!O! !Plan blong God blong Yumi I Bigwan Tumas!
Raon long yumi, i gat bigfala rij basket blong laet mo trutok we i mekem se mi askem miwan sapos yumi stap glad long wanem we yumi gat.
Yumi gat blesing blong kam tugeta bakegen long wo konfrens ia anda long daereksen mo lidasip blong dia profet mo Presiden blong yumi, Thomas S. Monson. !Mifala i lavem mo sastenem yu!
Long taem we mi bin stap wok olsem wan paelot, mi mas dipen bigwan long ol kompiuta sistem we oli mas wok stret evriwan, be miwan, mi no stap wok long kompiuta blong miwan. Long ofis wok blong mi olsem wan eksekutiv, mi bin gat ol asisten mo ol sekretari we oli kaen mo helpem mi wetem ol wok blong mekem.
Evri samting ia i bin jenis long 1994 taem oli singaotem mi olsem wan Jeneral Atoriti. Koling blong mi i givim fulap janis blong tij, be tu, i gat bigfala Jos ofis wok blong mekem—i moa bitim wanem mi bin tingting long hem.
Mi sek from se stamba tul blong mi save mekem gud evri wok blong mi, hem i wan kompiuta.
Hem i fas taem long laef blong mi we mi mas stat blong yusum strenj samting ia we mi no save yusum, we hem i wan kompiuta.
Stat long stat, kompiuta mo mi, mitufala i no fren gud.
Ol teknoloji man oli traem tijim mi hao blong yusum kompiuta. Oli stanap biaen long mi, oli pusum han ova long solda blong mi, mo taepem mo muvum fingga hariap long kibod.
“?Yu luk?” bae oli talem, “!Olsem ia nao yu mekem.!”
Mi no luk nating. I had blong lanem mo muv i go.
Taem blong lan ia i olsem wan simen wol.
I bin nidim bigfala taem, wok blong ripit, wet longtaem, bigbigfala hop mo fet, plante gud toktok we i kam long waef blong mi, mo plante lita blong jus we bae mi no talem nem blong hem.
Naoia, 22 yia afta, kompiuta teknoloji i raonem mi. Mi gat wan imel adres, a Twita akaon, wan Fesbuk pej. Mi gat wan smatfon, wan tablet, wan laptop, mo wan dijitol kamera. Mo nating we kompiuta skil blong mi i no semmak long wan pikinini blong seven yia, mi mekem i gud olsem wan we i gat seventi yia.
Be mi luk wan intresting samting. Moa mi kam blong save teknoloji, moa mi tekem se i nating.
Long plante samting long histri blong man, komunikesen i stap hapen long spid blong hos we i resis. Blong sendem wan mesej mo kasem wan ansa, bae i tekem plante dei o manis. Tedei, mesej blong yumi i travel plante taosen kilometa long skae o andanit solwota blong kasem wan long narasaed blong wol, mo sapos i slo smol, iven samfala seken nomo, nao yumi kros mo toktok fulap.
I fasin blong man: taem yumi kam blong savegud wan samting, iven wan samting we i wan merikel mo i openem ae blong yumi, be afta, yumi lusum hemia mo tekem se i wan samting nating o olbaot nomo.
?Yumi Tekem Ol Trutok blong Spirit Oli blong Nating?
Blong tekem teknoloji mo gud samting blong tedei oli blong nating, maet i no wan impoten poen. Be sore tumas, samtaem yumi tekem semfala fasin ia wetem doktrin blong gospel blong Jisas Kraes we i fidim sol blong yumi. Insaed long Jos ia blong Jisas Kraes, God i givim fulap long yumi. Raon long yumi, i gat wan bigfala rij basket blong laet mo trutok we i mekem se mi askem miwan sapos yumi stap glad tru from ol samting we yumi gat, o no.
Tingting long ol fas disaepol we oli bin wokbaot mo toktok wetem Sevya long taem blong seves blong Hem long wol. Traem tingting long bigfala tangkyu mo respek we i fulumap gud hat, mo i fulumap gud maen blong olgeta taem oli bin luk Hem, we i girap long hol blong ston, taem oli bin filim ol mak long han blong Hem. !Laef blong olgeta i neva semmak!
Tingbaot ol fas Sent long dispensesen ia, we oli bin save Profet Josef Smit, mo oli bin harem hem i prij abaot gospel we i kambak. Traem tingting olsem wanem oli mas filim blong save se kaliko we i stap bitwin heven mo wol i open bakegen, i saenem laet mo save i kam long wol ia; laet ia i kam long selestial hom antap.
Be antap long evri samting, tingting long hao nao yu bin filim, taem we, blong fas taem, yu bin bilivim mo andastanem se i tru se yu yu wan pikinini blong God; se Jisas Kraes i bin glad blong safa from ol sin blong yu, blong yu save kam klin bakegen; se prishud paoa i ril mo i save joenem yu long ol famli blong yu blong ful taem we i no save finis; se i gat wan profet we i stap laef long wol tedei. ?Yufala i no ting se hemia i gud tumas mo i bigwan tumas?
Taem yu tekem evri samting ia, ?hao nao i posibol blong yumi, aot long evri pipol, yumi no stap glad nating blong kam long Jos wosip seves blong yumi? ?O yumi taed blong ridim ol tabu skripja? Mi ting se bae i posibol nomo sapos hat blong yumi i nomo gat filing blong gat tangkyu, mo i nomo save luk ol tabu mo bigfala presen we God i givim. Ol trutok we oli save jenisim laef oli stap long fored blong ae mo fingga blong yumi, be samtaem, yumi slip long wokbaot blong yumi olsem disaepol. Plante taem tumas yumi letem ol wiknes blong ol narafala memba oli pulum ae blong yumi, be yumi nomo folem eksampol blong Masta blong yumi. Yumi wokbaot antap long rod we daeman i kavremap, be yumi no save luksave olgeta long medel blong ol narafala ston nating.
Wan Mesej we Yumi Save Gud
Taem mi wan yang man, ol fren bae oli askem mi abaot relijin blong mi. Plante taem, bae mi stat blong eksplenem ol samting we oli defren, olsem Tok blong Waes. Sam nara taem bae mi tokbaot ol samting we oli semmak long ol nara Kristin relijin. I no gat eni long ol samting ia we bae i pulum tingting blong olgeta tumas. Be taem mi tokbaot bigfala plan blong stap glad blong Papa long Heven, nao oli stap lisin.
Mi tingbaot mi stap traem blong droem plan blong fasin blong sevem man long blakbod long wan klasrum long japel long Frankfet, Jemani. Mi droem ol sekol we oli ripresentem laef bifo laef ia, laef long wol, mo rod i gobak long Papa mo Mama long Heven afta long laef ia.
Taem mi bin yang man, mi laekem blong serem gudfala mesej ia. Taem mi stap eksplenem olgeta prinsipol ia long simpol toktok blong mi nomo, hat blong mi bae fulap long tangkyu long wan God we i lavem ol pikinini blong Hem, mo wan Sevya we i pemaot yumi evriwan long ded mo hel. Mi praod tumas long mesej ia blong lav, glad mo hop.
Sam fren blong mi bae oli talem se oli filim se oli bin harem mesej ia finis, nomata oli neva tijim hemia long olgeta long relijin blong olgeta. I olsem se oli bin save se ol samting ia oli tru, mo mi stap saenem laet nomo long wan samting we i gat rus finis mo rus blong hem i stap dip insaed long hat blong olgeta.
!Yumi Gat Ol Ansa!
Mi biliv se evri man o woman i gat, insaed long hat blong hem, sam bigfala kwestin abaot laef. ?Mi kam wea? ?From wanem mi stap ia? ?Wanem bae i hapen taem bae mi ded?
Ol kaen kwestin olsem, ol man mo woman oli bin stap askem finis stat long taem we wol i stap. Ol man blong stadi long ol tingting, mo ol topman blong mekem stadi oli spendem laef blong olgeta mo bigfala mane blong lukaotem ol ansa.
Mi talem tangkyu se gospel we i kambak blong Jisas Kraes i gat ol ansa long ol bigbigfala kwestin blong laef. Olgeta ansa ia, oli stap tijim olgeta insaed long Jos blong Jisas Kraes blong Ol Lata-dei Sent. Oli klia, oli tok stret, mo oli isi blong andastanem. Oli kam wetem insperesen mo yumi stap tijim olgeta tu long ol pikinini blong 3 yia long Sanbim klas.
Ol brata mo sista. Yumi ol man mo woman we i no save finis, we yumi no gat stat mo no gat en. !Yumi bin stap stap nomo! !Yumi ol stret spirit pikinini blong wan Papa mo Mama we oli tabu, oli no save ded, oli gat olgeta paoa mo oli stap long Heven!
Yumi kamkamaot long ol haos blong heven we oli blong Lod God we I Gat Olgeta Paoa. Yumi kamaot long laen blong tabu haos blong Elohim, God ia we i Moa Hae. Yumi bin wokbaot wetem Hem long laef bifo laef long wol. Yumi bin stap harem Hem i toktok, mo witnesem glori blong Hem, mo lanem ol rod blong Hem.
Yu mo mi bin stap long Bigfala Kaonsel long taem we Papa we yumi lavem Hem i presentem plan we Hem i gat long yumi—se bae yumi kam long wol, kasem ol bodi blong mit mo bun, lan blong jusum gud mo nogud, mo progres tru long sam rod we bae i no posibol blong progres sapos oli no stap.
Taem yumi bin pas tru long vel mo kam long laef long wol ia, yumi bin save se bae yumi nomo tingbaot laef ia bifo. Bae i gat samting i kam agens, mo hadtaem mo temtesen. Be yumi bin save tu se, blong kasem wan bodi blong mit mo bun, i impoten tumas long yumi. O yes, yumi bin hop se bae yumi lanem kwiktaem blong mekem olgeta raet joes, bae yumi stanap agensem ol temtesen blong Setan, mo long en, bae yumi gobak long Papa mo Mama we yumi lavem long Heven.
Yumi bin save se bae yumi mekem sin mo mekem ol mistek—ating ol bigfalawan. Be yumi bin save tu se, Sevya, Jisas Kraes, i promes se bae Hem i kam long wol, i laef we i no gat sin, mo i glad blong givim laef blong Hem long wan sakrifaes we i no save finis. Yumi bin save se sapos yumi givim hat blong yumi long Hem, trastem Hem, mo traehad wetem ful paoa blong sol blong yumi blong wokbaot long rod blong stap olsem disaepol, bae yumi kam klin, mo bakegen, bae yumi save stap wetem Papa blong yumi long Heven.
So wetem fet long sacrifice blong Jisas Kraes, yu mo mi i bin akseptem, long tingting blong yumiwan, plan ia blong Papa long Heven.
Hemia nao from wanem yumi stap ia long naesfala planet we i wol ia—from se God i givim janis mo yumi bin jusum blong akseptem. Laef blong yumi long wol ia, i blong sot taem mo bae i en wetem ded blong bodi blong yumi. Be huia yu mo mi, bae i no finis. Spirit blong yumi bae i gohed blong laef mo wet long Laef Bakegen long Ded—wan fri presen we i kam long yumi long Papa long Heven mo Pikinini blong Hem, Jisas Kraes. Taem bae yumi laef bakegen long ded, bae spirit mo bodi blong yumi bae i joen bakegen, i nomo save harem i soa, mo i stret evriwan.
Afta long Laef Bakegen long Ded, bae i gat wan Dei blong Jajmen. Nomata Jisas i sevem yumi evriwan mo bae yumi go long wan kingdom blong glori, olgeta we oli trastem God mo stap lukluk gud blong folem ol loa mo odinens blong Hem, bambae oli kasem laef long ol ples we oli no save finis we tingting blong yumi i no naf blong talem glori blong hem mo hamas i hae.
Dei ia blong Jajmen, bae i wan dei blong sore mo lav—wan dei taem we hat i brok i harem gud, taem ol wota blong harem nogud oli kam wota blong tangkyu, taem evri samting i kam stret.
Yes, bae yumi filim wan bigfala sore from sin. Yes, bae yumi rigretem samting, mo tu, gat trabol tingting from ol mistek, ol krangke wok, mo stronghed blong yumi we i mekem yumi mestem janis blong wan gudfala fiuja.
Be mi trastem se bae yumi glad long jajmen blong God. Bae yumi sapraes tu, mo fulap long bigfala gladhat blong Hem, sore, bighat, mo lav we Hem i gat long yumi, ol pikinini blong Hem. Sapos ol tingting mo wok blong yumi oli gud, sapos yumi gat fet long wan God we i stap laef, nao yumi save lukluk fored mo hop long wanem Moronae i singaotem “gudfala kot blong hae Jehova, Jaj ia we I No Save Finis.”
Pro Tanto Quid Retribuamus
Ol brata mo sista blong mi, ol dia fren blong mi. ?Weswe? ?Hat mo maen blong yumi i no fulap long tingting mo sapraes taem yumi lukluk long bigfala plan blong glad ia we Papa i rere blong yumi? ?Yumi no fulap long bigbigfala glad blong save fiuja blong glori we God i stap rere blong evriwan ia we oli stap wet long Lod?
Sapos yufala i neva filim kaen sapraes mo glad ia, mi stap invaetem yu blong luklukgud, stadi mo tingting hevi long ol dip trutok blong gospel we i kambak. “Ol tabu samting blong taem we i no save finis oli mas stap stap long maen blong yufala.” Bae mi serem testemoni blong mi long yufala long saed blong tabu plan blong fasin blong sevem man.
Sapos yufala i bin filim olgeta samting ia bifo, mi stap askem yufala tedei: “?yufala i save filim samting ia naoia?”
I no longtaem i pas mi bin gat janis blong travel i go long Belfast, long Not Aerlan. Taem mi bin stap longwe, mi bin luk Sil blong Belfast we i gat moto blong hem se “Pro tanto quid retribuamus,” o “?Bae yumi givimbak wanem from plante ia we yumi kasem?”
Mi invaetem yumi evriwan blong tingting long kwestin ia. ?Wanem nao bae yumi givimbak from ol bigbigfala laet mo trutok we God i kapsaetem i kam long yumi?
Papa blong yumi i askem nomo se yumi mas laef folem trutok we yumi bin kasem, se bae yumi folem rod ia we Hem i putum i stap. From hemia, bae yumi gat strong paoa long tingting mo gat tras se Spirit bae i lidim yumi. Tru long toktok mo tru long aksen, bae yumi serem, wetem ol narafala man, gudfala mesej ia blong plan blong God blong stap hapi. Bae wanem i pusum yumi bae hem i lav we yumi gat long God mo ol pikinini blong Hem, from oli ol brata mo sista blong yumi. Hemia i stat blong wanem yumi save mekem blong givimbak from plante we yumi stap kasem.
Wan dei, “evri ni bae i bodaon, mo evri tang bae i talemaot” se ol wei blong God oli stret mo plan blong Hem i stret evriwan. Long yu mo mi, bae dei ia hem i tedei. Bae yumi talemaot olsem Jekob blong bifo: “!O Plan blong Papa blong yumi I Bigwan Tumas!”
Hemia, mi testifae wetem bigfala tangkyu long Papa blong yumi long Heven, taem mi livim blesing blong mi i stap wetem yufala, long nem blong Jisas Kraes, amen.