Doktrin Blong Kraes

I kam long Brian K. Ashton

Seken Kaonsela insaed long Sandei Skul Jeneral Presidensi

Doktrin blong Jisas i givim long yumi raet blong paoa long saed blong spirit we bae leftemap yumi long level blong yumi naoia long saed blong spirit i go long wan level we yumi save kam klin evriwan.

Visit blong Jisas i go long ol Man blong Nifae afta we Hem i laef bakegen long ded i bin oganaes gud long wan wei we i blong tijim yumi ol samting we oli impoten tumas. Hem i stat wetem testemoni blong Papa i go long pipol se Jisas Hem i “Pikinini blong [Hem] we [Hem i] Lavem Tumas, mo i glad tumas [long Hem] .” Afta, Jisas Hemwan i aot long heven i kamdaon mo i testifae abaot sakrifaes blong Hem we i pem praes, Hem i invaetem ol pipol blong oli “save gat save ia” se Hem i Kraes taem oli kam long fored blong Hem, blong mekem se oli save putum ol han blong olgeta long saed blong Hem, mo tu, blong mekem se oli save filim ol mak blong nil long han blong Hem mo long leg blong Hem. Ol testemoni ia oli konfemem we i no gat tu tingting long hem se, Atonmen blong Jisas i fulwan, mo se Papa i fulfilim kavenan blong Hem blong givim wan Sevya i kam. Afta, Jisas i tijim ol Man blong Nifae hao blong kasem evri blesing blong Plan blong glad, we i stap finis blong yumi tru long Atonmen blong Sevya, blong tijim olgeta doktrin blong Kraes.

Mesej blong mi tedei i lukluk moa long doktrin blong Kraes. Ol Skripja oli givim mining abaot doktrin blong Kraes olsem blong stap praktisim fet long Kraes mo Atonmen blong Hem, stap sakem sin, kasem baptaes, stap kasem presen we i Tabu Spirit, mo blong stap strong kasem en.

Doktrin blong Kraes i Letem Yumi Kasem Ol Blesing tru long Atonmen blong Kraes

Atonmen blong Kraes i krietem ol kondisen we yumi save dipen long hem “ol gudfala wok, mo sore, mo gladhat blong Tabu Mesaea,” “stap stret gud long Kraes,” obtain every good thing, and gain eternal life. tekem evri samting we i gud, mo kasem laef we i no save finis.

Doktrin blong Kraes nomata wanem, hem i rod ia nao – wan rod ia nomo—we yumi kasem olgeta blesing we i stap finis blong yumi tru long Atonmen blong Kraes. Hem i doktrin blong Kraes we i letem yumi blong save gat paoa long saed blong spirit we bae i leftemap yumi long level blong yumi long saed blong spirit naoia, i go long level we bae yumi kam klin evriwan olsem Sevya. Abaot fasin ia blong bon bakegen, Elda D. Tod Kristofeson, i bin tijim se: “bon bakegen, i no semmak olsem we yumi bon long wan mama, be hem i wan fasin, i no wan taem we i hapen. Mo blong mekem folem fasin ia, hem i stamba tingting blong laef ia long wol ia.”

Naoia bae yumi tokbaot moa long wanwan long ol pat blong doktrin blong Kraes.

Nambawan, fet long Jisas Kraes mo Atonmen blong Hem. Ol profet oli bin tijim se fet i stat taem yumi harem toktok blong Kraes. Ol toktok blong Kraes oli testifae abaot sakrifaes blong Hem we i pem praes mo i talem long yumi hao blong save kasem fogivnes, ol blesing, mo fasin blong kam olsem wan god.

Afta we yumi harem ol toktok blong Kraes, yumi praktisim fet blong yumi taem yumi jusum blong folem ol tijing mo eksampol blong Sevya. . Blong mekem hemia, Nifae i tijim yumi blong mas “hang fulwan long ol gud wok blong [Kraes], we i strong blong sevem man.” From Jisas Hem i bin wan God long laef bifo laef long wol ia, from hem i bin laef long wol we Hem i no mekem sin, mo long taem blong Atonmen blong Hem, hem i mitim ol kondisen blong jastis blong yu mo mi, nao Hem i gat paoa ia mo ol ki blong mekem i posibol blong evri man i kasem laef bakegen long ded, mo Hem i mekem i posibol blong sore i gat paoa ova long jastis, wetem kondisen blong man i mas sakem sin. Taem yumi andastanem se yumi save kasem sore tru long ol gudfala wok blong Kraes, nao yumi save “gat fet we i mekem yumi sakem sin.” Blong yumi hang fulwan long ol gud wok blong Kraes, nao i minim se yumi trastem se Hem i mas mekem samting ia blong sevem yumi, mo blong yumi mas tekem aksen folem bilif blong yumi.

Fet tu i helpem yumi blong stop blong wari tumas long ol lukluk blong ol nara man long yumi, mo stat blong kea moa long wanem God i wantem blong yumi.

Nambatu, fasin blong sakem sin. Samuel, man blong Leman, i tijim, “sapos yufala i biliv long nem blong hem bae yufala i sakem evri sin blong yufala.” Fasin blong sakem sin i wan gudfala presen we i kam long Papa long Heven tru long sakrifaes blong Wan Pikinini ia Nomo blong Hem we Hem i lavem. Hem i rod ia nao we Papa i bin givim long yumi, blong yumi save jenisim olgeta tingting, ol aksen mo yumiwan, blong mekem se yumi kam moa olsem Sevya. Hemia i no blong ol bigfala sin nomo, be hem wan samting we yumi mekem evri dei blong luklukbak long ol samting we yumi bin mekem long laef blong yumiwan mo jenisim blong i helpem yumi winim ol sin blong yumi, rong blong yumi, eria we yumi no strong long hem, mo eria we yumi no kam antap gud long hem. Fasin blong sakem sin i mekem se yumi kam ol “tru man blong folem Kraes,” we i fulumap yumi wetem lav mo i karemaot fasin blong fraet. Fasin blong sakem sin hem i no wan bakap plan, long tingting se lukaot plan blong yumi blong kam klin evriwan i no wok. Fasin blong sakem sin evri taem hem i wan rod ia nomo we i save tekem i kam glad ia we i no gat en mo helpem yumi blong gobak stap wetem Papa blong yumi long Heven.

Tru long fasin blong sakem sin, yumi kasem fasin ia blong folem mo obei long ol tingting blong God. Be yumi no save mekem hemia nomo. Blong luksave gudfala fasin blong God mo se yumi nating nomo, tugeta wetem hadwok blong yumi blong stretem yumi long tingting blong God, tekem gladhat i kam long laef blong yumi. . Gladhat “hem i help o paoa we i kam long heven, tru long lav mo sore blong Jisas Kraes … blong mekem ol gud wok, we sapos i no Hem, bae yumi no save mekem wetem paoa blong yumiwan.” From fasin blong sakem sin hem i mekem yumi kam olsem Sevya, we yumi no save mekem yumiwan nomo olsem, yumi rili nidim gladhat ia blong Sevya, blong mekem ol jenis we yumi mas mekem long laef blong yumi

Taem yumi sakem sin, yumi tekemaot ol fasin blong yumi we i no stret mo gud, ol wiknes, ol rong wei, mo ol fraet blong yumi, mo jenisim wetem ol niu fasin mo bilif we bae oli tekem yumi go kolosap long Sevya mo helpem yumi blong kam olsem Hem.

Nambatri, hem i baptaes mo sakramen Profet Momon i tijim se ol fasfala frut blong fasin blong sakem sin i baptaes.”Blong yumi komplitim, fasin blong sakem sin i mas go tugeta wetem odinens blong baptaes. Olsem ol memba blong Jos, ol kavenan we yumi stap mekem long taem blong baptaes mo long ol nara samting olsem, yumi stap riniu taem yumi stap kakae sakramen.

Insaed long odinens blong baptaes mo sakramen, yumi kavenan blong kipim olgeta komanmen blong Papa mo Pikinini, blong oltaem tingbaot Kraes, mo wantem blong tekem nem blong Kraes (o wok blong Hem mo fasin blong Hem) long yumiwan Sevya, long saed blong Hem, i kavenan blong fogiv, o tekemaot ol sin blong yumi mo kapsaetem Spirit blong hem moa fulap long yumi.” Kraes i promes blong mekem yumi rere from laef we i no save finis taem Hem i stap helpem yumi blong yumi kam moa olsem Hem.

Dakles D. Holms, Fas Kaonsela long Yang Man Jeneral Presidensi, i bin raetem: “ Odinens blong baptaes mo sakramen tugeta i risal mo proses blong stap bon bakegen. Long baptism, yumi berem olfala man long saed blong bodi ia mo kamaot long wan niu laef. Long sakramen, yumi lanem se jenis ia hem folem ol step, smol smol, wik afta wik, yumi jenis taem yumi sakem sin, mekem promes, mo tru long endaomen long saed blong Spirit yumi [kam olsem Sevya].”

Ol odinens mo ol kavenan oli wan mas insaed long doktrin blong Kraes. Taem yumi stap klin inaf blong stap kasem ol odinens blong prishud mo stap kipim ol kavenan we oli kam wetem, nao, paoa olsem hemia blong god i wok insaed long laef blong yumi. Elda D. Tod Kristofeson i eksplenem se “paoa ia olsem hemia blong god i kam long wan man mo tru long paoa blong Tabu Spirit.”

Nambafo, hem i presen we i Tabu Spirit. Afta long baptaes yumi kasem presen ia we i Tabu Spirit tru long odinens blong konfemesen. Presen ia, sapos yumi kasem, hem bae givim yumi raet ia blong gat wan God olsem fren blong yumi oltaem mo bae yumi gohed blong kasem lav ia we i stap raonem Hem oltaem.

Olsem wan fren we i stap wetem yumi oltaem, Tabu Spirit i givim long yumi moa paoa o fulpaoa blong kipim olgeta kavenan blong yumi. Hem i mekem yumi kam tabu, we i minim se, hem i mekem yumi “fri long sin, kam klin evriwan, klin, mo tabu, tru long atonmen blong Jisas Kraes.” Fasin ia blong kam tabu i no blong klinim yumi nomo, be tu hem i kavremap yumi wetem ol tabu presen blong spirit, o ol tabu fasin blong Sevya mo i jenisim ol fasin blong yumi, mekem se yumi nomo wantem blong mekem nogud fasin.” Evri taem yumi stap akseptem Tabu Spirit i kam insaed long laef blong yumi tru long fet, long fasin blong sakem sin, long ol seves we i semmak long hemia blong Kraes, mo long ol nara stret mo gud wok, yumi stap jenis kasem taem we, wan step afta nara step, smolsmol i go, yumi kam olsem Kraes.

Nambafaef, hem i stap strong kasem en. Profet Nifae i tijim se afta we yumi kasem presen we i Tabu Spirit, yumi mas “stap strong kasem en, folem eksampol blong Pikinini blong God we i stap laef.” Elda Del G. Renlan i tokbaot fasin blong stap strong kasem en olsem: “Yumi save kam klin evriwan taem yumi gogohed blong praktisim fet blong yumi long Kraes, sakem sin, kakae sakramen blong riniu olgeta kavenan mo olgeta blesing blong baptaes, mo kasem Tabu Spirit olsem wan fren we i stap oltaem wetem yu. Taem yumi mekem olsem, yumi kam moa olsem Kraes mo save stap strong kasem en, tugeta wetem evri samting ia.”

Long narafala toktok, taem yumi kasem Tabu Spirit mo ol jenis we Spirit i stap mekem long yumi, hem i bildimap fet blong yumi moa. Taem fet blong yumi i gro, hem i lidim yumi blong sakem sin moa. Taem we, olsem wan saen, yumi sakrifaesem hat blong yumi mo ol sin blong yumi antap long olta blong sakramen, Tabu Spirit i kam long yumi long wan level we i moa hae. Taem yumi kasem Tabu Spirit long wan level we i moa hae, hem i pusum yumi long rod blong bon bakegen. Taem yumi gogohed long rod ia mo kasem evri odinens blong sevem yumi mo ol kavenan blong gospel, yumi kasem “gladhat afta wan nara gladhat” kasem taem we yumi kasem fulwan.

Yumi Mas Wokbaot Folem Doktrin Blong Kraes long Laef blong Yumi

Ol brata mo sista, taem yumi stap wokbaot folem doktrin blong Kraes long laef blong yumi, blesing long saed blong spirit mo long saed blong bodi bae i kam long yumi, iven long ol hadtaem blong yumi. Sloslo bae yumi holemtaet evri gudfala samting.” Mi testifae se fasin ia i bin hapen mo stap gohed blong hapen long laef blong miwan, klaem lada i go, smolsmol i go.

Be moa impoten nao, yumi mas folem doktrin blong Kraes long laef blong yumi, from hemia nomo i save tekem yumi gobak long Papa blong yumi long Heven. Hem i wei ia nomo we yumi save akseptem Sevya mo kam olsem ol pikinini blong Hem. Tru tok i we, wan wei ia nomo blong Hem i pemaot yumi long sin mo blong yumi muv i go fored long saed blong spirit, hem i blong praktisim doktrin blong Kraes long laef blong yumi. Be Aposol Jon i tijim se “Man we i no stap folem ol tijing blong Kraes, God i no stap long laef blong hem.” Mo Jisas Hemwan i talem long Olgeta Twelef Man blong Nifae, se sapos yumi no praktisim fet blong yumi long Kraes, sakem sin, baptaes, mo stap strong kasem en, bae oli katemdaon yumi tu mo sakem i go long faea, long ples we yumi nomo save aot bakegen.”

So, ?olsem wanem nao yumi save praktisim doktrin blong Kraes moa fulwan long laef blong yumi? Wan wei hem i blong yumi mekem hadwok long tingting, blong mekem yumiwan i rere evri wik from sakramen, blong tekem sam taem blong prea from ol eria we yumi nid blong kam antap long hem. Yumi save tekem i kam long olta blong sakramen wan samting we i stap stopem yumi blong kam olsem Jisas Kraes. Yumi askem wetem fet from help, yumi askem ol presen blong spirit we yumi nidim, mo mekem kavenan blong kam antap long wik we i stap kam Taem yumi mekem olsem, Tabu Spirit bae i kam insaed long laef blong yumi long wan level we i moa hae, mo bae moa paoa i kam long yumi blong winim ol eria we i mekem yumi no klin inaf.

Mi testifae se Jisas Kraes i Sevya blong wol, mo Hem i wan nem ia nomo we i save sevem yumi. Evri samting we i gud oli kam tru nomo long Hem. Be blong rili “holemtaet evri gudfala samting,” hemia wetem laef we i no save finis, yumi mas gogohed blong praktisim doktrin blong Kraes long laef blong yumi. Long tabu nem blong Jisas Krae, amen.

Ol not

1. 3 Nifae 11:7.

2. Luk long 3 Nifae 11:10–11.

3. Luk long 3 Nifae 11:14–15.

4. Luk long 3 Nifae 11:21–39.

5. Luk 2 Nifae 31; 3 Nifae 27:16–20. Doktrin blong Kraes oli stap long evri ples long ol skripja be i no plante tumas olsem we i stap long Buk blong Momon.

6. 2 Nifae 2:8.

7. Moronae 10:32.

8. Luk Moronae 7:22–24.

9. Luk long Doctrine and Covenants 132:23.

10. Atonmen blong Kraes mo doktrin blong Kraes tugeta i mekem gospel blong Kraes. (luk 3 Nifae 27:13–21).

11. D. Todd Christofferson, “Born Again,” Liahona, May 2008, 78.

12. Luk long Romans 10:17; 2 Nifae 31:19; Alma 32:27–29; Moronae 7:25.

13. Luk long2 Nifae 32:3.

14. Luk long 2 Nifae 31:10, 13.

15. 2 Nifae 31:19.

16. Luk long Jon 1:1–3; Moses 7:47; Abraham 3:24–27.

17. Luk long Hibru 4:15; luk tu long Doctrine and Covenants 45:4.

18. Luk longAlma 34:16.

19. Luk long 2 Nifae 9:21–22; Dallin H. Oaks, “The Keys and Authority of the Priesthood,” Liahona, May 2014, 49–52.

20. Luk long Alma 34:15–16.

21. Alma 34:15.

22. Dipen nomo long ol fasin blong Kraes hemia wetem blong luksave se Jisas Kraes hem wan stamba ia nomo blong fasin blong pemaot (luk Mosaea 4:7–8). Hem i impoten se yumi biliv se Kraes i save long wanwan long yumi. Hemia i wan risen from wanem Doctrine and Covenants 27:2 i komandem yumi blong tekem pat long sakramen, yumi no tingbaot safaring blong Kraes nomo be tu se Hem i mekem samting ia from yumi wanwan.

23. Hileman 14:13.

24. Luk Russell M. Nelson, “Repentance and Conversion,” Liahona, May 2007, 102–5.

25. Luk long Neil L. Andersen, “Repent … That I May Heal You,” Liahona, Nov. 2009, 40–43.

26. Luk long Jeffrey R. Holland, “Broken Things to Mend,” Liahona, May 2006, 69–71; Anthony D. Perkins, “The Great and Wonderful Love,” Liahona, Nov. 2006, 76–78.

27. Moronae 7:48.

28. Luk Moronae 8:16. Tru tok se fasin blong sakem sin hem i wan impoten pruf se yumi ol disaepol blong Sevya. ?Yu save wetem tru hat blong yumi talem se yu stap folem Kraes be afta yumi no stap gohed blong sakem sin o wok had blong tanem ol hat mo ol aksen blong yumi long Hem?

29. Luk long Adjusting to Missionary Life (booklet, 2013), 46.

30. Luk long Mosaea 4:5–7.

31. Luk long2 Nifae 10:24; 25:23.

32. Luk long Hileman 5:11; Ether 12:27; Moronae 10:32–33.

33. Baebol Diksonari, “Gladhat.”

34. Moronae 8:25.

35. Taem yumi klin inaf mo tekem sakramen, yumi riniu evri kavenan wetem God (luk long Delbert L. Stapley, long Conference Report, Oct. 1965, 14; L. Tom Perry, “As Now We Take the Sacrament,” Liahona, May 2006, 41).

36. Luk Dallin H. Oaks, “Testimony” (hem i bin givim toktok long semina blong ol misin presiden, 25 Jun, 2014), 1–2.

37. Luk long Moronae 4:3; see also Mosaea 18:8–10; Doctrine and Covenants 20:37 blong sam moa kavenan we yumi mekem long taem blong baptaes.

38. Luk long Moronae 8:25.

39. Mosaea 18:10.

40. Luk long Seken Korin 3:18; Ita 12:27; Doctrine and Covenants 35:2; Moses 1:39.

41. Luk longRomans 6:4.

42. Douglas D. Holmes, “Come unto Christ—the Doctrine of Christ,” ol pepa we oli no printim yet.

43. Luk long Doctrine and Covenants 84:19–21.

44. D. Todd Christofferson, “The Power of Covenants,” Liahona, May 2009, 22.

45. Konfemesen i hapen taem oli putum ol han antap long hed (luk eksampol long , Ol Wok 8:17).

46. Luk long Doctrine and Covenants 20:28; Guide to the Scriptures, “Holy Ghost,” scriptures.lds.org.

47. Luk long Seken Korin 3:18; 1 Nifae 14:14; Doctrine and Covenants 93:20.

48. Luk long 3 Nifae 27:20.

49. Guide to the Scriptures, “Sanctification,” scriptures.lds.org.

50. Luk long Moronae 7:48; 8:26; 10:8–18.

51. Luk longMosaea 4:14; Doctrine and Covenants 84:33; Bruce R. McConkie, “The Ten Blessings of the Priesthood,” Ensign, Nov. 1977, 33–35.

52. Mosaea 5:2.

53. Tabu Spirit i lidim yumi i gobak long papa long Heven (luk 2 Nifae 32:5; Doctrine and Covenants 45:57) blong helpem yumi save wanem yumi mas mekem blong kam olsem Kraes (luk Seken Korin 3:18; Ita 12:27; Doctrine and Covenants 84:46–48).

54. 2 Nifae 31:16. Stap strong kasem en hem i nidim tugeta taem mo fasin blong stap strong kasem en (luk long Jemes 1:2–4). Trutok se yumi no save gro long ol fasin we i blong Kraes sapos yumi no fesem ol enemi mo ol hadtaem. Eksampol, ?olsem wanem nao yumi save go tru long ol hadtaem wetem longfala tingting sapos yumi neva bin safa blong wan longfala taem?

55. Dale G. Renlund, “Latter-day Saints Keep on Trying,” Liahona, May 2015, 56.

56. Luk longDoctrine and Covenants 93:12, 19.

57. Moronae 7:25; luk tu long Mosaea 2:41.

58. Luk long Doctrine and Covenants 39:4–6.

59. Luk long 2 Nifae 9:24.

60. 2 Jon 1:9.

61. 3 Nifae 27:17.

62. Ating wan i save tekem i kam sem sakrifaes ia blong wan taem long ol wik kasem, wetem help blong Sevya, mo olsem Elda Neal A. Maxwell i bin tijim, “it [is] consumed” (“Deny Yourselves of All Ungodliness,” Ensign, May 1995, 68).

63. Luk long 2 Nifae 25:20.

64. Luk long Moronae 7:24.

65. Moronae 7:25.