Lanem Samting Aot long Alma mo Amulek
Hem i hop blong mi se olgeta we oli kamaot long rod blong stap olsem disaepol, bae hat blong olgeta i lukluk mo lanem samting aot long Alma mo Amulek.
Yangfala Alma
Long medel blong olgeta man insaed long skripja we yumi no save fogetem i gat, Yangfala Alma. Nomata hem i bin boe blong bigfala profet, hem i bin lusum rod blong hem smol taem mo hem i kam “wan nogud man mo man blong wosipim ol aedol.” From ol risen we yumi no save, hem i strong blong agensem papa blong hem mo i wantem prapa spolem nogud Jos. Mo from fasin blong toktok blong hem i swit, mo from fasin blong hem blong save winim tingting blong man, nao hem i win long plante wei.
Be laef blong Alma i jenis taem wan enjel blong Lod i kamaot long hem mo toktok wetem voes blong tanda. Blong tri dei mo tri naet, Alma “i filim i soa wetem trabol we i no save finis … wetem ol soa blong wan sol we i kasem panis.” Mo afta, wan memori we i bin lus i tekem laet i go long tudak blong maen blong hem—wan trutok we i no save finis, we papa blong hem i bin tijim: se Jisas Kraes bae i kam “blong pemaot ol sin blong wol.” Alma i bin sakemaot ol kaen tingting ia longtaem finis, be naoia, “we tingting blong [hem] i fas long tingting ia,” nao, wetem tingting i stap daon mo wetem wan tru hat, hem i putum tras blong hem long paoa blong Kraes we i pem praes from man.
Taem Alma i kamaot long eksperiens ia, hem i wan man we i jenis. Stat long tetaem ia i go, hem i givim laef blong hem blong stretem ol trabol we hem i bin mekem. Hem i wan strong eksampol blong fasin blong sakem sin, fogivnes mo stap strong blong stap fetful.
Lod i bin jusum Alma blong i tekem ples blong papa blong hem olsem hed blong Jos blong God.
Evri sitisen blong nesen blong Ol Man Nifae oli save stori blong Alma. Olgeta Twita, Instagram, mo Fesbuk blong taem blong hem oli mas putum ol pikja mo stori abaot hem. Maet oli putum hem i kamaot long fas pej blong“Sarahemla Wik Nius” mo fulap oli raet abaot hem, hem i stap long ol netwok. Long sot toktok, maet hem nao i top sta blong taem blong hem.
Be taem we Alma i bin luk se ol pipol blong hem oli stap fogetem God mo stap leftemap olgeta long hae tingting mo raorao, hem i jusum blong stop blong wok long pablik ofis mo “i givim taem blong hem fulwan long prishud blong tabu oda blong God,” i stap prijim fasin blong sakem sin long medel blong Ol Man blong Nifae.
Long fas ples, Alma i gat bigfala sakses—kasem taem we hem i travel i go long siti blong Amonaea. Ol pipol blong taon ia oli save gud se Alma i nomo politik lida blong olgeta, mo oli no gat respek long prishud atoriti blong hem. Oli agensem hem, oli daonem hem, mo oli sakemaot hem aotsaed long taon blong olgeta.
Hat blong hem i brok; nao Alma i tanem baksaed blong hem long taon blong Amonaea.
Be wan enjel i talem long hem blong gobak.
Traem tingting long hemia: oli talem long hem blong gobak long ol pipol we oli no laekem hem mo no laekem Jos nating. Hem i wan wok we i gat denja mo i had. Be Alma i no tingting tu taem. “Hem i gobak hariap.”
Alma i bin livim kakae blong plante dei, mo hem i go insaed long taon ia. Longwe, hem i askem wan man we hem i no save nating, “blong givim kaekae long wan wokman blong God.”
Amulek
Nem blong man ia i Amulek.
Amulek i wan rijman, mo wan sitisen we oli save gud hem long Amonaea. Nomata hem i kamaot long wan longfala laen blong ol man we oli stap biliv, fet blong hem i go kolkol evriwan. Sam taem afta, hem i bin konfes se “God i singaotem mi plante taem mo mi no bin lisin; from hemia, mi save long saed blong ol samting ia, stil mi no wantem blong [biliv]; from hemia, mi bin gohed blong go agensem God.”
Be God i bin stap mekem Amulek i rere, mo taem Amulek i mitim Alma, hem i tekem wokman blong Lod insaed long haos blong hem, mo Alma i bin stap wetem hem blong plante dei. Long tetaem ia, Amulek i openem hat blong hem long mesej blong Alma, mo wan bigfala jenis i kam long hem. Stat long tetaem ia, Amulek i stap biliv, be tu, hem i kam wan jampion blong trutok.
Taem Alma i go bakegen blong tijim ol pipol blong Amonaea, hem i gat wan seken witnes long saed blong hem—Amulek, we i wan manples blong olgeta nomo.
Olgeta samting we oli hapen afta, oli wan swit mo konkon stori blong evri skripja. Yu save ridim long Alma, ol japta 8 kasem 16.
Tedei, bae mi wantem askem yufala blong tingting long tufala kwestin:
Faswan: “?Wanem nao mi save lanem aot long Alma?”
Sekenwan: “?Long wanem wei nao mi, mi semmak long Amulek?”
?Wanem Nao Mi Save Lanem Aot long Alma?
Bae mi askem faswan evri lida blong Jos blong Jisas Kraes blong bifo, blong naoia, mo blong tumoro: “?Wanem nao yu save lanem aot long Alma?”
Alma i wan man we i gat plante talen mo i save mekem samting. Bae i isi blong tingting se hem i no nidim help blong wan man. Be ?wanem nao Alma i bin mekem taem hem i bin gobak long Amonaea?
Alma i faenem Amulek mo i askem help blong hem.
Mo Alma i kasem help.
From sam risen, yumi, olsem ol lida, samtaem yumi no wantem faenem mo askem samting long ol Amulek blong yumi. Yumi ting se yumiwan nomo i save mekem wok i moa gud, o yumi fraet blong spolem plan blong ol narawan, o yumi ting se ol narawan bae oli no wantem tekpat. Plante taem tumas, yumi no stap invaetem ol pipol blong yusum ol talen we God i givim long olgeta, mo blong oli kam joen long bigfala wok blong fasin blong sevem man.
Tingting long Sevya—?Hem i bin stanemap Jos blong Hem, Hemwan?
No
Mesej blong Hem i no: “Yu stanap ia. Bae mi lukluk long hemia.” Be hem i talem se: “Kam. Yu biaen long mi.” Hem i givim insperesen, i tij, mo afta, i trastem olgeta we oli stap folem hem blong oli mekem olgeta samting we oli luk Hem i bin mekem. Long wei ia nao Jisas Kraes i bildimap Jos blong Hem, be tu, ol wokman blong Hem.
Long wanem posisen yu gat koling long hem—sapos yu yu wan dikon kworom presiden, wan stek presiden, o wan Eria Presiden—blong gat sakses, yu mas faenem ol Amulek blong yu.
Maet hem i wan we i no stap mekem wok, o yu no luk hem long kongregesen blong yu. Maet i wan we, i luk olsem se hem i no wantem, o i no save givim seves. Amulek blong yu maet i yangfala o olfala, i wan man o wan woman we i no gat eksperiens, we i taed, o i no aktiv insaed long Jos. Be maet wanem we yu no save luksave taem yu luk olgeta, i we oli stap hop blong harem ol toktok ia long maot blong yu: “!Lod i nidim yu! !Mi nidim yu!”
Dip daon, plante oli wantem givim seves long God. Oli wantem stap wan tul long han blong Hem. Oli wantem blong sakem huknaef blong olgeta mo traehad wetem ful paoa blong olgeta blong mekem wol ia i rere blong Sevya i kambak. Oli wantem blong bildimap Jos blong Hem. Be oli holemtaet olgeta blong stat. Plante taem oli wet se bae oli askem olgeta.
Mi invaetem yufala blong tingting long olgeta, insaed long ol branj mo wod blong yufala, insaed long ol misin mo stek, we oli nidim blong harem yu singaotem olgeta long aksen. Lod i bin stap wok wetem olgeta—i bin stap mekem olgeta oli rere, i mekem hat blong olgeta i sofsof. Faenem olgeta taem yu stap lukluk olgeta wetem hat blong yu.
Go aot long olgeta. Tijim olgeta. Givim insperesen long olgeta. Askem olgeta.
Serem long olgeta ol toktok we enjel i talem long Amulek—se blesing blong Lod bae i stap wetem olgeta mo haos blong olgeta. Bae yu sapraes blong faenem wan gudfala strong wokman blong Lod we, sapos i no hemia, bae i haed i stap nomo.
?Olsem wanem nao mi, mi olsem Amulek?
Sam long yumi oli mas go lukaotem ol Amulek, mo sam narawan, kwestin ia i talem: “?Olsem wanem nao mi, mi olsem Amulek?”
Ating wetem ol yia, yu nomo stap strong long wok blong yu olsem disaepol. Ating faea blong testemoni blong yu i godaon. Ating yu go longwe long Jos blong Kraes. Ating tingting blong yu i go blaen, o yu kros i stap. Semmak olsem olgeta blong Jos blong Efesas, yu aot long ol samting “we yu bin lavem fastaem”—ol bigfala trutok we oli no save finis blong gospel blong Jisas Kraes.
Maet olsem Amulek, yu save insaed long hat blong yu se Lod i “bin singaotem yu plante taem,” be yu “no wantem harem.”
Be, Lod i stap luk insaed long yu wanem we Hem i bin luk insaed long Amulek—wan strong wokman we i gat wan impoten wok blong mekem mo i gat wan testemoni blong serem. I gat seves we i no gat wan narawan i save givim long semfala wei. Lod i trastem yu wetem tabu prishud blong Hem, we i holem tabu paoa blong blesem mo leftemap ol narawan. Lisin wetem hat blong yu mo folem ol toktok blong Spirit.
Wokbaot blong Wan Memba
Wokbaot blong wan brata i bin tajem mi; brata ia i bin askem hemwan: “Sapos Lod i singaot, ?bambae mi save haremsave? Brata ia, bae mi singaotem hem, Deved.
Deved i jenisim laef blong hem i kam long Jos samples 30 yia i pas. Hem i go long wan misin, mo afta, hem i go long loa skul. Taem hem i bin stap stadi mo wok blong sapotem wan yang famli, hem i faenem sam infomesen abaot Jos we i mekem hem i konfius. Moa hem i stap ridim ol kaen nogud riding ia, moa tingting blong hem i trabol. Long en, hem i askem blong oli karemaot nem blong hem long ol rekod blong Jos.
Stat long tetaem ia i go, semmak olsem Alma long ol taem blong agens, Deved i bin spendem plante taem blong toktok wetem ol memba blong Jos, nao oli storian fulap long intanet wetem tingting blong jalenjem ol bilif blong olgeta.
Hem i mekem samting ia i gud we.
Wan long ol memba we hem i stap storian wetem, bae mi singaotem Jekob. Jekob i kaen mo gat respek oltaem long Deved, be hem i strong tu blong difendem Jos.
Afta sam yia, Deved mo Jekob, tufala i kam blong respektem tufala mo kam fren. Wanem we Deved i no bin save, i we Jekob i bin stap prea from Deved, mo i bin fetful blong mekem hemia blong moa long 10 yia. Hem i putum tu, nem blong fren blong hem long prea long ol tempol blong Lod, mo i bin hop se hat blong Deved bae i kam sofsof.
Wetem taem, sloslo, Deved i bin jenis. Hem i stat blong tingbaot gud ol eksperiens long saed blong spirit we hem i bin gat long wan taem, mo hem i tingbaot glad we hem i bin filim taem hem i bin wan memba blong Jos.
Semmak olsem Alma, Deved i no bin fogetem fulwan ol trutok blong gospel we hem i bin akseptem. Mo semmak olsem Amulek, Deved i bin filim se Lod i kam klosap long hem. Be naoia, hem i wan patna insaed long wan ofis blong loya—wan bigfala wok we i kasem gud mane long hem. Hem i mekem gogo nao oli save gud hem olsem wan we i save tokbaot Jos, mo hem i gat tumas hae tinting blong askem blong kambak long Jos.
Be hem i bin gohed blong filim Man blong Lukaot long Sipsip i stap pulum hem.
Hem i mekem wanem i stap long skripja ia: “Sapos wan long yufala i no gat waes, hem i mas askem God blong i givim waes long hem, nao God bambae i save givim long hem from we fasin blong [Hem] i no save tok nogud long man we i askem samting, mo hem i stap givim long ol man long gladhat blong hem.” Hem i prea: “Dia God, mi wantem kam wan Lata-dei Sent bakegen, be mi gat ol kwestin we mi nidim ol ansa.”
Hem i stat blong lisin long toktok blong Spirit mo ol ansa blong insperesen we ol fren oli givim, olsem we hem i neva mekem bifo. Wan afta wan, ol tu tingting blong hem oli tanem oli kam bilif, kasem taem we hem i luksave, se wan moa taem bakegen, hem i save filim wan testemoni abaot Jisas Kraes mo Jos we Hem i putumbak.
Long taem ia nao, hem i bin save se bae hem i save winim hae tingting blong hem, mo mekem wanem i nid blong mekem blong oli akseptem hem bakegen insaed long Jos.
Long en, Deved i baptaes bakegen, mo afta, hem i kaontem ol dei we i stap go blong hem i save kasembak ol blesing blong hem.
Mi glad blong talemaot se long las sama, Deved i kasembak ol blesing blong hem. Naoia hem i tekpat fulwan insaed long Jos mo i stap olsem Sandei Skul tija long wod blong hem. Hem i tekem evri janis blong tokabaot jenis blong laef blong hem long ol narawan, blong stretem ol trabol we hem i bin mekem, mo blong testifae abaot gospel mo Jos blong Jisas Kraes.
Las Toktok
Ol dia brata blong mi, ol dia fren blong mi. Bae yumi go lukaotem, faenem, mo givim insperesen mo dipen long ol Amulek insaed long ol wod mo stek blong yumi. I gat plante Amulek long Jos tedei.
Ating yu save wan. Ating yu yu wan long olgeta.
Ating Lod i bin stap toktok slo finis long yu, i pusum yu blong gobak long ol samting ia we yu bin lavem fastaem, blong yu serem talen blong yu, blong yu stap klin inaf blong praktisim prishud, mo wok saed-saed wetem ol nara Sent blong kam kolosap moa long Jisas Kraes mo bildimap kingdom blong God, long ples ia, long wol.
Sevya we yumi lavem Hem i save huia yu. Hem i save hat blong yu. Hem i wantem blong sevem yu, mo bae Hem i kam long yu. Jes openem hat blong yu long Hem. Hem i hop blong mi se olgeta we oli aot long rod blong stap disaepol—iven sapos i smol nomo—bae oli tingting long gud fasin blong gladhat blong God, mo bae oli luk wetem hat blong olgeta mo lanem samting aot long Alma mo Amulek, mo bae oli harem ol toktok blong Sevya we i jenisim laef: “Kam, yu biaen long mi.”
Mi askem strong long yufala blong folem singaot ia blong Hem, from se taem bae yu mekem, bambae yu kasem blesing blong heven. Blesing blong Lod bae i stap long yu mo haos blong yu.
Abaot hemia, mi testifae long hem mo givim blesing blong mi long yufala olsem wan Aposol blong Masta, long nem blong Jisas Kraes, amen.