Ol Impoten Trutok—Yumi Nid blong Tekem Aksen
Fas Visen mo Profet Josef Smit i givim moa save mo trutok we i impoten long fasin blong stap glad blong yumi long laef ia mo long laef blong yumi blong stap olsem wan god, long ples blong God.
Taem mi gat seven yia nomo, mi askem mama blong mi, “?Taem yu mo mi yumitu ded mo go long heven, bae yu stap yet olsem mama blong mi?” Hem i no ekspektem wan kaen kwestin olsem. Be hem i ansa wetem evri save blong hem, mo talem, “No long heven bae yumi stap olsem ol brata mo sista nomo. Bae mi no stap olsem mama blong yu.” Hemia i no ansa we mi stap hop from.
Sam taem afta long toktok blong mitufala, tu yang man i kam long get blong haos blong mifala. Wetem merikel papa blong mi i letem tufala blong kam insaed. Tufala i talem se tufala i misinari blong Jos Blong Jisas Kraes Blong Ol Lata Dei Sent.
Tufala elda ia, olsem we mifala i lan blong singaotem tufala, oli stat blong tijim famli blong mifala. Mi tingbaot gud filing blong glad evri taem tufala i kam long haos blong mifala. Tufala i talem long mifala se wan yang man i bin go long wan bus blong askem God se wanem Jos ia i tru mo se hem i luk God mo Jisas Kraes. Tufala elda i soem long mifala visen ia mo taem mi luk, mi save se from visen ia, tru Jos blong Jisas Kraes i bin kambak long wol.
Tufala misinari i bin tijim mifala tu long plan blong stap glad blong God mo ansa long ol kwestin blong ol famli blong mi long saed blong relijin. Oli bin tijim mifala se famli i save stap tugeta afta long laef ia olsem papa, mama, ol boe mo ol gel.
Famli blong mifala i kasem baptaes. Rod blong jenisim ol olfala fasin, lego ol kastom, mo kam ol aktiv memba blong Jos i bin raf samtaem. Be from sore mo lav blong God mo wetem help blong plante lida mo ol memba, mifala i kamaot long fas yia blong jalenj.
Milian we oli joenem Jos finis, wetem plante we oli bin konvet mo baptaes evri wik, oli bin kasem wan testemoni long saed blong Fas Visen. Tabu Spirit i save ripitim witnes ia long wanwan long yumi taem yumi traehad blong laef folem simpol trutok blong gospel blong Jisas Kraes.
Fas Visen mo Profet Josef Smit i givim moa save mo trutok we i impoten long fasin blong stap glad blong yumi long laef ia mo long laef blong yumi blong stap olsem wan god, long ples blong God. Bae mi tokbaot tri trutok yumi kasem mo yumi mas tekem aksen long hem from wan yang boe i nildaon long tru prea.
God I Singaotem Profet blong Lidim Mo Gaedem Yumi
Olsem ol impoten trutok yumi lanem long Fas Visen mo Profet Josef Smit se God i singaotem ol profet, ol sia, mo ol reveleta blong tijim, gaedem, wonem mo lidim yumi. Olgeta man ia oli ol mesenja blong God long wol ia, wetem atoriti blong toktok mo mekem samting long nem blong Lod. Taem yumi folem gud ol kaonsel blong olgeta, bae yumi gat proteksen mo kasem ol blessing long wokbaot blong yumi long wol ia.
Taem mi stap stadi long Brigham Yang Yunivesiti olsem wan yang misinari we i kambak, mi go long wan prishud sesen blong jenerol konfrens long Tabenakol long Tempol Skwea. Presiden Ezra Taft Benson olsem Presiden blong Jos, i askem evri misinari we i kambak blong tekem mared i series mo blong mekem i kam nambawan praeoriti long laef blong hem. Afta long sesen ia, mi save se oli singaotem mi blong sakem sin mo mi nid blong tekem aksen long kaonsel blong profet.
Afta, mi disaed blong go long hom kantri, Brasil, blong faenem wan waef. Bifo mi aot blong go long Brasil blong tu manis blong wok, mi kolem mama blong mi mo sam fren long fon mo mekem wan lis blong ten yang woman—wanwan long olgeta i save kam waef blong mi.
Taem mi stap long Brasil, afta long plante tingting hevi mo prea, mi mitim, deit wetem, blokem, mo putum wan dei blong mared wetem wan long ol yangfala woman ia long lis ia. Mi no brekem rekod blong ol studen long Provo, Yuta blong deit mo blong mi blokem wan woman, be i wan rekod long standet blong Brasil.
Sam manis afta, Mi maredem Ilein. Hem i lav blong laef blong mi mo wan blesing.
Mi no stap askem evriwan blong mekem semak lis ia, be mi stap askem—ating mo bitim askem—se bae yumi oltaem tekem aksen taem ol profet blong yumi we oli laef oli toktok.
Profet blong God tudei i Presiden Thomas S. Monson mo bae yumi kasem blessing taem yumi folem ol kaonsel blong hem evriwan.
Save Abaot Huia Nao Hem I God
Wan nara trutok yumi lanem long Fas Visen mo Profet Josef Smit hem i God mo huia Hem tru. Traem tingbaot hem i wan blesing blong save se God i wan man wetem wan bodi blong mit mo bun we yumi save tajem olsem hemia blong yumi, yumi save wosipim wan God we i ril, Hem we yumi save andastanem, mo we Hem i soem Hemwan mo Pikinini blong Hem long ol profet blong Hem—ol profet blong bifo tugeta wetem hemia blong ol las dei. Hem i wan God we i harem mo ansa long ol prea blong yumi; Wan God we i lukaot gud yumi long heven antap mo i wari oltaem from laef blong yumi long saed blong spirit mo bodi; wan God we i givim long yumi raet blong jusum blong disaed blong yumiwan blong folem Hem mo no fosem; yumi blong obei long ol komanmen blong Hem; wan God we i givim long yumi ol blessing mo letem yumi fesem ol hadtaem blong mekem se yumi save gro mo kam olsem Hem.
Hem i wan God we i gat lav we i givim wan plan, we tru long hem yumi save stap hapi long laef ia mo long ol taem we i no save finis.
Jisas Kraes I Sevya blong Yumi
Long Fas Visen mo Profet Josef Smit, yumi kasem save se Jisas Kraes i ril, mo tabu misin blong Lod Jisas Kraes i ril; Jisas Kraes i konaston blong relijin blong yumi.
From ded i bin kam long wol, olsem we yumi laef naoia bae yumi evriwan i ded wan dei. Wan long ol risal blong ded i lus blong bodi blong mit mo bun blong yumi blong oltaem; bae yumi no save mekem eni samting blong tekembak. Antap long hemia yumi evriwan i sin taem yumi stap long wol ia, bae yumi no save gobak stap long ples blong Papa blong yumi long Heven.
?Traem tingbaot wanem bae i hapen sapos yumi no save gobak stap long ples blong God mo no save kasem wan bodi bakegen?
I gat nid blong wan Sevya mo Ridima blong mekem yumi fri long ded mo sin. Anda long daereksen blong Papa long Heven, Jisas Kraes i kam long wol, safa, ded long kros mo laef bakegen blong mekem se yumi tu yumi save laef bakegen mo wetem tru fasin blong sakem sin mo fasin blong mekem mo kipim ol tabu kavenan, yumi save stap wetem Papa God bakegen.
Jekob i eksplenem: “O hamas nao gudfala fasin blong God blong yumi, we i mekem rere wan rod blong ronwe blong yumi aot long paoa blong rabis animol ia; yes, animol ia ded mo hel, we mi singaotem se ded blong bodi, mot u ded blong spirit.”
Jisas i Mesaea ia we God i promesem, Hem i Man we i givim loa, Tabu Wan blong Israel, Lod blong yumi, Sevya blong yumi, Ridima blong yumi, King blong yumi, Hem i Evri Samting.
Bae yumi gohed blong mekem samting folem ol impoten trutok mo save ia, soem fasin blong obei blong yumi long God mo Pikinini blong Hem we Hem i lavem tumas. Long nem blong Jisas Kraes, amen.