“Sapos Yufala I Stap Obei long Ol Tok blong Mi Bambae Mi Lavem Yufala Olwe”
God’s love is infinite and it will endure forever, but what it means for each of us depends on how we respond to His love.
Baebol i talem long yumi se “God Hem i Lav.”1 Hem nao i stret man we i soem lav, mo yumi dipen bigwan long lav ia we i stap oltaem mo i kavremap ful wol. Olsem we Presiden Tomas S. Monson i talem: “Lav blong God i stap ia blong yu, mo sapos yu filim o no filim se yu inaf blong kasem lav ia. Hem i stap ia oltaem nomo.”2
I gat fulap wei blong talem mo tokbaot tabu lav ia. Wan long olgeta toktok we yumi harem oltaem i we lav blong God i no gat kondisen. Long wan wei, hem i tru, be toktok ia, “no gat kondisen,” i no kamaot long eni ples long skripja. Be, lav blong Hem, oli tokbaot insaed long skripja se hem “i bigwan mo i mekem man i sapraes,”3 i “lav we i stret gud,”4 i “lav blong pemaot man,” i “lav we i no gat en”65 Olgeta toktok ia, oli ol toktok we oli moa gud from se, toktok ia, no gat kondisen, i save givim rong tingting abaot tabu lav ia; ol rong tingting olsem se God i akseptem mo i fogivim eni samting yumi mekem from lav blong Hem i no gat kondisen, o God i no askem eni samting blong yumi mekem from lav blong Hem i no gat kondisen, o, Jisas bae i sevem evriwan insaed long kingdom blong God long heven from se lav blong Hem i no gat kondisen. Lav blong God i no gat en blong hem mo bae i stap fogud, be mining blong hem long wanwan long yumi i dipen long hao yumi tekem aksen folem lav blong Hem.
Jisas i talem:
“Papa blong mi i lavem mi tumas, mo long sem fasin mi lavem yufala. Joen gud long mi blong mi save lavem yufala olwe.
“Sapos yufala i stap obei long ol tok blong mi, bambae mi lavem yufala olwe, stret olsem we mi stap obei long ol tok blong papa blong mi, nao oltaem hem i stap lavem mi.”7
Blong “joen gud” o blong “obei” blong Sevya i lavem yumi, i minim blong kasem gladhat blong Hem, mo kam stret evriwan tru long hem.8 Blong kasem gladhat blong Hem, yumi mas gat fet long Jisas Kraes, mo stap obei ol komanmen blong Hem, we i minim blong sakem ol sin blong yumi, kasem baptaes blong klin aot long sin, kasem Tabu Spirit, mo gogohed blong wokbaot long rod blong fasin blong stap obei.9
Oltaem bae God i stap lavem yumi, be Hem i no save sevem yumi sapos yumi no sakem sin blong yumi.10 Tingbaot ol toktok blong Amulek long Sisrom, se Sevya bae i no save sevem ol pipol blong Hem wetem ol sin blong olgeta, be i no from sin blong olgeta; 11 hemia i from we, wetem sin, yumi no klin mo “bae i no save gat wan samting we i doti i save kasem kingdom blong heven,”12 o stap wetem God. “Mo [Kraes] i gat paoa we Papa i bin givim long hem blong pemaot olgeta aot long ol sin blong olgeta, from fasin blong sakem sin; from hemia, hem i bin sendem ol enjel blong hem blong talemaot ol gud nius blong fasin blong sakem sin, we i karem ol pipol i go long paoa blong Ridima, mekem se hem i save sevem sol blong olgeta.”13
Long Buk blong Momon, yumi lanem se tingting biaen long safaring blong Kraes, bigfala eksampol ia blong lav blong Hem, i blong “karem i kam ol filing blong gat sore, we i bitim jastis, mo karem i kam long ol man, ol wei blong mekem se oli save gat fet blong oli save sakem sin.
“Mo olsem ia nao, sore i save stretem fulwan, ol samting we jastis i askem, mo i raonem olgeta wetem ol han blong sefti; mo long semtaem, hem we i no praktisim fet blong hem i sakem sin, hem i fesem ful loa blong wanem jastis i askem; from hemia, hem nomo we i gat fet we i mekem hem i sakem sin, God i mekem bigfala plan blong fasin blong pemaot man we i no gat en, i hapen long hem.”14
Nao, fasin blong sakem sin i presen we Hem i givim long yumi, we Hem i pem long wan hae praes tumas.
Sam bae oli toktok, oli se God i blesem evriwan i semmak nomo—mo ripitim toktok blong Jisas long Toktok Antap long Hil: “[God] i stap letem san blong hem i saen long ol gudfala man, mo long ol man nogud i semmak nomo.”15 I tru, God i no kapsaetem long evri pikinini blong Hem evri blesing we Hem i save kapsaetem—evri blesing ia we lav, mo loa, mo jastis mo sore bae i letem. Mo hem i givim oda long yumi blong mekem i semmak:
“Be mi talem long yufala se yufala i mas lavem ol enemi blong yufala, mo yufala i mas prea from olgeta we oli stap mekem i nogud tumas long yufala.
“Long fasin ia bae yufala i soemaot we yufala i pikinini blong Papa blong yufala long heven.”16
Be, ol blesing blong God we oli moa bigwan, oli kam long kondisen se man i sakem sin. Presiden Russell M. Nelson i eksplenem: “Bigfala bandel flaoa blong lav blong God—we i gat laef we i no save finis—i gat tu ol blesing we yumi mas kwalifae from, be i no samting we bae i kam we yu no klin inaf i stap. Ol man we oli mekem sin oli no save benem tingting blong Lod i kam folem tingting blong olgeta, mo askem Hem blong blesem olgeta wetem ol sin blong olgeta [luk long Alma 11:37]. Sapos oli wantem se oli mekyus long evri flaoa long bandel blong Lod, oli mas sakem sin.”17
Nomata we hemia i mekem man we i sakem sin i nomo gat rong mo mak wetem promes ia se bae Lod i “leftemap hem long las dei,”18 i gat wan nara saed tu we i impoten long fasin blong obei blong Lod i lavem yumi. Blong obei blong gat lav blong God bae i mekem se yumi luksave ful paoa we yumi save kasem, blong kam stret olsem Hem i stap.19 Olsem Presiden Dieter F. Uchtdorf i talem: “Gladhat blong God i no putumbak yumi long wan ples we yumi nomo gat rong nomo. Hem i stap lukluk i hae moa: Hem i wantem ol boe mo gel blong Hem blong kam semmak olsem Hem.”20
Blong obei blong gat lav blong God, long wei ia, i minim blong biaen long tingting blong Hem fulwan. I minim blong akseptem taem Hem i stretem yu, taem i nid, from “Hae God … i save stretem olgeta we [Hem] i lavem olgeta.”21 Hem i minim blong lavem mo givim seves long wanwan long yumi olsem we Jisas i bin lavem mo givim seves long yumi.22 Hem i minim blong lanem “blong stap obei long loa blong wan selestial kingdom” blong mekem se yumi save “stap long wan selestial glori.”23 Taswe, blong Hem i save mekem yumi kam huia Hem i wantem yumi kam, Papa blong yumi long Heven i plis long yumi blong mekem folem “ol gudfala toktok blong Tabu Spirit, mo i tekemaot man we i folem fasin blong wol, mo kam wan sent tru long atonmen blong Kraes we i Lod, mo i kam olsem wan pikinini, i stap lisin, i no stap flas, i putum tingting blong hem i stap daon, i save wet longtaem, i gat plante lav, i glad blong stap biaen long evri samting we Lod i tingting blong putum long hem, olsem wan pikinini i stap biaen long papa blong hem.”24
Elda Dallin H. Oaks i talem: “Las Jajmen i no blong skelem ful wok we i gud mo nogud—wanem yumi bin mekem. Hem i blong luksave wanem ol aksen mo tingting blong yumi—huia yumi kam. ”25
Stori blong Helen Keller i kolosap semmak long wan parabol we i soem hamas tabu lav i save jenisim wan sol we i wantem mekem samting. Helen i bon long stet blong Alabama long Yunaeted Stet long 1880. Taem hem i gat 19 manis nomo, oli faenem wan sik long hem mo hem i kam nambut mo blaen. Hem i wan waes gel mo hem i harem nogud taem hem i stap traem blong kasem ol samting raon long hem. Taem Helen i filim save se ol memba blong famli oli yusum maot blong olgeta blong toktok be i no ol saen semmak olsem hem, nao “bae hem i kros bigwan from se hem i no save joenem storian.” 26 Taem Helen i kasem sikis yia, nid blong hem blong save pasem toktok mo bigfala kros blong hem i stap kam antap moa, mekem se hem i stap “singsingaot evri dei, samtaem evri aoa.”27
Papa mo mama blong Helen i pem wan tija blong stap wetem gel blong tufala, wan woman we nem blong hem i Anne Sullivan. Semmak olsem we yumi gat wetem Jisas Kraes we i andastanem ol samting we yumi no save wokem,28 Anne Sullivan i traehad wetem bigfala hadtaem blong hemwan, mo i andastanem trabol blong Helen. Taem hem i gat faef yia, hem i kasem wan sik we i mekem ae blong hem i soa bigwan mo hem i haf blaen. Taem Anne i kasem eit yia, mama blong hem i ded; papa blong hem i lego hem mo yangfala brata blong hem Jimmie; mo oli sendem tufala long wan “pua haos” we kondisen blong hem i nogud tumas, mekem se Jimmie i ded afta tri manis nomo. Tru long strong tingting blong hemwan, Anne i go insaed long Perkins Skul blong Ol Blaenman mo olgeta we ae i nogud, mo hem i mekem gud. Afta we oli bin katem ae blong hem, hem i save luk gud smol moa we hem i save rid. Taem papa blong Helen Keller i toktok wetem Perkins Skul blong lukaotem wan tija, oli bin jusum Anne Sullivan.29
I no wan gudfala eksperiens long stat. “Helen i slapem, i pinsim, mo i stap kikim tija blong hem, mo i brekem wan tut blong tija. Anne i tekem kontrol taem oli muvum Helen i go long wan smol haos long propeti blong famli Keller. Wetem longfala tingting mo fasin blong gohed, Anne i winim “hat mo tras”30 blong Helen. Semmak, taem yumi kam blong trastem, be i no blong agensem, Hae Tija blong yumi, Hem i save wok wetem yumi blong givim moa laet mo leftemap yumi long wan niu ril laef.31
Blong helpem Helen blong lanem ol toktok, Anne bae i spelem ol nem blong ol samting blong evri dei long fingga blong Helen. Helen i laekem fingga pleiplei ia, be hem i no bin andastanem kasem taem Anne i spelem w-o-t-a, taem hem i stap kapsaetem wota antap long han blong Helen. Afta Helen i bin raetem:
“‘Kwiktaem, mi filim se wan samting we mi bin fogetem i kambak long tingting blong mi … long wan wei, sikret blong lanwis ia i kamkamaot long mi. Mi bin save se w-o-t-a i minim naes kolkol samting we i stap ron long han blong mi. !Toktok ia we i laef i wekemap sol blong mi, i givim laet, hop, glad, mo i mekem sol i fri! … Evri samting i bin gat wan nem, mo evri nem i givim wan niu tingting. Taem mifala i gobak long haos, evri samting we mi tajem, i olsem se hem i laef i stap.’” 32
Taem Helen Keller i gro i kam wan adalt, oli save hem from hem i lavem lanwis, from skil blong hem blong save raet, mo from ol naes toktok taem hem i toktok long pablik.
Long wan muvi we i tokbaot laef blong Helen Keller, oli soem se papa mo mama i glad wetem wok blong Anne Sullivan from hem i winim gel blong tufala we i wael blong mekem se Helen i save sidaon kwaet long tebol, i kakae gud, mo i save foldem ti tawel blong hem long en blong kakae. Be Anne i bin save se Helen i save mekem plante moa samting, mo hem i gat fulap wok blong mekem yet.33 Iven we bae yumi hapi nomo wetem wanem yumi mekem finis long laef blong yumi, mo yumi huia yumi ia nomo, be Sevya i savegud bigfala paoa blong glori we yumi gat mo yumi stap luk nomo “tru long glas we i tudak.”34 Wanwan long yumi i save filim bigbigfala glad blong tabu paoa ia we i stap kamkamaot long yumi, i semmak long glad we Helen Keller i filim taem ol toktok oli kam laef, mo givim laet long sol blong hem mo mekem hem i kam fri. Wanwan long yumi i save lavem mo givim seves long God, mo kasem paoa blong blesem ol narafalawan. Olsem we oli raetem, “ol man oli no luk ol samting ia long ae blong olgeta, oli no harem tok blong olgeta long sora blong olgeta, mo oli no tingbaot olgeta long tingting blong olgeta, be olgeta oli rere i stap.”35
Bae yumi lukluk long praes blong bigfala lav blong God. Jisas i talemaot se blong pem praes from ol sin blong yumi mo pemaot yumi long ded, long saed blong bodi mo spirit, safaring blong Hem i mekem Hem, “we i hae long evriwan, i seksek from soa long bodi, mo blad blong [Hem] i ronaot long evri hol blong skin blong [Hem], mo [Hem i] safa tugeta long bodi mo long spirit—mo [Hem i] no wantem drink kap ia we i konkon, mo [Hem i] wantem holemtaet [Hem].”36 Bigfala harem nogud blong Hem long Getsemane mo antap long kros i bitim wanem we eni man long wol i save tekem.37 Be, from lav we Hem i gat long Papa blong Hem mo yumi, Hem i gotru long hem, mo long en, i save givim yumi taem mo laef we i no save finis.
Hem i wan bigfala saen se blad i kamaot long evri “hol blong skin,”38 taem Sevya i bin safa long Getsemane, ples blong purumbut long olif frut. Blong mekem olif oel long taem blong Sevya, fastaem oli rolem wan bigfala ston ova long ol olif frut. Long en, oli karem frut ia we oli smasem mo putum long ol basket we oli wivim mo oli hivimap wan antap long narawan. Hevi blong ol basket i mekem oel i kamaot, mo fas oel we i kamaot i klin moa. Afta, oli putum wan hevi pis wud antap long ol basket ia, blong karem moa oel. Nao laswan, blong karemaot ol las drop, oli ademap ston antap long wud, blong mekem se ol olif ia oli smas gud.39 Mo yes, oel ia i red olsem blad taem hem i ronaot faswan.
Mi tingting long stori blong Matiu abaot Sevya taem Hem i go insaed long Getsemane long naet ia—se “tingting blong hem i kam hevi, we hem i harem nogud tumas. …
“Hem i wokbaot smol moa i go, i foldaon, i slip long fes blong hem blong i prea. I talem: ‘Papa sapos yu save mekem, plis yu tekemaot ol samting ia we i stap mekem mi mi harem nogud tumas. E yu no mekem olsem we mi mi wantem, yu mekem olsem we yu nomo yu wantem.’”40
Afta, mi ting se harem nogud ia i kam moa bigwan, Hem i prea wan nambatu taem blong kasem help, mo long en, taem Hem i harem se i soa we i soa, i prea nambatri taem. Hem i gotru long bigfala harem nogud ia kasem we i stretem mak blong jastis kasem las drop blong Hem.41 Hem i mekem hemia blong pemaot yu mo mi.
!Tabu lav ia i wan bigfala presen tumas! Jisas we i fulap long lav ia i askem: “?Bae yufala i no kambak long mi, mo sakem ol sin blong yufala, mo jenisim laef blong yufala blong mi save hilim yufala?”42 Wetem fasin we i kaen Hem i talem: “Luk, mi stretem han blong sore blong mi i kam long yufala, mo huia we bae i kam long mi, bae mi akseptem hem; mo bae mi blesem olgeta we oli kam long mi.”43
?Bae yu no lavem Hem we i lavem yu fastaem?44 Ale yu obei ol komanmen blong Hem.45 ?Bae yu no fren wetem Hem we i givim laef blong Hem from ol fren blong Hem?46 Ale, yu obei ol komanmen blong Hem.47 ?Bae yu no stap wetem lav blong Hem mo akseptem evri samting we Hem i givim long yu wetem wan hat we i glad? Ale, yu obei long ol komanmen blong Hem.48 Mi prea se bae yumi filim mo obei fulwan blong Hem i lavem yumi. Long nem blong Jisas Kraes, amen.