Wan Hom we Spirit I Stastap long Hem
Bae yu faenem sam long ol bigfala glad blong yu, insaed long ol hadwok blong yu blong mekem hom blong yu i wan ples blong fet long Lod Jisas Kraes, mo wan ples we lav i wan proteksen.
Ol dia brata mo sista blong mi. Mi talem tangkyu we oli bin invaetem mi blong toktok long yufala long namba 189 Yia Jeneral Konfrens blong Jos blong Jisas Kraes blong Ol Lata-dei Sent. Long deit olsem, long 1830, Josef Smit i bin oganaesem Jos anda long daereksen blong Lod. I bin hapen insaed long hom blong Witma famli long Feyet, Niu Yok. I bin gat sikis memba mo samples 50 nara pipol we oli bin intres, oli bin stap long dei ia.
Nomata we mi no save se Profet Josef i bin talem wanem long dei ia, o hem i luk olsem wanem taem hem i bin stanap long fored blong smol grup ia, be mi save wanem ol pipol ia wetem fet long Jisas Kraes, oli bin filim. Oli bin filim Tabu Spirit, mo oli bin filim se oli bin stap long wan tabu ples. I tru, oli bin filim se oli bin yunaet, olsem wan pipol.
Merikel filing ia nao yumi i wanem yumi evriwan i wantem insaed long hom blong yumi. Hem i wan filing we i kam blong stap, olsem Pol i talem, “[we tingting i fas long Spirit].”
Stamba tingting blong mi tedei, i blong tij wanem mi save long hao nao yumi save kwalifae from kaen filing ia plante taem, mo invaetem hemia blong stap longtaem moa insaed long ol famli blong yumi. Wetem eksperiens, yufala i save se hemia i no isi. Raorao, hae tingting, mo sin, oli mas kontrolem. Stret lav blong Kraes i mas kam insaed long hat blong olgeta insaed long famli blong yu.
Adam mo Iv, Lihae mo Sara, mo ol nara papa mo mama we yumi save aot long ol skripja, oli bin hemia se i wan had jalenj. Be yet, i gat olgeta eksampol we i leftemap tingting, we i gat glad insaed long ol famli mo long ol hom, we i mekem tingting blong yumi i kwaet. Mo olgeta eksampol ia, oli letem yumi luk wei we hemia i save hapen long yumi mo famli blong yumi. Yufala i tingbaot ol stori we i stap long 4 Nifae:
“Mo i bin hapen se i no gat eni rao long graon, from lav blong God we i bin stap insaed long hat blong ol pipol
“Mo i no bin gat ol tingting blong wantem samting blong narafala man, o ol rao, o ol faet, o ol fasin blong slip olbaot, o ol giaman, o ol fasin blong kilim man i ded, o eni kaen fasin blong gat rabis tingting; mo i tru we i no save gat wan pipol we i moa hapi long medel blong evri pipol we han blong God i mekem olgeta.
I no bin gat stilman, o ol man blong kilim man i ded, mo tu, i no bin gat Ol Man blong Leman, o eni kaen pipol we oli singaotem Ol Man blong _; be oli stap wan; oli ol pikinini blong Kraes, mo oli gat raet long kingdom blong God.
“!Mo hamas nao oli bin kasem blesing! From Lod i bin blesem olgeta long evri wok blong olgeta; yes, mo tu, Lod i blesem olgeta mo mekem olgeta oli kam antap gud kasem wan handred mo ten yia i pas i go; mo fasfala jeneresen afta Kraes i bin pas i go, mo i no gat eni rao long ful graon.
Olsem we yufala i save, hapi taem ia i no bin stap blong oltaem. Stori ia long namba 4 Nifae i tokbaot ol saen we Spirit i stap lego wan grup blong ol gudfala pipol. Hem i wan paten we i bin kamaot ova long ol yia long plante pipol, long ol kongregesen, mo sore tumas, insaed long ol famli. Taem yumi stadi long paten ia, yumi save luk olsem wanem yumi save kasem proteksen mo iven gat moa filing blong lav insaed long famli blong yumi.
Hemia nao paten se Spirit i stap aot afta 200 yia we oli bin laef long wan stret pis evriwan, we gospel i bin tekem i kam:
Hae tingting i kam insaed.
Ol pipol oli stop blong serem wanem we oli gat wetem ol narawan.
Oli stat blong luk olgeta se sam oli hae mo sam oli daon long wanwan long olgeta.
Oli stat blong nomo gat tumas fet long Jisas Kraes.
Oli stat blong no laekem ol man.
Oli stat blong mekem evri kaen sin.
Bae ol papa mo mama oli mas lukaot blong luk ol saen ia taem i kamaot long medel blong ol memba blong famli blong olgeta. I tru, bae oli wari. Be oli save se biaen long hemia, i gat paoa blong Setan we i stap traem blong lidim ol gudfala pipol i go daon long rod blong sin, mo olsem ia nao, oli lusum paoa blong Tabu Spirit. Mekem se, ol waes papa mo mama, bae oli luk se i gat janis blong lidim wanwan pikinini, mo olgetawan bakegen, blong oli akseptem moa fulwan invitesen blong Lod blong kam long Hem.
Maet yu no gat tumas sakses blong askem wan pikinini blong sakem sin, eksampol, from hae tingting blong hem. Maet yu save traem blong winim tingting blong ol pikinini blong serem moa wanem we oli gat. Yu save askem olgeta blong stop blong filim se oli gud moa bitim wan narawan long famli. Be afta, yu kam long saen blong sik ia we oli tokbaot fastaem, se: “Oli stat blong nomo gat tumas fet long Jisas Kraes.”
I gat wan ki blong lidim famli blong yu i go kasem ples ia long spirit we yu wantem blong olgeta—mo blong yu stap wetem olgeta long ples ia tu. Taem yu stap helpem olgeta blong gro wetem fet se Jisas Kraes i Ridima blong olgeta we Hem i lavem olgeta, bae oli filim blong wantem sakem sin. Taem oli mekem olsem, bae oli stat blong riplesem hae tingting. Taem oli stat blong filim wanem we Lod i bin givim long olgeta, bae oli wantem blong serem samting moa. Fasin blong kompit blong kam faswan o gat nem, bae i go daon. Fasin blong no laekem man, bae lav i ronemaot. Mo laswan, olsem i bin hapen wetem ol pipol we King Benjamin i bin help blong jenisim laef blong olgeta, tingting blong wantem mekem gud i mekem olgeta oli stap strong agensem temtesen blong mekem sin. Ol pipol blong King Benjamin oli testifae se oli “nomo bin gat tingting blong mekem rabis samting.”
So. Blong bildimap fet long Jisas Kraes, hem i stat blong mekem foldaon long spirit i tanem raon insaed long famli mo hom blong yu. Fet ia, bae i tekem moa fasin blong sakem sin i kam bitim yu stap prij agensem wanwan saen blong sik ia blong foldaon long spirit.
Bae yu lidim olgeta moa tru long eksampol. Ol memba blong famli mo ol narawan oli mas luk yu stap gro long fet blong yuwan long Jisas Kraes mo gospel blong Hem. I no longtaem i pas, yu bin givim fulap help. Ol papa mo mama insaed long Jos, oli bin gat blesing ia wetem wan tabu kurikulom, hemia blong ol famli mo wanwan man mo woman. Taem yu stap yusum, bae i bildimap fet blong yu, mo fet blong ol pikinini blong yu long Lod Jisas Kraes.
Mekem Fet I Stap Gro
Fet blong yu long Sevya i bin stap gro taem yu bin stap folem toktok blong Presiden Russell M. Nelson blong ridim bakegen Buk blong Momon. Yu bin makem ol ples mo ol toktok we i tokbaot Sevya. Fet blong yu long Jisas Kraes i bin gro. Be, olsem wan niu plant, kaen fet olsem long Jisas Kraes i save go drae sapos yu no mekem tingting blong yu blong gohed blong stap tingting hevi mo prea, blong mekem fet i gro.
Eksampol blong yu, blong mekem fet i gro, maet bae i no evri memba blong famli we bae i stap folem naoia. Be gat gud tingting aot long eksperiens blong Yangfala Alma. Long taem i harem i soa mo i nid blong sakem sin mo kasem fogivnes, Hem i bin tingbaot fet blong papa blong hem long Jisas Kraes. Ol pikinini blong yu, maet bae oli tingbaot fet blong yu long Sevya long wan taem we oli rili nidim blong sakem sin. Alma i tokbaot kaen taem olsem:
“Mo i bin hapen se taem we olsem ia nao mi bin harem nogud, taem we mi bin tingbaot ol plante sin blong mi, i bin givim had taem long mi, luk, mi bin tingbaot tu we mi bin harem papa blong mi i bin profesae long ol pipol long saed blong kam blong wan Jisas Kraes, wan Pikinini blong God, blong pem praes blong ol sin blong wol.
Nao, taem we tingting blong mi i kasem tingting ia, mi bin prea insaed long hat blong mi: O Jisas, yu yu Boe blong God, gat sore long mi, we mi stap long bigfala rabis ples, mo ol jen we i no save finis blong ded i raonem mi.
Mo nao, luk, taem we mi bin tingbaot samting ia, mi nomo save tingbaot ol soa blong mi; yes, mi nomo bin tingbaot ol sin blong mi we oli bin givim hadtaem long mi.
Stap Prea wetem Lav
Antap long eksampol blong yu blong stap mekem fet i gro, fasin blong prea olsem wan famli i wan nambawan pat blong mekem hom i wan tabu ples. Oli jusum wan blong i voes, i prea blong famli. Taem we prea ia, i klia se i go long God long bihaf blong ol pipol we oli stap nildaon mo stap lisin, fet i stap gro long wanwan long olgeta. Oli save filim ol saen blong lav long Papa long Heven mo long Sevya. Mo taem hem we i stap prea i talem nem blong olgeta we oli nildaon long famli sekol ia, we oli stap long nid, evriwan i save filim lav long wanwan mo i kam long wanwan memba blong famli.
Iven taem we ol memba blong famli oli no stap long hom, prea i save bildim ol rilesensip blong lav. Prea insaed long famli i save go krosem wol. Bitim wan taem mi bin lanem se wan memba blong famli, we i stap longwe, i stap prea long sem taem from sem samting we mi bin stap prea from. Long mi, olfala toktok ia: “Famli we i stap prea tugeta i stap tugeta” i save go kasem “Famli we i stap prea tugeta i stap tugeta, iven taem oli stap longlongwe long olgeta.”
Stap Tijim Fasin blong Sakem Sin Eli
From se i no gat wan long yumi i stret evriwan mo i isi blong ol filing oli stap nogud, ol famli oli save kam ol tabu sef ples nomo taem yumi stap sakem sin eli mo wetem tru hat. Papa mo mama i save soem eksampol. Ol strong toktok, mo ol tingting we i nogud, wan i save sakem sin from kwiktaem mo wetem tru hat. Wan simpol, “mi sore” i save hilim ol soa mo invaetem tugeta samting, fogivnes mo lav.
Profet Josef Smit i bin wan model long yumi taem hem i bin stap dil wetem ol rabis atak, olgeta we oli stap tanem baksaed long hem, mo ol smol raorao insaed long famli. Hem i bin fogivim olgeta kwiktaem, iven we hem i bin save se bae enemi bae i kam agensem hem bakegen. Hem i askem fogivnes, mo hem i givim fogivnes i isi tu.
Stap Praktisim Misinari Spirit
Ol boe blong Mosaea oli gat strong tingting blong serem gospel long evriwan. Tingting ia i kam aot long wanwan eksperiens blong olgeta blong sakem sin. Oli no save tekem tingting ia nomo se, eniwan i safa from risal blong sin olsem oli bin safa. So, oli bin fesem plante yia we man i sakemaot olgeta, taem i had, mo denja ia blong serem gospel blong Jisas Kraes long ol enemi blong olgeta. Long rod ia, oli bin faenem glad long plante we oli bin sakem sin mo oli save glad ia blong fogivnes tru long Atonmen blong Jisas Kraes.
Ol memba blong famli blong yumi bae oli gro long hat blong olgeta blong serem gospel taem oli filim glad ia blong fogivnes. Hemia i save kam taem oli stap riniu ol kavenan blong olgeta taem oli tekem mo kakae sakramen. Misinari spirit ia bae i gro insaed long ol hom blong yumi taem ol pikinini mo ol papa mo mama oli filim glad ia blong fogivnes insaed long sakramen seves. Tru long eksampol blong respek, tugeta, papa mo mama mo ol pikinini oli save helhelpem wanwan long olgeta blong filim glad ia. Glad ia i save go longwe blong tanem hom blong olgeta i kam ol misinari trening senta. Maet evriwan i no go long misin, be evriwan i filim blong wantem serem gospel, we i mekem oli save filim fogivnes mo pis. Mo nomata oli stap naoia long misin fultaem o no, evriwan i save filim glad ia blong serem gospel long ol narawan.
Stap Visitim Tempol
Tugeta, blong ol papa, mama mo pikinini, tempol i bes taem blong kasem filing mo wan lav ia blong ol ples blong heven. Hemia i tru taem ol pikinini oli yangfala. Ol pikinini oli bon wetem Laet blong Kraes; Iven wan bebi i save filim se wan tempol i tabu. From se ol papa mo mama oli lavem ol pikinini blong olgeta, tempol i ripresentem, long olgeta, hop ia se oli save gat ol pikinini blong olgeta blong lavem olgeta long famli we i no save finis—blong oltaem.
Sam long yufala i gat ol foto blong ol tempol insaed long ol hom blong yufala. Taem we oli stap ademap ol tempol raon long wol, hem i posibol blong plante papa mo mama oli visitim ol tempol graon wetem ol famli blong olgeta. Samfala bae oli save go long ol open haos taem we oli stap bildim ol tempol. Ol papa mo mama oli askem ol pikinini olsem wanem oli stap filim blong stap kolosap o insaed long wan tempol.
Evri papa mo mama oli save serem testemoni blong olgeta se tempol i minim wanem long hem. Presiden Esra Taf Benson, we i lavem ol tempol, i tokbaot oltaem se hem i stap lukluk mama blong hem i lukaot gud blong aeanem ol tempol klos blong hem. Hem i tokbaot memori blong hem se, taem hem i smol boe, hem i stap lukluk famli blong hem taem oli aot long hom blong olgeta blong go long tempol.
Taem hem i bin Presiden blong Jos, hem i bin go long tempol long sem dei, evri wik. Oltaem, hem i go mekem tempol wok blong wan bubu. Hemia i kamaot oltaem long eksampol blong papa mo mama blong hem.
Testemoni blong Mi
Bae yu faenem sam long ol bigfala glad blong yu, insaed long ol hadwok blong yu blong mekem hom blong yu i wan ples blong fet long Lod Jisas Kraes, mo wan ples we lav i wan proteksen. Restoresen blong gospel i bin stat wetem wan smol kwestin we oli tingting hevi long hem insaed long wan hambol hom, mo i gohed insaed long wanwan long ol hom blong yumi taem yumi stap gohed blong stanemap mo praktisim ol prinsipol blong gospel long ples ia. Hemia i bin hop mo bigfala tingting blong hat blong mi taem mi smol boe i kam. Yufala evriwan i luk ol kaen hom olsem. Plante long yufala, wetem help blong Lod, i bin krietem ol hom ia.
Sam long yufala i bin traem wetem ful hat from blesing ia, be yet, yufala i no kasem yet. Promes blong mi long yufala i wan promes we wan memba blong Kworom blong Olgeta Twelef Aposol i bin mekem long mi long wan taem. Mi bin talem long hem se, from sam joes we sam long famli blong mifala oli bin mekem, mi no ting se mifala i save stap tugeta long wol we bae i kam. Hem i talem, olsem we mi save tingbaot: “Yu stap wari abaot rong problem. Yu nid blong stap laef klin inaf nomo blong kasem selestial kingdom, mo ol famli bae oli kam moa gud bitim we yu save tingbaot.”
Mi biliv se bae hem i talemaot hapi hop ia long eniwan long yumi long laef ia, we i bin mekem evri samting we yumi save mekem blong mekem yumi kwalifae, mo ol memba blong famli blong yumi oli kwalifae from laef we i no save finis. Mi save se plan blong Papa long Heven i wan plan blong hapines. Mi testifae se plan blong Hem i mekem i posibol blong wanwan long yumi, we i mekem bes we hem i save mekem, blong i save sil insaed long wan famli, blong oltaem.
Mi save se ol prishud ki we Josef Smit i putumbak, oli paspasem olgeta i kam i folem wan laen we i no stop kasem Presiden Russell M. Nelson. Olgeta ki ia, oli mekem i posibol tru long siling blong ol famli tedei. Mi save se Papa long Heven i lavem yumi, ol spirit pikinini blong Hem, wetem wan lav we i stret evriwan. Mi save se, from Atonmen blong Jisas Kraes, yumi save sakem sin, kam klin, mo kam klin inaf blong laef insaed long ol naesfala famli blong oltaem wetem Papa blong yumi long Heven mo wetem Pikinini blong Hem we Hem i lavem, Jisas Kraes. Mi testifae long hemia, long nem blong Jisas Kraes, amen.