Bigfala Plan blong Pemaot Man
Mi save se taem yumi sakem sin wetem tru tingting, ol sin blong yumi oli go lus tru—!we i no gat mak i stap!
Sam manis bifo we Presiden Boyd K. Packer i pasawe, ol jeneral prishud mo okseleri lida oli bin gat spesel janis blong harem toktok blong hem. Mi no bin save stop blong tingting long wanem hem i bin talem. Hem i bin serem se hem i lukluk i gobak long laef blong hem, i traem faenem pruf blong ol sin we hem i bin mekem mo sakem sin wetem tru tingting from, mo i no save faenem mak blong hem i stap. From sakrifaes blong pemaot man we i kam long Sevya we yumi lavem Hem, Jisas Kraes, mo tru long tru fasin blong sakem sin, ol sin blong hem oli lus evriwan, olsem se oli neva bin hapen. Nao long dei ia, Presiden Packer i givim wok long mifala olsem ol lida, blong mifala i testifae se i tru we wanwan long yumi i mas sakem sin wetem tru tingting.
Mi mi save long wan man we i stap brekem loa blong jastiti plante yia i pas. Blong sam taem, man ia i filim se hem i sem mo wari tumas blong tokbaot long waef blong hem mo ol prishud lida. Hem i wantem blong sakem sin fulwan, be i talem tu se bae hem i jusum blong no kasem laef we i no save finis, be bae hem i no wantem se waef mo ol pikinini blong hem oli harem nogud, oli sem, o ol nara risal we i save hapen sapos hem i konfes.
Taem yumi sin, Setan i traem plante taem blong winim tingting blong yumi se samting we i no selfis blong mekem, i blong protektem ol narawan long ol trabol taem we i kamaot taem wan i save ol sin blong narawan, mo wan moa i blong no stap konfes long bisop blong yumi, we i save blesem laef blong yumi tru long ol prishud kit blong hem olsem wan jaj ia nomo blong evriwan long Isrel. Trutok, i we, samting we i no selfis mo i olsem Kraes, blong mekem, i blong konfes mo sakem sin. Hemia i bigfala plan blong pemaot man we i kam long Papa long Heven.
Nao, gudfala man ia i konfes long fetful waef blong hem, mo ol lida blong Jos, mo i talem rigret mo harem nogud blong hem. Nomata se hem i samting we i had moa we hem i bin mekem, ol filing blong gud tingting, pis, tangkyu, lav long Sevya, mo wan save se Lod i stap karemaot hevi trabol blong hem, mo stap karem hem, i mekem se hem i glad tumas nomata wanem bae i kamaot long en mo long fiuja blong hem.
Hem i bin sua se bae waef blong hem mo ol pikinini bae oli harem nogud tumas—mo i tru; i sua se bae i gat disiplin aksen mo rilis long koling blong hem—mo i tru. Hem i sua se bae hat blong waef blong hem i brokbrok, i soa mo i kros—mo i hapen. Mo hem i bin sua se bae waef blong hem i livim hem, i tekem ol pikinini wetem hem—be i no hapen.
Samtaem, ol bigfala sin olsem i mekem man i divos, mo dipen long situesen, hemia i wan nid. Be long sapraes blong man ia, waef blong hem i akseptem hem, i givim taem blong hem blong helpem man blong hem long eni wei we hem i save mekem. Wetem taem, hem i bin save fogivim hem. Hem i bin filim hiling paoa blong Atonmen blong Sevya. Sam yia afta, kapol ia wetem trifala pikinini, oli stap strong mo stap fetful. Hasban mo waef oli stap givim seves long tempol, mo gat wan naes mared we i gat lav. Testemoni blong man ia i dip mo lav mo tangkyu blong hem long Sevya oli kamaot gud long laef blong hem.
Amulek i testifae: “Mi wantem se yufala i kam fored mo yufala i nomo mekem hat blong yufala i kam strong; … sapos yufala i sakem sin … , naoia nomo bae bigfala plan blong fasin blong pemaot man i wok long yufala.”
Taem mi givim seves wetem hasban blong mi taem hem i stap prisaed ova long wan misin, mitufala i go long eapot blong pikimap wan bigfala grup blong ol misinari long wan moning. Wan yang man i kasem ae blong mitufala. Hem i no luk hapi, i filim daon, tingting blong hem i trabol. Mitufala i luklukgud long hem long aftenun ia. Long naet, yang man ia i konfes, mo ol lida blong hem oli disaed se bae hem i gobak hom. Nomata mifala i harem nogud tumas se hem i no bin ones mo i no bin sakem sin bifo hem i kam long misin blong hem, long rod blong hem i go long eapot, mitufala i presem hem wetem tru tingting blong gat strong paoa long tingting blong kam mo toktok, mo mitufala i promes blong stap kolosap long hem.
Yangfala man ia i gat blesing blong gat gudfala papa mo mama, ol gudfala prishud lida mo wan wod we i gat lav mo sapot. Afta wan yia we hem i wokhad mo i sakem sin fulwan, mo yusum Atonmen blong Sevya, hem i bin save kambak long misin blong mifala. Hem i had blong mi save tokbaot ol filing blong glad we mitufala i bin filim taem mitufala i pikimap yang man ia long eapot. Hem i fulap long Spirit, i hapi, i gat tras long fored blong Lod, i wantem blong wok mo stap fetful long misin. Hem i kam wan gudfala misinari, mo afta, hasban mo mi i bin gat janis ia blong go long tempol siling blong hem.
Long nara saed, mi save wan narafala misinari, we hem i save se sapos hem i konfesem sin we hem i mekem bifo i kam long misin bae i mekem se bae oli sendem hem i gobak hom eli, i mekem plan blong hem blong wok had moa long taem blong misin blong hem, mo konfes long misin presiden jes sam dei bifo hem i finisim misin blong hem. Hem i no gat sore long God mo i traem ronwe long plan we Sevya i putum blong wanwan long yumi.
Long taem blong misin blong mitufala, mi bin go wetem hasban blong mi taem hem i go intaviu long wan man blong i kasem baptaes. Taem hasban blong mi i mekem intaviu, mi bin wet aotsaed wetem ol sista misinari we oli bin tijim man ia. Taem intaviu i finis, hasban blong mi i talem long ol misinari se man ia bae i baptaes. Man ia i krae mo i krae taem hem i stap eksplenem se hem i sua se bigfala sin we hem i bin mekem long laef blong hem bae i stopem hem blong kasem baptaes. Mi bin witnesem glad mo hapines blong wan we i kamaot long tudak mo i kam long laet semmak olsem mi bin witnesem long dei ia.
Elda Todd Christofferson i testifae:
“Wetem fet long Ridima blong yumi we i gat sore mo long paoa blong Hem, ol tingting blong lus oli tanem i kam hop. Hat mo wanem hem i wantem i jenis; sin ia we i stap switim yu, naoia i kam konkon evriwan.
“… Nomata praes blong sakem sin, hem i draon insaed long glad blong kasem fogivnes.”
Ol eksperiens ia oli rimaenem mi abaot Inos long Buk blong Momon, we “i bin prea long [Lod] wetem wan strongfala prea,” mo afta, i harem wan voes i talem: “Inos, mi mi fogivim ol sin blong yu, mo bae mi blesem yu. …
“Mo mi, Inos, mi bin save we God i no save giaman; from samting ia, hem i bin tekemaot ol rong blong mi.
“Mo mi bin talem se: Lod, ?yu mekem samting ia olsem wanem?
“Mo hem i bin talem long mi se: ‘From fet blong yu long Kraes, … go stat, fet blong yu i bin mekem yu klin.”
Taem mi stap rere long toktok ia, mi bin wantem blong save olsem wanem ol apupikinini blong mitufala i andastanem fasin blong sakem sin, mo olsem wanem oli filim abaot Sevya, mekem se mi askem ol pikinini blong mitufala blong askem olgeta ol kwestin ia. Ansa blong olgeta i tajem hat blong mi.
?Wanem hem i fasin blong sakem sin? “Taem yu kilim wan man, yu talem ‘sore’ mo yu helpem hem blong girap.”
?Yu harem olsem wanem taem yu sakem sin? “Mi save filim save Hem; mi save filim lav blong Hem mo harem nogud ia i go lus.”
?Olsem wanem nao yu filim abaot Jisas mo Papa long Heven taem yu stap sakem sin? “Mi filim se Jisas i filim se i bin gud inaf blong Hem i mekem Atonmen, mo Hem i hapi se bae yumi save laef wetem Hem bakegen.”
?From wanem Jisas mo Papa long Heven, Tufala i wantem mi blong sakem sin? Long ol toktok blong yang apupikinini blong mi: “!From se Tufala i lavem mi! Blong save progres mo kam olsem Tufala, mi nid blong sakem sin. Mi wantem tu se Spirit i stap wetem mi, mekem se mi nid blong sakem sin evri dei blong gat Hem olsem kompanion blong mi. Bae mi neva save talem tangkyu inaf from Olgeta.”
Taem Brynlee we i gat kolosap 4 yia i harem ol kwestin ia, hem i talem se: “Mi no save Papa. Yu tijim mi.”
Long las jeneral konfrens, Elda Jeffrey R. Holland i talem: “Nomata yu ting se i let tumas, se yu bin gat hamas janis finis we yu mestem, nomata hamas mistek yu filim se yu bin mekem, … o se yu bin aot long hom mo famli, mo God, mi testifae long yu se yu no bin go longwe yet we tabu lav ia i no save kasem yu. Hem i no posibol blong yu draon i go daon olgeta we bigfala laet blong Atonmen blong Kraes i no save kasem yu.”
O, mi wantem tumas se wanwan long ol pikinini, ol apupikinini blong mi, mo wanwan long yufala—ol brata mo sista blong mi, i filim glad mo filim se yufala i stap kolosap long Papa mo long Sevya blong yumi taem yumi sakem sin mo wiknes blong yumi evri dei. Wanwan pikinini we i ansa long Papa long Heven i mas sakem sin. ?Tingting se wanem kaen sin yumi nidim blong sakem? ?Wanem i stap holemtaet yumi? ?Long wanem wei yumi nid blong kam antap moa?
Mi save, olsem we Presiden Packer i gotru long hem mo testifae from, se taem yumi sakem sin blong yumi wetem tru tingting, ol sin blong yumi oli go lus tru—!i nomo gat wan mak! Miwan, mi bin filim lav, glad, givhan, mo tras long fored blong Lod taem mi bin sakem sin wetem tru tingting.
Long mi, ol merikel we oli bigwan moa long laef oli no taem we Red Si i seraot, o blong muvum ol bigfala hil, o iven hiling blong bodi. Merikel we i bigwan moa i hapen taem yumi putum tingting i stap daon mo kam kolosap long Papa we i stap long Heven long prea, mo yumi askem strong blong Hem i fogivim sin blong yumi, mo afta, yumi kam klin long olgeta sin ia tru long sakrifaes blong Sevya we i pem praes. Long tabu nem blong Jisas Kraes, amen.