Blong Yumi Lan mo Bildimap Yumi long Saed blong Spirit
Be, ol sikret blong God oli kamkamaot long yumi, folem tingting blong Hem mo tru long paoa blong Tabu Spirit.
Taem mi wan smol boe, papa mo mama blong mi i bin risivim wan presen we i pulum ae blong smol brata blong mi Deved mo mi. Presen ia i wan smol model blong gol buk we Profet Josef Smit i bin risivim tru long enjel Moronae. Mi tingbaot se model blong gol buk ia i gat 10 o moa pej wetem ol toktok we oli raetem i stap long hem. Be, i no ol pej we i pulum ae blong mitufala.
Taem mitufala i stap gro i kam antap mitufala i harem ol storian blong Restoresen. Mitufala i bin save mo singsing abaot buk we oli bin mekem wetem gol we i bin haed i stap long saed blong hil mo enjel Moronae i givim long Josef Smit. Intres blong mitufala long gol buk i gro, mo mitufala i wantem luk nomo se: ? wanem raeting i stap long las seksen blong gol buk ia? we oli silim wetem tu smol pis blong aean.
Gol buk ia i sidaon i stap long en blong tebol blong sam dei bifo interes blong mitufala i winim mitufala. Nomata mitufala i save se hem i no stret buk we Moronae i givim, mitufala i wantem blong luk smol pat ia nomo we oli silim. Plante taem, mitufala i yusum naef blong bata, ol olfala spun, mo eni samting we mitufala i save yusum blong openem smol pat ia, blong luk smol nomo wanem we i stap insaed—be i no inaf blong brekem smol pis aean ia. Mitufala i traem blong no lego wan mak blong oli no faenem aot mitufala. Be mitufala harem nogud mo wari from hamas taem mitufala i traem blong “openem gol buk ia” be mitufala i no go tru.
Mi no save yet wanem—sapos i gat eni samting—i haed insaed long smol pat ia we i sil i stap. Be pat blong storian blong mitufala we mi sem long hem, i we, kasem tedei mi no save wanem toktok i stap long smol pat blong gol buk ia we i stap blong man i ridim. Mi stap pikjarem nomo se ol pej ia oli gat ol stori blong Restoresen mo testemoni blong Josef Smit mo Olgeta Tri witnes mo Olgeta Eit Witnes, we oli luk ol ril gol buk we Moronae i bin givim.
Stat long taem we Lod i krietem wol ia, Papa blong yumi long Heven i bin soem rod, lidasip, mo instraksen long ol pikinini blong Hem tru ol profet. Ol toktok blong Hem oli pas i kam daon long ol profet mo oli sevem olsem ol skripja blong yumi gro mo stap lan. Nifae i tokbaot hemia long wei ia;
“From sol blong mi i glad long ol skripja, mo hat blong mi i tingting hevi long olgeta, mo mi raetem ol samting ia blong ol pikinini blong mi i lanem olgeta mo oli save yusum blong helpem olgeta.”
“Luk, sol blong mi i glad long ol samting blong Lod; mo hat blong mi i tingting hevi oltaem long ol samting we mi bin luk mo mi bin harem.”
Antap long hemia, ol dispensesen blong bifo mo dispensesen blong las dei ia, yumi ol memba blong Jos blong Lod we yumi klin inaf, i gat blesing ia blong gat Tabu Spirit olsem fren blong yumi oltaem, we i helpem spirit blong yumi blong gro blong stap lanem samting.
Mi save brata blong mi i wan man blong wokhad oltaem wetem strong tingting, hem bae i mas ridim olgeta toktok we i stap long model blong gol plet ia long haos blong papa mo mama blong mitufala. Mi, stil, i ting nating long ol klia mo gudgudfala trutok, be i yusum paoa we mi gat blong lukaotem olgeta samting we oli no blong kamaot.
Samtaem, blong gro mo stap lanem samting, bae i go slo o i stop, folem tingting long hat we i no stret blong “sakem ae long gol buk ia.” Ol aksen ia i save lidim yumi blong lukaotem ol samting we oli no blong yumi andastanem yet long taem naoia. Yumi lukdaon long ol trutok we oli stap blong yumi naoia mo ol jalenj naoia−ol trutok we Nifae i tokbaot se hem i blong yumi lanem samting mo blong i blong gud blong yumi.
Brata blong Nifae, Jekob, i tijim: “Luk, ol wok blong Lod, oli bigfala mo gudfala. Hamas i had blong man, i lukaotem long ol dip ples blong ol sikret blong hem; mo hem i no save hapen se man bae i faenemaot evri wei blong hem.”
Ol toktok blong Jekob oli tijim yumi se yumi no save “sakem ae long gol buk ia” o fosem blong God i talemaot ol sikret blong Hem long yumi. Be, ol sikret blong God oli kamkamaot long yumi, folem tingting blong Hem mo tru long paoa blong Tabu Spirit.
Jekob i gohed:
“Mo i no gat man i save long ol wei blong hem, sapos hem i no kasem tru long revelesen; from samting ia, ol brata, no luk daon long ol revelesen blong God.
“From luk, tru long paoa blong toktok blong hem, man i kam long fes blong wol. …O ale, from wanem hem i no save rulum wol ia, o ol samting we hem i mekem wetem ol han blong hem long fes blong wol, folem tingting mo glad blong hem?
“From samting ia, ol brata, no lukaotem blong givim advaes long Lod, be tekem advaes long han blong hem.”
Blong andastanem ol sikret blong God, o olgeta samting we man i andastanem tru long revelesen nomo, yumi mas folem eksampol blong Nifae, we i talem: “Mo i bin hapen se mi Nifae, from mi yang tumas, be bodi blong mi i strong mo i bigfala, mo tu mi bin gat strong tingting tumas blong save ol sikret blong God, from samting ia, mi bin prea long Lod; mo luk hem i bin visitim mi, mo i bin mekem hat blong mi i kam sofsof, mekem se mi bin bilivim evri toktok we papa blong mi i bin talemaot.” Lod Hemwan i talem klia se Nifae hem i yusum fet, hem i bin lukaotem Lod oltaem, wetem wan hat we i stap daon, mo holem ol komanmen blong Hem.
Insaed long eksampol blong Nifae blong lukaotem save, i gat, (1) tru hat blong wantem save, (2) gat tingting i stap daon, (3) prea, (4) trastem profet, mo yusum (5) fet, (6) fasin blong wokhad oltaem wetem strong tingting, mo (7) fasin blong stap obei. Fasin ia blong lukaotem samting, i no semmak nating long fasin blong mi blong “sakem ae long gol buk” o traem fosem blong andastanem ol samting we i gat taem blong olgeta blong kamkamaot folem taem blong Lod mo tru long paoa blong Tabu Spirit.
Taem tedei, yumi tekem save olsem wan samting we yumi save mo mas kasem kwiktaem nomo; taem i no isi blong faenem infomesen, hem i samting we man i sakemaot mo no bilivim. From infomesen i plante tumas, samfala oli stap bilivim moa infomesen we oli no save hu i raetem bitim blong dipen long rod blong kasem revelesen blong olgetawan we Lod i putum i stap. Jekob i stap tokbaot taem blong yumi olsem: “Be luk, olgeta oli i bin wan stronghed pipol; mo oli bin luk daon long ol klia toktok … mo oli bin lukaotem ol samting we oli no save andastanem. From samting ia, from oli blaen, we blaen ia i bin kam tru long taem we oli bin lukluk i go ova long mak, oli mas foldaon; from God i bin tekemaot klia fasin blong hem long olgeta, mo i bin givim long olgeta plante samting we oli no save andastanem, from oli bin wantem samting ia.”
Komperem hemia wetem kaonsel blong Presiden Dida F. Ukdof. Hem i toktok long ol misinari, be toktok blong hem i blong evriwan we i stap lukaotem trutok long saed blong spirit. Hem i talem: “Taem … ol misinari oli gat fet long Jisas Kraes, bae oli trastem Lod fulwan blong save folem ol komanmen blong Hem−nomata taem oli no andastanem ol risen blong hem. Fet blong olgeta bae i kamkamaot long fasin mekem samting wetem strong tingting mo tru long wok.”
Long jeneral konfrens blong las Epril, Elda Dalin H. Oks i eksplenem se: “Jos i mekem bigfala wok blong mekem se ol rekod oli no haed, be afta plante buk oli kamaot, ol memba oli stil gat ol besik kwestin we ansa i no save kam tru long stadi … Sam samting yumi lanem tru long fet nomo.”
Ol profet blong bifo oli bin tijim semmak prinsipol we i soem se fasin blong man i no jenis mo, paten blong Lod blong stap lanem samting, hem i evri taem. Luk long Ol Testeman Proveb: “I nogud yu ting se save ya blong yu naoia, hem i naf blong givhan long yu. Yu mas trastem Hae God long olgeta tingting blong yu.”
Aesea i eksplenem, taem hem i stap toktok blong Lod se: “Skae i antap we i antap, i antap olgeta long graon, mo long sem fasin, tingting blong mi i hae we i hae, i antap olgeta long tingting blong yufala, mo fasin blong mi i antap olgeta long fasin blong yufala.”
Nifae i witnes long hemia taem hem i talemaot se: “O Lod, mi bin trastem yu, mo bae mi trastem yu blong oltaem.”
Fet mo tras long Lod i nidim yumi blong luksave se waes tingting blong Hem i moa hae long hemia blong yumi. Yumi mas luksave se plan blong Hem i givim bigfala janis blong gro mo stap lanem samting long saed blong spirit.
Hem i neva ting se bae yumi “gat wan stret save long ol samting” long laef blong wol ia. Be, Hem i wantem luk se bae yumi “hop long ol samting we yumi no luk, we oli tru.”
Iven wetem bigfala fet we Nifae i gat, hem i luksave se hem i no save evri samting taem enjel i askem hem se: “? Yu save ol samting long saed blong ol wok we God i kamdaon blong mekem wetem man?” Nifae i ansa: “Mi save se hem i lavem ol pikinini blong hem; be, mi no save mining blong evri samting.”
Semmak long Alma taem i stap toktok long boe blong hem Hileman, “Nao ol sikret ia, oli no bin soemaot fulwan long mi yet; taswe bae mi nomo tokbaot samting ia.”
Mi testifae se Papa long Heven i lavem ol Pikinini blong Hem, be yet, olsem Nifae mo Alma, mi no save mining blong evri samting. I no nid tu blong mi save evri samting; Mi tu bae mi mas stap kwaet mo wet wetem longfala tingting long Lod, from mi save se “Mi gat evri samting olsem wan testemoni se ol samting ia oli tru; mo bae yu gat evri samting olsem wan testemoni long yu se ol samting ia oli tru. …
“…Ol skripja oli stap long fored blong yu, yes, mo evri samting i soem se i gat wan God; yes, wol tu, mo evri samting we oli stap fes blong hem, yes, mo olsem wanem i muv, yes, mo tu, evri wol we oli muv long stret rod blong olgeta, oli witnes se i gat wan Krieta we Paoa blong hem i Hae Tumas.”
Taem yumi stap talem tangkyu se yumi ol wokman blong wan waes mo fetful Papa long Heven, ? “O ale, from wanem Hem i no save rulum wol ia, o ol samting we Hem i mekem wetem ol han blong Hem long fes blong wol, folem tingting mo glad blong Hem?
Hem i laef. Jisas Kraes Hem i wan pikinini ia nomo we God i lavem mo Ridima blong evri man. From Atonmen blong Kraes, Hem i gat wes tingting mo save luk wanem we i stap kam blong lidim yumi long ol las dei ia. Josef Smit hem wan profet blong Hem, we Hem i jusum blong putumbak kingdom blong Hem fulwan, long wol ia. Tomas S. Monson hem profet blong Hem we i stap laef mo God i tok tru long hem. Wetem hemia mi serem ones witnes blong mi long nem blong Jisas Kraes, amen.