Prishud Pleibuk
Krietem pleibuk blong yuwan long wei we bae yu pruvum yuwan olsem wan disaepol blong Kraes.
Long las Disemba, Fas Presidensi i givimaot wan toktok we i anaonsem se ol boe we oli gat 11 yia “oli stat blong go long ol kworom blong Aronik Prishud … long stat blong Jenuware long yia ia we bae oli kasem 12 yia.”
Olsem wan risal, long fas pat blong yia ia, i bin gat plante 11 yia boe we oli sek, we oli ting se bae oli stap long Praemeri kasem nekis betdei, be naoia, oli stap pasem sakramen long ol Sandei olsem ol niu dikon we oli odenem olgeta.
Mi stap tingting se, huia nao i moa sapraes long jenis ia—ol niufala dikon o papa mo mama blong olgeta. Aot long ol 80,000 niu dikon, plante oli stap wetem yumi tedei insaed long bigfala Konfrens Senta ia, o stap tekpat tru long blesing blong teknoloji. !Welkam long bigfala bratahud blong prishud!
Jenis ia i mekem se miting ia i wan histri wan—i luk se hem i bigfala grup blong olgeta we oli holem Aronik Prishud we i eva go long wan jeneral prishud sesen blong jeneral Konfrens. From spesel taem ia, toktok blong mi i go speseli long ol yang man blong Aronik Prishud.
Ol Lesen we Yumi Lanem long Spot
Olsem ol studen, plante long yufala i stap developem ol talen, ol intres, mo ol samting we yufala i laekem tru long sam ekstra aktiviti long skul, o long ol praevet lesen, ol tim, mo ol grup aotsaed long skul, wetem spot tu.
Mi bin laekem spot truaot long laef blong mi, mo oltaem mi laekem olgeta we oli stap developem atletik skil blong olgeta we oli go kasem ol hae level. Blong wan i rili gud long eni samting, antap long ol talen we hem i bon wetem, bae i tekem bigfala disiplin, sakrifaes, mo plante aoa blong trening mo praktis. Ol atlet olsem, plante taem oli harem sam strong toktok we i kam long ol koj, mo oli glad blong lego wan samting we oli wantem naoia, blong kasem wan moa gudwan long fiuja.
Yumi save sam memba blong Jos mo sam we oli kasem prishud, we oli gat sakses long ol hae level blong profesenol atletik. I gat plante gudfala eksampol, be mi save listim sam nomo from taem. Maet bae yu luksave sam long ol atlet ia: long besbol, Jeremy Guthrie mo Bryce Harper; long basketbol, Jabari Parker mo Jimmer Fredette; long soka, Ricardo Rojas; mo ragbi lig, William Hopoate; mo long futbol, Taysom Hill mo Daniel Sorensen. Wanwan i givim fulap long spot we hem i stap plei long hem.
Nomata we oli gat fulap sakses long spot blong olgeta, ol atlet ia, bae oli faswan blong admitim se oli no ol stret atlet evriwan, o ol man we oli stret evriwan. Oli wokhad blong oli beswan long spot blong olgeta—mo blong laef folem gospel. Oli girap sapos oli foldaon, mo oli traehad blong stap strong kasem en.
Stadi long Pleibuk
Long ol tim spot, oli mekem ol plei blong sam gem situesen mo oli putum olgeta oli stap tugeta insaed long wan pleibuk. Ol atlet oli lanem spesifik wok we oli gat long wanwan plei. Ol pleya we oli gat sakses, oli stadi gud evriwan long pleibuk, mekem se taem oli singaotem wan plei, oli save stret wantaem, mo olsem nomo, weaples blong go mo wanem blong mekem.
Foto i kam long Dave Kaup/REUTERS/stock.adobe.com
Long wan semmak wei, yumi, we yumi holem prishud, yumi tu i gat wan tim, (wan kworom,) mo wan pleibuk, (ol tabu skripja mo ol toktok blong ol profet blong tedei).
?Yu yu stap mekem ol tim fren oli kam strong moa?
?Yu yu stadi gud long pleibuk blong yu o no?
?Yu yu andastanem fulwan wok blong yu?
Fesem Oposisen, o Agens
Blong tekem analoji ia i go moa, yumi luk se ol bigfala koj oli save ol paoa mo ol wiknes blong tim blong olgeta, mo tu, olgeta we oli agens. Oli krietem wan plan blong plei we bae i givim olgeta bes janis blong win. ?Be olsem wanem long yu?
Yu save se wanem temtesen nao bae yu foldaon isi long hem, mo yu save talem finis olsem wanem enemi bae i traem blong stopem mo slakem tingting blong yu. ?Yu yu krietem wan plan blong plei mo wan pleibuk, blong mekem se bae yu save hao blong mekem taem yu fesem samting we i agensem yu?
Taem yu fesem ol defren temtesen blong fasin blong laef—nomata yu stap long kampani blong ol narawan, o taem we yu stap yuwan we yu stap luk skrin—yu mas save gem plan blong yu. Sapos wan fren i askem yu blong yu dring alkol, o traem ol drag, yu save hao blong plei. Yu bin praktisim bifo mo yu save wanem blong mekem longtaem bifo i hapen.
Wetem wan plan blong plei, wan pleibuk, mo wan strong komitmen blong plei pat blong yu, bae yu faenem se temtesen i no gat tumas kontrol long yu. Bae yu mekem finis wan desisen long wei we bae yu fesem mo wanem bae yu mekem. Bae yu no nid blong disaed evri taem yu fesem temtesen.
Wan long Olgeta Twelef, i no longtaem i pas, i bin serem wan stori we i soemaot prinsipol ia. Olsem wan pris long hae skul, hem i bin folem ol fren blong hem. Afta we oli go kakae, oli bin stap draev raon taem wan i givim tingting se bae oli go wajem wan kaen muvi ia. Problem i we, hem i save finis se i wan muvi we hem i no blong wajem. Nomata we, kwiktaem, hem i bin filim i hevi mo i wari long situesen ia, hem i bin plan finis from hemia. Hemia i wan pej we i kamaot stret long prishud pleibuk blong hem.
Hem i pulum gud win blong hem, i tekem evri paoa long tingting blong hem, nao i anaonsem, “Mi no intres long muvi ia. Bae yufala i go putum mi long haos blong mi,” mo oli bin mekem. !Wan simpol plei we i lidim hem long viktri! Sam yia afta, wan long ol fren we i bin stap wetem hem long naet ia, i tokbaot olsem wanem eksampol ia i bin pruvum se hemia i wan bigfala paoa long hem, blong hem i gat strong paoa long tingting blong fesem sem situesen long laef blong hem.
Ol Pej blong Wan Pleibuk
Mi askem samfala Brata Lida blong givim sam gem we yu save putum insaed long pleibuk blong yu. Hemia samfala tingting we i kam wetem insperesen:
-
Prea evri dei blong kasem laet ia we i saen moa, mo wan testemoni abaot Jisas Kraes.
-
Lisingud long ol tijing blong papa mo mama blong yu, blong bisop, mo blong ol lida blong Yang Man mo kworom.
-
Stap longwe long ponografi mo rabis samting insaed long sosol media.
-
Tingbaot ol promes we yu bin mekem long God mo wok blong kipim olgeta promes ia.
-
Stadi long ol skripja stori blong ol bigfala profet mo gat ol semmak gud kwaliti.
-
Blesem ol pikinini blong Papa long Heven tru long seves.
-
Gat ol gudfala fren blong helpem yu blong kam man o woman ia we yu wantem kam.
-
Kam wan topman o woman blong yusum ap blong FamilySearch mo lukaotem famli histri blong yuwan.
-
Plan ol ples blong go long hem blong save ronwe long ol rabis samting.
-
Lavem mo help blong mekem ol nara memba blong prishud kworom blong yu oli kam strong moa.
Mi bin toktok tu wetem ol atlet ia we yumi bin luk pikja blong ol. Mi faenem i intresting se oli no talem huia olgeta from ol samting we oli mekem olsem ol profesenol atlet, be from huia olgeta olsem ol boe blong wan Papa long Heven we i gat lav mo olsem ol man we oli kasem prishud blong God.
Nao, lisin long ol tingting blong olgeta:
-
Jimmer Fredette, olsem wan dikon, we i stap lan blong fasem nektae blong hem: “Mi bin lan blong dipen bigwan long save mo fet blong mi, se gospel ia i tru. Hemia i lidim mi blong stap olsem wan … man we i klin inaf blong holem prishud, mo antap long evri samting—blong stap gudfala eksampol.”
-
Bryce Harper, olsem wan hasban, i raetem: “Mi ting se blong kam popula, gat mane, mo kasem wan MVP awod bae i mekem mi hapi. Be wan samting i nogat. Mekem se, mi rere mo go insaed long tempol. Naoia, mi stap long wan rod blong gobak long Papa blong mi long Heven, mo gat wan famli we i no save finis—!we i bigfala glad ia olgeta long wol ia!
-
Daniel Sorensen, olsem wan misinari, i talem: “Wan gudfala pleibuk i wan plan we i yusum ol talen mo ol paoa blong wanwan memba blong tim. Taem mi stap stadi mo praktisim ol tijing blong gospel blong Jisas Kraes, bae mi save hao blong yusum wanem mi strong long hem blong givim seves insaed long prishud.”
-
Jeremy Guthrie, olsem wan misin presiden, i serem skripja ia: “Taem mi bin gat 12 yia mo stap wan dikon …” Mi bin filim Spirit i testifae long mi se “laef ia, i taem … mekem rere blong mitim God.’ Plei plan i fet long God long aksen, mo fasin blong sakem sin tru long Sevya. … Pleibuk ia, oli faenem insaed long ol tabu skripja mo tru long ol profet we oli stap laef.
-
Jabari Parker, long odinesen blong hem long ofis blong elda, i talem: “Mi no save tingting nomo se bae mi kam huia sapos mi no bin mekem desisen ia blong kasem baptaes taem mi bin yangfala. … Mi tangkyu se mi gat God insaed long laef blong mi blong lidim mi evri dei.”
-
Ricardo Rojas, we i stap olsem wan branj presiden naoia, i talem: “Tru long prishud blong God, yumi save helpem wok blong Hem. Oli singaotem yumi blong ‘stap strong mo gat strong paoa long tingting’ blong stap difendem trutok.” Hemia i bin helpem hem blong gat sakses long spot fil mo olsem wan we i holem prishud.
-
Taysom Hill, olsem wan misinari, i filim se gospel blong Jisas Kraes i bin stap olsem wan pleibuk long laef blong hem. Hem i serem: “Blong stap biliv long plan blong God mo mekem bes blong mekem rol blong mi, i bin givim mi wan bigfala filing blong pis mo hapines long laef blong mi, mo mi save se God i glad long ol traehad blong mi.”
-
William Hopoate, taem hem i blesem bebi boe blong hem olsem pat blong fo jeneresen, i talem se gospel i helpem hem blong “faenemaot ol wok plan blong oposisen mo givim strong paoa long spirit blong stanap agensem ol spia blong faea mo givim moa gud seves long ol narawan.”
?Be olsem wanem long yu? ?Yu yu luksave moa hae mo moa tabu aedentiti blong yu olsem wan boe blong God, olsem wan we i holem tabu prishud blong Hem? Wetem aedentiti ia we i no save finis long maen, krietem plei plan blong yu mo prishud pleibuk blong yu we bae i lidim yu long ol taem blong temtesen mo agens. Tingting long rod blong atak mo rod blong difendem yuwan.
Rod blong atak i helpem yu blong mekem testemoni i strong, mo stanap strong ia nao long rod ia we i stret mo i no isi. Ol eksampol oli, prea oltaem, skripja stadi, go long Jos mo long tempol, pem taeting, mo folem kaonsel we i stap long smol buk Blong Ol Yut Oli Kam Strong.
Rod blong difendem yu, oli blong yu plan fastaem long wei we bae yu fesem temtesen. Taem yu gat temtesen blong salemaot ol standet blong yu, yu save finis wanem bae yu mekem.
Yu nidim wan pleibuk from hemia.
?Yu no filim blong prea tedei? I taem blong yu plei wanem plei yu putum finis i stap long plan.
?Yu yu stap filim se testemoni blong yu i no strong inaf? Yu gat wan plei from finis. Yu save wanem blong mekem.
Evriwan I Wan Sta long Ae blong God
Yufala i ol man we i holem tabu prishud blong God. Komitmen blong yu blong holem strong aean rel ia bae i jenisim yu long man o woman ia we i no save finis, we God i krietem yu blong kam olsem.
Hem i save mo i lavem yu. Bae Hem i blesem yu mo lidim ol step blong yu.
Maet yu tingting se yu yu no wan we i spesel, se yu yu no wan top sta. Be hemia i no tru. ?Yu yu save o no, se God i bin talemaot: “Olgeta man mo samting blong wol we oli no strong bae oli kamkamaot mo mekem olgeta we oli gat paoa mo oli strong, oli foldaon”?
?So yu yu filim se yu no strong? ?Yu nating? !Kongratulesen! Yu kam joenem laen.
?Yu yu filim se yu no impoten? ?Yu smol? Ating, yu nao, God i nidim.
?Wanem moa bigfala eksampol ia i stap wetem Deved we i wokbaot long ples blong faet agensem wan strong man, Golaeat? Hem i dipen long Lod, mo wetem wan plan, !Deved i no sevem hemwan nomo, be tu, i sevem ami blong Isrel! Yu mas save se God bae i stap wetem yu taem yu stap askem se bae yu gat strong paoa long tingting blong stap long saed blong Hem. “Sapos God i stap wetem yumi, [hu] bae i save agens long yumi.?”
Hem i save openem ol doa mo helpem yumi blong faenem ol strong samting mo paoa long yumi we yumi neva bin save se yumi gat.
Lisin gud long ol koj we yu trastem, olsem papa mo mama blong yu, bisop mo ol Yang Man lida. Lanem pleibuk. Ridim olgeta skripja. Stadi long ol toktok blong ol lata-dei profet. Krietem plei plan blong yuwan long hao bae yu pruvum yuwan olsem wan disaepol blong Kraes.
Yu mas save fastaem ol plei ia we bae yu yusum blong mekem spirit blong yu i kam strong moa, mo blong stap longwe long ol trik blong enemi.
Mekem hemia, mo yes,bae God i yusum yu.
Nao. I gat samfala we oli seperetem olgeta long gospel mo oli go longwe. Sam oli sidaon long ol stan mo oli stap longwe mo wajem gem. Sam oli jusum blong sidaon nomo long saed jea, iven we koj i traem blong sendem olgeta oli go tekpat. !Mi invaetem yu blong sevem man, sapotem, mo lavem olgeta olsem wan memba blong tim!
Ol narawan oli go insaed long gem—mo mekem samting. Wanem i moa impoten i no hamas talen oli gat, be hamas oli glad blong go stap long fil ia. Oli no wet se bae oli singaotem namba blong olgeta, from se, oli save ol skripja ia we i talem se: “sapos yufala i wantem blong wok blong God, nao God i singaotem yufala long wok.”
Yu save go folem laen.
Yu mekem hemia taem yu stadi mo plei folem prishud pleibuk blong yu.
Folem rod ia, bae yu foldaon mo mestem samting—maet plante, plante taem. Yu yu no stret evriwan; blong mestem samting i pat blong rod ia blong kwalifae we i letem yu blong stretem fasin blong yu mo givim seves long wan wei we i gat moa lav mo sore. Sevya mo Atonmen blong Hem we i no gat en i givim wan rod ia blong winim ol mistek blong yumi tru long tru fasin blong sakem sin.
Ol bigfala atlet, oli stap spendem ol handred aoa blong mekem gud wan smol pat blong plei blong olgeta. Olsem wan we i holem prishud, yu nidim sem kaen maen. Sapos yu mestem, yu sakem sin mo lan aot long hem. Praktis, blong mekem yu mekem gud moa nekis taem. Long en, i stap long yu nao. ?Bae yu lanem wanem i stap long pleibuk?
Mi askem strong long yu: Trastem Lod. Putum ful klos blong faet blong God, mo go insaed long plei ia.
I no gat tumas man i plei profesenol spot long ol hae level, be taem i kam long fasin blong stap disaepol, i gat fulap we oli jusum blong stap folem Kraes.
Wanem i tru, i we, hemia nao misin blong yu long laef ia—blong lanem ol wei blong Lod, blong go long rod blong stap disaepol, mo traehad blong stap laef folem plan blong God. God bae i sapotem mo blesem yu taem yu tanem yu i go long Hem. Yu save mekem hemia from se yu wan top sta long ae blong Hem.
Mi prea se bae yu mekem komitmen ia blong laef klin inaf from tabu prishud ia we yu holem mo bae yu traehad blong mekem tabu rol blong yu evri dei. Mi blesem yufala wetem paoa blong hat blong mekem olsem. Mi ademap testemoni blong mi abaot paoa blong prishud we yufala i stap holem, abaot ol profet we oli stap laef, mo abaot Jisas Kraes mo rol blong Hem olsem Sevya mo Ridima blong yumi. Long nem blong Jisas Kraes, amen.