Lukaotgud agens Lukaot Wanwan Taem
Taem we ol fos blong wol oli stap akseptem ivel ia moa, yumi mas traehad wetem strong tingting blong stap strong long rod ia we i lidim yumi sef i go long Sevya.
Wan taem mi bin luk wan saen long windo blong stoa, i talem: “Hapines: 1500 Vatu.” Mi wantem save tumas hamas hapines nao mi save pem blong 1500 vatu, mekem mi go insaed. Mi faenem plante jip smol samting mo suvenir—i no gat samting we mi luk se i save givim long mi kaen hapines we saen ia i tokbaot. Ova long ol yia, mi tingting plante taem long saen ia mo hamas i isi blong lukaotem hapines long ol samting we oli jip mo blong smol taem. Olsem ol memba blong Jos blong Jisas Kraes blong Ol Lata-dei Sent, yumi gat blesing blong save olsem wanem mo weaples oli faenem tru hapines. Oli faenem long fasin blong lukaotgud blong laef folem gospel, we Lod mo Sevya blong yumi, Jisas Kraes i stanemap, taem yumi traem blong kam moa olsem Hem.
Mifala i gat wan gud fren we i wan enjinia blong tren. Wan dei, taem hem i stap draevem tren i go, hem i luk wan trak we i stop long rod blong tren long fored. Kwiktaem hem i luksave se trak ia i fas mo i no save kamaot long rod blong tren. Kwiktaem, hem i putum tren long imejensi, we i mekem brek i kamaot long saed blong wanwan wagun trak blong tren we i longfala long 1.2 kilometa biaen long enjin we i tekem 6500 tan blong ol samting. I nogat janis nating blong tren ia i stop bifo i bangem trak, mo i bin bangem Laki, ol pipol long trak oli harem woning wesil blong tren, mo oli ronwe long trak bifo tren i bangem. Taem enjinia i toktok long polis ofisa, wan woman we i kros i kam kolosap long tufala. Hem i singaot se hem i luk ful aksiden mo i testifae se !enjinia ia, i no iven traem blong tanem tren i kamaot blong i no bangem trak!
Oli luk gud nomo se, sapos enjinia i tanem tren mo tren i aot long rod blong hem blong no aksiden, hem mo ful tren ia bae i go lus mo tren bae i stop wantaem. Laki blong hem, ol aean blong rod blong tren oli holemtaet gud ol wil blong tren i muv i go fored nomata samting we i bin blokem rod blong hem. Laki, blong yumi, yumi tu i stap long wan rod ia, wan kavenan rod, we yumi komitim yumi blong folem taem yumi bin baptaes olsem ol memba blong Jos blong Jisas Kraes blong Ol Lata-dei Sent. Nomata bae yumi fesem samfala samting we i blokem rod blong yumi, be rod ia bae i mekem yumi muv fored i go from ples ia we i gat praes, sapos yumi stanap strong long rod ia.
Visen blong tri blong laef i soem yumi ol risal blong fasin blong lukaot wanwan taem, we i save lidim yumi longwe long kavenan rod. Tekem se aean rel ia mo rod ia we i stret mo i no isi, o kavenan rod ia, i lid i go stret long tri blong laef, we evri blesing i stap long hem, we i kam long Sevya blong yumi mo Atonmen blong Hem, hemia blong olgeta we oli fetful. Yumi luk tu, long visen, se i gat wan reva we i ripresentem ol doti blong wol ia. Ol skripja oli tokbaot se reva ia, “i ron folem” rod ia, be yet, i pas “kolosap” nomo long tri, be i no go long tri ia. Wol blong yumi, i hevi wetem ol samting we oli pulumaot tingting blong yumi, we oli save trikim olgeta tu we God i jusumaot, i mekem olgeta oli lukaot wanwan taem nomo blong laef folem ol kavenan blong olgeta—i stap lidim olgeta kolosap long tri, i no go long tri ia. Sapos yumi no lukaotgud blong laef folem ol kavenan blong yumi long stret we stret fasin, ol traehad we yumi mekem wanwan taem, bae oli lidim yumi long ol rong rod, o i lidim yumi blong go joen wetem olgeta we oli go insaed finis long bigfala haos ia we i gat plante rum. Sapos yumi no lukaot gud, bae yumi save draon long ol bigfala dip ples blong doti reva ia.
I gat wan fasin blong lukaotgud mo wan fasin blong lukaot wanwan taem long wei blong mekem evri samting, mo tu, blong laef folem gospel. Taem yumi tingting long komitmen blong yumi long Sevya, ?yumi lukaotgud o lukaot wanwan taem? From fasin blong yumi long wol ia, ?i no tru se samtaem yumi mekem eskius long fasin blong yumi, mo tekem se ol aksen blong yumi i stap long grei o yumi miksim gud wetem samting we i no gud tumas? Eni taem we yumi talem: “be nomo,” “be sapos,” o “be” long fasin blong folem kaonsel blong ol profet lida blong yumi, o wei blong lukaotgud blong laef folem gospel, i tru, yumi stap talem: “Kaonsel ia i no blong mi yusum.” Yumi save mekem hamas eskius, be wanem i tru, i we, !i no gat raet wei blong mekem rong samting!
Miutuol stamba toktok blong yia 2019, i kamaot long Jon 14:15, we Lod i talem: “Sapos yufala i lavem mi, bambae yufala i save obei long ol tok blong mi.” Sapos yumi lavem Hem olsem we yumi talem, yumi save soem lav ia taem yumi lukaotgud moa blong laef folem ol komanmen blong Hem.
Blong lukaotgud blong stap laef folem gospel blong Hem, i no minim se yumi series o mekem samting i go tumas oltaem. Wanem i minim, i we, blong yumi stap stret long ol tingting mo fasin blong yumi olsem ol disaepol blong Jisas Kraes. Taem yumi tingting hevi long wanem i defren long fasin blong lukaotgud mo lukaot gud wanwan taem long wei blong laef folem gospel, hemia sam tingting blong tingting long hem:
?Yumi lukaotgud long Sabat dei wosip blong yumi mo wei we yumi rere blong tekem mo kakae sakramen evri wik?
?Yumi save lukaotgud moa long ol prea mo skripja stadi blong yumi, o blong wok strong moa long Kam Folem Mi—Blong Wanwan Man, Woman mo Famli?
?Yumi lukaotgud long tempol wosip blong yumi, mo yumi lukaotgud wetem fri tingting blong yumi, blong laef folem ol kavenan we yumi bin mekem long baptaes mo insaed long tempol? ?Yumi lukaotgud long wei we yumi luk mo stap dresap gud, speseli long ol tabu ples mo ol tabu situesen? ?Yumi lukaotgud long wei we yumi werem ol tabu tempol klos? ?O, ol stael blong wol ia oli talem hao blong yumi lukaot wanwan taem long fasin blong yumi?
?Yumi lukaotgud long wei we yumi givhan long ol narawan, mo long wei we yumi mekem ol koling blong yumi insaed long Jos, o yumi no wantem save, o lukaot wanwan taem nomo long koling blong mekem wok?
?Yumi lukaotgud o lukaot wanwan taem long wanem yumi stap ridim mo wajem long TV mo long ol mobael tul blong yumi? ?Yumi lukaotgud long fasin blong toktok blong yumi? ?O samtaem yumi akseptem wanwan taem tok we i strong mo i doti?
Buklet ia, Blong Ol Yut Oli Kam Strong i tekem ol standet we, taem oli folem gud, i tekem ol rij blesing we oli save helpem yumi blong stap long rod blong kavenan. Nomata oli raetem blong gud blong ol yut, ol standet blong hem i no finis taem yumi aot long ol program blong ol Yang Man mo Yang Woman. Oli blong wanwan long yumi, evri taem. Sapos yu luklukbak long ol standet ia, i save soem ol nara wei we yumi save lukaotgud moa long wei blong yumi stap laef folem gospel.
Yumi no stap daonem ol standet blong yumi blong i fit o blong mekem wan narawan i harem gud. Yumi ol disaepol blong Jisas Kraes, mo from hemia, yumi stap blong leftemap ol narawan, leftemap olgeta i go long wan moa hae mo tabu ples we bae, olgeta tu, oli save karem ol moa hae blesing.
Mi stap invaetem wanwan long yumi blong lukaotem Tabu Spirit blong i lidim yumi blong save wanem yumi nid blong jenisim long laef blong yumi blong lukaotgud moa blong stretem yumi wetem ol kavenan blong yumi. Mi plis tu long yufala, blong no poenem fingga long ol narawan we oli stap long semfala rod. “Jajmen i blong mi, Lod i talem.” Yumi wanwan i stap long rod blong stap gro mo jenis.
Stori we oli tokbaot insaed long Buk blong Momon, abaot Ol Man blong Amlisae we oli mekem apostasi, i pulum intres blong mi. Olsem wan wei blong talem long ol narawan se oli nomo joenem Jisas Kraes mo Jos blong Hem, oli putum wan red mak long fored blong hed blong olgeta, blong evri man i luk. Long oposit wei, mo olsem ol disaepol blong Jisas Kraes, ?olsem wanem nao yumi stap makem yumiwan? ?Ol narawan bae oli save luk pikja blong Hem long fes blong yumi mo save huia yumi stap ripresentem tru long wei we yumi lukaotgud blong lidim laef blong yumi?
From se yumi wan kavenan pipol, yumi no blong miks wetem haf blong wol. Oli bin singaotem yumi wan spesel pipol—!hemia i gud tumas! Taem we ol fos blong wol oli stap akseptem ivel ia moa, yumi mas traehad wetem strong tingting blong stap strong long rod ia we i lidim yumi sef i go long Sevya, blong mekem se, spes bitwin kavenan laef blong yumi mo ol fos blong wol, i go bigwan moa.
Taem mi tingting long wei blong kasem hapines we i stap longtaem, mi luksave se, samtaem, yumi stap long grei ples. Ol klaod blong tudak oli stap, yumi no save ronwe long ol taem yumi stap wokbaot folem kavenan rod ia. Temtesen mo fasin blong lukaot wanwan taem i mekem se bae yumi jenisim rod blong yumi, yumi go long tudak blong wol mo longwe long kavenan rod. Blong ol taem we maet samting ia i hapen, profet blong yumi, Presiden Russel M. Nelson, i askem strong long yumi blong kambak long kavenan rod, mo mekem hemia kwiktaem. Mi talem tangkyu from presen ia we i fasin blong sakem sin mo paoa blong Atonmen blong Sevya.
I no posibol blong laef long wan laef we i stret evriwan. I gat wan man nomo we i bin save laef stret evriwan taem Hem i stap long telestial planet ia. Hem i Jisas Kraes. Nomata yumi no stret evriwan, ol brata mo sista, yumi save kam klin inaf: klin inaf blong tekem mo kakae sakramen, klin inaf blong kasem ol tempol blesing, mo klin inaf blong kasem revelesen blong yumiwan.
King Benjamin i bin testifae abaot ol blesing mo hapines we i kam long olgeta we oli lukaotgud blong folem Sevya: “Mo antap long samting ia, mi wantem se yufala i tingbaot gudfala mo hapi ples blong olgeta we oli obei ol komanmen blong God. From luk, Lod i blesem olgeta long evri samting, ol samting blong laef ia tugeta wetem blong spirit; mo sapos oli fetful kasem en, bae oli go insaed long heven, blong mekem se oli save stap wetem God long wan ples blong hapi we i neva gat en.”
?Oli save pem hapines long 1500 vatu? No, nogat. Hapines we i strong mo i stastap, i kam taem yumi minim mo lukaotgud blong stap laef folem gospel blong Jisas Kraes. Long nem blong Jisas Kraes, amen.