I Gat Paoa Insaed Long Buk Ia
Bigfala paoa blong Buk blong Momon hem i paoa ia we i karem yumi kam kolosap moa long Jisas Kraes.
Long Jun 14, 1989, folem sam giaman toktok abaot Jos, gavman blong Gana i stopem evri aktiviti blong Jos blong Jisas Kraes blong ol Lata-dei Sent insaed long kantri blong Afrika ia. Gavman i holemtaet evri propeti blong Jos, mo stopem evri aktiviti blong ol misinari. Ol memba blong Jos, we oli singaotem taem ia se “taem we evri samting i stop,” oli traem bes blong olgeta blong laef folem gospel no mata we oli nogat ol branj miting o sapot blong ol misinari. I gat plante stori abaot olsem wanem nao ol memba oli kipim laet blong gospel i saen taem oli stap wosip long ol hom blong olgeta mo stap lukaotem wanwan long olgeta olsem ol hom mo visiting tija.
Afta sam taem i pas oli stretem ol toktok ia, mo long Novemba 30, 1990, taem ia we evri samting i bin stop i finis mo ol aktiviti blong Jos oli stat bakegen. Stat long taem ia i kam, Jos mo gavman blong Gana i gat sam gudfala rilesensip.
Ol memba we oli bin stap long taem ia we evri samting i bin stop oli kwik blong poenemaot ol blesing we i kam from taem ia. Fet blong plante i kam strong moa truaot long taem we oli fesem enemi. Be wan long ol blesing blong taem ia i kam long wan wei we i defren.
Nikolas Ofosu-Hene Opare, wan yangfala polis man i kasem asaenmen blong bodi gad long LDS miting haos long taem ia. Wok blong hem i blong lukaotem bilding ia long naet. Fas taem we Nikolas i kasem miting haos ia, hem i bin luk ol samting i foldaon olbaot, ol pepa, ol buk mo ol fenija oli stap olbaot nomo. Long medel blong ol samting ia, hem i luk wan kopi blong wan Buk blong Momon. Hem i traem blong no lukluk buk ia from oli bin talem long hem se buk ia i blong devel. Be hem i filim se hem i no save tekemaot ae blong hem, naoia Nikolas i no moa save tanem bak long buk ia. Hem i pikimap. Hem i gat wan strong filing blong stat ridim buk ia. Hem i rid truaot long naet, mo wota blong ae i ron daon long fes blong hem taem hem i stap rid.
Fas taem we hem i pikimap buk ia, hem i ridim ful 1 Nifae.. Namba tu taem, hem i ridim ful 2 Nifae. Taem hem i kasem 2 Nifae japta 25, hem i ridim: “Mo mifala i tokbaot Kraes, mifala i glad long Kraes, mifala i prij long saed blong Kraes, mifala i profesae long saed blong Kraes, mo mifala i raetem folem ol profesi blong mifala blong mekem se ol pikinini blong mifala i save gat save long wanem ples oli save lukluk long hem blong kam klin aot long ol sin blong olgeta.
Long tetaem ia Nikolas i filim strong paoa blong Spirit mo hem i stat blong krae. Hem i luksave se long taem we hem i stap rid, hem i bin filim spirit se buk ia hem i skripja, hem i stret bitim eni nara buk we hem i bin ridim. Hem i luksave se ol Lata-dei Sent, oli no olsem we hem i bin harem, be oli biliv strong long Jisas Kraes. Afta long taem we evri samting i bin stop mo ol misinari oli kambak long Gana, Nikolas, waef blong hem, mo ol pikinini blong hem oli joenem Jos. Taem mi luk hem las yia, hem i wan komanda blong polis mo hem i stap sev olsem presiden blong Tamale Gana Distrik blong Jos. Hem i talem se: “Jos i bin jenisim laef blong mi…mi talem tangkyu long God we i gat evri Paoa blong lidim mi kam long gospel.”
Aliber Devis, wan narafala man Gana, i go wetem wan fren blong hem long wan long ol miting haos blong yumi wea bae fren blong hem i gat wan presidensi miting. Taem hem i stap wet long fren blong hem, hem i faenem wan buk kolosap. Taem miting i finis, Aliber i wantem tekem buk ia i go long haos. Oli givim raet long hem blong no tekem buk ia nomo be tu blong tekem wan kopi blong Buk blong Momon. Taem hem i kasem haos, hem i stat blong ridim Buk blong Momon. Hem i no save putum daon buk ia. Hem i rid long laet blong kandel kasem tri klok long moning. Hem i mekem olsem blong sam naet, hem i filim paoa blong wanem hem i ridim mo filim. Aliber i wan memba blong Jos naoia.
Anjelo Skapula i statem ol stadi blong hem long saed blong relijin long kantri blong hem long Itali taem hem i gat ten yia. Hem i kam wan pris mo givim gudfala seves long jos blong hem. I kasem wan taem we fet blong hem i stat blong seksek, mo hem i lukaotem mo kasem sam janis blong go stadi bakegen. Taem hem i stadi i go moa, hem i wari moa. Wanem we hem i stap ridim i winim tingting blong hem se i bin gat wan bigfala apostasi aot long ol tru doktrin we Jisas mo ol Aposol blong bifo oli bin tijim. Anjelo i lukaotem tru relijin blong God long ol defdefren jos blong plante yia, be i no faenem.
Wan dei hem i mitim tu memba blong Jos we i stap helpem ol misinari blong faenem ol man blong ol misinari oli tijim. Hem i filim olsem se tufala i pulum hem i go kolosap mo hem i glad blong lisin long mesej blong tufala. Anjelo i akseptem wan kopi blong Buk blong Momon.
Long naet ia hem i stat blong ridim buk ia. Hem i filim glad i fulumap hem. Tru long Spirit, God i givim long Anjelo wan gud tingting insaed long hem se bae hem i faenem tru tok ia we hem i bin stap lukaotem plante yia i pas insaed long Buk blong Momon. Ol naesfala filing i fulumap hem. Wanem we hem i ridim mo wanem we hem i lanem aot long ol misinari i konfemem tingting blong hem se i bin gat wan bigfala apostasi, be hem i lanem tu se tru Jos blong God i bin kambak long wol ia. I no long taem afta, Anjelo i bin kasem baptaes i kam long Jos. Fas taem we mi bin mitim hem, hem i presiden blong Rimini Itali Branj blong Jos blong yumi.
Wanem we Nikolas, Aliber, mo Anjelo oli bin go tru long hem wetem Buk blong Momon hem i semak long eksperiens blong Pali P. Prat.
“Mi bin openem [buk ia] wetem glad. …Mi rid ful dei, i hadwok tumas blong kaekae, mi no wantem kaekae; hadwok tu blong silip taem naet i kam, from mi wantem rid bitim we mi wantem silip.
“Taem mi rid, spirit blong Lod i kam long mi, mo mi save mo andastan se buk ia i tru, i simpol mo klia olsem we wan man i save se hem i laef. Glad blong mi naoia i fulwan, mo glad ia i tumas mo i pemaot ol harem nogud, ol sakrifaes mo ol hadtaem long laef blong mi.”
Samfala man oli gat ol paoaful eksperiens wetem Buk blong Momon long fas taem we oli openem, be long ol narafala man tru tok ia i kam sloslo taem oli stap rid mo oli stap pre from. Hemia wanem i bin hapen long mi. Fas taem mi ridim Buk blong Momon, mi wan yangfala long seminari. Hemia nao kopi blong Buk blong Momon we mi bin ridim. Mi no save talem long yufala stret taem o wea ples mi bin ridim, be sam ples long taem we mi stap rid, mi stat blong filim wan samting. Mi gat wan wom filing mo filim spirit evri taem mi openem buk ia. Filing ia i gro oltaem taem mi gohed blong rid. Filing ia i gohed kasem tedei. Evri taem mi openem Buk blong Momon, i olsem we mi stap onem wan swij─Spirit i kam insaed long hat mo sol blong mi.
Blong sam narafala, wan testemoni blong Buk blong Momon i kam sloslo, afta plante stadi mo prea. Mi gat wan fren we i ridim buk blong Momon blong faenemaot se buk ia i tru o no. Hem i mekem folem invitesen blong Moronae blong askem God wetem wan tru hat, tru tingting mo fet long Kraes, sapos Buk blong Momon hem i tru. Be hem i no bin kasem ansa we oli promesem hariap. Be wan dei, taem hem i tingting plante, hem i stap draev long rod, Spirit i testifae long hem long tru tok blong Buk blong Momon. Hem i glad tumas mo rolem daon windo blong trak mo singaot, i no long wan man be yet long ful wol, “!Hem i tru!”
I no mata sapos testemoni blong yumi long saed blong Buk blong Momon i kam long fas taem we yumi openem buk ia o afta sam taem i pas, bambae hem i givim daereksen long yumi evri dei sapos yumi gohed blong ridim mo folem ol tijing blong hem. Presiden Esra Taft Benson i bin tijim: “I gat paoa insaed long buk ia we bae i stat blong fulumap laef blong yu long taem we yu stat blong stadi gud long hem. Bae yu faenem bigfala paoa blong blokem temtesen. Bambae yu faenem paoa blong kam aot long ol trap. Bambae yu faenem paoa blong stap long stret mo smol rod ia”
Mi leftemap tingting blong evriwan we i kasem mesej ia, ingkludum olgeta we i holem Aronik prishud we oli stap long miting long naet ia, blong faenemaot paoa blong Buk blong Momon. Olsem Presiden Tomas S. Monson i bin leftemap ol tingting: “Ridim Buk blong Momon. Tingting hevi long ol tijing blong hem. Askem Papa long Heven sapos i tru.” Long taem ia bae yufala i filim Spirit blong God insaed long laef blong yufala. Spirit ia bae i kam pat blong testemoni blong yu se Buk blong Momon i tru, se Josef Smit i wan profet blong God, mo Jos blong Jisas Kraes blong ol Lata-dei Sent i tru Jos blong God long wol ia tedei. Testemoni ia bae i helpem yu blong blokem temtesen. Bae hem i priperem yu blong “bigfala singaot … blong wokhad oltaem long plantesen blong grep blong Lod.” Bae i holem taet yu blong stap strong long taem we bae oli sakem ol giaman toktok blong jalenjem fet blong yu mo bae i stap olsem wan strong fandesen taem oli jalenjem yu wetem ol kwestin we yu no save ansarem kwiktaem. Bae yu save luksave wij wan i tru tok mo wij wan i no tru, mo bae yu kasem stret tingting i kam long Tabu Spirit we bae i gohed blong konfemem testemoni blong yu taem yu gohed blong ridim Buk blong Momon truaot long laef blong yu.
Mi stap leftemap tingting blong ol papa mo mama we oli stap harem o ridim mesej ia blong mekem Buk blong Momon i kam wan impoten pat blong hom blong yu. Taem ol pikinini blong mi oli stap groap, mifala i stap ridim Buk blong Momon taem mifala i stap kakae brekfas. Hemia nao bukmak we mifala i bin yusum. Long fored i gat wan toktok blong Presiden Benson we i stap promes se bae God i kapsaetem blesing long yumi taem yumi stap ridim Buk blong Momon. Long baksaed hem i promes blong Presiden Marion G. Romni, hem i bin kaonsel insaed long Fas Presidensi: “Mi filim save se sapos, insaed long ol hom blong yumi, bae ol papa mo mama i rid long Buk blong Momon wetem prea mo i rid oltaem, tufala nomo mo wetem ol pikinini, bae spirit blong gudfala buk ia bae i kam insaed long ol hom blong yumi mo long evriwan we i stap insaed long hom ia. …Spirit blong agens bae i kamaot. Ol papa mo mama bae i givim kaonsel wetem bigfala lav mo waes. Ol pikinini bae oli ansa mo mekem folem ol kaonsel blong ol papa mo mama. Stret mo gud fasin bae i kam antap. Fet, hop mo bigfala lav—we i klin lav blong Kraes—bae i stap insaed long ol hom mo laef blong yumi, bae i karem pis, glad mo hapines i kam.”
Naoia, plante yia afta we ol pikinini blong mitufala oli aot long haos mo oli stap lukaotem ol famli blong olgetawan, mifala i save luk klia se promes blong Presiden Romni i bin happen. Famli blong mifala i no stret evriwan be mifala i save testifae long paoa blog Buk blong Momon mo ol blesing we i kam mo i gohed blong kam taem ful famli i ridim.
Bigfala paoa blong Buk blong Momon hem i paoa blong hem blong karem yumi kam kolosap long Jisas Kraes. Hem i wan strong witnes blong Hem mo misin blong Hem blong pemaot man. Tru long hem yumi kam blong andastanem majesti mo paoa blong Atonmen blong Hem. I tijim doktrin blong Hem i klia gud. Mo from ol naesfala japta we i tokbaot visit blong Kraes; we i laef bakegen; long ol pipol blong Nifae, yumi save luk mo eksperiensem Hem i lavem, blesem mo tijim ol man ia mo kam blong andastanem se bae hem i mekem semak samting blong yumi sapos yumi kam long Hem taem yumi stap laef folem gospel blong Hem.
Ol brata, mi testifae long paoa insaed long Buk blong Momon. I nomata se yumi ridim long Inglis, lanwis blong Itali, o Franis, long pepa o wan lektrik tul, mi faenem semak naesfala spirit ia i kam aot long ol japta mo ol vas ia i kam insaed long laef blong mi. Mi testifae long paoa blong hem blong karem yumi kam kolosap moa long Kraes. Mi prea se bae wanwan long yumi i yusum gud paoa ia we i stap insaed long naesfala buk blong skripja ia. Long nem blong Jisas Kraes, amen.