Ol Prinsipol mo ol Promes
Bae yumi kea long ol bodi blong yumi mo ol maen blong yumi taem yu folem ol prinsipol we i stap long Tok blong Waes, wan plan we oli givim we i kam antap.
Tunaet, ol brata, mi prea from help blong Papa blong yumi long Heven taem mi serem mesej blong mi wetem yufala.
Long 1833, Lod i bin rivilim long Profet Josef Smit wan plan blong helt blong laef folem. Plan ia i stap long 89 seksen blong Doktrin mo ol Kavenan mo yumi save long hem olsem Tok blong Waes. I givim stret wei long wanem kaikai blong kakae, mo i stopem yumi long ol samting we i strong tumas long ol bodi blong yumi.
Olgeta we oli stap biaen mo folem ol komanmen blong Lod mo stap fetful blong folem Tok blong Waes, bae oli kasem ol stret promes blesing, we wan hem i blong stap helti mo gat moa paoa long bodi.
I no longtaem mi bin ridim tru stori we oli bin putum long wan so abaot ol promes ia. Wan fetful memba blong Jos, Jon A. Larsen, i bin wok long taem blong Wol Wo II long Yunaeted Stet Kos Gad long ami sip ia USS Cambria. Long taem blong wan faet long Filipin, toktok i kam se wan grup blong ol plen blong faet we i fulap long ol bom i stap kam kolosap. Oda i kam blong oli mas muvaot. From se sip ia USS Cambria i aot finis, Jon mo tri long ol fren blong hem oli pikimap ol tul blong olgeta mo ron i go long solwota, wetem hop ia se wan long ol sip bae i pikimap olgeta. Laki we wan spid bot i pikimap olgeta i go long las sip blong faet we i stap aot. Ol man long sip blong faet ia tu oli bisi mo stap rere blong muvaot kwik long ples ia mekem se oli sakem ol rop nomo long fo(4) man ia, blong oli gat hop blong save mekem blong klaem i go antap long sip.
Jon, wetem wan hevi redio we i hang long bak blong hem, i hang long en blong wan 12 mita rop, long saed blong sip we i stap ron i go long big si. Hem i stat blong hang strong mo gohed blong jenisim han mo save se sapos hem i no hang strong, bae kolosap hem i save ded. Afta we hem i stap muv moa i go antap blong nambatri taem, skin blong han blong hem i soa. Hem i bin kam wik tumas we hem i filim se hem i no save go moa.
Paoa i nomo gat, wetem tingting long hao blong kasem sip, Jon i krae slo i go long God, talem long Hem se hem i bin kipim Tok blong Waes mo bin laef long wan laef we i klin—mo naoia hem i nidim tumas ol promes blesing ia.
Afta Jon i talem taem hem i finisim prea blong hem, hem i bin filim wan paoa we i kam long hem. Hem i stat blong klaem bakegen mo klaem kwik i go antap long rop. Taem hem i kasem sip, hem i pulum win gud nomo—hem i pulum win gud. Ol blesing blong stap moa helti mo gat moa paoa, oli promesem insaed long Tok blong Waes, mo hem i blong hem. Hem i talem tangkyu long Papa blong hem long Heven, mo truaot long ol laef blong hem, from ansa long strong prea blong hem from help.
Ol brata, bae yumi kea long ol bodi blong yumi mo ol maen blong yumi taem yu folem ol prinsipol we i stap long Tok blong Waes, wan plan we oli givim we i kam antap. Wetem evri hat mo sol, mi testifae long ol gudfala blesing we i stap blong yumi taem yumi mekem. Blong hemia bae i save hapen olsem, mi prea, long nem blong Lod mo Sevya blong yumi, Jisas Kraes, amen.