?Hemia Bae I Lidim Mi I Go Wea?
Yumi mekem ol moa gud joes mo desisen sapos yumi luk long ol defren kaen joes we oli stap, mo tingting hevi se bae oli lidim yumi i go wea.
Gospel we i kambak blong Jisas Kraes i leftemap tingting blong yumi blong tingting abaot fiuja. Hem i stap eksplenem stamba tingting blong laef long wol ia, mo ril laef blong stap folem. I stap tijim ol gudfala aedia abaot fiuja blong lidim ol aksen blong yumi tedei.
Be tu, yumi evriwan i save sam we oli stap tingting nomo long tedei: spendem tedei, glad tedei, mo no tingting long fiuja.
Laef blong yumi tedei mo fiuja blong yumi bae i hapi moa sapos yumi stap tingting long fiuja oltaem. Taem yumi stap mekem ol desisen tedei, yumi sapos blong oltaem askem yumi: “?Hemia bae i lidim mi i go wea?”
1.
Sam pat blong ol desisen oli ol joes bitwin, blong mekem samting, o blong no mekem eni ting. Mi harem wan eksampol blong wan kaen joes olsem long wan stek konfrens long Yunaeted Stet sam yia i pas finis.
Ples i wan naesfala kampas blong wan yunivesiti. Wan grup blong ol studen oli bin stap sidaon long gras. Spika ia we i tokbaot eksperiens ia, i talem se oli bin stap lukluk wan naes skwirel wetem bigfala bus tel blong hem, i stap pleiplei long stamba blong wan naesfala hadwud tri. Samtaem, hem i stap long graon, samtaem i go antap, kam daon mo go raon long stamba. ?Be from wanem bae hemia i pulum ae blong wan bigfala grup blong ol studen?
Kolosap, long gras, i gat wan dog we i flatem gud hem i stap. Hem nao, ol studen oli intres long hem, mo skwirel, i intres blong dog ia. Evri taem we skwirel i spid i go narasaed i stap raonem tri, dog ia, kwaet nomo bae i krip i go fored smol, mo afta i slip flat bakegen. Hemia nao i holemtaet intres blong ol studen. Oli stap kwaet mo oli no muv, ae blong olgeta i fas long wanem i stap mo i klia nomo se wanem nao bae i hapen afta.
Nao, dog ia i muv kam kolosap inaf blong jiam long skwirel mo holem long maot blong hem. Evriwan i singaot, mo grup blong ol studen oli ron i go blong karemaot smol animol ia long dog, be i let tumas. Skwirel i ded.
Eniwan long hip blong ol man ia, i bin save wonem skwirel, long eni taem, sapos oli sakem han, o singaot laod, be i no gat wan i mekem. Oli jes stap lukluk nomo long wanem oli save se bae i hapen, i hapen. I no gat wan i askem: “?Hemia bae i lidim tufala i go wea?” Taem trabol i hapen, evriwan i spid blong stopem trabol ia, be i let finis. Oli krae sore, hemia nomo oli save mekem.
Tru stori ia i wan kaen parabol long yumi. Hem i go wetem ol samting we yumi luk insaed long laef blong yumiwan, mo long ol laef mo ol situesen raon long yumi. Taem yumi stap luk trabol i stap krip sloslo long ol man o ol samting we yumi laekem, yumi gat joes ia blong toktok, o tekem aksen, o stap kwaet nomo. I gud blong askem yumiwan: “?Hemia bae i lid i go wea?” Taem we risal bae i kam kwik mo bae oli nogud, yumi no save stap mo stap mekem nating. Yumi mas givim ol stret woning, o givim sapot we i stret blong blokem nogud risal, taem we i gat taem yet.
Ol desisen we mi jes tokbaot i minim blong mekem ol joes bitwin, blong tekem aksen, o blong no tekem aksen nating. Plante nao i blong jusum bitwin wan aksen o wan nara aksen. Olgeta joes ia oli ol joes bitwin gud mo nogud, be plante taem, oli ol joes bitwin tu gudfala samting. Long ples ia tu, i gud blong askem se bae i lid i go wea. Yumi mekem plante joes bitwin tu gudfala samting, plante taem i abaot wei we bae yumi spendem taem blong yumi. I no gat eni samting i nogud blong stap plei vidio gem, o teksem man, o wajem Tivi, o toktok long mobaelfon. Be wanwan long olgeta samting ia, i gat wanem oli singaotem “praes blong hem,” we i minim se, sapos yumi spendem taem blong mekem wan samting, yumi stap lusum janis blong mekem wan nara samting. Mi sua se yu save luk se yumi nidim blong skelem wetem ful tingting wanem nao yumi stap lusum taem yumi spendem taem long wan aktiviti, iven sapos aktiviti ia i gud.
Sam taem i pas, mi givim wan toktok we taetol blong hem i, “Gud, Moa Gud, Gud Evriwan.” Long toktok ia, mi bin talem se “I no from se wan samting i gud we i wan risen we i gud inaf blong yu go mekem. Namba blong ol gud samting we yumi save mekem, i bigwan tumas bitim taem we yumi gat blong mekem olgeta samting ia. Sam samting oli moa gud bitim gud, mo olgeta samting ia nao oli mas kam faswan long laef blong yumi. … Yumi mas lego sam gud samting blong save jusum sam we oli gud moa, o gud evriwan.”
Lukluk i go longwe. ?Wanem i risal long fiuja, blong ol desisen we yumi stap mekem tedei? Tingbaot hamas i impoten blong kasem wan edukesen, stap stadi long gospel, riniu ol kavenan blong yumi taem yumi stap tekem mo kaekae long sakramen, mo go long tempol.
II.
“?Hemia bae i lidim yumi i go wea? I impoten tu blong stap jusum wanem nem yumi givim long yumiwan, o wanem yumi ting abaot yumiwan. Moa impoten, wanwan long yumi i wan pikinini blong God wetem wan bigfala fiuja we i laef we i no save finis. Evri nara nem, iven wok, kala blong skin, kaen bodi o ona, i blong sot taem, o i nating taem yu tingbaot ol nem blong taem we i no save finis. No jusum blong putum nem long yufalawan, o ting long yufalawan long wei we bae i putum limit long wan gol we yu stap traehad from.
Ol brata mo ol sista blong mi, we yufala i stap luk o ridim wanem mi stap talem long ples a, mi hop se yufala i save se from wanem ol lida blong yufala oli givim ol tijing mo kaonsel we oli stap givim. Mifala i lavem yufala, mo Papa blong yumi long Heven mo Pikinini blong Hem, Jisas Kraes, Tufala i lavem yufala. Plan blong Tufala long yumi, i “bigfala plan blong stap hapi” (Alma 42:8). Plan ia mo komanmen blong Tufala, mo ol odinens mo ol kavenan oli stap lidim yumi long hapines mo glad we i moa bigwan long laef ia mo long laef we i stap kam. Olsem ol wokman blong Papa mo Pikinini, yumi stap tij mo kaonsel taem Tufala i stap lidim yumi tru long Tabu Spirit. Mifala i no wantem nara samting, be blong talem wanem we i tru, mo blong leftemap tingting blong yufala blong mekem wanem we Tufala i putum i stap olsem rod ia blong laef we i no save finis, “we i presen we i moa hae long evri nara presen blong God” (Doktrin mo Ol Kavenan 14:7).
III.
Hemia i wan nara eksampol blong wanem risal blong ol desisen we yumi stap mekem tedei i gat long fiuja blong yumi. Hem i abaot joes blong mekem wan sakrifaes naoia blong kasem wan fiuja gol.
Long wan stek konfrens long Kali, Kambodia, wan sista i tokbaot olsem wanem we hem mo fiuja man blong hem, tufala i wantem go mared long tempol, be tempol we i kolosap moa, i stap longwe long Peru. Blong wan longfala taem, tufala i sevem mane blong tufala blong pem bas fea. Nao, tufala i tekem bas we i go long Bogota, be taem tufala i kasem longwe, oli faenem se i nomo gat ples long bas i go long Lima, Peru. Tufala i save gobak hom, mo no mared, o go mared aotsaed long tempol. Laki tumas, i bin gat wan nara wei. Tufala i save tekem bas ia i go long Lima, sapos tufala i glad blong sidaon long floa blong bas blong ful faef dei mo faef naet we bas bae i ron. Tufala i jusum blong mekem hemia. Sista ia i talem se i bin had, iven we sam long bas, samtaem, oli givim jea blong olgeta blong mekem se oli save stretem leg blong olgeta.
Wanem i tajem mi, long toktok blong hem, i we hem i talem se hem i talem tangkyu se hem mo hasban blong hem i bin save go long tempol long wei ia, from se i jenisim wei we tufala i bin filim abaot gospel mo wei we tufala i bin filim abaot mared insaed long tempol. Lod i bin givim praes long tufala wetem moa save long gospel we i kam from sakrifaes ia. Hem i talem tu se, faef dei trip ia i go long tempol, i mekem moa long saed blong bildimap spirit blong tufala bitim eni nara visit long tempol we i no bin nidim wan sakrifaes.
Long ol yia afta we mi bin harem testemoni ia, mi bin askem miwan se, bae laef blong yangfala kapol ia bae i go olsem wanem sapos oli bin mekem wan nara joes—blong lego sakrifaes we i bin nid blong mekem blong go mared long tempol.
Ol Brata. Yumi mekem plante kaen joes long laef, sam oli bigwan, mo sam oli smol. Taem yumi lukluk i gobak, yumi save luk olsem wanem sam long ol joes we yumi stap mekem long laef blong yumi, oli mekem samting i defren. Yumi mekem ol moa gud joes mo desisen sapos yumi luk long ol defren kaen joes we oli stap, mo tingting hevi se bae oli lidim yumi i go wea. Taem yumi mekem olsem, bambae yumi stap folem kaonsel blong Presiden Russell M. Nelson blong stat wetem en long maen. Long yumi, en ia, olsem i oltaem stap long kavenan rod ia i gotru long tempol i go kasem laef we i no save finis, we i presen blong God we i moa bigwan olgeta.
Mi testifae abaot Jisas Kraes mo risal blong Atonmen blong Hem, mo ol nara trutok blong gospel we i no gat en, blong Hem, long nem blong Jisas Kraes, amen.