Ol Ansa long Prea
Papa i save gud long yumi, i save gud nid blong yumi, mo bae i helpem yumi i stret gud nomo.
Wan impoten mo gudfala doktrin blong gospel blong Jisas Kraes, i we, Papa blong yumi long Heven i gat wan lav we i stret evriwan long ol pikinini blong Hem. From stret lav ia, Hem i blesem yumi i no folem tingting mo nid blong yumi, be tu, folem bigfala waes tingting blong Hem. Olsem we profet Nifae i talem: “Mi save se God i lavem ol pikinini blong hem.”
Wan saed blong stret lav ia, i pat blong Papa long Heven long ol ditel blong laef blong yumi, iven taem yumi no save gud, o andastanem gud. Yumi lukaotem tabu help blong Papa tru long prea we yumi talem wetem hat mo tingting. Taem yumi ona ol kavenan blong yumi mo traehad blong kam moa olsem Sevya blong yumi, yumi gat raet long wan smol reva blong help blong heven we i kam long paoa mo insperesen blong Tabu Spirit.
Ol skripja oli tijim yumi: “Taem yufala i no askem ol samting long Papa blong yufala yet, be hem i save finis ol samting we yufala i sot long hem,” mo “Hem i save evri samting, from evri samting oli stap long fored blong ae blong [Hem].”
Profet Momon i wan eksampol long hemia. Hem i no bin laef blong luk ol risal blong wok blong hem. Be yet, hem i bin andastanem se Lod i bin stap lukaotgud blong lidim hem i go. Taem hem i bin filim insperesen blong putum ol smol buk blong Nifae wetem histri blong hem, Momon i raetem: “Mo mi mekem samting ia blong wan waes stamba tingting; from olsem ia nao Spirit i talem slo long mi, folem fasin blong Spirit blong Lod we i stap long mi. Mo nao, mi no save evri samting; be Lod i save evri samting we bae i kam; taswe, hem i wok tru long mi blong mekem samting we hem i wantem.” Nomata Momon i no bin save se bae 116 pej blong buk bae oli lus, Lod i bin rere wan rod blong winim hemia longtaem bifo i hapen.
Papa i save gud long yumi, i save gud nid blong yumi, mo bae i helpem yumi i gud nomo. Samtaem, help ia i kam long stret taem, o afta we yumi askem help we i kam long heven. Samtaem, gudfala samting we yumi wantem, oli no ansarem long wei we yumi stap hop from, be yumi faenem se God i gat ol bigfala moa blesing i stap blong givim long yumi. Mo samtaem, ol gudfala samting yumi wantem long laef, hem i no givim long laef ia. Bae mi soemaot tru long tri defren stori, ol wei we Papa blong yumi long Heven i save ansarem ol strong prea we yumi talem long Hem.
Yangfala boe blong mifala, oli singaotem hem blong stap wan misinari long Franis Paris Misin. Blong mekem hem i rere blong givim seves long misin, mifala i go wetem hem blong pem ol sot, ol sut, ol nektae, stoking mo wan kot. Sori tumas, kot hem i wantem, i no gat long stok long saes we hem i nidim. Be, klak blong stoa i talem se kot bae i kam long sam wik taem mo bae oli save sendem i go long misinari trening senta long Provo bifo boe blong mifala i aot i go long Franis. Mifala i pem kot mo nomo tingting long hem.
Boe blong mifala i go long misinari trening senta long Jun, mo oli sendem kot jes sam dei bifo hem i aot long Ogis. Hem i no traem kot be i hariap i pakemap long sutkes wetem ol klos mo nara samting blong hem.
Taem Winta long Paris i kam, long ples we boe blong mifala i stap givim seves long hem, hem i raet i kam long mifala se, hem i karemaot kot blong hem, i traem, be i smol tumas long hem. Mekem se mifala i mas putum ekstra mane long bank akaon blong hem, blong hem i pem wan nara kot long Paris, mo hem i mekem. Mi no fil gud tumas, mi raet i go long hem mo talem se bae i givimaot fas kot ia from se hem i no save yusum.
Afta, mifala i kasem wan imel long hem, i go olsem: “Ples i kolkol we i kolkol long ples ia. … Win ia i stap gotru long bodi blong mifala, nomata niu kot blong mi i gud mo i hevi gud. Mi givim olfalawan blong mi long wan nara misinari long apatmen blong mifala, we i talem se hem i bin stap prea blong wan rod blong kasem wan moa gud kot. Hem i wan konvet blong plante yia finis mo hem i gat mama blong hem nomo … wetem misinari ia we i baptaesem hem, we tufala i stap sapotem hem long misin blong hem, mekem se kot ia, i wan ansa long wan prea, mekem se mi filim hapi long hemia.”
Papa long Heven i bin save se misinari ia, we i stap long misin long Franis kolosap 10,000 kilometa longwe long hom blong hem, bae i nidim kwik wan niu kot blong kolkol Winta long Paris, be, misinari ia, bae i no gat rod blong pem wan niu kot. Papa long Heven i bin save tu se boe blong mifala i kasem ol klos i kam long wan stoa long Provo, Yuta, wan kot we bae i smol tumas. Hem i bin save se tufala misinari ia, bae oli wok tugeta long Paris mo kot ia bae i ansa long wan hambol mo tru prea blong wan misinari we i gat wan kwik nid.
Sevya i bin tijim:
“Ol smosmol pijin ya we man i stap salem siksti vatu long tu, be sipos Papa blong yufala i no letem, i no gat wan long olgeta we i save foldaon long graon.
“Yufala i luk. Ol hea blong hed blong yufala, be hem i kaontem evriwan.
“From samting ya, yufala i no fraet. Long fes blong hem, yufala i gud moa, i winim plante smolfala pijin ya.”
Long sam nara situesen, taem God i no givim wanem yumi wantem long wei we yumi stap hop from, maet i blong bigfala gud blong yumi. Eksampol, Josef, boe blong Jekob, ol brata blong hem oli jalus mo no laekem hem, i go kasem we oli mekem sikret plan blong kilim Josef i ded. Be, oli bin salem hem olsem wan slef i go long Ijip. Sapos i gat wan i bin filim se ol prea blong hem oli no gat ansa long wei we hem i hop from, maet i bin olsem Josef ia nao. Wanem i tru, i we, nogud taem ia blong hem i kam ol bigfala blesing long hem mo hem i sevem famli blong hem blong oli no hanggri. Samtaem afta, from se hem i kam blong lida long Ijip we oli trastem hem, wetem strong fet mo waes tingting, hem i talem long ol brata blong hem:
“Be i nogud yufala i stap harem nogud, mo stap jajem yufala from yufala i salemaot mi. Hemia i wok blong God ya, we hem i sanem mi mi kam fastaem long ples ya, blong mi sevem laef blong ol man.
“Hemia i namba tu yia nomo blong hadtaem ya we bambae i no gat kakae long ples ya. Be i gat faef yia i stap yet, we ol man bae oli no save mekem garen, mo no save tekemaot kakae long garen.
“God i mekem we mi mi kam fastaem long yufala long ples ya, blong mi sevem yufala mo mekem rod blong olgeta we bae oli kamaot biaen long yufala oli no lus.
“I no yufala we i sanem mi mi kam long ples ya, God nomo i sanem mi
Taem hem i stap long yunivesiti, oli tekem bigfala boe long wan gudfala pat taem studen wok we i save lidim hem long wan gudfala fultaem wok afta we hem i graduet. Hem i bin wok had long wok ia blong fo yia, i kam kwalifae gud, mo olgeta we oli wok wetem hem oli respektem hem, semmak wetem ol supavaesa. Long en blong senia yia blong hem, kolosap olsem we heven i mekem (long tingting blong boe blong mifala), fultaem posisen ia i open, mo hem nao i nambawan kandidet, wetem evri saen we i soem se bae Hem i karem wok ia.
Ok, hem i no karem wok ia. I no gat wan long mifala i save andastanem. Hem i bin rere gud, i intaviu gud, mo i kandidet we i kwalifae moa, mo !hem i bin prea from wetem bigfala hop! Hem i harem nogud tumas, mo i fil daon, mo evri samting ia i mekem se mifala i sikrasem hed smol. ?From wanem God i lego hem long stret mo gud tingting blong hem?
Sam yia afta nomo, ansa i kam klia tumas. Sapos hem i bin kasem drim wok blong hem afta long graduesen ia, bae hem i mestem wan bigfala impoten jenis long laef blong hem, we naoia, i pruvum se i blong gud blong hem mo i wan blesing blong hem we i no save finis. God i bin save en stat long stat (olsem Hem i stap mekem oltaem), mo olsem long kes ia, i ansa long plante stret mo gud prea, i no, from se i gat wan narawan we i moa gud i stap kam.
Mo samtaem, ansa long prea ia we yumi wantem wetem stret hat mo wantem tumas, i no save kam long laef ia.
Sista Patrisia Pakinson, i bon we ae blong hem i gud, be taem hem i kasem seven yia, hem i stat blong go blaen. Long naen yia, Pat i stat blong go long Yuta Skul blong Olgeta we oli Nambut mo Blaen, long Ogden Yuta, 145 kilometa longwe long hom blong hem, mekem se i nid blong hem i slip long skul—we i tekem evriwan long ol homsik we wan blong naen yia i save gotru long hem.
Taem hem i gat 11 yia, hem i nomo luk wan samting. Pat i kambak hom fogud, mo taem hem i kasem 15 yia, hem i go long wan lokol hae skul. Hem i gohed long yunivesiti mo graduet wetem wan andagraduet digri long sik blong komunikesen mo tingting, mo afta we hem i winim tingting blong sam yunivesiti ofisa, hem i gohed mo finisim wan masta digri long sik blong save toktok. Naoia, Pat i wok wetem 53 praemeri skul studen mo i supavaesem fo teknisen blong sik blong toktok long distrik skul blong hem. Hem i pem wan haos mo wan trak blong hem, we ol fren mo memba blong famli oli draevem taem Pat i nidim transpot.
Taem hem i gat 10 yia, Pat i mas gotru long wan nara operesen blong lukluk long ae blong hem we i no save luk gud. Papa mo mama blong hem, oltaem oli talem stret long hem wanem i stap gohed long saed blong medikol kea blong hem, be from sam risen, oli no bin talem long hem abaot operesen ia. Taem oli bin talem long hem apoenmen taem blong operesen, Pat, long toktok blong mama blong hem, i harem nogud tumas. Pat i ron i go long nara rum, be i kambak afta, mo talem long papa mo mama blong hem, we i harem nogud finis, “Bae mi talem wan samting. Mi save. God i save, mo yutufala tu i mas save. !Bae mi blaen long ful laef blong mi!”
Sam yia i pas, Pat i travel long Kalifonia blong visitim ol memba blong famli we oli bin stap laef long ples ia. Taem hem i stap aotsaed wetem nefiu we i gat tri yia, nefiu ia i talem long hem: “Anti Pat, ?from wanem yu no askem nomo long Papa long Heven blong hem i givim ol niufala ae long yu? From se sapos yu askem Papa long Heven, bambae Hem i givim yu wanem we yu wantem. Yu jes nid blong askem Hem nomo.”
Pat i talem se hem i sek long kwestin ia, be hem i ansa: “Oraet. Samtaem Papa long Heven i no wok olsem. Samtaem Hem i nidim yu blong lanem wan samting, mo Hem i no givim evri samting we yu wantem. Samtaem yu mas wet. Papa long Heven mo Sevya, Tufala i save gud wanem i gud blong yumi mo wanem yumi nidim. Mekem se, bae Tufala i no givim yu evri samting we yu wantem long stret taem we yu wantem.”
Mi bin save Pat blong plante yia, mo i no longtaem i pas, mi bin talem long hem se mi glad tumas se, oltaem, hem i gat gud tingting mo stap hapi. Hem i ansa: “Ah. Yu no stap long hom wetem mi ia. Mi gat ol taem blong mi. Mi bin gat sam strong taem we tingting i fasfas, mo mi bin krae plante.” Hem i ademap, “Be, stat long taem we mi nomo save luk samting, i bin defren, be mi bin save se Papa long Heven mo Sevya oli bin stap wetem famli blong mi mo mi. Mifala i handelem long bes wei we mifala i save, mo mi ting se mifala i handelem long stret wei. Mi kam blong gat sakses, mo plante taem, mi mi bin stap hapi. Mi tingbaot han blong Hem we i stap long evri samting. Long olgeta we oli stap askem mi se mi kros from se mi blaen, mi ansa: ‘?Bae mi kros long hu? Papa long Heven i stap wetem mi long hemia; mi no stap miwan. Hem i stap wetem mi evri taem.’”
Long kes ia, tingting blong Pat blong luk samting bakegen, bae i no save hapen long laef ia. Be moto blong hem, hem i lanem long papa blong hem: “Hemia tu bambae i kam blong hapen.”
Presiden Henry B. Eyring i talem: “Papa, naoia i stap, i savegud yufala, filing blong yufala, mo ol nid long spirit mo laef blong evriwan raon long yufala.” Trutok ia we i bigwan mo i givim kamfot, yumi save faenem long ol trifala eksperiens ia we mi bin talem.
Ol brata mo sista. Samtaem, prea blong yumi i gat kwik ansa wetem risal we yumi hop from. Samtaem, prea blong yumi i no gat ansa long wei we yumi hop from, be yet, wetem taem, yumi lanem se God i gat ol bigfala moa blesing we Hem i rere blong yumi bitim hemia we yumi ting long hem. Mo samtaem, ol gudfala samting yumi wantem long laef, hem i no givim long laef ia. Olsem we Elda Neal A. Maxwell i talem: “Fet i tekem tu, tras ia long taem blong God.”
Yumi save stret se, long wei blong Hem mo long stret taem blong Hem, Papa long Heven bae i blesem yumi mo i stretem ol wari blong yumi, ol samting we i no stret mo ol samting we yumi harem nogud from.
Blong kwotem King Benjamin: “Mo antap long samting ia, mi wantem se yufala i tingbaot gudfala mo hapi ples blong olgeta we oli holem ol komanmen blong God. From luk, Lod i blesem olgeta long evri samting, ol samting blong laef ia tugeta wetem blong spirit; mo sapos oli fetful kasem en, bae oli go insaed long heven, blong mekem se oli save stap wetem God long wan ples blong hapi we i neva gat en. O tingbaot, tingbaot se ol samting ia oli tru; from Lod God i bin talemaot ol samting ia.”
Mi save se God i harem ol prea blong yumi. Mi save se, olsem wan Papa we i save evri samting mo i gat lav, Hem i ansarem ol prea blong yumi i stret nomo, folem waes blong Hem we i no gat en, mo long ol wei we bae i blong gud blong yumi mo blong blesem yumi. Mi testifae long hemia, long nem blong Jisas Kraes, amen.