Semmak Olsem Hem I bin Mekem
Taem yumi stap lukaotem blong givhan olsem Hem i bin mekem,bae yumi kasem ol janis blong fogetem yumiwan mo stap leftemap ol narawan.
Samples eitin manis i pas, long Ogis 2017, brata blong mi Mike i bin gat 64 yia i bin talemaot long se hem i kasem kansa long pankris. Hem i talem tu long mi se hem i bin kasem wan prishud blesing long hom tija blong hem, mo hem i bin mit tu wetem bisop blong hem. Mo afta, hem i bin teksem wan pikja blong Oklan Kalifonia Tempol we oli tekem long hospital we hem i stap kasem tritmen long hem, wetem ol toktok ia “Yu luk wanem mi save luk long hospital rum blong mi.”
Mi bin sapraes long ol toktok blong hem abaot ol hom tija, ol prishud blesing, ol bisop, mo ol tempol semmak olsem we mi bin sapraes long kansa. Yu luk, Mike, i wan pris insaed long Aronik Prishud, mo hem i no bin stap kam tumas long Jos blong kolosap 50 yia.
Olsem wan famli, mifala i bin intres long progres blong hem long saed blong spirit semmak olsem progres blong hem blong stap faetem kansa, be hemia from ol plante kwestin blong hem abaot Buk blong Momon, paoa blong siling, mo laef afta long ded. Taem ol manis oli pas mo kansa i stap kam bigwan, nid blong givim ol moa spesel tritmen i mekem se oli muvum Mike i go long Yuta mo long Huntsman Kansa Senta.
I no longtaem afta we hem i go, wod misin lida blong wod longwe, John Holbrook i bin visitim Mike mo hem i stap wok long ples ia we Mike i stastap long hem. John i talem “i klia long mi se Mike i wan boe blong God” mo kwiktaem tufala i kam fren, we i lid i go long John i stap olsem givhan brata blong Mike i nomata oli no singaotem hem. Kwiktaem, i gat wan invitesen blong mekem ol misinari oli kam visit, mo brata blong mi i talem no long wan kaen fasin, be afta long wan manis long frensip blong tufala, John i askem bakegen, mo i talem long Mike se, “Mi ting se bae yu laekem blong harem gospel mesej.” Long taem ia, Mike i akseptem invitesen, we i lid i go long sam moa visit wetem ol misinari, mo tu, ol visit blong Bisop Jon Sharp, we i bin toktok fulap long Mike mo i mekem Mike i kasem petriakel blesing blong hem, 57 yia afta long baptaes blong hem.
Long eli Disemba blong las yia, afta long ol manis blong tritmen, Mike i bin disaed blong stopem ol tritmen blong kansa, we i stap mekem hem i harem nogud moa, mo letem ol samting oli go olsem nomo. Ol dokta blong hem oli bin talem long mifala se Mike i gat samples tri manis blong laef. Long taem ia, ol kwestin long saed blong gospel i bin gohed—mo tu, ol visit mo sapot blong ol lokol prishud lida. Long ol visit blong mifala wetem Mike, samtaem bae mifala i luk Buk blong Momon i open long saed bed long taem we mifala i tokbaot Restoresen blong gospel, ol ki blong prishud, ol tempol odinens, mo we man i no save finis.
Long medel blong Disemba, wetem petriakel blesing long han blong hem, i luk olsem Mike i stap kasem moa paoa mo i luk se bae hem i save stap nara tri manis. Mifala i mekem tu ol plan blong hem i kam luk mifala long Krismes, Niu Yia mo i go. Long 16 Disemba, mi kasem wan kol long Bisop Sharp, mo hem i stap letem mi save se hem mo stek presiden i intaviu long Mike, mo hem i klin inaf blong kasem Melkesedek Prishud, mo i bin askem long mi wetaem bae mi save kam blong tekpat. Mifala i planem odinens ia blong Fraedei 21 Disemba.
Taem dei ia i bin kam, waef blong mi Karol, mo mi i go long ples we oli stap lukaot long Mike mo long semmak taem, long rod i go long rum blong Mike, oli bin talem long mifala se hat blong Mike i stop blong wok. Mifala i go insaed long rum mo luk petriak, bisop blong hem, mo stek presiden blong hem oli stap wet finis—afta Mike i openem ol ae blong hem. Hem i luk save mi mo talemaot se hem i save harem mi mo hem i rere blong kasem prishud. Fifti yia afta we oli bin odenem Mike wan pris insaed long Aronik Prishud, mi bin gat janis ia, wetem help blong ol lokol lida blong hem, blong givim Melkesedek Prishud mo odenem brata blong mi long ofis blong elda. Faef aoa afta, Mike i bin lus, mo i krosem vel blong mitim papa mo mama blong mifala olsem wan we i holem Melkesedek Prishud.
Jes wan yia i pas, Presiden Russell M. Nelson i bin singaotem yumi wanwan blong lukaotgud long ol brata mo sista blong yumi long “wan moa hae mo tabu wei.” Taem hem i stap tokbaot Sevya, Presiden Nelson i bin tijim se “from hem i Jos blong Hem, yumi, olsem ol wokman blong Hem, bae yumi givhan long wan ia, semmak olsem Lod i bin mekem. Bambae yumi givhan long nem blong Hem, wetem paoa mo atoriti blong Hem, mo wetem lav blong Hem we i kaen.”
Olsem ansa long invitesen blong wan profet long God, fulap efot blong givhan long wanwan man i stap hapen long evri ples long wol, long tugeta efot we i joen, olsem ol memba we oli fetful blong mekem ol wok blong olgeta olsem ol givhan brata mo sista, mo tu, olsem wanem mi stap singaotem, givhan we “oli no plan from,” olsem we fulap oli stap soem lav olsem blong Kraes long ol taem we oli ting long hem. Long famli blong miwan, mifala i witnesem, long fored blong mifala, kaen givhan olsem.
John, fren mo givhan brata blong Mike mo wan foma misin presiden, i bin stap talem long ol misinari blong hem se “sapos wan man i stap long lis we i talem ‘i no intres,’ yu no givap.” Ol man oli jenis.” Afta hem i talem long mifala, “Mike i bin jenis bigwan.” John i bin wan fren faswan, mo stap leftemap tingting mo givim sapot plante taem—be givhan blong hem i no stop nomo long ol visit. John i bin save se blong givhan i moa bitim wan fren mo frensip i kam strong moa taem yumi stap givhan.
I no nid blong wan man we i stap harem nogud long wan sik we i save karemaot laef blong stap long nid blong yumi givhan long hem. Ol nid ia oli kam long ol defren kaen sep, saes, mo situesen. Wan singgel papa o mama, wan lesaktiv kapol, wan yangfala we i stap traehad, wan mama we i hevi long ol trabol, wan tes blong fet, problem long saed blong mane, helt o mared—i olsem se hadtaem bae i neva finis. Be, olsem brata blong mi Mike, i no gat wan i go longwe tumas, mo i neva let tumas blong Sevya i kasem yu.
Oli bin tijim yumi long Jos websaet blong stap givhan se “nomata i gat plante stamba tingting blong wok blong givhan, ol traehad blong yumi i mas folem tingting ia blong yumi we i wantem blong helpem ol narawan blong oli kasem wan tru jenis tru long laef blong olgeta wanwan mo kam moa olsem Sevya.” Elda Neil L. Andersen i talem long wei ia:
“Wan we i gat gud hat i save helpem wan blong fiksim wil blong trak, tekem fren i go long dokta, kakae wetem wan we i no hapi tumas, o smael mo talem halo mo mekem dei i gud.
“Be wan we i folem fasfala komanmen, bae i ademap samting long ol impoten aksen blong seves ia.”
Taem yumi stap givhan folem eksampol blong Jisas Kraes, i impoten blong rimemba se ol traehad blong Hem blong lavem, leftemap, givim seves, mo blesem narawan, gol biaen long hem i moa hae, i bitim blong jes stap lukluk long wan hariap nid. Hem i bin save gud long ol evri dei nid blong olgeta mo Hem i bin gat lav mo sore long safaring blong olgeta taem Hem i bin stap hilim, fidim, fogivim, mo tijim olgeta. Be Hem i wantem mekem moa bitim blong lukaotgud long dei blong tedei nomo. Hem i wantem olgeta raon long Hem blong folem Hem, save Hem, mo kasem tabu paoa we oli save kasem.
Taem yumi stap lukaotem blong givhan “semmak olsem we Hem i bin mekem,” bae yumi kasem ol janis blong fogetem yumiwan mo stap helpem ol narafala man. Ol janis ia, samtaem oli no stret long yumi, i testem tingting blong yumi blong kam moa olsem Masta, we seves blong Hem we i moa bigwan olgeta, Atonmen blong Hem we i no gat en, i bin stret long Hem nomo. Long Matiu, japta 25, Lod i rimaenem yumi hao Hem i filim abaot yumi, taem, olsem Hem, yumi harem nogud long ol hadtaem, mo ol jalenj we fulap i fesem be fulap taem yumi no luksave:
“Yufala i kam. Papa blong mi i [blesem] yufala. Yufala i kam tekem [kingdom] blong yufala [we Hem i makemaot].
“From we taem mi hanggri, yufala i givim kakae, mo taem mi tosta, yufala i givim wota. Taem mi strenja, yufala i tekem mi go long haos blong yufala …
“Nao bae ol stret man ia bae oli talem long mi se, ‘?Masta, mifala i luk yu wataem we yu hanggri nao mifala i givim kakae long yu? ?No yu tosta nao mifala i givim wota long yu?
“?Mifala i luk yu wataem we yu strenja afta mifala i tekem yu kam long haos blong mifala?
“Nao King bae i talem long olgeta se, ‘Tru mi talem long yufala, taem we yufala i mekem olsem long wan brata blong mi we i moa daon, hemia i olsem we yufala i mekem long mi nomo.”
Nomata we yumi wok olsem ol givhan brata o sista, o taem oli talem long yumi abaot wan we i stap long nid, yumi mas lukaotem blong Spirit i lidim mo daerektem yumi—afta yumi mas mekem. Maet bae yumi tingting long hao yumi save wok moa gud, be Lod i save, mo tru long Spirit blong Hem, bae hem i daerektem yumi long ol efot blong yumi. Olsem Nifae, we “Spirit i lidim [hem]; [hem i] no save yet wanem samting bae [hem i] mas mekem,” yumi tu bae Spirit i lidim yumi taem yumi traehad blong kam olsem ol tul long han blong Lod blong blesem ol pikinini blong Hem. Taem yumi stap lukaotem blong Spirit i lidim yumi mo tras long Lod, bae yumi stap long ol situesen mo ol taem we yumi save tekem aksen mo blesem—o long ol narafala toktok, givhan.
Maet i gat ol nara taem we yumi luksave wan nid be yumi filim se yumi no inaf blong mekem samting, mo yumi ting se wanem we yumi gat blong givim i smol tumas. Be blong mekem “semmak olsem Hem i bin mekem,” hem i blong givhan taem yumi givim wanem yumi save givim mo blong trastem se Lod bae i dabdabolem ol efot blong yumi blong blesem “olgeta long yumi tu we oli stap travel long rod blong laef ia.” Blong sam, maet bae hem i blong givim presen we hem i, taem mo ol talen; blong ol narawan, maet bae hem i wan kaen toktok o mekem sam strong wok. Nomata bae yumi filim se ol efot blong yumi i no inaf, Presiden Dallin H. Oaks i serem wan impoten prinsipol abaot “smol mo simpol.” Hem bin tijim se ol smol mo simpol aksen oli gat fulap paoa from oli invaetem “kampani blong Tabu Spirit,” wan kampani we i blesem tugeta, man we i givim, mo man we i kasem.
Wetem save ia se kolosap bae hem i ded, brata blong Mike i talem, “I naes tumas hao kansa long pankris i save mekem yu lukluk nomo long wanem i moa impoten.” Tangkyu long ol gudfala man mo woman we oli bin luk wan nid, no bin jaj, mo bin givhan olsem Sevya, i mekem se i no bin let blong Mike. Blong sam, jenis i save kam naoia, mo maet blong ol narawan, i save kam afta long vel. Be, yumi mas tingbaot se i neva let tumas, mo i no gat wan we i wokbaot i go longwe tumas long rod mekem se hem i no save kasem Atonmen blong Jisas Kraes, we i no gat wan en long taem mo ples.
Long las jeneral konfrens long Oktoba, Elda Dale G. Renlund i tijim se “i nomata se yumi bin aot long rod ia i longtaem olsem wanem … taem yumi disaed blong jenis, God i stap helpem yumi blong gobak.” Desisen ia blong jenis, i samtaem wan risal blong wan invitesen olsem “Mi ting se bae yu laekem blong harem gospel mesej.” Semmak olsem i neva let tumas long Sevya, i neva eli tumas blong yumi invaetem man.
Taem blong Ista ia bakegen, i givim yumi wan gudfala janis blong luklukbak long bigfala sakrifaes blong Sevya blong yumi, Jisas Kraes, mo wanem Hem i bin mekem blong wanwan long yumi long wan praes we i bigwan tumas—wan praes we Hemwan i talemaot se “i mekem [Hem], we [I] hae long evriwan, [Hem i] seksek from soa long bodi.” “Be,” Hem i talem, “mi finisim wok blong mi blong mekem rere evri samting blong gud blong ol pikinini blong ol man.”
Mi testifae se from Hem i “finisim wok,” nao i gat hop oltaem. Long nem blong Jisas Kraes, amen.