Stap Mekem Ol Masel blong Spirit blong Yumi Oli Wok
Semmak olsem blong stap ridim mo stap lanem abaot ol masel blong bodi i no naf blong bildimap strong masel, blong stap ridim mo stap lanem abaot fet mo no praktisim o ademap aksen long hem, i no naf blong bildimap fet.
Mi talem tangkyu long blesing ia blong gat wan bodi blong mit mo bun, we i wan presen we i gud tumas we Papa blong yumi long Heven i givim. Ol bodi blong yumi i gat moa long 600 masel. Plante masel oli nidim blong eksasaes blong mekem se oli stap gud mo save mekem ol aktiviti we yumi stap mekem evri dei. Yumi save yusum fulap efot long tingting blong stap ridim mo lanem abaot ol masel blong yumi, be sapos yumi ting se bae hem ia i mekem olgeta i kam moa strong, bae yumi no glad nating. Ol masel blong yumi oli gro nomo taem yumi yusum olgeta.
Mi kam blong luksave se fasin blong ol presen long saed blong spirit i semmak long ol masel. Oli nid blong yumi praktisim olgeta blong mekem oli gro. Eksampol. Fet, we i wan presen long saed blong spirit, i no jes wan filing nomo; hem i wan prinsipol blong aksen, we fulap taem long skripja, oli yusum wetem wan aksen toktok olsem praktisim o yusum. Semmak olsem blong stap ridim mo stap lanem abaot ol masel i no naf blong bildim masel, blong stap ridim mo stap lanem abaot fet mo no praktisim i no naf blong bildim fet.
Taem mi gat 16 yia, bigfala brata blong mi we i bigwan long mifala evriwan, Ivan, i gat 22 yia long taem ia, i bin kambak long haos wan dei mo serem sam nius wetem famli. Hem i bin disaed blong baptaes long Jos blong Jisas Kraes blong Ol Lata-Dei Sent. Papa mo mama blong mi i lukluk hem wetem tu tingting, mo mi tingbaot se mi no andastanem wan samting we i stap go hed. Wan yia afta, hem i givim sam moa nius blong sapraes: hem i bin disaed blong wok olsem wan misinari blong Jos, we i minim se bae mifala i no luk hem blong tu yia. Mama mo papa blong mi i no glad tumas long nius ia; be, mi bin luk long hem wan klia mo strong tingting we i mekem mi lukluk moa antap long hem mo desisen we hem i bin mekem.
Sam manis afta, taem Ivan i stap wok olsem wan misinari yet, mi bin gat janis blong planem wan holidei wetem sam fren long skul. Mifala i bin wantem selebretem en blong ol hae skul yia blong mifala mo spenem sam dei long sanbij.
Mi raetem wan leta i go long misinari brata blong mi mo mi talem smol abaot ol plan blong holidei blong mi. Hem i raet i kambak se taon we hem i stap wok long hem i stap long rod we bae mi pas long hem blong kasem ples we mi wantem go long hem. Mi disaed se bae i wan gud aedia blong stop mo visitim hem. I no long taem nomo mi lanem se ol famli blong ol misinari oli no sapos blong visitim olgeta.
Mi mekem ol plan. Mi tingbaot we mi stap sidaon long bus mo stap tingbaot ol fulap naes samting we mi mo Ivan bae i gat long naes dei ia. !Bae mitufala i dring ti, storian, pleplei long sanbij, lego san i bonem mitufala—bae i wan gudfala taem stret!
Taem bas i stop, mi luk Ivan i stap stanap narasaed long wan nara yangfala man, mo tufala tugeta i werem ol waet set mo nek tae. Mi kamaot long bas, mitufala i haggem mitufala mo hem i introdiusum mi long kompanion blong hem. Mi no westem taem mo talem long brata blong mi ol plan blong dei ia, be mi no bin save wanem Ivan i bin planem finis. Hem i luk mi, mo i smael, mo i talem, “!I stret wantaem! Be,yumi nid blong mekem sam samting fastaem. ?Yu save kam wetem mifala?” Mi agri, wetem tingting se bae mifala i gat inaf taem blong enjoem sanbij afta.
Long dei ia, blong moa long 10 aoa, mi wokbaot long strit blong taon ia wetem brata blong mi mo kompanion blong hem. Mi smael long ol pipol ful dei. Mi talem halo long ol pipol we mi neva luk long laef blong mi. Mifala i toktok long evriwan, noknok long ol doa blong ol strenja, mo visitim ol man we brata blong mi mo kompanion blong hem oli stap tijim.
Long wan long ol visit ia, brata blong mi mo kompanion blong hem i stap tij abaot Jisas Kraes mo plan blong sevem man. Afta, Ivan i stop mo i lukluk mi. Long sapraes blong mi, hem i askem mi wetem kaen fasin blong serem tingting blong mi abaot wanem we oli stap tijim. I nomo gat noes long rum mo evri ae i stap long mi. Wetem smol had wok, mi bin faenem ol toktok mo serem ol filing blong mi abaot Sevya. Mi no bin save sapos wanem mi serem i raet o rong. Brata blong mi i neva korektem mi; be, hem i bin talem tangkyu long mi blong serem ol tingting mo filing blong mi.
Long ol aoa ia we mifala i stap tugeta, brata blong mi mo kompanion blong hem i no bin spenem wan minit blong tijim wan lesen stret long mi, be yet, mi bin kasem moa save bitim evri storian we bin gat wetem hem. Mi bin witnes long hao ol fes oli bin jenis taem ol pipol oli bin kasem laet ia long saed blong spirit long ol laef blong olgeta. Mi bin luk olsem wanem sam long olgeta i faenem hop long ol mesej ia, mo mi bin lanem hao blong givim seves long ol nara wan mo fogetem mi wan mo ol samting we mi wantem. Mi stap mekem wanem Sevya i bin tijim: “Man we i wantem kam biaen long mi, hem i mas blokem ol samting we hem nomo i wantem.”
Taem mi stap lukluk i gobak, mi luk save se fet blong i gro long dei ia from brata blong mi i givim janis long mi blong putum long aksen. Mi bin praktisim taem mifala i rid long ol skripja, lukaotem ol man blong tijim, serem testemoni, givim seves long ol nara wan, mo i go mo i go. Mi no bin gat janis blong lego san i bonem mi smol long dei ia, be hat blong mi i bin swim long laet we i kam long heven. Mi no bin luk wan sid blong sanbij, be mi filim fet blong mi i gro olsem smol sid blong wan masted sid. Mi no bin spenem dei ia olsem wan turis, be mi bin kasem sam eksperiens we i naes tumas, mo mi no bin luk save se, mi bin wan misinari—we mi no iven wan memba blong Jos!
Ol janis blong Stap Bildimap Ol Masel blong Spirit.
Tangkyu long gospel we i kambak long wol bakegen, we i mekem yumi save kam blong andastanem hao Papa long Heven i help yumi blong developem ol presen ia long saed blong spirit. Bae Hem i givim yumi ol janis blong developem ol presen ia moa bitim blong givim stret long yumi we yumi no traehad long saed blong spirit mo bodi. Sapos yumi stap long laen wetem Spirit blong Hem, bae yumi lanem blong luk save ol janis ia mo mekem folem olgeta.
Sapos yumi lukaot moa blong gat fasin blong wet long taem, bae yumi faenem se yumi nid blong stap praktisim taem yumi stap wet long wan ansa. Sapos yumi wantem blong gat moa lav long ol neiba blong yumi, yumi save bildim lav ia taem yumi sidaon narasaed long sam we oli niu long jos. Wetem fet i semmak: taem ol tu tingting oli long ol maen blong yumi, yumi nid blong tras long ol promes blong Lod blong save muv i go fored. Long wei ia, yumi stap praktisim ol masel blong yumi long saed blong spirit mo stap developem olgeta oli kam olsem ol ples blong karem paoa, insaed long laef blong yumi.
Ating bae i no isi long stat, mo bae i iven save kam wan bigfala jalenj. Ol toktok blong Lod, tru long profet Moronae, i kam long yumi tedei: “Mo sapos ol man oli kam long mi, bae mi soem long olgeta, wiknes blong olgeta. Mi givim wiknes long ol man blong mekem se oli save putum tingting blong olgeta i stap daon; mo gladhat blong mi, i naf blong evri man we i putum tingting blong olgeta i stap daon long fored blong mi; from sapos oli putum tingting blong olgeta i stap daon long fored blong mi, mo gat [o praktisim] fet long mi, nao ol samting ia we oli no strong long olgeta, bae mi mekem olgeta oli winim mo kam strong long olgeta.”
Mi talem tangkyu long brata blong mi Ivan, we i no serem gospel nomo wetem mi be tu, hem i bin invaetem mi blong laef folem mo luk save ol wiknes blong mi. Hem i helpem mi blong akseptem invitesen blong Masta: “Kam folem mi”—blong mekem olsem Sevya i bin mekem, blong lukaot olsem Sevya i bin lukaot, mo blong lav olsem Sevya i bin lavem yumi. Sam manis afta, afta long eksperiens blong misinari blong mi, mi bin disaed blong kasem baptaes mo go wok long misin blong mi wan.
Bae yumi akseptem invitesen blong Presiden Russell M. Nelson, mo wetem hat we i wantem, yumi kam long Sevya taem yumi stap faenemaot ol masel ia we oli nidim moa aktiviti long saed blong spirit, mo taem yumi stat blong yusum olgeta. Hem ia i wan longfala resis, wan maraton, be i no wan kwik sot resis; so no fogetem ol smol aktiviti long saed blong spirit, we oli hapen oltaem, we bae i mekem ol impoten masel ia long saed blong spirit oli kam moa strong. Sapos yumi wantem blong mekem fet blong yumi i kam moa bigwan, letem yumi mekem ol samting we i nidim fet.
Mi serem wetem yufala witnes blong mi se yumi ol pikinini blong wan Papa long Heven we i gat lav. Pikinini blong Hem, Jisas Kraes, i lavem yumi. Hem i kam long wok ia blong soem rod long yumi mo i givim laef blong Hem long fri wil blong hem blong givim yumi hop. Sevya i invaetem yumi blong folem eksampol blong Hem we i stret evriwan, blong praktisim fet blong yumi long Hem mo Atonmen blong Hem, mo blong mekem ol presen ia long saed blong spirit i kam moa bigwan, we oli bin blesem yumi wetem. Hem nao, Hem i rod. Hemia i testemoni blong mi, long nem blong Jisas Kraes, amen.