Kworom: Wan Ples we Yumi Pat long Hem

I Kam long Elda Carl B. Cook

Blong Presidensi blong Olgeta Seventi

Lod i wantem se yufala i stanemap wan strong kworom. Taem we Lod i stap pulum tugeta ol pikinini blong Hem, oli nidim wan ples we bae oli pat long hem mo stap gro.

Long 2010, Andre Sebako i bin wan yang man we i stap lukaotem trutok. I nomata we hem i neva mekem wan prea wetem evri hat blong hem bifo, hem i disaed blong traem. I no longtaem afta, hem i mitim ol misinari. Oli givim hem wan paskad wetem wan pikja blong Buk blong Momon. Andre i filim wan samting mo i askem sapos ol misinari oli save salem buk ia long hem. Oli talem long hem se hem i save karem buk ia i fri sapos hem i save kam long jos.

Andre, hemwan i go long jos, long niufala Mojudi Branj we oli jes krietem long Botswana, Afrika. Be branj ia i wan branj we i gat lav, i wan smol grup we oli wok wan we i gat samples 40 memba. Oli welkamem Andre wetem open han. Hem i bin kasem ol misinari lesen, mo i kasem baptaes. !I bin gud tumas!

?Be afta, wanem? ?Hao bae Andre i stap aktiv? ?Hu nao i helpem hem blong progres long kavenan rod ia? Wan ansa blong kwestin ia i !prishud kworom blong hem!

Evriwan we i kasem prishud, i nomata situesen blong hem, i kasem sapot long wan strong kworom. Ol yang brata we yufala i holem Aronik Prishud. Lod i wantem yufala i stanemap wan strong kworom, wan ples we wanwan mo evri yang man i pat long hem, wan ples we Spirit blong Lod i stap long hem, wan ples we evri memba blong kworom oli welkam mo oli filim impoten. Taem we Lod i stap pulum tugeta ol pikinini blong Hem, oli nidim wan ples we bae oli pat long hem mo stap gro.

Wanwan long yufala, ol memba blong kworom presidensi, i lidim rod ia taem yufala i lukaotem insperesen mo developem lav mo fasin blong stap brata long medel blong evri memba blong kworom. Yufala i lukluk speseli long olgeta we oli niu memba, olgeta lesaktiv, o olgeta we oli gat ol spesel nid. Wetem prishud paoa, yufala i stap bildim wan strong kworom. Mo wan kworom we i strong, i yunaet, i mekem evri samting i defren long laef blong wan yang man.

Taem we Jos i anaonsem niufala fasin blong lanem gospel long hom olsem senta, sam oli tingting long ol memba olsem Andre, mo askem: “?Be olsem wanem long ol yang pipol we oli kam long ol famli situesen we oli no stap stadi long gospel, mo i no gat wan ples blong lanem samting mo laef folem gospel? ?Olgeta bae oli no pat?”

!No! !I no gat wan we bae i stap hemwan! Lod i lavem wanwan yang man mo wanwan yang woman. Yumi, olsem ol man we i kasem prishud, yumi ol han blong Lod. Yumi sapot blong Jos blong ol wok insaed long hom senta. Taem i no gat tumas sapot long hom, ol prishud kworom mo ol nara lida mo fren oli lukluk ova mo sapotem wanwan man, woman mo famli olsem we i nid.

Mi luk hemia i wok. Mi gat eksperiens long hemia. Taem mi gat sikis yia, papa mo mama blong mi oli divos, mo papa i aot, i lego mama wetem faef yang pikinini. Mama blong mi i stat blong wok blong lukaot long mifala. Hem i nidim 2 wok blong wan smol taem, mo tu, hem i mas gobak skul. I no gat tumas taem blong hem i tijim mifala. Be ol bubu, ol anggel, ol anti, ol bisop, mo ol hom tija oli kam insaed mo helpem enjel mama blong mi.

Mo mi bin gat wan kworom. Mi glad tumas from ol fren blong mi—ol brata blong mi—we oli bin lavem mo sapotem mi. Kworom blong mi i wan ples we mi pat long hem. Sam oli ting se mi no save mekem mo mi daon tumas from famli situesen blong mi. Maet long tetaem ia. Be ol prishud kworom blong mi oli jenisim ol nogud taem ia. Kworom blong mi i raonem mi, mo i blesem laef blong mi i bitim mak.

I gat olgeta we oli no save mekem mo oli daon tumas raon long yumi. Maet yumi evriwan i olsem long wan wei o nara wei. Be wanwan long yumi long ples ia, i gat wan kworom, wan ples we tugeta, yumi save kasem paoa mo givim paoa. Kworom, hem i “Evriwan blong wan, mo wan blong evriwan.” Hem i wan ples we yumi stap tijim yumi wanwan bakegen, yumi givim seves long ol narawan, mo bildimap yuniti mo stap olsem brata taem yumi wok blong God. Hem i wan ples we merikel i hapen.

Mi wantem blong talem long yufala abaot sam merikel we oli bin hapen long kworom blong Andre long Mojudi. Taem mi serem eksampol ia, lukaotem olgeta prinsipol we i mekem evri prishud kworom we i yusum olgeta, i kam strong moa.

Afta we Andre i baptaes, hem i go wetem ol misinari taem oli bin stap tijim fo nara yang man, we olgeta tu oli baptaes. Naoia, oli faef yang man. Oli stat blong mekem olgeta wanwan mo branj i kam strong moa.

Wan nambasikis yang man, Tuso i baptaes. Tuso i serem gospel wetem tri long ol fren blong hem, mo i no longtaem afta, oli naen evriwan.

Ol disaepol blong Jisas Kraes, plante taem oli kam tugeta long wei ia—samfala nomo long wan taem, taem fren i invaetem olgeta. Long taem blong bifo, taem Andru i faenem Sevya, hem i go kwiktaem long brata blong hem, Saemon, mo i “tekem hem i go long Jisas.” Semmak, i no longtaem afta we Filip i kam folem Kraes, hem i bin invaetem fren blong hem, Natanael blong “kam mo luk.”

Long Mojudi, nambaten yang man i joenem Jos, i no longtaem. Ol misinari oli faenem namba 11. Mo nambatwelef yang man i kasem baptaes afta we hem i luk risal blong gospel long ol fren blong hem.

Ol memba blong Mojudi Branj oli bin glad tumas. Ol yang man ia, “oli bin jenisim laef blong olgeta i go long Lod mo oli bin wok wan long Jos.”

Buk blong Momon i gat wan bigfala pat long jenis blong laef blong olgeta. Tuso i tingbaot: “Mi stat blong ridim Buk blong Momon … evri taem mi fri, long hom, long skul mo evri ples.”

Oratile, hem, gospel i pulum hem from eksampol blong ol fren blong hem. Hem i eksplenem: “I luk se oli jenisim laef olsem nomo. … Mi ting se i mas from smol buk ia we oli stat blong tekem i go raon long skul. Mi save luk se oli kam ol gudfala man. … Mi tu, mi bin wantem jenis.”

Evri 12 yang man ia oli bin kam tugeta mo kasem baptaes, hemia long tu yia taem. Wanwan i wan memba ia nomo long wanwan famli blong olgeta. Be oli bin gat sapot blong Jos famli blong olgeta, wetem Presiden Rakwela, branj presiden blong olgeta; Elda mo Sista Taylor, wan senia kapol misinari kapol; mo ol nara memba blong branj.

Brata Junia, wan lida blong wan kworom, i bin invaetem ol yang man long haos blong hem long ol Sandei aftenun, mo hem i tijim olgeta. Ol yang man oli bin stadi long ol skripja tugeta mo oli holem famli haos naet.

Brata Junia i tekem olgeta blong visitim ol memba, sam pipol we ol misinari oli stap tijim, mo eni narawan we i nidim wan visit. Evri 12 yang man oli hipap long kat blong trak blong Brata Junia. Hem i dropem olgeta long ol hom, long ol kampani blong tu o tri man, mo i pikimap olgeta afta.

I nomata we ol yang man oli jes stat blong lanem gospel, mo oli no filim se oli save gud samting, Brata Junia i talem olgeta blong serem wan o tu samting we oli save wetem ol pipol we oli bin visitim. Ol yang prishud man ia oli bin tij, oli bin prea, mo oli bin help blong lukaot gud long Jos. Oli mekem ol prishud responsabiliti blong olgeta mo oli filim glad ia blong stap givim seves.

Andre i talem: “Mifala i plei tugeta, laf tugeta, krae tugeta, mo kam ol brata.” I tru, oli bin singaotem olgeta “Skwad blong ol Brata.”

Tugeta oli putum wan gol se bae evriwan i go long misin. From se olgeta nomo oli ol memba insaed long ol famli blong olgeta, oli gat fulap samting blong winim, be oli bin helhelpem wanwan long olgeta i go tru.

Wan afta wan, ol yang man ia oli kasem misin koling blong olgeta. Olgeta we oli bin aot faswan, oli bin raet i gobak hom long olgeta we oli stap rere yet, oli serem ol eksperiens mo stap leftemap tingting blong olgeta blong givim seves. Leven long ol yang man ia i go long ol misin.

Ol yang man ia oli bin serem gospel wetem famli blong olgeta. Ol mama, ol sista, ol brata, ol fren, mo tu, ol pipol we oli bin tijim olgeta long ol misin, oli bin jenisim laef mo kasem baptaes. Ol merikel oli bin hapen mo plante laef i kasem blesing.

Mi save harem sam long yufala i tingting se maet wan merikel olsem i save hapen nomo long wan ples olsem Afrika, wan graon we i rere mo ples we kam tugeta blong Isrel i stap go hariap. Be, mi testifae se ol prinsipol ia, we oli bin yusum long Mojudi branj, oli tru long eni nara ples. Long weaples yu stap, kworom blong yu i save gro tru long wok blong mekem memba i aktiv mo wok blong serem gospel. Taem wan disaepol nomo i go luk o stori wetem wan fren, wan, i kam tu. Tu, i kam fo. Fo, i save kam eit. Mo eit, i save kam twelef. Ol branj oli kam ol wod.

Lod i tijim se: “From we long weaples we tu no tri man oli joen wanples long nem blong mi, mi mi stap wetem olgeta.” Papa long Heven i stap rere ol maen mo hat blong ol pipol evri ples raon long yumi. Yumi save folem ol kwaet toktok blong Spirit, sakem wan han blong felosip, serem trutok, invaetem ol narawan blong ridim Buk blong Momon, mo lavem mo sapotem olgeta taem oli kam blong save Sevya blong yumi.

I kolosap 10 yia nao we Skwad blong Ol Brata blong Mojudi oli statem rod blong olgeta tugeta, mo oli stap yet olsem wan grup blong ol brata.

Katlego i talem: “Maet mifala i stap farawe long mifala, be mifala i stap givgivhan yet long wanwan blong mifala.”

Hem i prea blong mi se bambae yumi akseptem invitesen blong Lod blong kam joen wetem Hem insaed long ol prishud kworom blong yumi, blong wanwan long ol kworom ia i save kam wan ples we yumi pat long hem, we yumi kam tugeta long hem, wan ples blong gro.

Jisas Kraes i Sevya blong yumi, mo hemia i wok blong Hem. Mi testifae long hemia, long nem blong Jisas Kraes, amen.