Stap Harem Voes blong Hem
Ol brata mo sista. Long wan wol we i gat fulap voes i kompit, mi testifae se Papa blong yumi long Heven i mekem se i posibol blong yumi harem mo folem hemia blong Hem.
Eli tedei moning, brata blong waef i givim hem wan not we waef i bin raetem long mama blong hem plante yia i pas. Long tetaem ia, Sista Homer i wan smol gel nomo. Smol pat blong not ia, i rid olsem: “Dia Mama, Mi sore tumas we mi no go serem testemoni blong mi tedei—be mi lavem yu.” Taem mitufala i stap go lanj, mi tingting mo luk se hemia i wan intresting samting. Mekem se mi sidaon, mo mi raetem wan not we i talem se: “Dia Presiden Nelson, Mi sore se mi no givim toktok blong mi tedei—be mi lavem yu.” Be, mi filim se hemia i no stret. Mekem se mi stanap ia, mo mi hapi blong ademap ol toktok blong mi long olgeta we oli bin toktok finis long sesen ia, tedei.
Plante yia i pas, mi bin travel long wan smol plen wetem wan niu paelot we i holem stia. Long en blong flaet blong mifala, oli givim raet blong mifala i lan. Be taem mifala i stap kam kolosap long graon, mi harem wan alam long rum blong paelot we i talem paelot blong pulum plen i go antap. Paelot i luk fren blong hem we i gat moa eksperiens, we i poen i go long daereksen i go daon, longwe long rod blong plen, mo talem “!Naoia!”
Plen blong mifala i muv kwik i go lef mo daon, mo afta i klaem i gobak, i laen bakegen wetem rod blong lan, mo mifala i kasem ples, mifala i sef. Afta long hemia, mifala i lanem se i gat wan nara plen we i stap tekof. Sapos mifala i folem instraksen blong alam, bae mifala i go stret long plen ia we i stap kam. Eksperiens ia i tijim mi tufala impoten lesen. Faswan, long ol impoten taem blong laef blong yumi, bae yumi harem plante defren kaen voes i kompit blong pulum tingting blong mifala. Mo nambatu, hem i impoten blong yumi stap lisin long ol stretwan.
Ol Voes we Oli Kompit
Yumi stap laef long wan wol wetem plante voes we i stap pulum tingting blong yumi. Wetem evri fres nius, ol twit, ol blog, ol podkas, mo advaes blong Aleksa mo Siri, mo ol narawan, yumi save faenem i had blong save wijwan voes blong trastem. Samtaem, yumi askem plante long ol narawan insaed long laef blong yumi, mo ting se bigfala namba nao bae i bes ples blong faenem trutok. Sam nara taem, yumi “stop long tu tingting mo jusum se bae yumi “no kolkol mo bae yumi no hot.” Stil, sam nara taem yumi folem wanem i moa isi, yumi harem nomo wan singgel voes o poen blong lidim yumi, o dipen nomo long paoa blong yumi blong save tingting.
Nomata se tufala rod ia i save help, eksperiens i tijim se yu no save dipen long tufala oltaem. Wanem i popula, i no oltaem wanem i bes. Blong stop bitwin tu tingting i no soem wan rod blong folem. Wanem i moa isi i no lidim man long wanem we i moa impoten. Blong lisin nomo long wan voes nomo o poen, i save blokem yumi blong luk samting. Mo blong stap dipen nomo long tingting blong yumiwan i save lidim yumi long wan yu nomo gat inaf waes blong tingting wetem. Sapos yumi no lukaotgud, ol rong joes oli save lidim yumi longwe long ol gospel senta i go long ol ples we i had blong holemtaet fet, mo yumi faenem se yumi emti moa, yumi konkon moa, mo yumi no glad long wan samting.
Stap Lisin long Rong Voes
Bae mi soem wanem mi minim taem mi yusum analoji mo skripja eksampol. Olgeta we oli klaem long ol hil, oli tokbaot ol ples we i hae moa long 8000 mita olsem ol “ded eria” from se long ol ples hae olsem, i nomo gat inaf oksijen blong sapotem laef. I gat wan ples semmak long saed blong spirit. Sapos yumi spendem tumas taem long ol ples we i no gat inaf fet, ol semmak voes oli save karemaot spirit oksijen we yumi nidim.
Insaed long Buk blong Momon, yumi stap rid abaot Koriho, we i gat wan eksperiens olsem. Hem i glad blong stap popula from ol tijing oli “mekem tingting blong wol ia i hapi.” Hem i talem se ol papa mo mama, mo ol profet oli tijim ol krangke kastom we i blong putum limit long fridom mo mekem man i gohed blong no save samting. Hem i tok strong se ol pipol oli mas fri blong mekem wanem we oli jusum from se ol komanmen ia oli wan gud wei nomo blong putum limit long man. Long hem, bilif long Atonmen blong Jisas Kraes, i “kamaot long wan krangke tingting,” we oli krietem bilif long wan man we i no save stap from se oli no save luk Hem.
Koriho i mekem plante trabol mo oli tekem hem i go fored long jif jaj mo hae pris. Long ples ia, hem i stanap “wetem ol toktok we oli solap long selfis,” i poenem fingga long ol lida mo i askem wan saen. Oli givim wan saen long hem. Hem i kam nambut mo no save toktok. Afta, Koriho i luksave se Setan i trikim hem, mo taem hem i tingting long ol gudfala trutok we hem i bin lego, hem i komplen i talem: “mi bin save oltaem.”
Afta, Koriho i stap askem kaekae olbaot, go kasem wan grup blong Ol Man blong Soram oli purumbut antap long hem gogo kasem hem i ded. Las ves long stori blong hem i tekem wan tingting ia: “Mo olsem ia nao yumi luk en blong hem, we hem i bin prapa spolem gud ol wok blong Lod; mo olsem ia nao yumi luk se devel bae i no sapotem ol pikinini blong hem long las dei, be i pulum daon olgeta kwiktaem nomo i go daon long hel.”
Raet Voes
From se Papa blong yumi long Heven i wantem moa gud samting blong yumi, Hem i mekem i posibol blong yumi harem voes blong Hem. Plante taem, yumi harem Hem tru long ol filing we i kam long Tabu Spirit. Tabu Spirit i nambatri memba blong Godhed. Hem i witnes long yumi abaot Papa mo Pikinini, oli sendem hem blong tijim evri samting long yumi, mo bambae Hem i soemaot long yumi, evri samting we yumi mas mekem.
Spirit i toktok long ol defren pipol long ol defren wei, mo Hem i save toktok long semfala man o woman long ol defren wei long ol defren taem. Olsem wan risal, blong lanem ol plante wei we Hem i stap toktok long yumi, i wan wok blong laeftaem. Samtaem, Hem i stap toktok long maen mo insaed long hat blong yumi, long wan voes we i smol, yet i gat paoa, i stikim olgeta we oli stap harem samting wetem hat blong olgeta. Sam nara taem, ol filing blong Hem oli “stap long maen blong [yumi],” i “pusum strong long ol filing blong [yumi].” Sam nara taem, hat blong yumi bae i “hot insaed long yumi.” Be yet, long sam nara taem, Hem i fulumap sol blong yumi wetem glad, i givim laet long maen blong yumi, o i toktok pis long trabol hat blong yumi.
Stap Faenem Voes blong Hem
Bae yumi faenem voes blong Papa long plante ples. Bae yumi faenem taem yumi stap prea, taem yumi stap stadi long ol skripja, mo taem yumi go long jos, stap gat ol fetful storian, o go long tempol. I tru, bae yumi faenem long konfrens long wiken ia.
Tedei, yumi bin sastenem 15 man olsem ol profet, ol sia, mo ol reveleta. Spirit mo eksperiens blong olgeta i givim olgeta wan spesel lukluk we yumi nidim tumas. Mesej blong olgeta, oli isi blong faenem mo oli talem wetem klia toktok. Oli talem long yumi wanem we God i wantem yumi blong save, i nomata se i popula o nogat.
Blong lukaotem voes blong Hem long wan long ol ples ia, i gud, be blong lukaotem voes ia long plante long olgeta, i gud moa. Mo taem yumi harem voes ia, yumi nid blong folem daereksen we hem i givim. Aposol Jemes i talem: “Yufala i mas mekem ol samting we tok ya i talem.” Mo Presiden Thomas S Monson i tijim: “Yumi luk gud. Yumi wet. Yumi lisin long kwaet, smol voes ia. Taem hem i toktok, ol waes man mo woman oli stap obei.
Taem Daereksen I Slo blong Kam
Eli long profesenol laef blong mi, oli askem Sista Homer mo mi blong akseptem wan jenis long wok blong mi. Long tetaem ia, i luk olsem se hem i wan bigfala desisen. Mifala i bin stadi, livim kaekae, mo mifala i bin prea, be wan ansa i slo blong kam. Long en, mitufala i mekem wan desisen mo go fored. Taem mitufala i mekem olsem, mitufala i filim stret mo lanem afta se i wan long ol bes desisen we mitufala i bin mekem.
Olsem wan risal, mifala i bin lanem se ol ansa, samtaem oli slo blong kam. Maet hemia i from se i no stret taem, o from se yumi no nidim wan ansa,o from se God i trastem yumi inaf blong mekem desisen ia yumiwan. Elda Richard G. Scott i tijim wan taem se, yumi mas talem tangkyu from ol kaen taem olsem mo mekem promes ia: “Taem yu stap laef klin inaf mo joes blong yu i go wetem ol tijing blong Sevya mo yu nidim blong tekem aksen, gohed wetem tras. … God bae i no letem yu go longwe tumas we i no givim wan woning filing sapos yu bin mekem wan rong desisen.”
Yumi Mas Jusum
Mekem se, yumi nid blong disaed se, long medel blong evri defren voes, wijwan nao bae yumi obei. ?Bae yumi folem ol voes we yumi no save dipen we i kam long wol, o bae yumi mekem wok we yumi mas mekem blong letem voes blong Papa i lidim yumi long ol desisen mo i protektem yumi long denja? Moa yumi gat strong tingting blong lukaotem voes blong Hem, moa i isi blong yumi harem. I no se voes blong Hem i kam laod moa, be yumi save harem voes ia moa. Sevya i promes se sapos yumi “lisin long ol rul blong [Hem] mo “lisin long ol advaes blong [Hem],” bambae Hem i givim moa long yumi.” Mi testifae se promes ia i tru—blong wanwan long yumi.
Kolosap wan yia i pas, mifala i lusum bigfala brata long wan nogud trak aksiden. Ol eli yia blong Jon, oli fulap long promes mo gud samting. Be taem hem i stap gro i kam bigman, bodi we i brokbrok mo maen we i no wok gud i mekem laef i had. Nomata hiling we hem i bin hop from i no bin kam long laef blong hem, Jon i holemtaet fet blong hem, i strong blong stap strong, long bes wei we hem i save mekem kasem en.
Nao, mi save se Jon i no stret evriwan, be mi bin askem miwan se wanem nao i mekem hem i stap strong olsem. Plante voes i stap invaetem hem blong i go krangke, be hem i no jusum blong go olsem. Be hem i mekem bes blong hangem laef blong hem long gospel senta. Hem i bin laef long ples ia, from se hem i save se bae hem i faenem voes blong Masta blong hem long ples ia; hem i bin laef long ples ia, from se hem i bin save se long ples ia nao bae oli tijim hem.
Las Toktok
Ol brata mo sista. Long wan wol we i gat fulap voes i kompit, mi testifae se Papa blong yumi long Heven i mekem se i posibol blong yumi harem mo folem hemia blong Hem. Sapos yumi wok wetem strong tingting, Hem mo Pikinini blong Hem bae oli soem daereksen ia we yumi stap lukaotem, paoa we yumi nidim, mo hapines we yumi evriwan i wantem. Long nem blong Jisas Kraes, amen.