Ol Sista long Saeon, Girap Wetem Paoa
Blong stap olsem ol woman we i jenisim laef mo stap holem kavenan, yumi nid blong stadi long ol stamba doktrin blong gospel, mo gat wan testemoni we i no save seksek we i save talem se ol samting ia oli tru.
Hem i wan bigfala glad blong kam tugeta long Konfrens Senta ia wetem ol gel, ol yang woman, mo ol woman blong Jos ia. Mifala i save gud tu se i gat ol taosen blong ol nara grup blong ol sista we oli kam tugeta raon long wol, blong lukluk konfrens ia, mo mi talem tangkyu from janis ia mo rod we i stap blong yumi evriwan i joen tugeta tedei long yuniti mo stamba tingting.
Long Oktoba 2006, Presiden Gordon B. Hinckley i bin givim wan toktok we taetol blong hem i “O Man blong God, Girap” we i folem wan hym we oli bin raetem long 1911. I wan singaot i go long ol man blong Jos blong girap mo kam gud moa. Toktok ia i bin ring insaed long maen blong mi taem mi bin prea blong save wanem blong serem wetem yufala.
Ol sista, yumi stap long wan taem blong denja. Ol kondisen blong taem blong yumi i no wan sapraes long yumi. Oli bin talem finis plante plante yia i pas, olsem wan woning mo strong tok blong yumi save rere from. Namba 8 japta blong Momon i tokbaot klia se taem blong yumi bae i olsem wanem. Long japta ia, Moronae i talem se hem i bin luk taem blong yumi, mo i gat ol wo, ol toktok from wo, ol bigfala samting we i spolem wol, fasin blong kilimded man, stil, mo ol pipol we bae oli talem se i no gat raet o rong long ae blong God. Hem i tokbaot ol pipol we oli fulap long hae tingting, we oli wokem werem ol klos we oli sas, mo oli jikim relijin. Hem i bin luk ol pipol we tingting blong olgeta i stap nomo long ol samting blong wol, mekem se oli letem blong i gat olgeta we oli nidim samting, mo olgeta we oli neked, mo olgeta we oli sik, mo olgeta we oli gat hadtaem blong pas kolosap long [olgeta],” mo oli no wantem save long olgeta.
Moronae i askem wan kwestin i gobak long sol blong yumi—yumi ia we yumi stap laef long taem ia. Hem i askem: “?From wanem yufala i sem blong tekem long yufala nem blong Kraes? Stret tok ia i tokbaot fasin blong wol blong yumi blong no stap biliv.
Josef Smit—Matiu i tokbaot se long las dei, se olgeta we “God i bin jusumaot olgeta folem kavenan,” bae oli trikim olgeta. Olgeta ia blong kavenan, i tekem tu ol gel, ol yang woman, mo ol sista blong Jos we oli bin baptaes mo oli bin mekem ol kavenan wetem Papa blong olgeta long Heven. Iven, yumi, yumi stap long denja ia blong oli trikim yumi wetem ol giaman tijing.
Ol sista. Mi no biliv se ol samting bae oli kam gud moa taem yumi stap muv i go. Sapos ol samting we oli stap hapen naoia oli wan saen, yumi nidim blong yumi rere from ol hariken we oli stap kam. Bae i isi blong saksakem han blong yumi nomo mo no gat hop, be olsem wan kavenan pipol, yumi no mas lusum hop o givap. Olsem we Elda Gari E. Stivenson i bin talem: “Bigfala praes we Papa long Heven i givim blong stap laef long wan taem blong denja, hem i tu blong yumi stap laef long ful taem ia we evri wok blong God i kamtru.” Mi laekem tumas pis we i kam wetem toktok ia.
Presiden Russell M. Nelson i bin talem yumi wan yia i pas: “Bae ol atak agensem Jos, doktrin blong hem mo fasin blong laef blong yumi bae oli kam antap moa. From hemia, yumi nidim ol woman we oli gat strong fandesen blong andastanem doktrin blong Kraes, we bae oli yusum save ia blong tijim mo help blong lukaotem wan jeneresen we i save stanap agensem sin. Yumi nidim ol woman we oli save luksave evri defren kaen trik. Yumi nidim ol woman we oli save olsem wanem blong yusum paoa we God i givim long olgeta we oli kipim kavenan, mo oli save tokbaot bilif blong olgeta wetem tras mo jareti. Yumi nidim ol woman we oli gat strong paoa long tingting mo visen blong Mama blong yumi, Iv.”
Mesej ia i mekem hat blong mi i kwaet, se nomata ol kondisen blong taem blong yumi, yumi gat fulap risen blong stap glad mo gat hop. Mi biliv wetem ful hat blong mi, se yumi, ol sista, i gat fulap paoa insaed long yumi, mo fet ia we bae i letem yumi fesem ol jalenj blong stap laef long ol las dei. Sista Sheri Dew i bin raetem: “Mi bilivim se long taem ia we bae yumi lanem blong yusum ful paoa blong ol woman we oli konvet mo kipim kavenan, bae kingdom blong God bae i jenis kwiktaem nomo.”
Bae i nidim bigfala wok blong jenisim fasin mo kipim ol kavenan blong yumi. Taem yumi mekem olsem, yumi nidim blong stap ol gel mo ol woman we yumi stap stadi long ol stamba blong doktrin blong gospel, mo gat wan testemoni we i no seksek se oli tru. I gat trifala eria we mi biliv se oli stamba blong ol strong testemoni, mo mi ting se yumi mas gat blong save andastanem samting.
Faswan, yumi nidim blong akseptem se God, Papa blong yumi we I No Save Finis, mo Pikinini blong Hem, Jisas Kraes, Tufala i stap long stamba blong fet mo fasin blong sevem yumi. Jisas Kraes i Sevya mo Ridima blong yumi. Yumi nidim blong stadi mo andastanem Atonmen blong Hem mo save olsem wanem blong yusum evri dei; fasin blong sakem sin i wan long ol bigfala blesing we yumi wanwan i mas gat evri dei. Yumi nidim blong luk Jisas Kraes olsem fas eksampol blong yumi, mo huia yumi mas kam olsem. Yumi nidim blong oltaem tijim ol famli blong yumi, mo tijim ol klas long saed blong bigfala plan blong Papa abaot fasin blong sevem man, we i gat insaed doktrin blong Kraes.
Nambatu, yumi nidim blong andastanem nid ia blong putumbak doktrin, oganaesesen, mo ol ki blong atoriti long ol las dei ia. Yumi nidim blong stap wan witnes se Profet Josef Smit, Lod i jusum hem mo i putum hem i stap blong i putumbak gospel, mo yumi mas wan witnes se hem i bin oganaesem ol woman blong Jos ia folem oganaesesen we i bin stap insaed long Jos blong Kraes bifo.
Mo nambatri, yumi nidim blong stadi mo andastanem ol odinens mo kavenan blong tempol. Tempol i gat wan ples we i stap long medel blong ol plante tabu bilif, mo Lod i askem blong yumi go long tempol, tingting hevi, stadi mo faenem mining long yumiwan mo olsem wanem blong praktisim. Bae yumi kam blong andastanem se tru long ol odinens blong tempol, paoa olsem hemia blong God i stap hapen long laef blong yumi. Mo from ol odinens blong tempol, bae yumi holem paoa blong God mo nem blong Hem long yumi, glori blong Hem bae i raonem yumi, mo ol enjel blong Hem bae oli lukaot long yumi. Mi askem miwan se yumi stap yusum fulwan paoa blong promes ia, o nogat.
Ol sista. Iven hem we i yangfala moa insaed long ples ia, i save girap wetem fet mo gat wan impoten rol blong bildimap kingdom blong od. Ol pikinini oli stat blong kasem testemoni blong olgeta taem oli ridim mo lisin long ol skripja, prea evri dei, mo tekem sakramen long wan wei we i gat mining. Evri pikinini mo yang woman oli save leftemap tingting blong gat famli haos naet mo tekpat fulwan long hem. Yu save kam faswan blong nildaon taem famli i kam tugeta blong mekem famli prea. Iven sapos hom blong yufala i no stret evriwan, eksampol blong yufalawan blong stap fetful blong laef folem gospel i save gat paoa long laef blong famli mo fren blong yufala.
Ol yang woman blong Jos oli nid blong luk olgetawan olsem ol stamba woman insaed long wok blong fasin blong sevem man we prishud i lidim, mo oli no jes stap blong lukluk mo sapotem. Yufala i holem ol koling, mo oli setem yufala apat tru long olgeta we oli holem ol ki blong prishud, blong yufala i wok olsem ol lida wetem paoa mo atoriti long wok ia. Taem yufala i wok strong long koling blong yufala long ol presidensi blong klas mo rere long saed blong spirit, toktok tugeta, go aot blong givhan long ol memba blong klas, mo tijim wanwan long yufala long gospel, nao yufala i stap tekem ples blong yufala long wok ia, mo tugeta, yu mo ol fren blong yu, bae yufala i kasem blesing.
Evri woman i nid blong luk olgetawan olsem ol stamba wokwoman long prishud wok ia. Ol woman insaed long Jos ia, oli ol presiden, ol kaonsela, ol tija, ol memba blong kaonsel, ol sista, mo ol mama, mo kingdom blong God i no save gohed sapos yumi no girap mo mekem evriwan long ol diuti blong yumi wetem fet. Samtaem, yumi jes nid blong gat wan visen we i open mo bigwan moa long wanem i posibol blong hapen.
I no longtaem i pas, mi bin mitim wan sista long Meksiko, we i bin andastanem mining blong wok strong long koling blong hem wetem fet. Marffissa Maldonado, oli bin singaotem hem blong tijim wan yut Sandei Skul klas, tri yia i pas. Hem i gat 7 studen we oli stap long klas taem oli bin singaotem hem, be naoia, hem i gat 20 we oli kam oltaem. Mi sapraes mo askem hem wanem nao hem i bin mekem blong mekem namba i kam antap. Long simpol wei hem i talem: “O, i no miwan nomo. Evri memba blong klas oli help.” Tugeta, oli bin luk nem blong ol lesaktiv long lis, mo stat blong go aot tugeta mo invaetem olgeta blong kambak long Jos. Mo tu, from hadwok blong olgeta, oli bin gat wan baptaes.
Sista Maldonado i mekem wan sosol media pej blong hem mo ol memba blong klas blong hem nomo we hem i singaotem “Mi Pikinini blong God,” mo hem i stap putum ol toktok blong insperesen mo skripja plante taem long wan wik. Plante taem bae hem i tekstem ol studen blong hem blong givim homwok o givim toktok blong leftemap tingting. Hem i filim se i impoten blong toktok wetem olgeta long wei we oli save gud, mo i wok. Hem i talem nomo: “Mi lavem ol studen blong mi.” Mi save filim lav ia taem hem i stap tokbaot ol hadwok blong olgeta, mo eksampol blong hem i mekem mi mi tingbaot wanem wan man o woman we i gat fet mo tekem aksen i save mekem blong wok ia i kamtru wetem help blong Lod.
Ol yut blong yumi oli fesem ol had kwestin evri dei, mo plante long yumi i gat ol famli we oli traehad blong faenem ol ansa. Gud nius i we, i gat ansa long ol kwestin we oli askem. Lisin long ol las mesej we oli kam long ol lida blong yumi. Oli askem strong long yumi blong stadi, mo blong andastanem plan blong stap glad blong Papa long Heven. Oli rimaenem yumi abaot ol prinsipol long famli ofisol toktok. Oli leftemap tingting blong yumi blong tijim mo yusum ol tul ia olsem ol stik blong makem wokbaot blong yumi long rod we i stret mo smol.
Samples wan yia i pas, mi bin visitim wan yang mama we i gat ol yang pikinini, mo mama ia i disaed blong tekem step blong protektem ol pikinini blong hem agensem plante fos we oli bin stap fesem long intanet mo long skul. Hem i bin jusum wan topik evri wik, plante taem, wan topik we oli tokbaot bigwan long intanet, mo hem i statem sam gudfala storian long wik taem ol pikinini blong hem oli save askem kwestin mo hem i meksua se oli gat wan lukluk we i stret long sam had topik. Hem i stap mekem hom blong hem i wan sef ples blong askem kwestin, mo save tijim gospel long wan wei we i gat mining.
Mi wari se yumi stap stap long wan kaen ples we yumi no wantem spolem tingting blong man nao, yumi fogetem evriwan blong tijim ol prinsipol we oli stret. Yumi no mekem wok blong tijim ol yang woman blong yumi se blong stap rere blong kam wan mama i impoten tumas, from se yumi no wantem spolem olgeta we oli no mared, olgeta we oli no save gat pikinini, o blong oli luk yumi se yumi putum limit long joes blong olgeta. Long nara han, yumi no mekem wok blong tokbaot se i impoten blong gat edukesen from yumi no wantem sendem mesej ia se hem i moa impoten bitim mared. Yumi no stap talemaot se Papa long Heven i putum se mared i bitwin wan man mo wan woman from se yumi no wantem spolem olgeta we oli gat problem blong laekem olgeta we oli gat sem seks olsem olgeta. Mo yumi faenem se yumi no filim stret nating blong tokbaot fasin blong man o woman, o ol helti wei long saed blong seks.
I tru, ol sista. Yumi nid blong toktok long wan gud fasin, be tu, yumi mas yusum tingting mo save blong yumi long saed blong plan blong fasin blong sevem man blong save tok klia mo tok stret taem yumi kam blong tijim ol pikinini mo ol yut blong yu abaot ol prinsipol blong gospel we oli mas andastanem blong oli save sel tru long wol ia we oli stap laef long hem. Sapos yumi no stap tijim ol pikinini mo ol yut blong yumi long tru doktrin—mo tijim i klia gud—wol ia bae i tijim ol giaman blong Setan long olgeta.
Mi lavem gospel blong Jisas Kraes, mo glad foreva from daereksen, paoa mo evri dei help we mi stap kasem olsem wan kavenan gel blong God. Mi testifae se Lod i blesem yumi, olsem ol woman we i stap laef long denja taem, wetem evri paoa, presen mo strong paoa we yumi nidim blong help blong mekem wol ia i rere from Seken Kaming blong Lod Jisas Kraes. Mi prea se bae yumi evriwan i luk tru paoa we yumi save gat mo girap blong kam ol woman blong fet mo strong paoa long tingting we Papa blong yumi long Heven i nidim yumi blong kam olsem. Long nem blong Jisas Kraes, amen.