastanem instraksen blong Hem, blong yusum olgeta mo putum wan leg long fored blong narawan.
No. Laef i no wan trak we i draev hemwan. I no wan plen we yu pusum otomatik baten.
Yu no save flot long ol wota blong laef mo trastem se taed blong wota bae i pulum yu long ples we yu hop from, wan dei. Blong stap wan disaepol, i nidim blong yu glad blong yu swim agensem taed taem i nid.
I no gat wan i responsibol long wokbaot blong yuwan. Sevya bae i helpem yu mo mekem rere long rod long fored blong yu, be komitmen blong folem Hem mo obei ol komanmen blong Hem, hemia i mas kam long yu. Hemia i hevi wok blong yuwan, i spesel janis blong yuwan.
Hemia i wan gudfala wokbaot.
Plis mekem folem singaot blong Sevya blong yu.
Folem Hem.
Lod i stanemap Jos blong Jisas Kraes blong Ol Lata-dei Sent blong helpem yu long komitmen ia blong givim seves long God mo ol nara man. Stamba tingting i blong leftemap tingting, tijim, leftemap, mo givim insperesen. I givim janis blong yu yusum lav mo sore, blong yu helpem narawan, blong riniu mo kipim ol tabu kavenan. Hem i stap blong blesem laef blong yu, blong mekem hom, komuniti mo kantri i gud moa.
Kam, joenem mifala mo trastem Lod. Serem talem blong yu long gudfala wok blong Hem. Go aot, leftemap tingting, hilim mo sapotem evriwan we i wantem blong filim mo folem rod we i go long paoa hom blong yumi. Bae yumi joen tugeta long bigfala wokbaot blong glori i go long ples long heven.
Gospel i wan tabu mesej blong hop, hapines mo glad. Hem i rod we i lidim yumi go hom.
Taem yumi akseptem gospel wetem fet mo aksen, evri dei mo evri aoa, bambae yumi kam kolosap moa long God blong yumi. Laef blong yumi bae i gud moa, mo Lod bae i yusum yumi long ol bigfala wei blong blesem olgeta raon long yumi mo blong mekem ol stamba tingting we oli no save finis, blong Hem, oli kamtru. Long hemia, mi testifae mo livim blesing blong mi stap wetem yufala, long nem blong Jisas Kraes, amen.